neke’xq’alu rib’ li ixq

24 septiembre

Chan ru tintaaqe lix b’aanuhom li Kolonel sa’ xtenq’ankileb’ li neke’raj ru xtenq’?

2 Korintios 8–13

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Jolomil K’anjenel Hu, 10.2, 11.2). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajom ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?

• Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?

• Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

K’a’ru naru nakab’aanu laa’at ut eb’ li saaj li nakatzol re k’anjelak chiruheb’ li wankeb’ sa’ rajom ru? Naq jwal ra wankeb’ laj santil paab’anel sa’ Jerusalen ut neke’raj ru xtenq’, laj Pablo kixtaqla jun hu reheb’ laj Korinto re xwaklesinkileb’ xch’ool chi k’ehok chi anchal ch’oolej, “ink’a’ chi kab’ rix xch’ool chi moko chi minb’ilaq ru, xb’aan naq li Dios naxra li nasihok chi sa sa’ xch’ool.” A’an kixye naq wi te’xb’aanu, li Dios “wank xwankil chixnujob’resinkileb’ rik’in chixjunil li rusilal” re naq “te’ruuq ajwi’ chixb’aanunkil chixjunil li chaab’il k’anjel” (2 Korintios 9:7–8).

Laj Pablo kixjayaliheb’ ajwi’ rik’in li Jesukristo, li “b’ihom naq kiwan chaq, ut kineb’a’o’k sa’ eek’ab’a’ re naq texb’ihomo’q rik’in lix neb’a’il” (2 Korintios 8:9). Li Kolonel kiwan rajom chixmayejankil lix b’ihomal li choxa re naq taaruuq chi k’anjelak chiqu ut chixk’eeb’al qe li junelikil b’ihomal. K’oxlaheb’ li seraq’ re xyu’am li Jesus naq kik’anjelak chiruheb’ li ras riitz’in. Rochb’een rilb’al 2 Korintios 8–9 naq nakakawresi li tzolok, naru taawil li raatin li Hermana Michelle D. Craig, “Xnaq’ uhej re ilok” (Jolomil ch’utub’aj-ib’ re octubre 2020).

Tzolok sa’ komonil

Re xtikib’ankil li tzolok, patz’ reheb’ li saaj naq te’xye k’a’ut naq jun kristiaan maare ink’a’ taaraj raj k’anjelak chiru li ani wan sa’ rajom ru. K’a’ru naqatzol sa’ li raatin laj Pablo sa’ 2 Korintios 8:9; 9:7–8 li nokoreek’asi chi k’anjelak mas chiruheb’ li ani wankeb’ sa’ rajom ru? Naru xb’aanunkil li na’leb’ a’in re xtenq’ankileb’ li saaj chixtawb’al ru chan ru te’kanjelaq chiruheb’ li ras riitz’in.

• Sa’eb’ li loq’laj hu, li Qaawa’ kixk’ut k’iila sut chan ru nareek’a chirix xtenq’ankileb’ li neb’a’ ut li wankeb’ sa’ rajom ru. Wan resil junjunq reheb’ a’an sa’ “Xkomon chik li tenq’.” Re xtz’ilb’aleb’ rix lix k’utum, naru taak’eheb’ li saaj chirilb’aleb’ li raqal sa’ ka’kab’il. Patz’ reheb’ naq te’xye k’a’ru neke’xye li raqal a’an chirix xtenq’ankileb’ li neb’a’ ut li wankeb’ sa’ rajom ru. K’a’ut naq aajel ru xtenq’ankileb’ li neb’a’ ut li wankeb’ sa’ rajom ru choq’ re li qaChoxahil Yuwa’ ut li Jesukristo? Patz’ reheb’ li saaj naq te’xk’uub’ chan ru te’ruuq chixtenq’ankileb’ li wankeb’ sa’ rajom ru.

• Wan naq nalaatz’o’ li qayu’am, ut nasach sa’ qach’ool xk’eeb’al reetal li rajomeb’ li qas qiitz’in. Sa’ “Xnaq’ uhej re ilok,” li Hermana Michelle D. Craig kixtz’il rix li seraq’ naq li Dios kixte xnaq’ ru jun saaj winq (chi’ilmanq 2 Reyes 6:15–17). K’a’ru naqatzol sa’ li seraq’ a’in? K’a’ru naru naqatzol sa’ xkomoneb’ chik li seraq’ kixwotz chirix xk’eeb’al reetal li rajomeb’ li qas qiitz’in ut xtenq’ankileb’? (chi’ilmanq ajwi’ li video “Oren para tener ojos para ver como Él lo hace” sa’ ChurchofJesusChrist.org). Eb’ li saaj naru ajwi’ te’xseraq’i naq jun kristiaan xk’e reetaleb’ li rajom a’an ut xk’anjelak chiruheb’. Jo’q’e xqak’e reetal li rajomeb’ li qas qiitz’in ut xook’anjelak chiruheb’? K’a’ru naqeek’a naq ani nak’anjelak chiqu malaj naq laa’o nokok’anjelak chiru jalan?

• Ma neke’xtaw ru li saaj chan ru te’xb’aanu li teneb’anb’ileb’ wi’ sa’ xtenq’ankileb’ li wankeb’ sa’ rajom ru? Naru teetz’il rix Mosiah 4:16–21 ut 18:8–10, jo’eb’ ajwi’ li raqal chirix a’in sa’ li Jolomil K’anjenel Hu (10.2.2 choq’ reheb’ li molam re li Tijonelil re Aaron malaj 11.2.2 choq’ reheb’ li saaj ixq). K’a’ru eek’asinb’ilo chixb’aanunkil xb’aan li na’leb’ xqatzol arin? Naru teek’uub’ chan ru texk’anjelaq sa’ komonil re xtenq’ankileb’ li wankeb’ rajom ru sa’ lee tzoleb’aal, molam, teep, malaj tenamit. Ebʼ li video saʼ “Xkomon chik li tenq’ ” naru teʼxkʼe eenaʼlebʼ. Re rilb’al li k’anjel naru teeb’aanu sa’ lee na’aj, chi’ilmanq JustServe.org.

saaj ixq yoo chi k’anjelak

Wi took’anjelaq jo’ li Kristo, naru taqosob’tesi lix yu’ameb’ li qas qiitz’in.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Mateo 25:31–45; Santiago 1:27; Mosiah 2:17; Alma 34:27–28; Mormon 8:35–39; Tzol’leb’ ut Sumwank 104:14–18 (Aajel ru xtenq’ankileb’ li neb’a’ ut li wankeb’ sa’ rajom ru)

• Jeffrey R. Holland, “Ma maawa’o tab’i’ aj lemoox chiqajunilo?,” Jolomil ch’utub’aj-ib’ re octubre 2014

Li k’utuk jo’ li Kolonel

Eb’ li loq’laj hu ut li raatineb’ li profeet ut apostol sa’ roso’jikeb’ li kutan a’aneb’ xyo’leb’aal li yaal nakak’ut. Sa’ chixjunil hoonal, waklesi xch’ooleb’ li ani tzolb’ileb’ aab’aan chixsutq’isinkil rib’ rik’in li raatin li Dios re xk’ulb’al xb’eresinkileb’, xsumenkil lix patz’omeb’, ut xtenq’ankileb’.