Anij Enaaj Kōm̧m̧ane Juon Men Jej Jab Kōtmene
Anij ekar kepooj ro Nejin im Kabun̄ in An ilo tōre in.
Ejjab to ālkin jikrōkļo̧k eo ilo Salt Lake Valley, Armej ro Rekwojarjar ilo Raan Ko Āliktata rekar jino kalōk tampeļ eo aer ekwojarjar Raar en̄jake raar lo juon jikin ijo remaron̄ kabun̄jar n̄an Anij ilo aenōm̧m̧an im eļļā jen matōrtōr.
Ijoke, ilo iien eo epaak an dedeļo̧k pedped eo an tampeļ eo, juon kumi in ritariņae an United States raar etal n̄an aer kāālet juon kabna kōn kipel.
Kōnke ritōl ro an Kabun̄ in rekar jab jeļā ewi jon̄an lāj in ritariņae ro, Brigham Young eaar karon̄ ro Rekwojarjar n̄an ko im kilbwin pedped eo an tampeļ eo.
Ijeļā jet iaan membōr ro an Kabun̄ in raar ļōmņak etke kijejeto ko aer n̄an kalōk aelōn̄ in kiin̄ eo an Anij ekar jab m̧ūjkōk aer jab tōprak.
Āliktata, kauwōtata eo eaar ellā, im pedped in tampeļ eo kar bar kwaļo̧ke im bar etale. Innām rikkal baineer ro rekar lo bwe jet iaan dōkā ko rekar kōk, ekōm̧m̧an bwe ren jab ekkar āinwōt juon pedped eo.
Ilo m̧ool, Brigham eaar kōņaan bwe ren jāniji pedped eo bwe en jurake dōka ko 1 itōrerein Salt Lake Temple. 2 Āliktata, ro Rekwojarjar rekar al al eo “Bedbed Eo E Bin” 3 kar jeļā bwe tampeļ ekwojarjar eo aer ekar ekkal ioon juon pedped eo epen me enaaj to kitien n̄an epepen ko.
Bwebwenato in emaron̄ katakin kōj elmen an Anij kōjerbal apan̄ n̄an kadedeļo̧k jibadbad ko An.
Juon Ajeded in Nan̄inmej Peļakin Laļ in
Eļan̄n̄e ainikien in ej arrome ļo̧k jekjek ko rekar waļo̧k me jej loi ippād rainin, ej kōnke āindein.
Ijeļā ewōr juon armej ej ron̄jake ak riiti naan kein aō ro rejjan̄in bōk ajeded in nan̄inmej in peļaakin laļ in.
N̄an ro rej jan̄ kōn jako eo an juon baam̧le ak ro m̧ōttan, jej jan̄ ippāmi. Jej akweļap n̄an Jemedwōj Ilan̄ n̄an kaenōm̧m̧an im jipan̄ kom̧.
Men ko aitok kitier an kūj in remootļo̧k jān ājmour an ānbwin. Elōn̄ baam̧le ko em̧ōj an jako aer jerbal im rej kor kōn kwōle, jab jeļā ta, im mijak. Jej nōbar kijejeto ko jab ļōmņak kōn e make an ekanooj lōn̄ n̄an bōbrae ajeded eo an nan̄inmej in. Jej ettā kōn kaarmejete eo im kijejeto ko rem̧m̧an an ro me raar likūt mour ko aer ilo kauwōtata n̄an jipan̄, kemour, im rejtake armej ro rej pād ilo aikuj. Būruwōd eobrak kōn kam̧m̧oolol kōn em̧m̧an im tūriam̧o eo ami.
Jej lukkuun jar bwe Anij en kōpeļļo̧k wintō ko an lan̄ im kobrak mour ko ami kōn kōjeraam̧m̧an ko indeeo an Anij.
Jej Ine ko
Ekanooj lōn̄ wōt men ko jab jeļā kake kōn kūj in. Ak eļan̄n̄e ewōr juon men ijeļā, en̄in ej bwe kūj in eban ankamjuri Jemedwōj Ilan̄. E ejjab aikuj in ain elōn̄ļo̧k jarin tariņae in enjeļ ro, kūr kweilo̧k ko reidin̄, ak kōjaaļ kein jipan̄ ko jān kar jibadbad eo aer ilo laļ in n̄an ņa mejļan aikuj eo jab kōtmene.
Ennaan eo aō rainin ej bwe men̄e ajeded in nan̄inmej in ejjab men eo jekar kōņaan ak kōtmene, Anij eaar kepooj ro Nejin im Kabun̄ eo An n̄an tōre in.
Aaet, jenaaj dipļo̧ke menin. Bōtaab enaaj ļapļo̧k ijo jōkōm̧m̧ane jān baj kij dekā in n̄iid, dāpdep wōt, im kōttar men ko n̄an aer bar ro̧o̧l n̄an iminene eo m̧okta. Jenaaj wōnm̧aanļo̧k wōt, im jenaaj em̧m̧anļo̧k āinwōt juon tōprak.
Ilo juon wāween, jej ine ko. Im kōn ine ko n̄an tōpar kōjatdikdik eo aer, rej aikuj kōtaki m̧okta jān aer maron̄ juļ. Ej aō kam̧ool bwe men̄e ilo iien ko jemaron̄ en̄jake libobo kōn mālijjon̄ ko an mour ak jepooļ jān en̄jake in marok, iakwe eo an Anij im kōjeraam̧m̧an ko an gospel eo kōjepļaaktok an Jisōs Kraist naaj bōktok juon men jab kōtmene kake n̄an an waļo̧k.
Kōjeraam̧m̧an ko rej Itok jān En̄taan
Aolep tōre in bōk eddo raar jelm̧ae iien ko an mālijjjon̄ im en̄taan.
Inōk im armej ro an raar jokwe ilo juon tōre enana, tariņae ko, im kōto̧o̧rļo̧k bōtōktōk. “A Irooj eaar itok im jokwe ippān armej ro An.” E ewōr men ko rekabwilōn̄lōn̄ ilo ļōmņak kōn er. Eaar jipan̄ er kajutak armej ro an—Zaion “ro rekar juon wōt ilo bōro im ļōmņak” ro rekar “jokwe ilo wānōk.” 4
Josep eo edik, nejin Jekab, kar joļo̧k ilo juon ro̧n̄, kar wia kake n̄an rikōm̧akoko ro, kaarmejete, im atajinemjen. 5 Josep emaron̄ kar ļōmņak eļan̄n̄e Anij eaar meļo̧kļo̧k e. Ekar wōr juon men jab kōtmene ippān Anij n̄an Josep. Eaar kōjerbal iien mālijjon̄ in n̄an kōkajoorļo̧k bōnjān Josep im likūt e ilo juon jerbal n̄an lo̧mo̧o̧ren baam̧le eo an. 6
Ļōmņak kōn Josep Smith Rikanaan eo ke eaar kalbuuj ilo Liberty Jail, ekōjkan an kar kajjitōk kōn jipan̄ eo n̄an Rikwojarjar ro rej en̄taan. Emaron̄ kar ļōmņak elmen an Zaion maron̄ kar jutak ilo jekjek ko. Ak Irooj eaar kōnono aenōm̧m̧an n̄an e, im revelesōn in eaiboojoj eaar bōktok aenōm̧m̧an n̄an ro Rekwojarjar—im ej wōnm̧aanļo̧k wōt n̄an bōktok aenōm̧m̧an n̄an kwe im n̄a. 7
Ewōr jete alen ilo iiō ko jinoin an Kabun̄ eo an Jisōs Kraist im Armej ro Rekwojarjar ilo Raan ko Āliktata an ro Rekwojarjar ebbwer im ļōmņak n̄e Anij eaar meļo̧kļo̧k er? Ak kōn matōrtōr ko, nana ko, im kamijak ko n̄an kakkure, Irooj Anij in Israel ebar wōr jet men ko ilo kōļmenļo̧kjeņ n̄an armej ro An. Juon men jab kōtmene kake.
Ta eo jaar ekkatak jān waanjon̄ak kein—im bukwi ro jet ilo jeje ko rekwojarjar?
Moktata, riwānōk ro reban bōk juon jinekjej bwe ren jab etal ilo koṃlaḷ in annañin mej. Jej aolep ioon en̄taan ko ilo iien ko reppen, em̧ool tōre in apan̄ kein me jej ekkatak kōn pedped ko me rekōkajoor m̧wiļid im kōm̧m̧an bwe jen epaakeļo̧k Anij.
Kein karuo, Jemedwōj Ilan̄ ejeļā bwe jej en̄taan, im kōnke jej ajri ro Nejin, E eban katajinemjene kōj. 8
Ļōmņak kōn eo ejouj, Rilo̧mo̧o̧r eo, eo ekar joļo̧k eļap iien ilo jerbal in kwaļo̧k eo An n̄an rinan̄inmej ro, ro rajimakeke, pere, im ebweer. 9 Kwoj ļōmņak E edikļo̧k an inepata kōn kwe rainin?
Ro m̧ōtta rejitenbōro, ro jeiū im jatū rejitenbōro, Anij ej lale im oņaake eok ilo iien kein reppen me jab jeļā kaki im rekamijak. Ejeļā kajjeem̧. E ej ron̄jake am jar. E etiljek im kōjatdikdik kake. E enaaj kakūrm̧ool kallim̧ur ko An.
Ewōr juon men jab kōtmene kake ippān Anij n̄an kwe make im n̄an aolepān Kabun̄ eo—juon jerbal ekōppaļpaļ im kabwilōn̄lōn̄.
Kimij Kamolol Yuk, O Anij, Kin Juōn Dri Kanaan
Raan ko ad rem̧m̧antata repād im̧aan, ejjab itulikid. En̄in ej etke Anij ej letok n̄an kōj revelesōn ilo raan kein! N̄e ejako, mour emaron̄ in āinwōt keļo̧k ilo juon jekjek eo āliji, kōttar n̄an an tab eo jako bwe jen maron̄ jok ilo ejjelo̧k jorrāān. Jibadbad ko an Irooj n̄an kōj eļapļo̧k an aorōk jān in. Kōnke en̄in ej Kabun̄ eo eo an Kraist eo emour, im kōnke Ej tōl rikanaan ro An, jej bun̄ m̧aanļo̧k im lōn̄ļo̧k n̄an jikin ko jejjan̄in kar pād ie, n̄an utiej ko epen ad maron̄ arromiļo̧k!
Kiiō, ejjab meļeļein bwe jeban ioon ekajkaj ilo baluuņ eo waad ilo mour wabanban. Ejjab meļeļein bwe eban wōr likjab ko jab kōtmeni kake, jab jetjet an jerbal injin ko, ak apan̄ ko an katu eļap. Ilo m̧ool, men ko remaron̄ nana ļo̧k m̧okta jen aer em̧m̧anļo̧k.
Āinwōt juon fighter pilot im kapen in baļuun, iaar ekkatak bwe n̄e ijab maron̄ kāālet apan̄ eo inaaj ioon ilo flight eo, imaron̄ kāālet elmen aō kar keppopo im elmen aō kar jerbale. Ta eo aikuji ilo iien kein reppen ej ineem̧m̧an im lōke mejān iruj.
Elmen ad kōm̧m̧ane menin?
Jej ioon m̧ool ko im ro̧o̧lļo̧k n̄an pedped in katak ko, n̄an pedped in katak ko m̧oktata an gospel eo, n̄an ta eo eļapl tata tokjen. Kwon kōkajoorļo̧k m̧wil in kabun̄ eo am̧ make—āinwōt jar im ekkatak jeje ko rekwojarjar im kōjparok kien ko an Anij. Kwon kōm̧m̧ani kālet ko pedped ioon imminene ko am̧ rem̧m̧an tata.
Mije wōt men ko kwomaron̄ kōm̧m̧ani im jab men ko koban kōm̧m̧ani.
Kwon ain tōmak eo am̧. Im kwon ron̄jake naan in tōl eo an Irooj im rikanaan eo An n̄an tōl eok n̄an jokne.
Keememej, en̄in ej Kabun̄ eo an Jisōs Kraist—E ej ilo jila in.
Ļōmņak kōn elōn̄ wōnm̧aanļo̧k ko reim̧we me rekar make waļo̧k m̧okta. N̄an kwaļo̧k jejjo̧ iaer:
-
Kwojkwoj eo kar bar kapene āinwōt unjen kabun̄jar eo ad ilo Jabōt.
-
Itok, Ļoor Eō kar letok āinwōt juon pedped-ilo m̧weo, rie jān Kabun̄ in kein jerbal n̄an kōkajoorļo̧k kajjojo armej im baam̧le ko.
-
Jaar jino juon men eaorōkļo̧k im wāween ekwojarjarļo̧k an jerbal in karejar n̄an aolep.
-
Jerbal eo an kein tōknalōji ko raan kein n̄an kwaļo̧k gospel eo n̄an kōm̧m̧ane jerbal eo an Irooj em̧ōj an ajedeed ilo aolepen Kabun̄ in.
Men̄e m̧wen̄an eo an kweilo̧k eo eļap eban kar jerbal n̄e eban kar kein jerbal kein rem̧m̧an.
Ro jeiū im jatū, ilo an Kraist pād ilo jila in, men ko reban wōt em̧m̧an; renaaj kabwilōn̄lōn̄.
Jerbal in Aiintok Israel ej Wōnm̧aanļo̧k Wōt
Ilo jinoin āinwōt ajedeed in nan̄imej in ipeļaalkin laļ in enaaj erom̧ juon men in bōbrae jerbal eo an Irooj. N̄an waanjon̄ak, wāween kwaļo̧k gospel eo ekar jab pidodo. Ijoke, ajeded in nan̄inmej in ej kwaļo̧k wāween ko rekāāl im eļapļo̧k n̄an tōpar ro em̧ool būruweer. Jerbal in aiintok Israel ej ļapļo̧k an kajoor im kam̧ōņōņō. Bukwi im taujin bwebwenato ko rej waļo̧k.
A m̧ōttam̧ eo em̧m̧an ej jokwe ilo Norway eaar jeje tok n̄an Harriet im n̄a kiiō epaak kōn ļapļo̧k in peptaij ko. “Ilo jikin ko ijo Kabun̄ in edik ie,” liin eaar je, “radikdik ko renaaj erom branch, im branch ko renaaj erom ward!!”
Ilo Latvia, juon kōrā ekar lo Kabun̄ in ilo an kar baj lale intōrnet ekar m̧ōņōņō in ekkatak kōn gospel eo an Jisōs Kraist me ekar jadetok n̄an jikejuuļ eo an juon awa m̧oktaļo̧k, im m̧okta jen an mijinede ro kōjem̧ļo̧k katak eo jino tata liin ekar kajjitōk kōn juon iien n̄an peptaij.
Ilo Eastern Europe, juon kōrā eaar bōk juon kūr jen mijinede ro, “Sisters, etke kwaar jab kooļ m̧oktaļo̧k? Ilakkar kōttar!”
Elōn̄ iaan mijinede ro ad eļapļo̧k aer boup jen m̧okta. Elōn̄ rej katakin elōn̄ļo̧k armej jen m̧okta. Ewōr juon ļapļo̧k in ekkejel ikōtaan membōr ro im mijenede ro.
Ilo jem̧aan, jemaron̄ in kar kanooj ekkejel n̄an jekjek in kepaak ko iminene kaki me ekar bōk juon ajeded in nan̄inmej n̄an kōpeļļo̧k mejād n̄an jekjek ko rekāāl. Bōlen jej ekkal wōt kōn dōkā n̄e dōka in to̧l ko rekar pād kadede. Kōn aikuj in, jej kiiō ekkatak kilen kōjerbal juon kōl em̧m̧anļo̧k, ekoba kein kapeel ko, n̄an karuwaneneik armej ro—āinwōt jinion im wāween ko rekkar—n̄an itok im lale, itok im jipan̄, im itok im pād.
Jerbal eo An, Wāween ko An
En̄in ej jerbal eo an Irooj. E ej kūr kōj n̄an pukot wāween ko An n̄an kōm̧m̧ane, im remaron̄ oktak jen en̄jake ko ad m̧okta.
Ekar waļo̧k n̄an Simōn Piter im rijilōk ro jet ro raar ilo̧k im eo̧n̄ōd ilo Ļom̧alo in Tiberiōs.
“Ilo bon̄ eo ejjeļo̧k kuņaer.
“A ke jimmarok [ekar itok], Jisōs ej jutak ioon parijet. …
“Im E ba n̄an er, Kom̧win door ok i [anmooņōn] im kom̧ naaj lo.”
Raar door ļo̧k ok i anmooņōn im “ban tōbwe, bwe elōn̄ ek.” 10
Anij eaar kwaļo̧k im enaaj wōnm̧aanļo̧k wōt im kwaļo̧k Pein ekajoor bōtata. Raan eo enaaj itok n̄e jenaaj reilikļo̧k im jeļā bwe ilo iien apan̄ in, Anij ekar jipan̄ kōj n̄an pukot iaļ ko rem̧m̧anļo̧k—iaļ ko An—n̄an kalōk aelōn̄ in kiin̄ eo An ilo juon pedped eo epen.
Ij kwaļo̧k aō kam̧ool bwe en̄in ej jerbal eo an Anij im E enaaj wōnm̧aanļo̧k wōt n̄an kōm̧m̧ane elōn̄ men ko rekabwilōn̄lōn̄ ilbwiljin ro Nejin, armej ro An. Anij ej dāpij kōj ilo utiej im oņaake im pein jouj ko An.
Ij kam̧ool bwe Būreejtōn Russell M. Nelson ej rikanaan an Anij ilo tōre in ad.
Āinwōt juon Rijilōk an Irooj, ij kajjitōk im kōjeraam̧m̧an kom̧ n̄an “kōm̧m̧ani aolep men kein ilo m̧ōņōņō ko im rej pād ilo ad kajoor; innām jen jutak pen, kōn jeļā ekanooj dim, n̄an lo lo̧mo̧o̧r an Anij, im n̄an an kwaļo̧k pein.” 11 Im ij kallim̧ur bwe Irooj enaaj kōm̧m̧an bwe men ko jab kōtmene kake naaj itok jān jerbal ko ami rejimwe. Ilo etan Jisōs Kraist, amen.