Li wank chi k’ulub’ej moko naraj ta naxye naq tz’aqal qe qu

Xbʼaan li Bradley R. Wilcox

Xkab’ aj tenq’ aj k’ehol na’leb’ sa’ li jolomil awa’b’ejil reheb’ li Saaj Winq

Naq nekek’oxla naq ak xexmaakob’k naab’al sut ut xexlub’ chixyalb’al eeq’e, chijultikoʼq eere naq lix tojbʼal rix li maak xbʼaan li Kristo ut li rusilal aʼan tixkʼe eewankilal chi xik chi uubʼej.

Jun sut kintaqla jun esil re lin rab’in ut lix b’eelom, b’ar wi’ lin celular xchap xyaab’ inkux ut kixjal ru chi tz’iib’. “Ma sa lee ch’ool? Nekexinra,” chankin reheb’. A’in li aatin ke’xk’ul, “Xik’ nekexwil. Nekexinra raj.” Wan naq naqaj xyeeb’al jun chaab’il aatin a’ut moko tawb’il ta ru chi jo’kan. Wan naq nak’ulman a’in rik’in li raatin li Dios chirix li jalb’a-k’a’uxlej ut li k’ulub’ejil.

Wankeb’ li neke’xk’oxla naq moko aajel ta ru li jalb’a-k’a’uxlej ut li jalaak. Li Dios naxye naq aajeleb’ ru.¹ A’b’anan, ma ink’a’ nokoxra li Dios us ta wan qamajelal? Nokoxra chi yaal. A’an tz’aqal nokoxra. Laa’in ninraheb’ li wimam, us ta wan xmajelaleb’, a’b’an toj nawaj naq te’k’iiq ut te’chaab’ilo’q. Li Dios nokoxra jo’ wanko anajwan, a’b’an q’axal nokoxra, jo’kan naq ink’a’ tooxkanab’ chi jo’ka’in.² Wanko arin re took’iiq rik’in li Qaawa’.³ Li Jesukristo kixtoj rix li qamaak re naq tooruuq chi jalaak. Li Kristo naru tooxwaklesi chi yo’yo, tooxsantob’resi, tixtuqub’ qach’ool, ut tooxk’irtesi, ut rik’in chixjunil a’an, naru tooxjal re toowulaq jo’ chanru a’an.⁴

Wankeb’ li neke’xk’oxla naq jun sut ajwi’ tento taqajal qak’a’uxl. Li raatin li Dios, jo’ kixye li Awa’b’ej Russell M. Nelson, a’an naq “Li jalb’a-k’a’uxlej … a’an jun k’anjel nab’aanuman.”⁵ Li jalb’a-k’a’uxlej naraj hoonal ut li yalok q’e,⁶ re xtz’eqtaanankil li maak⁷ ut re wank chi “maak’a’ chik li qajom re xb’aanunkil li maa’usilal; re b’an xb’aanunkil rajlal li chaab’ilal”⁸ chiru chixjunil li qayu’am.⁹

Li qayu’am a’an chanchan jun qab’eenik sa’ b’eleb’aal ch’iich’. Ink’a’ toowulaq b’ar wi taqaj rik’in yal jun tanque chi gasoliin. Tento naq naab’al sut naqanujob’resi li tanque. Li loq’laj wa’ak a’an chanchan li wulak sa’ li gasolinera. Naq naqajal qak’a’uxl ut naqa’ak’ob’resi li qasumwank, naqaye naq wanq qach’ool chixpaab’ankileb’ li taqlahom, ut li Dios ut li Kristo nokohe’rosob’tesi rik’in li Santil Musiq’ej.¹⁰ Naqayeechi’i naq tooxik chi uub’ej sa’ li qab’eenik, ut li Dios ut li Jesukristo neke’xyeechi’i xnujob’resinkil li qatanque.

Wankeb’ li neke’xk’oxla naq moko k’ulub’ejeb’ ta chixyu’aminkil li evangelio xb’aan naq toj wan xmajelaleb’. Li Dios naxye naq li wank chi k’ulub’ej moko naraj ta naxye naq tz’aqal qe qu.¹¹ Li k’ulub’ejil naraj b’an naxye naq naqayal qaq’e chi maak’a’ qab’alaq’. Tento naq maak’a’ qab’alaq’ chiru li Dios, laj jolominel sa’ li tijonelil, ut xkomoneb’ chik li nokohe’xra,¹² ut tento taqayal qaq’e chixpaab’ankileb’ lix taqlahom li Dios ut chi kuyuk us ta nokot’ane’ chi jo’q’ehaq.¹³ Li Elder Bruce C. Hafen kixye naq li wulak jo’ li Jesukristo “mas naxpatz’ li qakuyum ut naq tookuyuq chiru naq toowanq chi tz’aqal qe qu.”¹⁴ Li Qaawa’ kixye naq eb’ li maatan re li Santil Musiq’ej “k’eeb’ileb’ choq’ re xchaab’ilaleb’ li ani neke’rahok we ut neke’paab’ank re chixjunil lin taqlahom, ut li ani nasik’ok xb’aanunkil chi jo’kan.”¹⁵

Jun saaj winq kixtz’iib’a: “Naq saajin chaq yookin chirilb’al li pornografia. Xinxutaanak xb’aan naq moko us ta li yookin chixb’aanunkil.” Rajlal sut naq kimaakob’ li saaj winq a’in, q’axal kiraho’ xch’ool ut kixk’oxla naq maak’a’ xk’ulub’ejil re tixk’ul li usilal malaj xkuyb’al lix maak xb’aan li Dios. A’an kixye: “Xink’oxla naq junelik tento raj taaraho’q inch’ool. Xink’oxla naq xik’ nikinril li Dios xb’aan naq ink’a’ xink’e inch’ool chi jalaak ut chi numtaak sa’ xb’een li ch’a’ajkilal a’in chi junajwa. Xinkanab’ li pornografia chiru jun xamaan malaj jun po, toja’ naq xinwil wi’chik ut xink’oxla, “Maajo’q’e tinruuq chi jalaak, k’a’ut b’i’ naq tinyal xb’aanunkil?” ”

Sa’ xrahil xch’ool li saaj winq kixye re jun aj jolominel sa’ li tijonelil: “Maare tinkanab’ wulak sa’ iglees. Ink’a’ nawulak chiwu naq laa’in aj ka’pak’al-u.”

Laj jolominel kixye re: “Maawa’at aj ka’pak’al-u yal xb’aan naq yookat chixyalb’al aaq’e rik’in aamajelal. Laa’at raj aj ka’pak’al-u wi ta taayal xmuqb’al, tik’ti’ik chirix, malaj xyeeb’al naq wan xmajelal li Iglees xb’aan naq ch’a’aj chixjunil li naxpatz’ aawe. Maawa’at aj ka’pak’al-u xb’aan naq yookat chixyeeb’al k’a’ru tento taab’aanu ut yookat chixyalb’al aaqe’ chi jalaak.” Laa’at b’an jun tzolom.”¹⁶ Laj jolominel a’in kixye li raatin li Elder Richard G. Scott, li kixye: “Li Qaawa’ moko naril ta xq’unal li metz’ew jo’ naril li po’ok ch’oolej. … Naq li Qaawa’ na’aatinak chirix xq’unal li metz’ew, junelik naxb’aanu rik’in uxtaan.”¹⁷

Li na’leb’ a’in kixk’e xyo’onihom li saaj winq. A’an kixk’e reetal naq li Dios moko yoo ta chixyeeb’al, “Moko us ta xab’aanu.” A’an yoo b’an chixyeeb’al, “Il, timil timil yookat chi jalaak.” Li saaj winq a’in kixkanab’ ilok taq’a rik’in xutaan ut xtiikob’resinkil lix maak. Ki’ilok b’an taqe’q re xk’ulb’al li choxahil tenq’, ut chi jo’kan kixk’ul.¹⁸

A’an kixye: “Junxil ka’ajwi’ xinsik’ li Dios re xpatz’b’al xkuyb’al inmaak, a’b’an anajwan chik xinpatz’ re naq tinrusila—xinpatz’ lix “wankilal aj k’ehonel” [K’utul Raqal reheb’ li Loq’laj Hu, “Usilal”]. Maajun wa inb’aanuhom chaq a’an. Anajwan ink’a’ chik mas xik’ nawil wib’ xb’aan li xinb’aanu, mas ninra b’an li Jesus xb’aan li xb’aanuhom a’an.”

Xb’aan naq chiru k’iila kutan kiwan xch’a’ajkilal li saaj winq a’in, ink’a’ us raj naq lix na’ xyuwa’ malaj laj jolominel li ke’raj xtenq’ankil te’xye raj re naq “maajun sut chik” malaj naq te’xye jo’q’e taawanq “xk’ulub’il” a’an. Ruuchil a’an, ke’xtenq’a chi ok chi jalaak chi timil timil. Ke’xjayali rib’ sa’ li jalaak chi timil timil, li kixtenq’a li saaj winq chi kab’lak sa’ xb’een lix k’iijik, ink’a’ sa’ xb’een lix majelal.¹⁹ Li saaj winq, jo’eb’ lix tenamit laj Limhi li ke’wan sa’ preexil, kixtzol naq “timil timil” truuq chi “usaak.”²⁰

Li Elder D. Todd Christofferson kixye: “Naq wan jun qanimla k’anjel, us raj naq took’anjelaq chi timil timil wulaj wulaj. … Li chaab’ilob’resink-ib’ malaj xkanab’ankil li k’a’ru ink’a’ us naraj naq taqayal qaq’e anajwan, ut wulaj, ut chi jo’kan chiru k’iila kutan, po, malaj chihab’. … A’ut naru taqab’aanu xb’aan naq naru taqatz’aama chiru li Dios … li tenq’ naqaj ru wulaj wulaj.”²¹

Anajwan ut, ex was wiitz’in, ch’a’aj li yajel COVID-19 choq’ re chixjunil, a’b’an li junaatal li chalenaq xb’aan xtz’apb’al qib’ sa’ kab’l jwal naxch’a’ajkila xyu’ameb’ li ani ak neke’ch’a’ajko’ rik’in xmajelaleb’. Chijultiko’q eere naq naru texjalaaq, li jalb’a-k’a’uxlej naraj hoonal, ut li wank chi k’ulub’ej moko naraj ta naxye naq tz’aqal eere eeru. Sa’ xb’een chixjunil, chijultiko’q eere naq li Dios ut li Kristo wankeb’ xch’ool chiqatenq’ankil arin ut anajwan.²²

Wankeb’ li neke’xk’oxla naq li Dios ink’a’ tooxtenq’a toj reetal naq ak jalb’il qak’a’uxl. Li Dios naxye naq tooxtenq’a naq toj yooko chixjalb’al qak’a’uxl. Tixk’e li rusilal qe, “maak’a’ naxye b’ar wanko sa’ xb’ehil li paab’ank.”²³ Li Elder Dieter F. Uchtdorf kixye: “Li Dios ink’a’ naraj ruheb’ li kristiaan tz’aqaleb’ re ru. Naxsik’eb’ li ani neke’xk’e “li raam ut lix k’a’uxl” [Tzol’leb’ ut Sumwank 64:34], ut “tixtz’aqob’resi ruheb’ rik’in li Kristo”[Moroni 10:32–33].”²⁴

Wankeb’ naab’al li rahob’tesinb’ileb’ xb’aan li ch’a’ajkilal sa’ xkomonileb’, jo’kan naq ch’a’aj choq’ reheb’ xpaab’ankil naq aj uxtaan li Dios ut naq najt li royb’enihom. Ch’a’aj chiruheb’ rilb’al li Dios jo’ chanru wan—jun Yuwa’b’ej aj rahonel li nokoxtenq’a sa’ li qach’a’ajkilal²⁵ ut li naxnaw chan ru “xk’eeb’al k’a’aq re ru chaab’il reheb’ li neke’tz’aaman chiru.”²⁶ Li rusilal ink’a’ nayeechi’iman reheb’ ka’ajwi’ li k’ulub’ejeb’. A’an b’an jun “choxahil tenq’ ” naxk’e a’an li nokoxtenq’a chi wulak chi k’ulub’ej. Moko nayeechi’iman ta reheb’ ka’ajwi’ li tiikeb’ chi paab’ank. A’an jun “maatan re kawilal” li naxk’e re qatenq’ankil chi paab’ank sa’ tiikilal.²⁷ Ink’a’ yal nokob’eek sa’ xjayal li Dios ut li Kristo. Nokob’eek b’an qochb’eeneb’.²⁸

Sa’ li Iglees, eb’ li saaj neke’xyaab’asi li ch’ol aatin reheb’ li Saaj Ixq ut reheb’ li molam re li Tijonelil re Aaron. Chalen Nueva Zelanda toj España, chalen Etiopia toj Japon, eb’ li saaj ixq neke’xye, “Nink’e xloq’al li maatan re li jalb’a-k’a’uxlej.” Chalen Chile toj Guatemala toj Moroni, Utah, eb’ li saaj winq neke’xye, “Naq tinyal inq’e chi k’anjelak chiruheb’ jalan, chi paab’ank, chixjalb’al ink’a’uxl, ut chi chaab’ilo’k rajlal kutan, k’ulub’ejaqin chi osob’tesiik xb’aan li santil ochoch ut chixk’ulb’al li sahil ch’oolejil re li evangelio.”

Ninch’olob’ yaalal naq li ani napaab’ank re chixjunileb’ li taqlahom ut “li ani nasikʼok xbʼaanunkil chi joʼkan”²⁹ naru te’xk’ul li osob’tesink ut li sahil ch’oolejil a’an. Naq nekek’oxla naq ak xexmaakob’k naab’al sut ut xexlub’ chixyalb’al eeq’e, chijultikoʼq eere naq lix tojbʼal rix li maak xbʼaan li Kristo ut li rusilal aʼan tixkʼe eewankilal chi xik chi uubʼej.³⁰ “Ye’b’il eere li ruq’ aj uxtaan.”³¹ Raab’ilex laa’ex—anajwan, sa’ jun may chihab’, ut chi junelik. Sa’ xk’ab’a’ li Jesukristo, amen.