Usilanb’ilin xb’aan li Qaawa’ chiru chixjunil lin kutan
Chan ru naqak’ul li qach’a’ajkilal? Ma nokob’antioxin xb’aan naq wan tz’aqal li qilob’aal sa’eb’ li qosob’tesinkil ut ink’a’ sa’eb’ li qach’a’ajkilal?
Li yajel COVID-19 a’an jun reheb’ li naab’al chi yale’k neke’xnumsi li ralal xk’ajoleb’ li Dios chalen chaq sa’ xtiklajik li ruchich’och’. Sa’ xtiklajik li chihab’ a’in, lin junkab’al ut laa’in xqanumsi naab’al li kutan jwal ch’a’aj. Li yajel ut xkomon chik li rahilal xe’xk’am chaq li kamk ut rahilal sa’ li qajunkab’al xb’aan naq xe’kam qakomon. Us ta li b’ane’k, li kuyuk sa’, ut li tijok, chiru oob’ xamaan li wiitz’in, aj Charly, li wanab’, xSusy, ut li rixaqil li was, aj Jimmy, xe’nume’ junpak’al li tz’apleb’ t’ikr.
Wan hoonal ninpatz’ wib’ k’a’ut naq li Kolonel kiyaab’ak naq kiril chi ra xch’ool li xMaria xb’aan xkamik laj Lazaro, li riitz’in, us ta naxnaw naq wan xwankilal re xwaklesinkil laj Lazaro, ut naq li Kolonel ok re chiroksinkil li wankilal a’an re risinkil chaq li ramiiw sa’ li kamk.1 Nasach inch’ool rilb’al chan ru naq li Kolonel kixtoq’ob’a ru li xMaria; kixwotz li nimla rahilal yoo chixk’ulb’al xb’aan lix kamik laj Lazaro, li riitz’in.
Kiqeek’a ajwi’ li nimla rahilal a’an naq xoohe’xkanab’ li qakomon. Li Kolonel naruxtaana qu chi tz’aqal. A’an ink’a’ nokoxtz’eqtaana xb’aan li qamutz’il, chi moko naq ink’a’ naqak’anjela rix li qab’e chi junelik. A’an b’an wan ruxtaan choq’ qe rik’in xrahil qach’ool ut qarahilal.
Li qaChoxahil Yuwa’ ut li Jesukristo, li Ralal, neke’raj naq wanq xsahil qach’ool.2 Li Awa’b’ej Russell M. Nelson kixye: “Lix sahil li qach’ool ink’a’ nayo’la sa’ li k’a’ru naqak’ul. Nayo’la b’an sa’ li k’a’ru naqataaqe. Naq naqataaqe lix k’uub’anb’il na’leb’ li kolb’a-ib’ re li Dios, … naru naqeek’a xsahil qach’ool, maak’a’ naxye k’a’ru li nak’ulman—malaj li ink’a’ nak’ulman—sa’ li qayu’am.”3
Naq laa’in chaq jun li saaj misioneer, nanaq sa’ inch’ool jun li misioneer li jwal kiwoxloq’i kixk’ul jun li rahil esil. Lix na’ ut li riitz’in ke’kam sa’ jun li nimla toch’e’k. Li awa’b’ej re li mision kixye re li misioneer naq naru taaxik chixmuqb’aleb’. A’b’anan, chirix naq ki’aatinak sa’ telefono rik’in lix yuwa’, li misioneer a’in kixsik’ ru kanaak toj sa’ xraqik lix mision.
Moqon, naq yooko chi k’anjelak sa’ jun li na’ajej, li wochb’een ut laa’in xqak’ul jun li b’oqok; eb’ laj elq’ ke’xmaq’ lix b’aqlaq ch’iich’ li misioneer a’in ut ke’xrahob’tesi rik’in jun yok’leb’ ch’iich’. A’an ut li rochb’een ke’b’eek re xtawb’al li b’anleb’aal wan chi nach’, li wochb’een ut laa’in kiqataweb’ aran. Naq yooko chi xik sa’ li b’anleb’aal, kiraho’ inch’ool chirix li misioneer. Kink’oxla naq ink’a’ chik sa sa’ xch’ool ut rik’in li kik’ulman, taaraj sutq’iik sa’ li rochoch.
Naq koowulak sa’ li b’anleb’aal, kiwil li misioneer sa’ li ch’aat, yoo chiroyb’eninkil naq taak’ame’q chi cho’e’k—a’ut se’se’ ru. Kink’oxla, “Chan ru naq yoo chi se’ek sa’ jun li hoonal jo’ a’in?” Naq yoo chi k’iraak sa’ li b’anleb’aal, rik’in xsahil xch’ool kixsi li kok’ hu ut lix Hu laj Mormon reheb’ laj b’anonel ut reheb’ li yaj. Us ta rik’in li yale’k a’in, ink’a’ kiraj sutq’iik sa’ li rochoch. A’an b’an kik’anjelak sa’ lix mision toj sa’ roso’jik rik’in xpaab’aal, xkawilal, xmetz’ew, ut xsahil xch’ool.
Sa’ xtiklajik lix Hu laj Mormon, laj Nefi naxye, “Rik’in naq wilom k’iila ch’a’ajkilal chiru xb’ehil lin kutan, a’ut k’ajo’ ajwi’ naq usilanb’ilin xb’aan li Qaawa’ chiru chixjunil lin kutan.”4
Nink’oxlak chirix chixjunil li rahilal kixk’ul laj Nefi, naab’al reheb’ a’an neke’tawman sa’ lix tz’iib’ahom. Li yale’k kixk’ul naxk’ut chiqu naq chiqajunilo nokonume’ sa’ li q’ojyinal hoonal. Jun reheb’ li yale’k a’an naq kitaqlaak laj Nefi chi sutq’iik aran Jerusalen re tixxok chaq li perel ch’iich’ bronce li wan rik’in laj Laban. Eb’ li ras laj Nefi maak’a’eb’ lix paab’aal, ut ke’xsak’ rik’in li b’arb’ookil ch’iich’. Laj Nefi kixnumsi jun chik li yale’k naq kitoqe’ li roq lix tzimaj ut ink’a’ kiru chixtawb’al li tzakemq choq’ re lix junkab’al. Chirix a’an, naq kitaqlaak laj Nefi chixyiib’ankil li jukub’, eb’ li ras ke’xse’e ut ink’a’ ke’raj xtenq’ankil. Us ta kiyale’ rix chiru lix yu’am, laj Nefi rajlal kixk’e reetal lix chaab’ilal li Dios.
Naq lix junkab’al yoo chi nume’k chiru li palaw re xik sa’ li yeechi’inb’il ch’och’, junjunqeb’ lix komon laj Nefi “ke’ok chixsahob’resinkileb’ xch’ool,” ke’ok chi aatinak chi k’a’jo’ xyib’al ru li raatineb’, ut ke’sach sa’ xch’ool naq a’ lix wankilal li Qaawa’ kikolok chaq reheb’. Naq ke’q’use’ xb’aan laj Nefi, ke’josq’o’ ut kexb’ak’ chi k’aam re naq ink’a’ taaruuq chi eek’ank. Lix Hu laj Mormon naxye naq “k’a’jo’ li rahilal ke’xb’aanu re”; li xkux ruq’ ut li xkux roq “siipo’jenaq chi numtajenaq, ut maak’a’jo’ xrahil.”5 Laj Nefi kiraho’ xch’ool xb’aan lix kawileb’ li raameb’ li ras ut wan hoonal kilukta ut kitawa.6 “Aʼbʼanan,” chan, “laaʼin kinʼilok wan wiʼ lin Dios, ut kinnima ru chiru chixjunil li kutan, ut inkʼaʼ kinwechʼi rix li Qaawaʼ xbʼaan li chʼaʼajkilal kinkʼul.”7
Ex was wiitz’in, chan ru neke’qak’ulub’a li qach’a’ajkilal? Ma nokowech’ok rik’in li Qaawa’ xb’aan a’an? Malaj, jo’ laj Nefi ut li wamiiw misioneer, nokob’antioxin rik’in aatin, k’a’uxl, ut b’aanuhom xb’aan naq wan tz’aqal li qilob’aal sa’eb’ li qosob’tesinkil ut ink’a’ sa’eb’ li qach’a’ajkilal?
Li qaKolonel, Jesukristo, kixk’e li eetalil rik’in lix k’anjel sa’ ruchich’och’. Sa’ xyi li ch’a’ajkilal ut li yale’k, maak’a’ chik wan li naxk’e xnimal li qatuqtuukilal ut xsahil qach’ool chiru xtenq’ankileb’ li qas qiitz’in. Sa’ lix hu laj Mateo nayeeman resil li kik’ulman naq li Kolonel kirab’i resil naq li rech alal, laj Jwan aj Kub’sihom Ha’, kich’ote’ xjolom xb’aan li rey aj Herodes re xsahob’resinkil lix rab’in laj Herodias:
“Ke’wulak eb’ lix tzolom laj Jwan, ke’xxok li kamenaq, koxe’xmuq ut koxe’xye resil re li Jesus.
“Naq li Jesus kirab’i a’in, ki’el aran sa’ jukub’ ut xkoho sa’ jun junesal na’ajej najt rik’in chixjunileb’. Ka’ajwi’ ke’rab’i a’in eb’ li tenamit, ke’xtaaqe chi roqeb’ chalen chaq sa’ lix tenamiteb’.
“Naq li Jesus ki’el chaq sa’ li jukub’, kiril naab’aleb’ li tenamit, kixtoq’ob’a ruheb’ ut kixk’irtesiheb’ li yaj wankeb’ sa’ xyanqeb’.
“Naq ki’ewuuk, eb’ lix tzolom ke’jilok chixk’atq chixyeeb’al re—Li na’ajej a’in wank xjunes, ut ak xkoho li kutan. Chaq’rab’iheb’ li tenamit re naq toxe’xloq’ chaq xwaheb’ sa’eb’ li k’aleb’aal.
“A’b’an li Jesus kixsumeheb’ ut kixye: Moko tojo’ ta sa naq te’xik; k’ehomaqeb’ b’an chi wa’ak laa’ex.”8
Li Jesukristo kixk’ut chiqu naq sa’ li yale’k ut sa’ li ch’a’ajkilal naru naqil lix ch’a’ajkilaleb’ li qas qiitz’in. Rik’in li toq’ob’ank-u, naru naqak’e li quq’ re xwaklesinkileb’. Ut naq naqab’aanu a’in, naxwaklesi li qak’anjel jo’ aj paab’anel. Li Awa’b’ej Gordon B. Hinckley kixye: “Lix b’anol li k’a’uxlej a’an li k’anjelak. Lix b’anol li oso’jenaq ch’oolej a’an li k’anjelak. Lix k’irtesinkil li lub’k a’an li yale’k re xtenq’ankil li ani jwal tawajenaq wi’chik.”9
Sa’ lix Iglees li Jesukristo, xwan naab’al inhoonal re k’utuk ut re xtenq’ankil li was wiitz’in. Sa’eb’ li hoonal a’an naweek’a naq li qaChoxahil Yuwa’ naxseeb’ob’resi li wiiq. Li Awa’b’ej Russel M. Nelson a’an xprofeet li Dios sa’ li ruchich’och’; a’an jun nimla eetalil re chan ru taqileb’ li qas qiitz’in sa’ xhoonalil li yale’k. Ninwotz lin nawom jo’eb’ naab’al reheb’ laj santil paab’anel, naq li Dios a’an li qaChoxahil Yuwa’. Week’ahom lix rahom maak’a’ roso’jik sa’eb’ li kutan moymoy choq’ we. Li qaKolonel, Jesukristo, naxtaw ru li qarahilal ut li qach’a’ajkilal. A’an naraj qatenq’ankil rik’in li qiiq ut xk’ojob’ankil qach’ool. Tento taqab’aanu li kixk’ut naq took’anjelaq ut taqileb’ li jwal aaleb’ wi’chik li riiq chiru li qe laa’o. Sa’ xk’ab’a’ li Jesukristo, amen.