Ekkar n̄an Naan Eo, jān Elspeth Young.

Meri ewōr an naan in kam̧ool ekajoor kōn mijen eo an Rilo̧mo̧o̧r (lale Luk 1:46–55). Ekkar n̄an Naan Eo,, jān Elspeth Young.

Jānwōde 8

Elmen Aō Kōjeraam̧m̧an Ro Jet kōn Naan in Kam̧ool eo aō kōn Jisōs Kraist?

Matu 1; Luk 1

pija eo ej bōk jikin kapilōk doon

Ko̧o̧njeļ Ippān Doon

Kar tōl juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron Innām tōl juon iien ekōnono kōn jerbal in lo̧mo̧o̧r eo im mour indeeo ippān Anij ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe: Jerbal ilo Kabun̄ eo an Jisōs Kraist im Armej Ro Rekwojarjar ilo Raan Ko Āliktata, 10.2, 11.2, ChurchofJesusChrist.org). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta eo jekar ekōnono kake iien eo ļo̧k, im ta kūr ko ak ijjitōn̄ ko rekar kōm̧m̧an? Ta eo em̧ōj ad kar kōm̧m̧ane n̄an jerbal kōn kūr ko ak ijjitōn̄ ko?

• Kea kōn ro rej pād ilo aikuj. Ta eo jemaron̄ kōm̧m̧ane ak ba n̄an pukōtļo̧k ro me remaron̄ en̄jake ajimakeke ak ettoļo̧k jān Jemedwōj Ilan̄?

• Karuwaineneik aolep n̄an bōk gospel eo. Ta jet iaan wāween ko jemaron̄ jipan̄ ro jet en̄jake iakwe eo an Jisōs Kraist?

• Kobaik baam̧le ko n̄an indeeo. Ta ļōmņak ko jemaron̄ kwaļo̧ki ippān ro jet n̄an jipan̄ kōkajoorļo̧k baam̧le ko ad?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

pija ej bōk jikin katakin katak eo

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Āinwōt elon̄ iaan Riju ro reweppan ilo iien eo an, Meri ekar lukkun to an kotar itok eo an Mesaia eo. Ālikin ekkatak jān enjel eo ke kōtar eo m̧ōttan jidik ejemļo̧k—im bwe enaaj mama eo an Ripinmuur eo kallim̧ur kake Meri ekar—Meri ekar kwaļo̧k an naan in kam̧ool aiboojoj “Anij aō Rilo̧mo̧o̧r.” Naan in kam̧ool in ekar jeje ilo Luk 1:46–55, im ej jitōnbōro ippan̄ aolep kūriji ipeļaakin ļal in. Ilo am̧ riiti eoon kein, ļōmņak kōn armej ro ilo kūlaaj eo am̧ ak doulul eo. Er, āinwōt Meri, kar kōppopo n̄an itok ilo Jisōs Kraist— ilo iien in, n̄an iien Itok eo An Kein Karuo aiboojoj. Im āinwōt Meri, naan in kam̧ool ko aer emaron̄ kajoor im̧we eo n̄an tōmak ko ro ipeļaakier.

Elmen an armej ro kwoj katakin er en̄jake kōn Jisōs Kraist? Elmen an nej naan in kam̧ool ko aer kōn E kōjeraam̧m̧an ro jet? Ilo am̧ kōppopo n̄an katakin, komaron̄ barāinwōt katak 2 Nipai 25:23–26 im ennaan eo an Elder Neil L. Andersen’s “Jej Kōnono kōn Kraist” (Liaona, Nob. 2020, 88–91).

Ekkatak Ippān Doon

Juon wāween em̧m̧an n̄an jipan̄ jodikdik ļōmņak kōn naan in kam̧ool ko aer kōn Jisōs Kraist ej n̄an etale ippān doon naan in kam̧ool eo an Meri Luk 1:46–55. Innām remaron̄ kwaļo̧k ippān doon ennaan ko jet rej kōmeļeļe ta eo Meri ekar tōmak im en̄jake kōn Rilo̧mo̧o̧r. Ewi iaan ennaan kein rej barāinwōt kōmeļeļe elmen ad en̄jake kōn E? N̄an waanjon̄ak, ta eo ej kōm̧m̧an bwe jetōb eo ad en “[lan̄lōn̄] ilo Anij”? (eoon 47). Ta “men ko reļap” Ekar kōm̧m̧ane n̄an kōj? (eoon 49). Elmen An kar kwaļo̧k kajoor eo An ilo mour ko ad? (lale eoon 51). Makūtkūt kein iļal remaron̄ tōl n̄an ekōnono ko kōn elmen an naan in kam̧ool ko ad kōn Kraist kōjeraam̧m̧an ro jet.

• Ennaan eo an Elder Neil L. Andersen “Jej Kōnono kōn Kraist” ej jipan̄ kōmeļeļe etke jej aikuj kōppeļo̧k eļapļo̧k kōnono kōn Rilo̧mo̧o̧r— im elmen ad kōm̧m̧ane. Kōmaron̄ riiti jekjen ko ilo ennaan eo an Elder Andersen ippān doon. Kūlaaj ak doulul ko remaron ekōnono kōn wun ko ekar letok n̄an kwaļo̧k ad naan in kam̧ool kōn Jisōs Kraist im ko̧o̧njeļ eo an kōn elmen kōm̧m̧ane. Ta men ko raorōk me jemaron̄ kōppeļo̧k ekōnono eļapļo̧k kōn Kraist?

• Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, jejeļā m̧ool ko raorōk kōn Jisōs Kraist me jemaron̄ kwaļo̧k. Ewi wāween am̧ nej jipan̄ jodikdik ro ļōmņak kōn m̧ool kein? Komaron̄ kajjitōk ippāer n̄an ekkatak “Kraist Emour: Naan in Kam̧ool an Rijiļo̧k ro” make iaer ak ilo kurup, kappukot uwaak eo an kajjitok in “Ta m̧ool ko kōn Rilo̧mo̧o̧r ewōr melele rejenoļo̧k n̄an eok?” Kajjitōk ippāer n̄an kwaļo̧k m̧ool ko rej loi im kōmeļeļe etke m̧ool kein ewōr melelein n̄an er? Remaron̄ kwaļo̧k jān jeje ko rekwojarjar im en̄jake ko aer make ilo aer kōm̧m̧ane. Innem remaron̄ ekōnono kōn ewi iaan m̧ool ko kōn Rilo̧mo̧o̧r remaron̄ kwaļo̧ki ilo online, ippen juon mōttaer ej en̄taan kōn juon naan in kam̧ool, ak ippen juon eo ejjab membōr in Kabun̄ in.

• Kakobaba ilo Luk 1:46–55, jeje ko rekwojarjar ewōr elon̄ ennaan ko remaron̄ im̧we kōj n̄an kwaļo̧k ta eo jejeļā kōn Jisōs Kraist. Waanjon̄ak ko jet rej elaajrak ilo “Kein Jipan̄ ko rej Rie.” Lale eoon kein n̄an riiti ippān doon. Ta eo rej katakin kōj kōn elmen ad kwaļo̧k naan in kam̧ool ko ad kōn Jisōs Kraist ippen ro jet? Ta eo jet jej ekkatak jān eoon kein? Ro uwaan kūlaaj ak doulul remaron̄ kwaļo̧k men kein rekar ekkatak jān armej ro rejeļā kajeer ro rej kwaļo̧k aer tōmak ilo Jisōs Kraist.

jiron̄ ro ej ekkatak jeje ko rekwojarjar

Ilo ad ekkatak n̄an jeļā im iakwe Rilo̧mo̧o̧r, jej pukōt ial ko n̄an kwaļo̧k ad naan in kam̧ool ilo E.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Matu 5:14–16; 1 Piter 3:15; 2 Nipai 25:26; Alma 5:43–50; Katak im Bujen Ko 100:5–8

• Russell M. Nelson, “Kwaļo̧k Am̧ Tōmak” (Liaona, Māe 2014, 29–31)

• Cristina B. Franco, “Lo Lan̄lōn̄ ilo Kwaļo̧k Gospel eo” (Liaona, Nob. 2019, 83–86)

Katakin ilo Wāween eo an Rilo̧mo̧o̧r

Kajjitōk kajjitōk ko me rej kōketak rikkatak ro n̄an kwaļo̧k aer naan in kam̧ool emaron̄ juon wāween ekajoor n̄an karuwaineneik Jetōb eo. Komaron̄ kajjitōk kajjitōk ko āinwōt “Elmen am̧ kar itok n̄an jeļa bwe Jisōs Kraist ekar pinmuur kōn jerawiwi ko am̧?” ak “Elmen am̧ kar itok n̄an mōņōņō kōn ta eo Rilo̧mo̧o̧r ekar kōm̧m̧an n̄an kōj ilo Gethsemane?”