Pukōt Kraist ilo Men Otemjeļo̧k
Tariņae ņae kapo ebōk juon tōre in mour an niknik im tiljek. Bōtaab jouj im jeļā bwe Irooj ej pojak n̄an jipan̄ kōj.
Ilo boem̧ in al in nōbar eo an, Rijeje Al in Jar eo ekar kwaļo̧k:
“O Jeova, Kwaar kallimjek eō im jeḷā eō.
“Kwō jeḷā aō jijet im aō jutak; Kwō jeḷā aō ḷōmṇak jān ettoḷọk.
“Kwō kallimjek aō iaḷ, im aō babu, im Kwō jeḷā iaḷ ko aō otemjej.” 1
Ilo jekjek in jeje naan ko me reier wōt juon ak jaab ilo boem̧ in, Rijeje al in jar eo ej nōbar bōnjān kwojarjar eo an Irooj kōn Jeļā Men Otemjej kōnke em̧ool E ejeļā aolep jekjek ko an jetōb ko ad. 2 Jān jeļā kōn aolep men ko me remenin aikuj n̄an kōj ilo mour in, Rilo̧mo̧o̧r eo ej kajjitōk ippād n̄an kappukōt E ilo aolep ļōmņak im ļoor E kōn aolepān būruōd. 3 Menin eletok n̄an kōj kallim̧ur eo bwe jemaron̄ etetal ilo meram eo An im bwe An tōl ej bōbrae kareel eo an maro ilo mour ko ad. 4
Pukōt Kraist ilo aolep ļōmņak im ļoor E kōn aolepān būruōd ej aikuj bwe jej kajim̧we ļōmņak eo ad im ikdeelel ko ippān ko An. 5 Jeje Ko Rekwojarjar rej kōnono kōn kajim̧we in āinwōt “jutak ilo Irooj.” 6 Menin aaet ej kwaļo̧k bwe jen wōnm̧aanļo̧k wōt ilo kōjeikik mour ko ad ilo jokkun wōt juon ippān gospel eo an Jisōs Kraist im raan otemjej kalimjōk wōt men ko me rem̧m̧an. 7 Innām wōt jen maron̄ bōk “aenōṃṃan jān Anij, eo ej eḷḷā jān jeḷā otemjej,” im eo enaaj “kōjparok bōro im ļōmņak ko [ad] ilo Jisōs Kraist.” 8 Rilo̧mo̧o̧r Make ekar jiron̄ elder ro an Kabun̄ in ilo Pāpode in 1831 eo, “Ko̧koņi men kein ilo būruōmi, im kejōkļo̧kjeņ ko rem̧wilaļ an indeeo ren pād ilo ļōmņak ko ami.” 9
Kōjekdo̧o̧n wōnm̧aanļo̧k wōt in kijejeto ko ad n̄an pukōt Irooj, ļōmņak ko rejekkar remaron̄ deļo̧n̄ ilo ļōmņak eo ad. N̄e kain ļōmņak rōt in rej kōtļo̧k im em̧ool karuwaineneik n̄an pād, remaron̄ ļam ikdeelel ko an būruōd im tōlļo̧k kōj n̄an ta eo jenaaj erom ilo mour in im āliktata n̄an ta eo jenaaj jolete n̄an indeeo. 10 Elder Neal A. Maxwell ekar kōmejajaik juon alen pedped in katak in kōn ba, “Ikdeelel ko … rej barāinwōt ļōm̧ake ta eo ej waļo̧k, ekoba etke ‘elōn̄ kar kūr, ak eiet ro kar kāālet.’” 11
Rikanaan ro ad etto im raan kein rekar jokkun wōt juon ilo kakeememej kōj n̄an jum̧ae kapo n̄an ad maron̄ joļo̧k luuji kajoor ilo jetōb eo ad im erom tarpok, jōbwābwe, im inepata.
Ilo kōnono kake, ron̄jake kapo ko ej āinwōt kepaakļo̧k juon jitūūļ ippān juon men aaen. Kajoor eo jab loe an jitūūl eo ej kan̄ōltok aaen eo im kanooj dāpiji. Jitūūl in ej luuji kajoor an wōt n̄e aaen eo likūti ettoļo̧k jāne. Kōn menin, ejja āinwōt jitūūļ eo ejjab maron̄ in kōjerbal kajoor eo an ioon juon men aaen ettoļo̧k, ilo ad joļo̧k kapo ko, rej makunļo̧k im jako kajoor eo aer ioon ļōmņak eo ad im būruōd im , kōn menin, ioon jerbal ko ad.
Waanjon̄ak in ej kakeememej eō kōn juon en̄jake kōn juon membōr in Kabun̄ in ekanooj in tiljek ekar kwaļo̧ke ippa jet iien remootļo̧k. Membōr in ekar jiron̄ eō bwe ke ekar rujļo̧k juon baj jibbon̄, juon ļōmņak ekōm̧aļōn̄ļōn̄ me ejjan̄in kar en̄jake m̧oktaļo̧k ilo ejjeļo̧k kōtmene ekar deļo̧n̄ ilo ļōmņak eo an. Men̄e ekar kōļo̧kjen an kōn bwilōn̄, liin ekar jum̧ae jekjek eo ilo būkin koļe ilo rom, ba n̄an e make n̄an ļōmņak eo, “Jaab!” im kar bōk jikin kōn juon men em̧m̧an n̄an ukōtļo̧k ļōmņak eo an jān ļōmņak eo ejjab ruwainene. Liin ekar jiron̄ eō bwe ilo an kar kōjerbal anemkwoj in kāālet eo an ilo mour in ilo jim̧we, ļōmņak ko renana, ekadu kitier ekar m̧ōkaj aer jakoļo̧k.
Ke Moronai ekar kūr ioon armej ro rej tōmak ilo Kraist im n̄an ukweļo̧k, ekar kakkōl er n̄an itok n̄an Rilo̧mo̧o̧r eo kōn aolepān būruier, joļo̧k aolep ļōmņak im kōm̧m̧an ko renana jān er. Eļapļo̧k, Moronai ekar karuwaineneik er n̄an kajjitōk ippān Anij, kōn juon kije eo ejjab maron̄ rup, bwe ren jab naaj wōtļo̧k ilo kapo. 12 Kōjerbal pedped in katak kein ilo mour ko ad ej aikuji eļapļo̧k jān jidik tōmak, bej aikuji oktak ilo ļōmņak ko ad im būruōd n̄an pedped in katak kein rekwojarjar. Kain okoktak kein ej aikuj juon kijejeto raan otemjej ejjab m̧ūjkōk an juon make, ilo kakobaba n̄an pedped eo ad ilo Rilo̧mo̧o̧r eo, kōnke kōn pedped eo ad ilo mour in ejjamin naaj jako kōn er make. Tariņae ņae kapo ebōk juon tōre in mour an niknik im tiljek. Bōtaab jouj im jeļā bwe Irooj ej pojak n̄an jipan̄ kōj ilo kiejejto ko ad make im ej kallim̧uri kōjeraam̧m̧an ko rekabwilōn̄lōn̄ eļan̄n̄e jej niknik n̄an jem̧lo̧k in.
Ilo baj juon iien epen ke Josep Smith im rikalbuuj ro m̧ōttan ilo Liberty Jail ekar ejjeļo̧k aer anemkwoj ilo jabdewōt men ijello̧kin kōn ļōmņak ko aer, Irooj ekar leļo̧k kapilōk eo ejipan̄ im juon kallim̧ur n̄an er me ej bar itok n̄an kōj aolep:
“Aolepān am̧ en barāinwōt obrak kōn iakwe-em̧ool n̄an armej otemjeļo̧k, im n̄an nukwin eo an tōmak, im erreo en kainōknōk ļōmņak ko am ilo ejjeļo̧k m̧wijkōk; innām am peran enaaj kanooj kajoor ilo im̧aan mejān Anij …
“Jetōb Kwōjarjar enaaj m̧ōttam iien otemjeļo̧k, im jokoņam̧ juon jokoņan wānōk im m̧ool ej jab ukoktak; im mo̧jen eo am enaaj juon mo̧jen ejjeļo̧k jem̧ļo̧kin.” 13
Ilo kōm̧m̧an āindein, ļōmņak ko rekwojarjar renaaj wōnm̧aanļo̧k wōt n̄an kōkōm̧anm̧anļo̧k ļōmņak ko ad im ikdeelel ko rōreeo naaj tōlļo̧k kōj n̄an jerbal ko rejim̧we.
Moronai ekar barāinwōt kakeememej armej ro an n̄an jab kalbubuik er kōn ļōn̄ ko aer. 14 Naan eo ļōn̄ ej keidi n̄an juon kōņaan ekajoor im ikdeelel jab jim̧we n̄an juon men. 15 . Ej koba jabdewōt ļōmņak ko remarok ak ikdeelel ko renana me rej kōm̧m̧an bwe juon armej en kalimjōk wōt iminene ko an ļōmņak kōn juon make ak m̧weiuk ko an laļ in ijello̧kin kōm̧m̧an em̧m̧an, jouj, kōjparok kien ko an Anij, ko eierļo̧k. Emakijkij an waļo̧k eļap tata ilo en̄jake ko an kanniōk an jetōb eo. Rijilōk Paul ekar kwaļo̧k jet iaan en̄jake kein, ko āinwōt etoon, ļōn̄, … kōjdat ko, … akwāāl ko, ebbanban ko, kiojaljal ko, … im ko āinwōt. 16 Ijello̧kin aolep jekjek in ļōn̄ ko renana, jen jab meļo̧kļo̧k bwe rikejdāt eo ej kōjerbale āinwōt kein tariņae eo an ettiņo̧ ņae kōj n̄e ej kajjieon̄ kapok kōj n̄an kōm̧m̧ane juon men ebōd.
Ro jeiū im jatū jitōn bōro, ij kam̧ool bwe ilo ad pedped ioon dekā in lo̧mo̧o̧r eo, Rilo̧mo̧o̧r eo an jetōb ko ad, im ļoor kapilōk eo an Moronai, ad maron̄ n̄an kōjbwebweik ļōmņak ko ad naaj lukkuun in ļapļo̧k. Imaron̄ kam̧ool n̄an kom̧ bwe ekeke eo ad ilo jetōb enaaj eddōkļo̧k ilo juon jon̄an eddōkļo̧k, ukōt būruōd, kōm̧m̧an bwe jen eromļo̧k āinwōt Jisōs Kraist. Ilo kakobaba, kareel eo an Jetōb Kwojarjar enaaj kajoorļo̧k im wōnm̧aanļo̧k wōt ilo mour ko ad. Innām kapo ko an rikōjdet eo, jidik kōn jidik, jenaaj mejaļiļo̧k kajoor ko aer iood, tōprak in juon m̧ōņōņō im mour ewenōkļo̧k.
N̄an ro me, kōj jabdewōt un, wōtļo̧k ilo kapo im rej jokwe ilo ilo jerbal ko rejjab jim̧we, ij kam̧ool n̄an kom̧ bwe ewōr juon iaļ n̄an ro̧o̧l, me ewōr kōjatdikdik ilo Kraist. Jejjo iiō ko remootļo̧k, ekar wōr aō iien em̧m̧an n̄an loļo̧k juon membōr in Kabun̄ eo an Jisōs Kraist aorōk eo ekar pad ilo juon iien ekanooj pen ilo mour eo an ālkin an kōm̧m̧ane juon jerawiwi eļap. Ke ikar lo e kein kajuon, ikar maron̄ lo juon būrom̧ōj ilo mejān, ippān tok juon kōjatdikdik emeram ilo paotok eo an. Lukkuun piktokin ekar kwaļo̧k juon bōro errān im oktak. Ekar juon Kūrijin ekitarre im kar kanooj kōjeraam̧m̧an jān Irooj. Ijo wōt ke, ekar kōtļo̧k an juon ļōmņak nana jodiki ļōmņak eo an, innām ekar bōkļo̧k n̄an bar jet men. Ilo an kar jino kijin̄en̄e im ļapļo̧k an kanemkwoj ļōmņak kein, ejjab tok ekar tōt okraer ilo ļōmņak eo an im kar jino eddōkļo̧k ilo būruōn. Āliktata ekar kōm̧m̧ani ikdeelel kein rōtoon, eo ekar tolļo̧k e n̄an kōm̧m̧ani jokāālet ko ņar aolep men ko me raar kanooj in aorōk ilo mour eo an. Ekar jiron̄ eō bwe eļan̄n̄e en kar jab kōm̧m̧an jikin ļōmņak bwebwe eo n̄an ijjino kake, ejjamin naaj kar erom aorōk im jedmatmat n̄an kapo ko an rikōjdāt eo—kapo ko me raar bōktok eļap būrum̧ōj ilo mour eo an, kōpetata in juon tōre in iien.
Jeraam̧m̧an, āinwōt nejin eo ejerwan ilo būrabōļ eo ebun̄bun̄ loe ilo gospel Luk, “ekar itok n̄an e make” im jerkak jān jekjek eo enanan. 17 Ekar kōkāāl lōke eo an ilo Irooj im kar en̄jake bōro eo erup im ekar wōr an ikdeelel n̄an āliktata bar ro̧o̧l n̄an oror eo an Irooj. Kōmro jim̧or ilo raan eo kar en̄jake iakwe in pinmuur eo an Rilo̧mo̧o̧r eo n̄an kōm. Ilo jem̧lo̧k kweilo̧k eo am ekadu, kōm kar jim̧or obrak kōn en̄jake, im n̄an rainin, ij keememej lan̄lōn̄ eo ekabwilōn̄lōn̄ ilo paotok eo an ke ekar ilo̧k jān opiij eo aō.
Ro m̧ōtta rejitōn bōro, n̄e jej jum̧ae kapo ko reddik, ko emarkijkij aer itok ilo jab kōtmene n̄an mour ko ad, ekanooj em̧m̧anļo̧k ad pojak n̄an joļo̧k jerawiwi ko reļļap. Āinwōt an Būreejtōn Spencer W. Kimball kar ba: “Jen jab ron̄jake jekdo̧o̧n ta kapo eo edik tata, eo ej kōpeļļo̧k kōjām eo n̄an eo eļapļo̧k. … ‘Juon meļaaj eo ejjeļo̧k ine ie [ejjab] ilo jidimkij [erom] ujoj e.’” 18
Ilo an kar kōppopo n̄an kadedeļo̧k mijen eo An ekwojarjar ioon laļ in, Rilo̧mo̧o̧r Jisōs Kraist ekar kōmejajaik aorōk eo an jokkun wōt juon ilo jum̧ae aolep men ko remaron̄ kabbwer kōj jān kakūrm̧ool jibadbad eo ad indeeo. Ālkin jejjo jodik ko rekar jab tōprak jān rikejdāt eo, eo ekar kajjieon̄ n̄an bōkļo̧k E jān mijen eo an, Rilo̧mo̧o̧r eo ekar kajju joļo̧k e kōn ba: “Kwōn ilọk, Setan. … Innām tepiḷ ej ilọk jān E, im lo, enjeḷ ro rej itōm jipañ e.” 19
Komaron̄ ke pijaikļo̧k, ro jeiū im jatū, ta eo enaaj kar waļo̧k eļan̄n̄e jaar maron̄ in bōk kajoor im peran eo jān Rilo̧mo̧o̧r eo im ba, “Jaab” im “Kwōn ilo̧k” n̄an ļōmņak ko retoon me juon alen rej itok n̄an ļōmņak ko ad? Ta eo enaaj kar jelet ikdeelel ko an būruōd? Ekōjkan an tōprak in jerbal ko ad naaj kar dāpij kōj epaake Rilo̧mo̧o̧r eo im kōtļo̧k an wōnm̧aanļo̧k wōt kareel eoa n Jetōb Kwojarjar ilo mour ko ad? Ijeļā bwe jān ļoor waanjon̄ak eo an Jisōs, jenaaj joļo̧k elōn̄ bōnja ko rekabūrom̧ōjm̧ōj im jerawiwi me remaron̄ kōm̧m̧ani jorrāān ko im jab errā ko an baam̧le, en̄jake ko renana im jibadbad ko, kōm̧m̧ani men ko relej n̄an ro jet, rikm̧akoko an an̄ūrlep ko renana, im jabdewōt bar men me renaaj jum̧ae kien ko an Irooj.
Ilo ennaan eo an epād ilo bwebwenato im eim̧we jān Eprōļ in iiō in, rikanaan eo ad ejitōn bōro, Būreejtōn Nelson M. Nelson, ekar kōm̧m̧ane juon kallim̧ur bwe aolep re me rej m̧ōņōņō in “ron̄jake E”—ron̄jake Jisōs Kraist—im pokake kien ko An “jeraam̧m̧an kōn kajoor eļapļo̧k n̄an jelm̧ae kapo ko, apan̄, im m̧ōjņo ko” im bwe maron̄ eo ad n̄an en̄jake lan̄lōn̄ enaaj ļapļo̧k, jekdo̧o̧n ilo iien an ļapļo̧k aen̄wān̄wā kiiō. 20
Ij kam̧ool n̄an ko̧m bwe kallim̧ur ko kar litok jān rikanaan eo ad ejitōn bōro rej kallim̧ur ko kar litok jān Rilo̧mo̧o̧r Make. Ij kajjitōk ippād wōj aolep n̄an “ron̄jake E” ilo aolep ļōmņak im ļoor E kōn aolepān būruōmi n̄an ami maron̄ bōk kōkajoor eo im peran eo n̄an ba, “Jaab” im “Kwōn ilo̧k” n̄an aolep men ko me remaron̄ bōktok n̄an kōj jab m̧ōņōņō eo ilo mour ko ad. Eļan̄n̄e jej kōm̧m̧an aindein, ij kallim̧ur bwe Irooj enaaj jilkinwaj Jetōb Kwojarjar eo An n̄an kōkajoorļo̧k im kaenōm̧m̧an kōj, im jemaron̄ erom armej kajjojo ālkin kōņaan eo an būruōn Irooj. 21
Ij kwaļo̧k aō kam̧ool bwe Jisōs Kraist ej mour im bwe kōn E, jemaron̄ anjo̧ ioon kareel ko renana an rikōjdāt eo im karbōb n̄an mour n̄an indeeo Ippān im ilo im̧aan mejān Jemād ilo Lan̄ eo ejitōn bōro. Ij kam̧ool kōn m̧ool kein kōn aolepān aō iakwe n̄an kom̧ im n̄an ad aiboojoj Rilo̧mo̧o̧r, eo etan ij leļo̧k aiboojoj, utiej, im nōbar indeeo im indeeo. Ij ba men kein ilo et eo ekwojarjar etan Jisōs Kraist, amen.