Taqsihomaq lee saqen
Moko ch’a’aj ta inb’oqom anajwan: wotzomaq li evangelio. Chek’ut anihex ut chetaqsi li saqen.
Yookin chi xik Peru junjunq chihab’ chaq, chunchuukin chixk’atq jun li winq li kixye naq maak’a’ xpaab’aal. A’an kixpatz’ we k’a’ut naq ninpaab’ li Dios. Naq yooko chi aatinak, kinye re naq ninpaab’ naq wan li Dios xb’aan naq laj Jose Smith kiril—ut kinye re naq lin nawom chirix li Dios nachal ajwi’ rik’in li musiq’ejil na’leb’ xinnumsi injunes wib’. Kinwotz inpaab’ahom naq “chixjunil li k’a’aq re ru naxk’ut naq wan jun li Dios,”1 ut kinpatz’ re k’a’ru naxpaab’ chirix lix yo’ob’tesinkil li ruchich’och’ a’in li nujenaq rik’in li k’a’ru yo’yo. Kixye we naq maare kik’ulman a’in “yal chi jo’kan” chiru xq’ehil k’iila millon chihab’. Kinch’olob’ re naq jwal ch’a’aj raj naq taayo’ob’tesiiq chixjunil a’in chi tz’aqal ch’ina-us ut tustu “yal chi jo’kan.” Ch’anch’o kikana chiru jun k’amok, toja’ naq kixye, “Yaal b’i’ a’an.” Kinpatz’ re ma taaraj rilb’al ru lix Hu laj Mormon. Kixye naq taaril, jo’kan naq kintaqla jun hu re.
Moqon sa’ inyu’am, kintaw jun ak’ wamiiw sa’ li aeropuerto re Lagos, Nigeria. Kiqanaw qib’ naq yoo chirilb’al lin pasaporte. Kinpatz’ re k’a’ru naxpaab’, ut xye naq naxpaab’ li Dios. Kinwotz xsahilal ut xchaab’ilal lix evangelio li Jesukristo li k’ojob’anb’il wi’chik, ut kinpatz’ re ma naraj xtzolb’al xkomon chik rik’ineb’ li misioneer. Us chan, kitzolok, ut moqon kikub’e xha’. Jun malaj wiib’ chihab’ chirix a’an, naq yookin chi nume’k sa’ li aeropuerto re Liberia, xwab’i jun xyaab’ kuxej li kixpatz’ ink’ab’a’. Kinsutq’isi wib’, ut kiwil chi nach’ok li saaj winq a’an, tz’aqal se’se’ ru. Kiqaq’alu qib’ ut a’an kixseraq’i we naq yoo chi wulak sa’ li Iglees, ut rochb’eeneb’ li misioneer, yoo chixk’utb’al li evangelio chiru lix mukuy.
Anajwan ut, ink’a’ ninnaw ma kiril lix Hu laj Mormon malaj ma ki’ok sa’ li Iglees li winq maak’a’ xpaab’aal. Li xkab’ wamiiw kixb’aanu. Rik’in xkab’ichaleb’, juntaq’eet lin teneb’ankil2 malaj li wosob’tesinkil: xtaqsinkil lix saqenkil li evangelio—rahok, wotzok, ut b’oqok chi maak’a’ li xutaan ut xiw.3
Ex was wiitz’in, ak xin’osob’tesiik xb’aan xwotzb’al li evangelio, ut ch’ina-us chaq a’an. Wahe’ junjunq reheb’:
Xwotzb’al li evangelio naxk’e sahil ch’oolejil ut yo’onihom
Naqanaw naq koowan jo’ choxahil alalb’ej ut k’ajolb’ej rik’in li qaChoxahil Yuwa’ naq maji’ xoochal arin,4 ut naq kiyo’ob’tesiik li ruchich’och’ re naq chiqajunilo taqak’ul li qatib’el, taqataw qana’leb’, tootzoloq, ut took’iiq re tooruuq chixk’ulb’al li junelik yu’am—a’an lix yu’am li Dios.5 Li qaChoxahil Yuwa’ kixnaw naq taqak’ul rahilal ut toomaakob’q sa’ ruchich’och’, jo’kan naq kixtaqla li Ralal, ut xb’aan “lix yu’am li maak’a’ xjuntaq’eetankil”6 ut lix junelikil mayej aj tojol-ix,7 taaruuq taakuye’q qamaak, took’irtesiiq, ut taatz’aqob’resiiq qe qu.8
Li nawom a’in naxjal li qayu’am! Naq jun kristiaan naxtzol k’a’ru aj-e li yu’am a’in, naxtaw ru naq li Jesukristo naxkuy xmaakeb’ ut naxtenq’aheb’ li neke’taaqenk re, ut naxsik’ ru xtaaqenkil li Kristo toj sa’ xha’il li kub’iha’, nachaab’ilo’ xyu’am—us ta ink’a’ nachaab’ilo’ li k’a’ru nak’ulman sa’ xyu’am.
Jun komon ixq jwal sa xch’ool li xinnaw ru sa’ Onitsha, Nigeria kixye we naq chalen chaq naq kixtaw li evangelio ut kikub’e xha’ (ut a’in li kixye), “us chixjunil choq’ we. Sa inch’ool. Wankin sa’ choxa.”9 Xwotzb’al li evangelio naxloch xsahilal ut xyo’onihom li raam li nak’ehok jo’ ajwi’ li nak’uluk. Relik chi yaal, “k’a’jo’aq xnimal xsahil eech’ool”10 naq teewotz li evangelio! Xwotzb’al li evangelio, a’an li saho’k sa’ ch’oolej ut li yo’onink chi numtajenaq.11
Xwotzb’al li evangelio naxk’e lix wankil li Dios sa’ li qayu’am
Naq xkub’e qaha’, xoo’ok sa’ jun junelikil12 sumwank rik’in li Dios naq “took’anjelaq chiru, ut taqapaab’ lix taqlahom,”13 li naraj naxye naq “tooxaqliiq jo’ aj yehol nawom chirix a’an sa’ chixjunil hoonal, ut sa’ chixjunil li k’a’aq re ru, ut sa’ chixjunil li na’ajej.”14 Naq “nokokana rik’in” a’an sa’ xyu’aminkil li sumwank a’in, li wankilal re choxahilal li nokoxwaklesi ut nokoxsantobʼresi nak’ehe’ qe xb’aan li Kristo, jo’ chanru naq li ruq’ li che’ nach’olaniik xb’aan li toon che’.15
Xwotzbʼal li evangelio naxkol qix chiru li aaleek
Li Qaawaʼ kixtaqla:
“Taqsihomaq lee saqen re taaruuq taalemtz’unq chiru li ruchich’och’. K’ehomaq reetal, laa’in li saqen li teetaqsi—li kʼaʼaq re ru kineeril chixbʼaanunkil. …
“… Kintaqla naq … texchalq wikʼin, re texruuq chi chʼeʼok ut chi ilok; joʼkan ajwiʼ teebʼaanu re li ruchichʼochʼ; ut ani naqʼetok re li taqlahom aʼin naxkanabʼ ribʼ chi bʼeresiik saʼ li aaleek.”16
Naq naqasik’ ink’a’ xtaqsinkil xsaqenkil li evangelio noko’ok sa’ muhel, b’ar wi’ nokoroyb’eni li aaleek. Yaal ajwi’ lix junpak’alil: naq naqasik’ xtaqsinkil xsaqenkil li evangelio noko’ok sa’ li saqen, b’ar wi’ kawob’resinb’ilo chiru li aaleek. K’a’jo’aq xchaab’ilal li osobʼtesink aʼan saʼ li ruchichʼochʼ anajwan!
Xwotzb’al li evangelio nokoxkʼirtesi
Li Hermana Tiffany Myloan kixkʼulubʼa xbʼoqbʼal chixtenqʼankilebʼ li misioneer us ta wan xchʼaʼajkilal, ut naabʼal lix patzʼom chirix lix paabʼaal. Toje’ xye we naq xtenq’ankileb’ li misioneer kirak’ob’resi lix paab’aal ut xsahilal lix yu’am. A’an xye, “Li k’anjelak jo’ misioneer nokoxk’irtesi.17
Li sahil ch’oolejil. Li yo’onink. Lix wankil li Dios re qawaklesinkil. Li kole’k chiru li aaleek. Li k’irtesink. Chixjunil a’in—ut wan xkomon chik (jo’ lix kuyb’al li qamaak)18 nahoye’ sa’ qab’een xb’aan li choxa naq naqawotz li evangelio.
Anajwan, a’in li qanimla osob’esinkil
Ex was wiitz’in, “wankeb’ naab’al … sa’ xyanqeb’ chixjunil li ch’uut chi paab’aal, li molam, ut li raqal chi iglees, li … ramb’il li yaal chiruheb’ yal xb’aan naq ink’a’ neke’xnaw b’ar te’xtaw.”19 Jo’ maajun wa chalen chaq xtiklajik, jwal aajel ru sa’ li qakutankil xtaqsinkil li qasaqenkil. Jo’ maajun wa chalen chaq xtilajik, naru xtawb’al li yaal.
Laj Jimmy Ton, a’an chaq aj Budista, kitoch’e’ xch’ool xb’aan jun junkab’al li xe’xwotz resil xyu’ameb’ sa’ YouTube. Naq kixnaw naq a’aneb’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ki’ok chixtzolb’al li evangelio sa’ internet, chirilb’al ru lix Hu laj Mormon sa’ lix celular, ut kikub’e xha’ naq kixnaweb’ ru li misioneer naq wan sa’ li tzoleb’aal.20 Li Elder Ton nak’anjelak anajwan jo’ misioneer.
A’an ut li rech misioneeril, a’aneb’ lix teep li Qaawa’—jo’ naxye li qaprofeet.21 Eb’ li misioneer moko neke’xtaaqe ta xb’ehil li ruchich’och’: eb’ li tz’ilok-ix neke’xk’ut naq li saaj yookeb’ chixtz’eqtaanankil li Dios,22 a’b’an li qasaaj aj pleet23 elder ut hermana yookeb’ chixb’eresinkileb’ li kristiaan rik’in li Dios. Ut k’iheb’ chik li komon re li Iglees li yookeb’ chixjunajinkileb’ rib’ rik’ineb’ li misioneer re xwotzb’al li evangelio, ut xtenq’ankileb’ li kristiaan chi chalk rik’in li Kristo ut lix Iglees.
Eb’ li qakomon aj santil paab’anel sa’ Liberia ke’xtenq’a 507 chi kristiaan chi kub’eek xha’ chiru li lajeeb’ po naq maak’a’eb’ li misioneer sa’ xtenamiteb’. Naq jun awa’b’ej re oqech aran kirab’i naq maare te’sutq’iiq li misioneer, a’an kixye, “Us, truuq toohe’xtenq’a rik’in li qak’anjel laa’o.”
Yaal li kixye: li xch’utub’ankil Israel—li k’anjel k’a’jo’ xnimal xwankil sa’ ruchich’och’ a’in24—a’an li qak’anjel laa’o. Ut a’in li qakutankil laa’o! Moko ch’a’aj ta inb’oqom anajwan: wotzomaq li evangelio. Chek’ut anihex ut chetaqsi li saqen. Chetz’aama xtenq’ li choxa ut chetaaqe xhasb’ li musiq’ej. Chewotz eeyu’am; cheb’oq jun kristiaan chi chalk ut chi ilok, chi chalk ut chi tenq’ank, ut chi chalk ut chi tz’aqonk.25 Ut chisaho’q sa’ eech’ool naq eb’ lee raarookil komon ut laa’ex nekek’ul li yeechi’inb’il eere.
Ninnaw naq rik’in li Kristo jultikanb’il li chaab’il esil chiruheb’ li tuulaneb’ xch’ool; rik’in li Kristo lanb’ileb’ xtoch’olaleb’ li yot’b’ileb’ lix ch’ool; rik’in li Kristo yaab’asinb’il li ach’ab’aak chiruheb’ li preex; ut rik’in li Kristo, ka’ajwi’ rik’in li Kristo, ruuchil li cha hoyb’il li sununkil b’an sa’ xb’eeneb’ li neke’yaab’ak.26 Chi jo’kan naq aajel ru xyeeb’al resil a’in!27
Ninch’olob’ xyaalal naq li Jesukristo a’an aj yoob’anel ut aj choyonel re li qapaab’aal.28 A’an tixchoy, tixtz’aqob’resi ru, li qab’aanuhom—us ta maji’ tz’aqal re ru—naq naqataqsi xsaqenkil li evangelio. Tixk’anjelaheb’ li sachb’a-ch’oolej sa’ li qayu’am ut sa’ xyu’ameb’ chixjunil li ch’utub’anb’ileb’ xb’aan, xb’aan naq a’an jun Dios re sachb’a-ch’oolej.29 Sa’ xk’ab’a’ li Jesukristo, amen.