Jej Kōnono kōn Kraist

Jān Elder Neil L. Andersen

Jān Doulul eo an Jon̄oulruo Rijilōk ro

Ilo an laļin dikļo̧k an kōnono kōn Jisōs Kraist, jen kōnono eļapļo̧k kōn E.

Ij kwaļo̧k aō iakwe kom̧, ro jeram̧ im ritōmak ro ad rejitenbōro. Ij nōbar ami tōmak im peran ilo allōn̄ kein remootļo̧k, kōn nan̄inmej in ipeļaakin laļin em̧ōj an kakkure mour ko ad im bōk ro uwaan baam̧le ko ad reaiboojoj im ro jerad rejitenbōro.

Il tōrein jab jeļa kake, iaar en̄jake juon kam̧m̧oolol eo me ij jeļā im em̧ool bwe Jisōs ej RiKraist eo. Kwaar ke en̄jake wāween in? Ewōr men ko reppen me rej kainepataik kōj kajjojo, ak iien otemjej ilikid E eo ettā eaar ba, “N̄a iaļ, im m̧ool, im mour.” ¹ Ilo ad niknik jidik iien n̄an kattoļo̧k kōj make jen ro jet, jej aikuj jab kōttolo̧k kōj make ilo jetōb jān E eo ej iakwe im kūr kōj, “Itok n̄an eō.” ²

Āinwōt juon iju in tōl ilo lan̄, mejatoto emarok, Jisōs Kraist ej kōmeram ad iaļ. E ekar itok n̄an laļin ilo wāween ettā. E ekar mour kōn juon mour ewāppen. E ekar kōmour rinan̄inmej im kōjerkak rimej. E ekar juon m̧ōttā n̄an ro raar kowaane. E ekar katakin kōj n̄an kōm̧m̧an em̧m̧an, im n̄an iakwe doon. Ekar dōbwāāl ioon juon wōjke, jerkakpej jilu raan tokālik, kōm̧m̧an bwe jen im ro jej iakwe er ren bar mour jen lōb. Kōn tūriam̧o im jouj eo An ban keidi, E eaar bōk ioon E Make kōn jerawiwi ko ad im ad en̄taan, bōktok jeo̧rļo̧k bōd ilo ad ukweļo̧k im bōktok aenōm̧m̧an ilo apan̄ ko an mour. Jej iakwe E. Jej kabun̄jar n̄an E. Jej ļoore E. E ej emjak n̄an jetōb ko ad.

Ekabwilōn̄lōn̄, ilo an jetōb in tōmak in ļapļo̧k ilo kōj, ewōr jet ilo laļin ro edik aer jeļā kōn Jisōs Kraist, im ilo jet jikin ilo laļin ijo etan kar kwaļo̧ke etto, tōmak ilo Jisōs Kraist ej dikļo̧k. Kajoor eo an ro Rekwojarjar ilo Europe kar lo an dikļo̧k tōmak ilo iiō ko. ³ Ekabūrom̧ōjm̧ōj, ilo Amedka in edikļo̧k tōmak. Juon ekkatak ekāāl ekar kwaļo̧k bwe ilowaan 10 iiō kein 30 milien armej in Amedka em̧ōj joļo̧k aer tōmak ilo Jisōs Kraist ekwojarjar. ⁴ Kalimjōk peļaakin laļin, bar juon ekkatak ej kwaļo̧k bwe ilo iiō ko im̧aad elōn̄ ļo̧k jen ruo alen an lōn̄ enaaj jako aer Kūrjin jen ro renaaj depdep wōt. ⁵

Kōj, em̧ool, kautiej jim̧we eo an kajjojo n̄an kālet, aaet Jemedwōj Ilan̄ eaar kwaļo̧k, “E in Nejū e jitōnbōro: kom̧win ron̄jake e.” ⁶ Ij kam̧ool bwe raan eo enaaj itok n̄e aolep bukwe naaj bukwelōlō im aolep lo otemjej renaaj kwaļo̧k bwe Jisōs ej RiKraist eo. ⁷

Elmen ad ba n̄an laļin ad eoktak? Ilo an ro jet kowaan tōmak eo aer, ro jet rej kappukot m̧ool eo. Jaar bōk iood make etan Rilo̧mo̧o̧r. Ta eo eļapļo̧k jemaron̄ kōm̧m̧ane?

Keppopo eo an Būreejtōn Russell M. Nelson

Mōttan uwaak eo ad emaron̄ itok ilo ad keememej elmen an Irooj kar katakin Būreejtōn Russell M. Nelson ilo allōn̄ ko m̧okta jen kūr eo an āinwōt Būreejtōn an kabun̄ in. Kōnono n̄an rūm̧m̧an ded ro juon iiō m̧okta jen kūr eo an, Būreejtōn Nelson ekar kūr kōj n̄an lukkuun ekkatak 2,200 naan ko kōn etan Jesus Christ elaajrak ilo Unin Tōl ilo Jeje ko Rekwojarjar. ⁸

Jilu allōn̄ tokālik, ilo Eprōļ kweilo̧k eo eļap, eaar kōnono kōn elmen, em̧ool iiō in an wūjlepļo̧k āinwōt rijilōk, ekkatak in em̧wilaļ kōn Jisōs Kraist eaar ļap ilo e. Sister Wendy Nelson, eaar kajjitōk ippān kōn kajoor. Eaar ba, “ij juon armej eoktak!” Ekar juon em̧m̧aan em̧m̧an? Ilo 92 iiō, kwoj juon armej eoktak? Būreejtōn Nelson ekar kakobaba:

“Ilo ad kōm̧m̧an ad iien ekkatak kōn Rilo̧mo̧o̧r im katok in pinmuur eo An, jej kālet n̄an tōmak [E]. …

“… Ad [ejekiik] rej aikuj dim ilo Rilo̧mo̧o̧r im gospel eo An.” ⁹

Rilo̧mo̧o̧r ekar ba, “Reitok n̄an Eō ilo ļōmņak otemjeļo̧k.” ¹⁰

Ilo juon laļin jerbal, inepata, im m̧akūtkūt ko rerreeo, jej kōjparok būruwōd, ad ļōmņak, im kōļmenļo̧kjeņ ko ad n̄an E eo ej ad kōjatdikdik im lo̧mo̧o̧r.

Eļan̄n̄e juon ekkatak ekāāl kōn Rilo̧mo̧o̧r ekar jipan̄ kepooj Būreejtōn Nelson, ejjab ke bar jipan̄ kepooj kōj?

Kōn jim̧we in etan Kabun̄ in, Būreejtōn Nelson ekar kwaļo̧k, “Eļan̄n̄e kōj … āinwōt armej ro im āinwōt kajjojo armej ro ewōr ippāer jim̧we n̄an deļo̧n̄e kajoor eo an Pinmuur eo an Jisōs Kraist—n̄an karreo im kōmour kōj, n̄an kōkajoorļo̧k im kōļapļo̧k kōj, im eļaptata n̄an lelōn̄ļo̧k kōj—jej aikuj in lukkuun kile E āinwōt kein jipan̄ eo me ekajoor.” ¹¹ Būreejtōn Nelson ekar katakin kōj n̄an kōjerbal jejjet in etan Kabun̄ in, juon men eo me emaron̄ in dik, eban dik wōt im dik, ak enaaj kōkm̧anm̧anļo̧k ilju eo.

Juon Kallim̧ur ilo Am Keppopo

Ij kallim̧uri eok bwe ilo am̧ kepooj eok make, āinwōt kar Būreejtōn Nelson, kwonaaj bar oktak, ļōmņak kōn Rilo̧mo̧o̧r, kōnono emakijkij kōn E im dikļo̧k mijak. Ilo am̧ jeļā im iakwe E em̧wilaļļo̧k, naan ko am̧ renaaj ineem̧m̧anļo̧k, āinwōt aer kōm̧m̧ane, n̄e am̧ kōnono kōn juon iaan ajri ro nejum̧ ak juon eo jerad ejitenbōro. Ro rej ron̄jake eok naaj en̄jake dikļo̧k aer jum̧ae, ak kowaan eok im ļapļo̧k aer ekkatak jen kwe.

Kwe im n̄a naaj kōnono kōn Jisōs Kraist, ak bōlen jemaron̄ iien otemjej kōm̧m̧an em̧m̧anļo̧k. N̄e edik an laļin kōnono kōn E, wōn eo enaaj kōnono eļapļo̧k kōn E? Kōj! Ippān aolep Kūrjin ro rej wūjlepļo̧k!

Kōnono kōn Kraist ilo Mōko Im̧ōd

Ewōr ke pijain Rilo̧mo̧o̧r ilo m̧ōko im̧ōd? Emakijkij ke ad kōnono n̄an ajri ro nejid kōn būrabōļ ko an Jisōs? “Bwebwenato ko kōn Jisōs [rej] āinwōt juon kōto em̧ōkaj an kadōk tōmak ilo būruwōn ajri ro nejid.” ¹² N̄e ajri ro nejum̧ rej kajjitōkin eok, ļōmņak kōn katak ta ko Rilo̧mo̧o̧r eaar katakin. N̄an waanjon̄ak, n̄e ajri ro nejum̧ ej kajjitōk, “Baba, etke jej jar?” Kwomaron̄ ba, “em̧m̧m̧an kajjitōk in. Kwoj ke keememej ke Jisōs ekar jar? Jen kōnono etke Eaar jar im elmen An kar jar.”

“Jej kōnono kōn Kraist, jej m̧ōņōņō ilo Kraist, [im] jej kwaļo̧k kōn Kraist, … bwe ro nejid ren maron̄ jeļā n̄an ia rej maron̄ reiļo̧k n̄an jeorļo̧k jero̧wiwi ko aer.” ¹³

Kōnono kōn Kraist ilo Kabun̄ in

Ejja eoon in ej ba “jej kwaļo̧k kōn Kraist.” ¹⁴ Iien otemjej ilo kabun̄jar ko ad, jen mije wōt Rilo̧mo̧o̧r Jisōs Kraist im menin letok in en̄taan in pinmuur eo An. Ejjab meļeļein bwe jeban kwaļo̧k en̄jake ko jen mour eo ad make ak kwaļo̧k ļōmņak ko jān ro jet. Ilo an unin kōnono eo ad kōn baam̧le ak jipan̄ ak tampeļ ak juon mijen, aolep ad kabun̄jar en pedped wōt ilo Irooj Jisōs Kraist.

Jiln̄uul iiō remootļo̧k, Būreejtōņ Dallin H. Oaks ekar kōnono kōn juon leta eaar bōke “jān juon em̧m̧aan eo ekar ba ekar pād ilo [juon kweilo̧k] in kwojkwoj im kar ron̄jake jon̄ouljiljilimjuon naan in kam̧ool ko ilo an jab ron̄ kōn Rilo̧mo̧o̧r.” ¹⁵ Būreejtōn Oaks eaar keememej, “Bōlen naan in ekajoor [ak] ij kouti kōnke ej letok juon kakeememej eo eaorōk n̄an kōj kajjojo.” ¹⁶ Innām ekar karuwaineneik kōj n̄an kōnono eļapļo̧k kōn Jisōs Kraist ilo kōnono ko ad ilo kūlaaj. Em̧ōj aō loe ke eļap wōt im ļap ad mije Kraist ilo kweilo̧k ko ad ilo Kabun̄. Jen lukkuun m̧ool ilo aolep kijejeto.

Kōnono kōn Kraist n̄an ro Jet

Ippān ro ipeļakid, en ļapļo̧k ad, m̧ōņōņō in kōnono kōn Kraist. Būreejtōn Nelson ekar ba, “Rikaļoor ro rem̧ool an Jisōs Kraist rej m̧ōņōņō in jenolo̧k jān ro jet, kōnono, im oktak jān armej ro an laļ in.” ¹⁷

Jet iien jej ļōmņak bwe kōnono jidik kōn aikuj ko an ro jet ej tōprak eo bwe ren itok n̄an jar ak lo mijenede ro. Kōtļo̧k bwe Irooj en tōl er ilo aer kōņaan, ilo ad ļōmņak eļapļo̧k kōn eddo eo ad n̄an ripinej jenkwan Irooj, ļōmņak im kōnono kōn tōmak in ad. Elder Dieter F. Uchtdorf eaar katakin kōj bwe n̄e juon ej kajjitōk kōn weekend eo ad, jej aikuj in m̧ōņōņō im ba bwe em̧m̧an ad ron̄ an ajri in Būraimere ro al “Ij kajjieon̄ āinwōt Jisōs.” ¹⁸ Kōm̧m̧an bwe jen kam̧ool tōmak in ad ilo Kraist. Eļan̄n̄e juon ej kwaļo̧k kōn juon būrabōļōm̧ kōn mour eo an make, jemaron̄ ba, “Jon, Mari, kwojeļā bwe ij tōmak ilo Jisōs Kraist. Ikar ļōmņak kōn jet men Eaar ba me emaron̄ jipan̄ kwe.”

Ilo social media ko kwon kōnono kōn leke eo am ilo Kraist. Elōn̄ renaaj kautiej tōmak in ami, ak n̄e juon ej kowaan am kōnono kōn Rilo̧mo̧o̧r, bōk peran ilo kallim̧ur in An: “Em̧ōņōņō kom̧, n̄e armej re naaj kajjirere kake kom̧ … kōn N̄a. … Bwe eļap jinōkjeej n̄an kom̧ il lan̄.” ¹⁹ Eļapļo̧k ad kea kōn ad rikaļoor ro An “jen” ad rikaļoore kōj make. Piter ekar kapilōk, “Kom̧win pojak iien otemjej bwe kom̧win uwaak [kōn] unin kōjatdikdik eo ej ilowami.” ²⁰ Jen kōnono kōn Kraist.

Bok in Mormon ej bar juon kam̧ool ekajoor kōn Jisōs Kraist. Enan̄in aolep peij rej kam̧ool kōn Rilo̧mo̧o̧r im mijen eo An ekwojarjar. ²¹ Juon jeļā kōn Pinmuur im tūriam̧o eo An eobrak ilo peij ko. Āinwōt juon m̧ōttan Kallim̧ur Ekāāl, Bok in Mormon ejipan̄ kōj jeļā eļapļo̧k etke Rilo̧mo̧o̧r eaar itok n̄an lo̧mo̧o̧ren kōj im elmen an m̧wilaļ ad maron̄ itok n̄an E.

Jet iaan Kūrjin ro m̧ōttad rej, ilo tōre kein, rejjab jeļā kōn tōmak ko ad im kōn jibadbad ko ad. Kōm̧m̧an bwe jen m̧ōņōņō ippāer ilo ad kwaļo̧k tōmak eo ad ilo Jisōs Kraist im ilo jeje ko rekwojarjar ilo Kallim̧ur Ekāāl eo jej iakwe. Ilo iiō ko im̧aan, ro rej tōmak ilo Jisōs Kraist naaj aikuj jemjerā im jipan̄ doon. ²²

Ilo an laļin dikļo̧k an kōnono kōn Jisōs Kraist, jen kōnono eļapļo̧k kōn E. Āinwōt armej āinwōt rikaļoor ro An kar kwaļo̧k, elōn̄ ro ipeļakid renaaj pojak in ron̄jake. Ilo ad kwaļo̧k meram eo em̧ōj ad bōke jān E, An meram im An kajoor in lo̧mo̧o̧r eaiboojoj enaaj rome ro rem̧ōņōņō in kōpeļļo̧k būruweer. Jisōs ekar ba, “N̄a … I moottok n̄an laļ.” ²³

Kotak Ikdeleel eo Ad n̄an Kōnono kōn Kraist

Ejjeļo̧k men elōn̄aj aō kōņaan kōnono kōn Kraist eļapļo̧k jen pijaikļo̧k An jepļaaktok. Ilo ad jab jeļā n̄āāt Enaaj itok, men ko ilo An ro̧o̧ltok enaaj aiboojoj. E enaaj itok ilo kōdo̧ ko ilo lan̄ ilo utiej im aiboojoj ippān enjeļ ro An rekwojarjar. Eban jejjo̧ enjeļ ak aolep enjeļ ro An rekwojarjar. Ejjab kōnono kōn wut kerub ko kar jin̄aiki jen Raphael me kar loi ilo Valentine kaat ko ad. Errein rej enjeļ in etto ro, enjeļ ro raar kiili lo̧n̄iin ļaiōn ko, ²⁴ n̄an kapeļļo̧k kōjām ko, ²⁵ n̄an kōnnanik kōn ļotak eo An, ²⁶ n̄an kaenōm̧m̧an E ilo Gethsemane, ²⁷ kallim̧ur n̄an rijilōk ro An ilo An Wanlōn̄ļo̧k, ²⁸ im kōpeļļo̧k jepļaaktok in gospel eaiboojoj. ²⁹

Kwomaron̄ ke antooneļo̧k am pād Ippān, maron̄ ioon E emaron̄ ilo inin ak ilo rōn̄al eo juon? ³⁰ En̄in ej kallim̧ur eo An ewānōk. En̄jake in naaj kōkaļļeik jetōb ko ad indeeo.

Ewi jon̄an ad m̧ōņōņō kōn rikanaan eo ad ejitenbōro, Būreejtōn Russell M. Nelson, eo eaar lōn̄aj kōņaan eo ad n̄an iakwe Rilo̧mo̧o̧r im kwaļo̧k An kwojarjar. Ij juon mejen rikam̧ool ilo pein Irooj ilo e im menin letok eo an revelesōn me ej tōl e. Būreejtōn Nelson, kōmij kijerjer in ron̄jake kapilōk eo am̧.

Ro jera rejitenbōro ipeļaakin laļin, jen kōnono kōn Kraist, bōk kallim̧ur eo eaiboojoj an Rilo̧mo̧o̧r: “Ro otemjej … naaj kwaļo̧k Eō im̧aan mejān armej, Inaaj barāinwōt… kwaļo̧k e im̧aan mejān Jema.” ³¹ Ij kam̧ool E ej Nejin Anij. Ilo etan Jisōs Kraist, amen.

Kakeememej ko

1. Jon 14:6.

2. Matu 11:28.

3. Lale Niztan Peri-Rotem, “Religion and Fertility in Western Europe: Trends across Cohorts in Britain, France and the Netherlands,” European Journal of Population, May 2016, 231–65, ncbi.nlm.nih.gov/pmc/articles/PMC4875064.

4. “[Sixty-five percent] of American adults describe themselves as Christians when asked about their religion, down 12 percentage points over the past decade. Meanwhile, the religiously unaffiliated share of the population, consisting of people who describe their religious identity as atheist, agnostic or ‘nothing in particular,’ now stands at 26%, up from 17% in 2009” (Pew Research Center, “In U.S., Decline of Christianity Continues at Rapid Pace,” Oct. 17, 2019, pewforum.org).

5. Lale Pew Research Center, “The Future of World Religions: Population Growth Projections, 2010–2050,” Apr. 2, 2015, www.pewforum.org.

6. Mark 9:7; Luk 9:35; bar lale Matu 3:17; Josep Smith—Bwebwenato 1:17.

7. Lale Philipai 2:9–11.

8. Lale Russell M. Nelson, “Prophets, Leadership, and Divine Law” (worldwide devotional for young adults, Jan. 8, 2017), broadcasts.ChurchofJesusChrist.org.

9. Russell M. Nelson, “Letok Kajoor eo an Jisōs Kraist ilo Mour ko Ad,” Kweilo̧k eo Eļap, Eprōļ 2017.

10. Katak im Bujen Ko 6:36.

11. Russell M. Nelson, “Jim̧we in Etan Kabun̄ in”,” Kweilo̧k eo Eļap, Okt. 2018.

12. Neil L. Andersen, “Jiron̄ Eō kōn Bwebwenatoin Jisōs,” Kweilo̧k eo Eļap, Epr. 2010.

13. 2 Nipai 25:26.

14. 2 Nipai 25:26.

15. Dallin H. Oaks, “Bar Juon Kallim̧ur in Jisōs Kraist” (Brigham Young University fireside, June 6, 1993), 7, speeches.byu.edu.

16. Dallin H. Oaks, “Witnesses of Christ,” Ensign, Nov. 1990, 30.

17. Russell M. Nelson, “Drawing the Power of Jesus Christ into Our Lives,” 40.

18. Lale Dieter F. Uchtdorf, “Missionary Work: Sharing What Is in Your Heart,” Liahona, May 2019, 17; “I’m Trying to Be like Jesus,” Children’s Songbook, 78.

19. Matu 5:11–12.

20. 1 Piter 3:15.

21. “Āinwōt [jeje in kanaan ko ilo Bok in Mormon] kar je naan in kam̧ool ko kōn Messaia, raar kwaļo̧k jet jekjek kōn etan ilo juon jon̄an in aolepen 1.7 eoon ko. [Raar] iokļo̧k Jisōs Kraist, emaron̄, emaron̄ 101 āt ko reoktak. … N̄e jej kile bwe juon eoon ejejet ilo juon jentōj, ej kwaļo̧k bwe jeban, ilo jon̄an, riiti ruo jantōj ilo Bok in Mormon ijelo̧kin lo jet jekjek kōn etan Jisōs” (Susan Easton Black, Finding Christ through the Book of Mormon [1987], 5, 15).

    “Ilo naan ko juon wōt ak pinmiuur, ilo jabdewōt jekjek ko aer, waļo̧k juon wōt alen ilo ukook eo an Kiin̄ Jemes ilo Kallim̧ur Ekāāl, rej waļo̧k 35 alen ilo Bok in Mormon. Āinwōt bar juon kallim̧ur in Jisōs Kraist, ej kwaļo̧k juon meram kōn Pinmuur eo An” (Russell M. Nelson, “The Atonement,” Ensign, Nov. 1996, 35).

22. Ro rej etal jen Kūrjin ilo Amedka rej ro reddik. “More than eight-in-ten members of the Silent Generation (those born between 1928 and 1945) describe themselves as Christians (84%), as do three-quarters of Baby Boomers (76%). N̄an keidi, jimettan in Millienial (49%) kōmeļeļeik er make āinwōt Kūrjin; four-in-ten are religious ‘nones,’ and one-in-ten Millennials identify with non-Christian faiths” (“In U.S., Decline of Christianity Continues,” pewforum.org).

23. Jon 12:46.

24. Lale Daniel 6:22.

25. Lale Jerbal 5:19.

26. Lale Luk 2:2–14

27. Lale Luk 22:42–43.

28. Lale Jerbal 1:9–11.

29. Lale Katak im Bujen Ko 13; 27:12–13; 110:11–16; Josep Smith—Bwebwenato 1:27–54.

30. Lale 1 Tessalonika 4:16–17; Katak im Bujen ko 88:96–98.

31. Matu 10:32.