“Kōjerbal Itok, Ļoor Eō—N̄an Doulul ko an Priesthood eo an Aron im Kūlaaj ko an Doulul eo an Jiron̄—,” Itok, Ļoor Eō—N̄an Doulul ko an Priesthood eo an Aron: Unin Kōnono ko an Katak ko an 2023 (2022)
“Kōjerbal Itok, Ļoor Eō—N̄an Doulul ko an Priesthood eo an Aron im Kūlaaj ko an Doulul eo an Jiron̄ ro”,” Itok, Ļoor Eō—N̄an Doulul ko an Priesthood eo an Aron im Kūlaaj ko an Doulul eo an Jiron̄ ro: Unin Kōnono ko an Katak ko an 2023
Kōjerbal Itok, Ļoor Eō—N̄an Doulul ko an Priesthood eo an Aron im Kūlaaj ko an Doulul eo an Jiron̄ ro
Ta Jibadbad ko an Kweilo̧k ko an Kūlaaj ko im Doulul ko Ad?
Irooj ekar letok n̄an kwe juon lōke ekwojarjar: Ekar kūr kwe n̄an jerbal ilo juon būreejtōnji an Doulul eo an Jiron̄ ro ak būreejtōnji eo an dolulu eo an Priesthood eo an Aron. M̧ōttan eddo eo am̧ ej n̄an tōl im kajeikiik kweilo̧k ko an kūlaaj eo am̧ ak doulul eo am̧ ilo Jabōt, N̄an kōm̧m̧an menin, ejipan̄ n̄an meļeļe etke jej kōm̧m̧ani kweilo̧k kein.
Kweilo̧k ko an kūlaaj eo an Doulul eo an Jiron̄ ro im doulul eo an Priesthood eo an Aron reoktak jān kūlaaj ko an Kabun̄ in āinwōt Jabōt Jikuuļ ak jemenere. Ilo kweiļo̧k ko an kilaaj im doulul ko, jej ekkatak kōn jerbal eo Anij ekar letok n̄an kōj, im jej karōke membōr in kilaaj ak doulul n̄an kom̧m̧ane jerbal ko ilo m̧oko, ilo Kabun̄, im ilo jukjuk in ped ko. Ilo kweilo̧k kein, jejjab kōnono wōt kōn jerbal in—jej kōm̧m̧ani pepe im karōk ko n̄an kakūrm̧ool eddo ko ad āinwōt m̧ōttan ļo̧k jar in tariņae an jodikdik ro an Irooj, ekoba jipan̄ aiintok Israel.
Ilo kweilo̧k ko an kūlaaj ak doulul eo, jej kōm̧m̧an karōk ko n̄an kakūrmool āinwōt m̧ōttan ļo̧k jar in tariņae an jodikdik ro an Irooj.
Bōtaab kōmejaja in kōn jerbal in ejjab meļeļe in bwe jej door wōt ekōnono ko an katak wōt n̄an Jabōt Jikuuļ wōt. Ilo m̧ool, ekkatak katak ko ilo kūlaaj ko an Doulul eo an Jiron̄ ro im Doulul eo an Priesthood eo an Aron ej menin aikuj—ej jipan̄ kōj kōkajoorļo̧k jem̧jerā eo ad ippān Jisōs Kraist, meļeļe kōn karōk eo an Jemedwōj Ilan̄, im bōk koņaad ilo jerbal ko Aer. Ilo ad ekkatak gospel eo ippān doon, m̧ool ko jej ekkatak remaron̄ ukot būruōd im jipān̄ kōj jeļā wāween n̄an kōm̧m̧an eļapļo̧k ilo wāween ko āinwōt an Kraist. Jemaron̄ bōk im̧we kōn wāween ko n̄an kōļapļo̧k “ilo mālōtlōt im rūtto, im ilo jouj ippān armej im Anij” (Luk 2:52 Ilo an ļapļo̧k wōt ad oktaktok n̄an Jisōs Kraist im gospel eo An, jenaaj lo m̧ōņōņō im en̄jake ikdeleel n̄an jipan̄ ro jet ilo iaļan bujen in.
Wōn eo Ej Tōl Kweilo̧k Kein?
Anij ekar kūr kom̧ āinwōt būreejtōnji ko an kūlaaj im doulul eo im kar lewaj ami mālim n̄an tōl. Unin an kajjojo kweilo̧k an kūlaaj im doulul eo ami aikuj in kōjeikik jān juon uwaan būreejtōnji eo an kūlaaj ak doulul eo ami. Ritōl ro rerūtto rej aikuj leļo̧k tōl im rie, ak rejjab aikuj kōm̧m̧ane n̄an kwe. Lale jekjōn eo taitōļ in “Kapilōk Ippān Doon” ilo jino in kajjojo unin tōl ilo kein jipan̄ in n̄an ļōmņak ko n̄an jipan̄ eok jeļā ekōjkan tōl juon kweilo̧k im kadedeļo̧k jibadbad ko rem̧ool an. Kōjerbal kweilo̧k ko an būreejtōnji eo n̄an karōk wāween am̧ naaj kōjeikik kweilo̧k kein ilo Jabōt.
Wōn Eo ej Aikuj Katakin Katak eo?
Ritōl ro rerūtto, juon uwaan būreejtōnji ro an kūlaaj ak doulul eo, ak jabdewōt membōr ro jet an kūlaaj ak doulul eo remaron̄ kōm̧m̧ane katak ko. Āinwōt būreejtōnji an kūlaaj ak doulul eo, bōk an doon ļōmņak ippān ritōl ro rerūtto kōn wōn eo kar aikuji kappeik n̄an kōm̧m̧ane katak ko. Keememej bwe ritōl ro rerūtto ami ekanooj ļap ijo remaron̄ letok. Kappukot n̄an ekkatak jān en̄jake ko aer im naan in kam̧ool ko aer. Elōn̄ barāinwōt em̧m̧an ko n̄an kajjitōk ippān jodikdik ro n̄an katakin—katakin emaron̄ jipan̄ kam̧ūlaļļo̧k oktakļo̧k eo aer im jipan̄ er kalōk jemjerā ko rekijin̄en̄eļo̧k ippān ro jet uwaan kūlaaj eo ak doulul eo. Kōn menin leļo̧k n̄an er iien ko rem̧m̧an rejetjet n̄an katakin aolepān ak jidik in katak eo, likūt ilo kōļmenļo̧kjeņ aikuj ko im maron̄ ko an armej ro ilo kūlaaj eo ak doulul eo ami. N̄an waanjon̄ak, ritōl ro rerūtto remaron̄ emakijkijļo̧k aer katakin ilo kūlaaj ko ak doulul ko ippān jodikdik ro reddikļo̧k ak ippān jodikdik ro me edikļo̧k aer iminene ilo katakin gospel eo. N̄e kwoj kajjitōk ippān juon jodikdik n̄an katakin, juon jinen ak jemen ak juon rikapilōk erūtto aikuj in jipan̄ er m̧aanjabpopo n̄e emenin aikuj.
Ro me kar jitōn̄ er n̄an katakin remaron̄ kōjerbal taitōļ jekjōn eo “Katakin Katak eo” ilo kajjojo unin tōl ilo kein jipan̄ in n̄an jipan̄ er m̧aanjabpopo. Jekjōn in epād ie elmako ko n̄an katakin im ekōnono kōn katak eo n̄an wiik jab eo, bōtaab rūkaki ro ejjab aikuj wōr jon̄an aer en̄jake n̄an kein jipan̄ kein make. Āinwōt an Jetōb tōl, rūkaki ro remaron̄ ukukōt ļōmņak kein ak kōjerbal eo aer make ilo juon wāween eo me enaaj jetjet an tōpar aikuj ko an ro uwaan kūlaaj eo ak doulul eo im jipan̄ er meļeļe katak eo im kōjerbal katak eo.
Ta Unin Kōnono ko an katak ko Jenaaj Ekōnono Kake ilo Kweilo̧k ko Ad?
Unin kōnono eo an unin tōl eo an kajjojo wiik ej juon pedped in katak an katak eo me kar jokāālete n̄an kajjokun ippen kein riiti ko an Kalim̧m̧ur Ekāāl ilo wiik eņ, loe ilo Itok, Ļoor Eō—N̄an Kajjojo Armej im Baam̧le Ko Ilo wāween in, iien ekōnono ko an katak eo ilo kweilo̧k ko an kūlaaj eo ak doulul eo enaaj jipan̄ ta eo jodikdik ro rej ekkatak ilo m̧weo.
Men̄e unin tōl ko rej aikuj in katakin ilo Jabōt ko rejeno̧lok, enaaj wōr am̧ kāālet n̄an ekōnono kōn unin kōnono ko an katak ko jet pedped ioon aikuj ko an doulul eo im kūlaaj eo ami.
Bok in ekoba unin tōl ko n̄an aolep wiik n̄e kweilo̧k ko an kūlaaj eo an Doulul eo an Jiron̄ Ro im Doulul eo an Priesthood eo an Aron rej kōm̧m̧an. Jet iien, komaron̄ aikuj in kejoon juon katak kōnke kōn kweilo̧k ko an stake ak un ko jet.
Ta Eddo eo an Ritōl ro Ad Rerūtto?
Ritōl ro rerūtto ami rej kōm̧m̧ane juon jerbal aorōk ilo kūlaaj ko an Doulul eo an Jiron̄ ro im doulul ko an Priesthood eo an Aron. Renaaj tōl im kapilōk eok ilo kūr in tōl ko am̧. Renaaj rie im rōjan̄ eok ilo am̧ kōm̧m̧ane jerbal eo an kūlaaj eo ak doulul eo. Renaaj katakin eok katak eo, im renaaj kōjeraam̧m̧an eok kōn waanjon̄ak ko aer, en̄jake, im naan in kam̧ool.