“8 octubre. Chan ru naq lix evangelio li Jesukristo naru nikinixtenq’a chixkawob’resinkil lin junkab’al? Efesios,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023 (2022)
“8 octubre. Chan ru naq lix evangelio li Jesukristo naru nikinixtenq’a chixkawob’resinkil lin junkab’al?,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li tzol’leb’ choq’ re 2023
8 octubre
Chan ru naq lix evangelio li Jesukristo naru nikinixtenq’a chixkawob’resinkil lin junkab’al?
Efesios
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li tzoleb’aal malaj molam; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Rochb’een li aatinak chirix li na’ajman sa’ lee tzoleb’aal malaj molam, naru tex’aatinaq chirix li xeril ut xerab’i sa’ li jolomil ch’utub’aj-ib’. Naru roksinkileb’ li patz’om a’in.
-
Ma wankeb’ li na’leb’ malaj esil li xe’xtoch’ qach’ool? K’a’ru xnimob’resi li qapaab’aal chirix li Jesukristo?
-
K’a’ru xnimob’resi lix nawom qach’ool chirixeb’ li yo’yookil profeet? K’a’ru nokomusiq’aak chixb’aanunkil xb’aan li k’a’ru xqatzol malaj xqeek’a?
-
Ma wan k’a’ruhaq tento taqab’aanu sa’ komonil re xjultikankil ut xb’aanunkil li xqab’i sa’ li jolomil ch’utub’aj-ib?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutb’al li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Wankeb’ li saaj li kaweb’ ut aj rahoneleb’ lix junkab’al, ut neke’ch’olaniik xpaab’aaleb’ ut xmusiq’ejileb’ aran. Wankeb’ chik li maare xjuneseb’ rib’ neke’xyu’ami li evangelio, ut maare wan li wech’ok-ib’ ut li rahilal sa’ rochocheb’. A’b’an maajun reheb’ tz’aqal re ru xjunkab’al, ut wan xch’a’ajkilal chixjunileb’. Ut chixjunileb’ naru ajwi’ te’roksi xwankil li Jesukristo, li naru tixk’irtesi ut tixkawob’resi li junkab’al.
Li Kolonel naraj rosob’tesinkil li junkab’al. Wan naq narosob’tesi rik’in xrahom ut xb’aanuhom jun li saaj li naxyal xq’e chixtaaqenkil a’an ut chixyu’aminkil lix evangelio. Naq nakakawresi aawib’ re xtzolb’aleb’ li saaj chirix li wankilal naraj xk’eeb’al li Jesukristo reheb’ a’an ut lix junkab’aleb’, k’oxla li na’leb’ sa’ li hu Efesios li naru tooxtenq’a chixkawob’resinkil li qajunkab’al. Naru ajwi’ taawil “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org).
Tzolok sa’ komonil
Chirix xk’eeb’al xhoonaleb’ li saaj chixwotzb’al li na’leb’ kixk’ut li Musiq’ej chiruheb’ chiru li xamaan a’in naq xe’ril li hu Efesios, sik’ chan ru taatikib’ xwotzb’al chan ru naq li Jesukristo naru tooxtenq’a chixkawob’resinkil li qajunkab’al. Maare taapatz’ reheb’ li saaj naq te’xtaweb’ ut te’xwotzeb’ li raqal sa’ Efesios li neke’aatinak chirix li na’leb’ nokoxtenq’a chixkawob’resinkil li qajunkab’al. Junjunq reheb’ li raqal a’an Efesios 2:19–22; 3:14–19; 4:1–3, 25–26, 29–32; 5:1–2; 6:1–4. Chan ru naq li na’leb’ sa’eb’ li raqal a’in naru narosob’tesi li junkab’al? Chan ru naq li Kolonel ut lix evangelio narosob’tesi li qochoch? Arin wan junjunq chik li na’leb’ naru taab’aanu.
-
Wi taawaj aatinak chirix li taqlahom “chawoxloq’i laa na’ laa yuwa’ ” (Efesios 6:2), naru taatikib’ rik’in xpatz’b’al reheb’ li saaj k’a’ru naraj naxye li aatin oxloq’ink choq’ reheb’. Maare jun reheb’ naru tixwotz li naxye jun xtusulal aatin malaj li K’utul Raqal reheb’ li Loq’laj Hu. Patz’ reheb’ li saaj naq te’xye chan raj ru te’xyu’ami li taqlahom a’an sa’ xyu’ameb’. Naru naq us ajwi’ xk’eeb’al reetal chan ru naq li Jesukristo kiroxloq’i lix Yuwa’ sa’ Choxa ut li xMaria, lix na’ (chi’ilmanq, jo’ eetalil, Lukas 2:41–52; Jwan 8:29; 19:25–27). K’a’ru naru naqatzol rik’in xb’aanuhom li Jesus li naru naxkawob’resi li qawanjik rik’in li qana’ qayuwa’?
-
Maare us xch’olob’ankil k’a’ru na’ajman re xyiib’ankil jun kawil kab’l. K’a’ru na’ajman re xyiib’ankil jun kawil junkab’al? Sa’ li aatinak a’in, naru taawotz li aatin kixye li Elder L. Whitney Clayton: “Li aajel ru, a’an chan ru wankeb’ li raam li wankeb’ chi sa’, moko a’an ta chan ru rilb’al li ochoch” (“Eb’ li tz’aqal chaab’il ochoch,” Jolomil ch’utub’aj-ib’ re abril 2020). Naru ajwi’ tex’aatinaq chirix li kaahib’ chi na’leb’ kixye li Elder Clayton chirix xyiib’ankileb’ “li tz’aqal chaab’il ochoch.”
-
“Li Junkab’al: Jun Jek’inb’il Aatin choq’ re li Ruchich’och’ ” naxye a’in: “Li sahil ch’oolejil sa’ li junkab’al, k’a’jo’ wi’chik naq taatawmanq naq k’ojob’anb’il sa’ xb’een li na’leb’ k’utb’il xb’aan li Qaawa’ Jesukristo.” Chan ru naq lix k’utum li Kolonel naxk’e xk’ojleb’aal li junkab’al sa xch’ool? Li jek’inb’il aatin choq’ re li junkab’al ut eb’ li raqal re li loq’laj hu sa’ “Xkomon chik li tenq’ ” neke’xye chan ru. Chan ru naq eb’ li komon sa’ li junkab’al naru te’xtenq’a rib’ chirib’ileb’ rib’ chixyu’aminkil li na’leb’ a’an?
-
Eb’ li saaj naru te’ril li video “Por cosas pequeñas,” b’ar wi’ neke’aatinak oxib’ li as iitz’inb’ej chirix xk’ulub’ankil xb’oqom li obiisp naq te’xk’oxla chan ru xsantob’resinkil li rochocheb’. Chan ru naq x’osob’tesiman li junkab’al sa’ li video rik’in xb’aanuhomeb’ li saaj a’an? K’a’ru naru tixk’e xsantilal li ochoch? Naru taab’oqeb’ li saaj chixk’ulub’ankil lix b’oqom li obiisp a’an sa’ xyu’ameb’. Re xtenq’ankileb’ chixnawb’al k’a’ raj ru te’xb’aanu, naru teetz’il rix li patz’om sa’ li video: “K’a’ru li taawanq aach’ool chixb’aanunkil re naq taawanq li Musiq’ej sa’ laa wochoch?”
Lix na’leb’ li Jesukristo a’an xk’ojleb’aal li sahil ch’oolejil choq’ re li junkab’al.
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Mateo 5:21–24, 38–42; 6:14; 7:1–5; 22:36–39; 3 Nefi 18:21; Moroni 7:33; Tzol’leb’ ut Sumwank 18:10–13
-
Henry B. Eyring, “Jun ochoch b’ar wi’ nawan lix Musiq’ li Qaawa’,” Jolomil ch’utub’aj-ib’ re abril 2019
-
“Naq nawan rahok,” “Li ochoch chanchan choxa,” Eb’ li B’ich, 190, 191
Li k’utuk jo’ li Kolonel
Wi eb’ li saaj neke’reek’a naq nakawil xchaab’ilaleb’, taanimanq lix kawilal xch’ooleb’ chirix lix choxahil eechanihom, ut taasachq aach’ool rik’in li k’a’ru neke’ru chixb’aanunkil. Tenq’aheb’ chirilb’al li k’a’ru naxnaw li qaChoxahil Yuwa’ chirix b’ar naru te’wulaq.