Aolep Laļ ko, Bwij ko, im Lo ko
Jemaron̄ erom̧, ilo wāween eo ad make, m̧ōttanļo̧k kūrm̧ool in kanaan ko an Irooj im kallim̧ur ko—m̧ōttanļo̧k an gospel eo kōjeraam̧m̧an laļ in.
Ro jeiū im jatū jitōnbōro, raan ko ļo̧k ikar bōk koņaaō ilo juon iien liāp ilo tampeļ, ļoor laajrak in tōl ko an COVID-19. Ippān lio im ļeo pālele, me erro kar jim̧or mijenede ro retiljek, ekar bar pād ippāer ro jineer im jemāer im ro jeier im jatier. Menin eaar jab pidodo. Lio ej m̧are ej kein karatimjuon iaan jon̄oul ajri. Ajri ro jein im jatin ruatimjuon rekar jijet ekkarōk, jān rūtto n̄an diktata, rekar jijet ettoļo̧k jān doon.
Baam̧le eo ekar kajjieon̄ bwe ren jet armej ro rem̧m̧an n̄an ro rūtūrier ijoko rej jokwe ie. Ijoke, juon jukjukin pād rekar jab lukkuun karuwaineneik er—kōnke, jinen leddik eo ej m̧are ekar ba, baam̧le eo aer rej membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Baam̧le eo ekar kōm̧m̧an aolep men n̄an m̧ōttāik er ilo jikin jikuuļ, leļo̧k jipan̄, im kakarōkrōk, ak ejjeļo̧k tōprak. Baam̧le eo ekar jar im bar jar bwe en pelļo̧k buruōer.
Juon jota, baam̧le eo ekar en̄jake bwe jar eo aer ekar uwaak, men̄e ilo juon wāween eo me kar jab kōtmene. Mweo m̧ōer ekar bwil im lukkuun maat n̄an laļ. Ak bar juon men ekar waļo̧k. Kijeek eo ekar kōm̧m̧an bwe en pelļo̧k buruōn ro rūtūrier.
Ro rūtūrier im jikin jikuul eo ijo rej pād ie rekar aiin tok nuknuk ko, juuj ko, im menin aikuj ko jet remenin aikuj n̄an baam̧le eo, me ekar bwil men ko m̧weier. Jouj ekar kōpelļo̧k jeļā eo aer. Ekar jab juon wāween eo baam̧le eo ekar kōjatdikdik kake ak kōtmene ke jar ko aer ren kar uwaak. Ijoke, rej kwaļo̧k kam̧m̧oolol kōn ta eo rekar ekkatak kōn en̄jake ko reppen im uwaak ko jab kōtmeni n̄an jar ko kōn juon bōro em̧ool.
Em̧ool, n̄an ro buruōer im mejaer retiljek n̄an loļo̧kjeņ, iakwe in tūriam̧o eo an Irooj rej kwaļo̧k ilubwiljin apan̄ ko an mour in. Ro retiljek rej ioon apan̄ ko im kaarmejet ko me rej bōktok kōjeram̧m̧an ko an lan̄. Ilo mour in, jemaron̄ luuji ak kōttar jet men ko ium̧win juon iien eaitok, ak ilo jem̧ļo̧kin jenaaj lo ta eo eļaptata an aorōk. 1 En̄in ej kallim̧ur eo An. 2
Naan in kean̄ eo ad n̄an kakeememej 200 iiō in jepļaaktok eo an gospel eo ej jino kōn juon kallim̧ur ekabwūlōn̄lōn̄ “Anij ej iakwe ajri ro Nejin ilo aolep laļ ko ilo laļ in.” 3 N̄an kōj kajjojo ilo aolep laļ ko, bwij, kajin, im armej, 4 Kallim̧ur, im bujen ko an Anij, im kūr ko rej karuwaineneik kōj n̄an en̄jake lan̄lōn̄ im em̧m̧an eo an Eļap.
Iakwe eo an Anij n̄an aolep armej ej kam̧ool ilo jeje ko rekwojarjar. 5 Bwe iakwe ej jepooļe bujen ko an Ebream, aiintok ajri ro Nejin me rejepelōklōk, 6 im karōk eo An ekam̧ōņōņō ilo mour ko ad.
Ilo m̧ōn ritōmak ejjeļo̧k ruwamāejet, ejjeļo̧k ri ito-itak, 7 ejjeļo̧k rim̧weie im rijeram̧ōl, 8 ejjeļo̧k ej atajinemjen. Āinwōt “citizen ippān ro rem̧m̧an,” 9 kar kūr kōj n̄an kōm̧m̧an oktak ilo laļ in n̄an em̧m̧anļo̧k eo, jān men ko reddik, juon armej, juon baam̧le, juon rūtūrūm̧ ilo juon iien.
Menin ej waļo̧k n̄e jej mour im kwaļo̧k kōn gospel eo. Jinoin ilo epepen in, Rikanaan Josep ekar bōk juon kanaan ekabwūlōn̄lōn̄ bwe Jemedwōj Ilan̄ ej ikdeleel bwe aolep armej ilo aolep jikin ren lo iakwe eo an Anij im en̄jake kajoor eo An n̄an eddōkļo̧k im oktak.
Kanaan eo kar bōk ijin, ilo m̧weo im̧ōn baam̧le eo an Smith ilo Palmyra, New York. 10
Kar kadedeikļo̧k ilo 1998, m̧weo im̧ōn Smith kar kalōke ilo ejja ioon pedped eo an jinoin tata. Jikin kiki in ilōn̄ ej kabwe ejja 18 kōn 30 kōn 10-ne (5.5 kōn 9 kōn 3m) meļwan jikin eo ijo Moronai, āinwōt juon ribōkto bōktak enaan ekwojarjar jān Anij, kar itok n̄an ļaddik jidikdik in Josep ilo joteneen Jeptōm̧ba 21, 1823. 11
Kwoj keememej ta eo Rikanaan Josep ekar ba:
“[Moronai] eaar ba … Anij ekar wōr juon an jerbal n̄an eō n̄an kōm̧m̧ane; im bwe eta naaj watōke kōn em̧m̧an im nana ilubwiljin aolep laļ ko, nokwe ko, im lo ko. …
“[Moronai] eaar ba ekar wōr juon bok kar doore, … bwe tarlep in Gospel eo ejjeļo̧k jem̧ļo̧kin ekar pād ie.” 12
En̄in jej bōjrak jidik. Jej kabun̄ jar n̄an Anij Indeeo im Eo Nejin, Jisōs Kraist, ejjab Rikanaan Josep ak bar jabdewōt em̧m̧aan ak kōrā ilo laļ in.
Aaet, ļōmņak kōn kanaan ko me Anij ekar leļo̧k n̄an ro Rikarejeran me em̧ōj an kūrm̧ool. 13 Jet rekar kūrm̧ool m̧oktaļo̧k, jet rekar kūrm̧oool tokālik, ak aolepeer raar kūrm̧ool. 14 Ilo ad eo̧ron̄ jetōbin kanaan eo Irooj, jemaron̄ erom̧, ilo iaļ ko ad make, m̧ōttanļo̧k kūrm̧ool in kanaan ko An im kallim̧ur ko—m̧ōttan kōjeraam̧m̧an eo an gospel eo ilo laļ in.
Ilo 1823, Josep ekar juon eo ejabun̄bun̄ ke ekar juon ļaddik eo me 17 an iiō eo im ekar jokwe ilo bukwōn eo ejeja rejeļā kake ilo juon laļ eo ilo ej kab jeņoļo̧k make iaan. N̄e enkar jab m̧ool, ewi wāween an kar make ba enej erom̧ juon eo ej kein jerbal ilo jerbal eo an Irooj im ukot jeje ko rekwojarjar kōn menin letok eo an Anij me enaaj bun̄bun̄ aolep jikin?
Aaet, kōnke em̧ool, kwe im n̄a jemaron̄ kam̧ool bwe kanaan ko rej kūrm̧ool em̧ool n̄e kūr kōj n̄an kakūrm̧oole.
Ro jeiū im jatū, ilo aolepān laļ in, kōj kajjojo jej bōk koņaad ilo Oktoba 2020 Kweilo̧k eo Eļap ilubwiljin laļ ko, bwij ko, im kajin ko me kar kōnono kaki.
Rainin, ro uwaan Kabun̄ eo an Jisōs Kraist im Armej ro Rekwojarjar ilo Raan ko Āliktata ilo 196 laļ ko im jikin ko, kōn 3,446 stake ko an Kabun̄ in ilo 90 iaan laļ ko. 15 Jej jutak kōn jikin im kajoor.
Ilo 1823, wōn ekar baj pijaikļo̧k bwe ilo iiō eo 2020 enaaj wōr 3 laļ ko me kajjojo kōn elōn̄ļo̧k jān juon milien membōr ro ilo Kabun̄ in—Amedka, Mexico, im Brazil?
Ak 23 laļ ko kajjojo kōn elōn̄ļo̧k jān 100,000 membōr ro an Kabun̄ in—jilu ilo North America, jon̄oul emen ilo Central im South America, juon ilo Europe, emen ilo Asia, im juon ilo Africa? 16
Būreejtōn Russell M. Nelson ej ņa etan Bok in Mormon “juon menin bwūlōn̄ ekabwūlōn̄lōn̄.” 17 Rikam̧ool ro an rej kam̧ool, “Aolep laļ ko, bwij ko, lo ko, im armej, ro rej jerbal in naaj ilo̧k, ren jeļā.” 18 Rainin, kweilo̧k eo eļap ej pojak ilo 100 kajin ko. Būreejtōn Nelson ekar kwaļo̧k an naan in kam̧ool ilo 133 laļ ko im ko jet kōn Jisōs Kraist im gospel eo an me em̧ōj an jepļaaktok.
Jino kōn 5,000 kape ko jinion tata ko em̧ōj būriini an Bok in Mormon, jet 192 milien kape ko in aolep ak m̧ōttan Bok in Mormon me em̧ōj an publish ilo 112 kajin ko. Ukook eo an Bok in Mormon rej barāinwōt pojak ilo digital. Ukook eo an Bok in Mormon raan kein ekoba eiten aolepān 23 kajin kōjerbal ko rej kōjerbali jān 50 milien armej ro ak eļapļo̧k, kobaik kajin ko an jikin ko an 4.1 bilien armej. 19
Kōn men ko reddik im reļam waan—eo me kar karuwaineneik kōj kajjojo n̄an bōk koņaad—men ko reļļap renaaj kūrm̧ool.
N̄an waanjon̄ak, ilo juon kweilo̧k eļap ilo Monroe, Utah, oran armej ro ie 2,200, ikar kajjitōk ewōr jete rekar mijen. Eiten aolep pā rekar jutak. Ilo iiō ko kiiō, jān ejja stake in wōt, 564 mijenede ro rekar jerbal ilo aolep 50 states ko an Amedka im 53 laļ ko—ilo aolep laļ ko reļļap ijjeļo̧kin Antarctica.
Kōnono kōn Antarctica, barāinwōt ilo Ushuaia, ilo ijoko itulaļ in Argentina, ikar lo an kanaan ko kūrm̧ool āinwōt an mijenede ro kwaļo̧k gospel eo an Jisōs Kraist me em̧ōj an jepļaaktok ilo juon jikin etan “jem̧ļo̧k ko ilo laļ.” 20
Pija jin̄n̄a eo ej ejaak jān kabar in bok ko emen Saints 21 ej kwaļo̧k juon m̧ōttan in nuknuk eo em̧ōj jin̄n̄a im kaiņōkņōki kwaļo̧k kōn kōjeraam̧m̧an ko me rej itok n̄an membōr ro retiljek ilo aer mour kōn gospel eo ilo aolep jikin. Bwebwenato in kabun̄ in ad ej emjak ilo naan in kam̧ool ko remour im iaļ in gospel eo an kajjojo membōr, ekoba Mary Whitmer, sister eo etiljek n̄an eo me Moronai ekar kwaļo̧k pileij ko an Bok in Mormon. 22
Itok ilo Jānwōde 2021, māākjiin ko jilu rekāāl an Kabun̄ in peļaakin laļ in—Eo M̧ōtta, N̄an Kōkajoorļo̧k Jodikdik ro, im Liaona—ej karuwaineneik aolep n̄an kobaļo̧k im kwaļo̧k ilo jukjuk in pād ko ad ritōmak ro ipeļaakin laļ in. 23
Ro jeiū im jatū, ilo ad kōļapļo̧k tōmak eo ad ilo Jemedwōj Ilan̄ im Jisōs Kraist, mour kōn m̧ool ko an gospel in me em̧ōj an jepļaaktok im bōk bujen ko rekwojarjar, im ekkatak, kejo̧kļo̧kjeņ, im kwaļo̧k kōn Jepļaaktok eo me ej wōnm̧aanļo̧k wōt, jej bōk koņaad ilo kakūrm̧ool kanaan eo.
Jej kōm̧m̧an oktak ilo mour ko ad im ilo laļ in ilo juon jon̄ak an gospel in me ej kōjeraam̧m̧an mour ko ad aolep jikin.
Juon sister in Africa ekar ba, “Jipan̄ in Priesthood eo an ļeo ippa ekar kōm̧m̧an bwe en ļapļo̧k an kijenmej im jouj. Im ikar erom̧ juon kōrā in pālele im juon m̧am̧a eo em̧m̧anļo̧k.
Juon consultant ewōr an pejnej ilo Central America ej ba m̧okta jān an kar jeļā kōn gospel eo an Anij me em̧ōj an jepļaaktok, ekar mour ilo an ejjeļo̧k un ilo iaļ ko. Kiiō e im baam̧le eo an rekar lo kadakdier, tokjeer, im aer kajoor.
Juon ļaddik jidikdik ilo South America ej nejnej bao im wia kake lep ko lepin bao ko n̄an jipan̄ wia winto in m̧weo m̧ōn baam̧le eo an me ej kalōke. Ej kōļļā juon m̧ōttan jon̄oul m̧oktata. Enej lukkuun lo an winto in lan̄ pelļo̧k.
Ilo Kona ko Emen, ilo tulaļ turōk in Amedka, juon baam̧le in ri Native Amedka rej kaddōk wūt ko raibojooj n̄an kabbōli ilo āne jem̧aden ko, kōkaļļein tōmak ilo gospel im un̄n̄are peid make.
Juon eo ekar mour jān juon iien tariņae ekauwōtata, juon bratōr ilo Tulaļ turōk ilo Asia ekar likit bwe mour in ejjeļo̧k kōjatdikdik kake. Ekar lo kōjatdikdik ilo juon ettōņak eo me kar juon an kūlaajmate ekar jibwe tūre in kwojkwoj im kar kam̧ool kōn kain̄i in lo̧mo̧o̧r ko im Pinmuur eo an Jisōs Kraist.
Jemedwōj Ilan̄ ej karuwaineneik kōj aolep jikin n̄an en̄jake iakwe eo An, n̄an ekkatak im eddōkļo̧k ilo jeļāļo̧kjeņ, jerbal ko rem̧m̧an, jipan̄ ūn̄n̄are peid make, jon̄ak ko kōn em̧m̧an ko im m̧ōņōņō ko jej loe ilo Kabun̄ in me em̧ōj an jepļaaktok.
Ilo ad lōke Anij, jet iien kōn akweļap ilo iien ko remarok, reajimakeke, im retarpok, jej ekkatak bwe E ejeļā wōn kōj im ej iakwe kōj eļapļo̧k jān ad jeļā ak iakwe kōj make.
En̄in ej unin ad aikuj jipan̄ eo an Anij n̄an ejaak kajim̧we, jon̄an wōt juon, jab kalijōkļo̧k, im aeņōm̧m̧an ilo m̧ōko im jukjuk in pād ko. Moolin, m̧wūlaļ, lukkun m̧ool in bwebwenato, jikin, im ijo jene ej waļo̧k n̄e jej en̄jake iakwe in lo̧mo̧o̧r an Anij, kappukot jouj im menin bwūlōn̄ ko kōn Pinmuur eo an Eo Nejin, im ejaake jem̧jerā ko n̄an indeeo kōn bujen ko rekwojarjar.
Em̧m̧an im māletlet an kabun̄ remenin aikuj ilo laļ eo etarpok, ekauwaron̄ron̄, im ettoon. Ebar ewi wāween jemaron̄ kōkāāl, im̧we, im kōketak jetōb an armej? 24
Ekkat wōjke ilo Haiti ej make wōt juon ilubwiljin bukwi waanjon̄ak ko in an armej aiin doon n̄an kōm̧m̧an em̧m̧an. Jukukin pād ko, ekoba 1,800 membōr ro an Kabun̄ in ad, eo me ej leļo̧k jipan̄ kōn elōn̄ wōjke ko, kar koba ippān doon n̄an katōk epaak 25,000 wōjke ko. 25 Būrajāāk in ekkat wōjke in ekar kadede katōk elōn̄ļo̧k jān 121,000 wōjke ko. Ej kōtmene n̄an katōk bar jon̄oul jima to̧ujin.
Koba in kijejeto ej bōktok ellur, dāpij bwidej ko, im kadikļo̧k ibwijleplep ilju im jekļaj. Ej kaibojooj melaaj ko turin m̧ōko m̧ōd, kalōk jukjuk in pād ko, bōktok nem ko rem̧m̧an, im naajdik jetōb ko ad. Eļan̄n̄e kwoj kajjitōkin ri Haiti ro wōn eo enaaj bōk leen wōjke kein, rej ba, “Jabdewōt eo ej kwōle.”
80 jima būjāān in oran armej ilo laļ in rej tōmak ilo kabun̄ ko. 26 Doulul ko an kabun̄ em̧ōkaj aer kajju eo̧ron̄ aikuj in idin̄ ko ālkin iien kakkure itok jān nana in mejatoto barāinwōt aikuj ko n̄an m̧ōn̄ā, jikin jokwe, jeļāļo̧kjeņ, jeļā riit im jeje. Ilo aolepān laļ in, membōr ro ad, ro m̧ōttad, im Kabun̄ in rej jipan̄ jukjuk in pād ko rie ro rejipokwe im rej leļo̧k aibōj, kein karreo, wa ko waan ro rejaje m̧akūtkūt, im ad loļo̧kjeņ—juon armej, juon bukwōn, juon wōjke ilo juon iien. 27 Aolep jikin, jej kappukot n̄an erom̧ m̧am̧a im baba ro rem̧m̧an im citizen ro rem̧m̧an, n̄an jipan̄ ilo ijoko jej jokwe ie im jukjuk in pād ko, ekoba kōn Kein Jipan̄ ko an Armej ro Rekwojarjar ilo Raan Ko Āliktata. 28
Anij ej letok n̄an kōj anemkwoj in kāālet—im ad bōk eddo. Irooj ekar kwaļo̧k, “N̄a, Irooj Anij, Ij kaanemkwōj kom̧, kōn menin kom̧ij lukkuun anemkwōj.” 29 N̄an kajedeed “anemkwōj eo me kar kaanemkwōj kom̧,” 30 Irooj ej kallim̧m̧ur bwe iaļan Pinmuur im gospel eo An emaron̄ jalōt to in jem̧jerā ko an mour in im mour in jetōb. 31 Ilo tūriam̧o, anemkwoj in lo̧mo̧o̧r in ej em̧ōj erļo̧ke n̄an ro em̧ōj aer jako jān mour in.
Jet iiō ko rem̧ootļo̧k, juon priest ilo Central America ekar ba n̄an n̄a ke ekar ekkatak kōn “peptaij kōn ro remej” an Armej ro Rekwojarjar ilo Raan Ko Āliktata. “Ejim̧we ilo ad pijaikļo̧k,” priest eo ekar ba, “bwe Anij enaaj kar letok n̄an kajjojo armej iien ko rem̧m̧an n̄an peptaij, jekdoon n̄aat ak ia eo rej jokwe ie, ijjeļo̧kin ajri jiddik ro, ro me ‘rej mour ilo Kraist.’ 32 Rijilōk Paul,” priest eo ekar je “kōnono kōn armej ro remej rej kōttar peptaij im jerkakpeje.” 33 Kallim̧ur eo kōn kain̄i ko n̄an jerbal n̄an ro remej aolep laļ ko, bwij ko, im lo ko bwe ejjeļo̧k juon ej aikuj jab “pād wōt ilo kam̧akoko an mej, hell, ak an lōb.” 34
Ilo ad lo Anij, jet iien uwaak ko n̄an jar ko an rej bōk kōj jān kepoon in iaļ ko, bōktok kōj n̄an jukjukin pād eo, jutoļo̧k marok jān jetōb ko ad, im tōl kōj im kappukot likapejn̄ak an jetōb im pād ilo em̧m̧an ko an bujen ko An im iakwe eo ejjeļo̧k jem̧ļo̧kin.
Men ko rem̧m̧an ekkā an dik, ak menin būlōn̄ ko an Anij rej waļo̧k aolep raan. Jej lukkuun kam̧m̧oolol kōn menin letok eo an Jetōb Kwojarjar, Pinmuur eo an Jisōs Kraist, im katak ko An kar litok, kain̄i, im bujen ko kar loi ilo jerbal Kabun̄ in, me em̧ōj an jepļaaktok me kar etņake kōn Etan.
Kōjatdikdik bwe jen lan̄lōn̄ ilo ad eo̧ron̄ kūr eo an Anij n̄an bōk im jipan̄ kakūrm̧ool kōjeraam̧m̧an ko kar kallim̧ur im kanaan kake ilo aolep laļ ko, armej, im kajin ko, ij jar ilo etan Jisōs Kraist, amen.