1 Eo̧ron̄, O kom̧ armej ro an kabun̄ eo Aō, ro n̄an er aelōn̄ eo em̧ōj leļo̧k; kom̧in eo̧ron̄ im letok lo̧jiln̄ōmi n̄an E eo eaar door pedped eo an laļ, eo Eaar kōm̧anm̧an lan̄ ko im aolep men ko kobban, im eo jān E aolep men otemjeļo̧k rekar kōm̧m̧an ko rej mour, im m̧akūtkūt, im ewōr juon biktokier.

2 Im bar juon alen Ij ba, eo̧ron̄ e naan eo Aō, n̄e mej eab anjo̧ ioomi; im ilo awa eo n̄e kom̧ij jab ļōmņak bwe rak enaaj eļļā, im m̧adm̧ōde eo eaar jem̧ļo̧k, im ami rekar jab bōk lo̧mo̧o̧r.

3 Ron̄jake E eo ej rijojomar ippān Jemān, eo ej akweļap kōn kom̧ im̧aan Mejān—

4 Im ba: Jema, lo en̄taan ko im mej eo an Eo eaar jab kōm̧m̧an jero̧wiwi, ilo E Kwaar kanooj bun̄-būruōm̧; lo bōtōktōkin Nejūm̧ eo ar to̧o̧rļo̧k, bōtōktōkin E eo Kwaar leļo̧k bwe Kwōn maron̄ aiboojoj;

5 Kōn menin, Jema, dāpij rein jeiū im jatū rej lōke ioon Eta, bwe ren maron̄ itok n̄an Ippa im bōk mour ejjeļo̧k jem̧ļo̧kin.

6 Eo̧ron̄, O kom̧ armej ro ilo kabun̄ eo Aō, im kom̧ elder ro ron̄jake ippān doon, im ron̄ Ainikiō ke ej ja rainin, im jab kapen būruōmi;

7 Bwe em̧ool Ij ba n̄an kom̧ bwe N̄aij Alpa im Omega, jinoin im jem̧ļo̧kin, meram eo im mour eo an laļ—meram eo ej romaak ilo marok im marok ej jab jeļā E.

8 Iaar itok n̄an armej ro Aō make, im armej ro Aō make rekar jab bōk Eō; ak n̄an jon̄an lōn̄ ro rekar bōk Eō Iaar leļo̧k kajoor n̄an kōm̧m̧an elōn̄ mennin bwilōn̄ ko, im n̄an erom m̧aan ro nejin Anij; im em̧ool n̄an er ro rekar lōke ioon Eta Iaar leļo̧k kajoor n̄an bōk mour indeeo.

9 Im em̧ool āindein Iaar jilkinļo̧k bujen eo ejjeļo̧k jem̧ļo̧kin Aō ilo laļ in, bwe en juon meram n̄an laļ, im n̄an juon jon̄ok n̄an armej ro Aō, im n̄an ro riAelōn̄ ko n̄an kappukot e, im n̄an juon ribōk ennaan eo ļo̧k Im̧aō n̄an kōpooj iaļ eo Im̧aō.

10 Kōn menin, kom̧in itok n̄an e, im ippān eo ej itok Inaaj pepe āinwōt ippān armej in raan ko etto, im Inaaj kwaļo̧k n̄an kom̧ Aō kajoor in koļmānļo̧kijeņ.

11 Kōn menin, kom̧in eo̧ron̄ ippān doon im kōtļo̧k Eō n̄an kwaļo̧k n̄an kom̧ em̧ool Aō mālōtlōt—mālōtlōt eo an Eo kom̧ij ba ej Anij an Inok, im ro jein im jatin,

12 Ro rekar jepelļo̧k jān laļ, im kar bōktok er n̄an Ippa—juon jikin kwelo̧k eo dāpiji m̧ae juon raan in wānōk enaaj itok—juon raan eo kar kappukot jān aolep em̧m̧aan ro rekwōjarjar, im rekar jab lo e kōnke nana im mennin jōjō ko;

13 Im kar kwaļo̧k burueer ke rekar ro riruwamāejet im riito-itak ioon laļ in;

14 Ak kar bōk juon kallim̧ur bwe ren pukote im lo e ilo ānbwinnier.

15 Kōn menin, eo̧ron̄ im Inaaj pepe ippemi, im Inaaj ekkōnono n̄an kom̧ im kanaan, āinwōt n̄an em̧m̧aan ro ilo raan ko etto.

16 Im Inaaj kwaļo̧k e ilo alikkar āinwōt Iaar kwaļo̧k e n̄an ro rikaļoora ke Iaar jutak im̧aer ilo kanniōk, im kar kōnono n̄an er, im ba: Āinwōt kom̧ ar kajjitōk jān N̄a kōn kakōļļe ko in itok eo Aō, ilo raan eo n̄e Inaaj itok ilo aiboojoj eo Aō ilo kōdo̧ ko in lan̄, n̄an kakūrm̧oole kallim̧ur ko Iaar kōm̧m̧ani n̄an ro jemāmi,

17 Bwe āinwōt ami kar kalimjekļo̧k toun jako eo an jetōb ko ami jān ānbwinnōmi ke ej juon lokjak, Inaaj kwaļo̧k n̄an kom̧ ekōjkan an raan in lo̧mo̧o̧r eo naaj itok, im barāinwōt jepļaaktok eo an Israel ejjeplōklōk.

18 Im kiiō kom̧in lo tampeļ in eo ej pād ilo Jerusalem, eo kom̧ij ņa etan m̧weo im̧ōn Anij, im rikōjdat ro ami rej ba bwe m̧wiin ej jamin naaj wōtlo̧k.

19 Ak, em̧ool Ij ba n̄an kom̧, bwe jorrāān enaaj itok ioon epepen in āinwōt juon riko̧o̧t ilo bon̄, im armej in naaj ko̧kkure er im kajjeplōklōk er ilubwiljin aolep laļ ko.

20 Im tampeļ in me kom̧ij kiiō loe naaj jolaļļo̧k bwe en jab ejjeļo̧k juon dekā ej pād ioon bar juon.

21 Im enaaj waļo̧k, bwe epepen in an riJu ro eban jako ļo̧k m̧ae aolep jorrāān otemjej me Iaar jiron̄ kom̧ kake er renaaj jejjet kūtier.

22 Kom̧ij ba bwe kom̧ jeļā bwe jem̧ļo̧k in laļ ej itok; kom̧ij ba barāinwōt bwe kom̧ij jeļā bwe lan̄ ko im laļ renaaj jako;

23 Im ilo men in kom̧ij ba ilo m̧ool, bwe āindein jekjekin in; ak men kein me Iaar ba n̄an kom̧ rej jamin jako m̧ae renaaj aolep kūrm̧ool.

24 Im men in Iaar ba n̄an kom̧ kōn Jerusalem; im n̄e raan eo enaaj itok, juon m̧ōttan naaj ejjeplōklōk ilubwiljin aolep laļ ko;

25 Ak renaaj bar kuktok bar juon alen; ak renaaj pād wōt m̧ae iien ko an ro riAelōn̄ ko renaaj kūrm̧ool.

26 Im ilo raan eo naaj kar ron̄ kōn tariņae ko im unoj ko kōn tariņae ko, im aolepān laļ enaaj limotak, im būruōn armej raņ renaaj likjab, im renaaj ba bwe Kraist ej karum̧wijļo̧k itok eo An m̧ae jem̧ļo̧k in laļ.

27 Im iakwe eo an armej raņ enaaj kanooj m̧ōļo, im nana enaaj ļapļo̧k.

28 Im n̄e iien ko an ro riAelōn̄ ko ej deļo̧n̄tok, juon meram enaaj urļo̧k ilubwiljin ro rej jijet ilo marok, im enaaj tarlep in gospel eo Aō;

29 Ak rej jab bōk e; bwe rej jab kile meram eo, im rej ukōtļo̧k burueer jān Eo kōnke katak ko an armej.

30 Im ilo epepen en naaj iien ko an ro riAelōn̄ ko kūrm̧ool.

31 Im enaaj wōr armej rej jutak ilo epepen en, im reban jako m̧ae aer naaj lo juon lutōk mājidjid in kaen̄tanaan; bwe juon jorrāān in nan̄inmej enaaj kalbubuuk āneo.

32 Ak ro rikaļoora renaaj jutak ilo jikin ko rekwōjarjar, im rej jamin em̧m̧akūt; ak ilubwiljin ro renana, armej renaaj kotak ainikier im kaliaik Anij im mej.

33 Im enaaj wōr m̧akūtkūt ko an laļ barāinwōt ilo elōn̄ jikin ko, im elōn̄ jorrāān ko; ak armej renaaj kapen wōt burueer ņae Eō, im renaaj kotake jāje eo, juon ņae bar juon, im renaaj m̧ane doon.

34 Im kiiō, ke N̄a Irooj Iaar ekkōnono naan kein n̄an ro rikaļoora, rekar lōļn̄o̧n̄.

35 Im Iaar ba n̄an er: Kom̧in jab lōļn̄o̧n̄, bwe, n̄e aolep men kein renaaj waļo̧k, kom̧ maron̄ jeļā ke kallim̧ur ko me kar kōm̧m̧ani n̄an kom̧ renaaj kūrm̧ool.

36 Im n̄e meram eo enaaj jino n̄an urļo̧k, enaaj n̄an er āinwōt būrabōļ eo me Inaaj kwaļo̧k n̄an kom̧—

37 Kom̧ij reilo̧k im lo wōjke fig ko, im kom̧ij loi kōn mājemi, im kom̧ij ba n̄e rej jino tak in uwa, im bwilo̧k ko bwilo̧kaer rej dik wōt, rak ej epaak;

38 Em̧ool āindein enaaj ilo raan eo n̄e renaaj loi aolep men kein, innām renaaj jeļā bwe awa eo epaak.

39 Im enaaj waļo̧k bwe eo ej mijak Eō enaaj reim̧aanļo̧k n̄an itok eo an raan eo eļap an Irooj, em̧ool n̄an kakōļļe ko an itok eo an Nejin Armej.

40 Im renaaj loi kakōļļe ko im kabwilōn̄lōn̄ ko, bwe renaaj waļo̧k alikkar ilo lan̄ ko ilōn̄, im ilo laļ ium̧win.

41 Im renaaj lo bōtōktōk, im kijeek, im m̧ōto̧dik in baat.

42 Im m̧okta jān an raan eo an Irooj naaj itok, aļ enaaj marok, im allōn̄ enaaj oktak n̄an bōtōktōk, im iju ko renaaj wōtlo̧k jān lan̄.

43 Im bwe eo naaj aintok n̄an jikin in;

44 Innām renaaj pukpukot Eō, im, lo, Inaaj itok; im renaaj lo Eō ilo kōdo̧ ko ilan̄, pālpel kōn kajoor im wōj eļap; ippān aolep enjeļ ro rekwōjarjar; im eo ej jab pukot Eō naaj bukweļo̧k e.

45 Ak m̧okta jān an pein Irooj naaj wōtlo̧k, enjeļ eo enaaj uuk jilel eo an, im ro rekwōjarjar raar kiki renaaj jerkaktok n̄an ioon Eō ilo kōdo̧ eo.

46 Kōn menin, eļan̄n̄e kom̧ ar kiki ilo aenōm̧m̧an jeraam̧m̧an n̄an kom̧; bwe āinwōt ami kiiō lo Eō im jeļā bwe N̄a e, em̧ool āindein kom̧ naaj itok n̄an Ippa im jetōb ko ami renaaj mour, im lo̧mo̧o̧r eo ami naaj kōweeppānļo̧ke; im ro rekwōjarjar renaaj itok jān m̧ōttan ko emān an laļ.

47 Innām pein Irooj enaaj wōtlo̧k ioon laļ ko.

48 Innām Irooj enaaj likūt Neen ioon toļ in, im enaaj jepelļo̧k ilo ruo alen, im laļ enaaj jebwāālel, im kanooj ajjim̧aalal, im lan̄ ko barāinwōt renaaj wūdiddid.

49 Im Irooj enaaj kwaļo̧k ainikien, im aolep jem̧ļo̧k ko an laļ renaaj ron̄jake e; im laļ ko an laļ renaaj liaajlo̧ļ, im ro raar ettōn̄ em̧ool renaaj lo bwebwe eo aer.

50 Im jorrāān enaaj kalbubuuk rikajjirere eo, im riillulu naaj oran̄ļo̧k; im ro raar pukot nana naaj juokļo̧k er im joļo̧k er ilo kijeek eo.

51 Innām riJu ro renaaj kalimjek Eō im ba: Ta kinej kein ilo Peim im ilo Neem?

52 Innām renaaj jeļā ke N̄aij Irooj eo; bwe Inaaj ba n̄an er: Kinej kein rej kinej ko me Iaar kinejnej ilo m̧weo im̧ōn ro jera. N̄aij eo kar kotak E. N̄aij Jisōs eo kar debwāāle. N̄aij Nejin Anij.

53 Innām renaaj jan̄ kōnke nana ko aer; innām renaaj liaajlo̧ļ kōnke rekar matōrtōre kiin̄ eo aer.

54 Innām laļ ko rejjan̄in ron̄ naaj lo̧mo̧o̧ren er, im er ro rekar jab jeļā kien eo enaaj wōr aer ilo jerkakpeje eo m̧okta; im enaaj jim̧we n̄an er.

55 Im Setan naaj lukwōje, bwe en kab naaj ejjeļo̧k jikin ilo bōro ko būruōn ro nejin armej.

56 Im ilo raan en, n̄e Inaaj itok ilo Aō wōj, būrabōļ in enaaj kūrm̧ool eo Iaar kōnono kake kōn virgin ro jon̄oul.

57 Bwe ro remālōtlōt im rekar bōk m̧ool eo, im rekar bōk Jetōb Kwōjarjar bwe en aer ritōl, im rekar jab po ilo m̧oņ—em̧ool Ij ba n̄an kom̧, rejamin naaj juoklaļļo̧k er im joļo̧k er ilo kijeek eo, ak renaaj mour ilo raan eo.

58 Im laļ in naaj leļo̧k n̄an er bwe en aer jolōt; im renaaj wōrļo̧k im kanooj kajoor, im ro nejier renaaj eddekļo̧k ilo ejjeļo̧k jero̧wiwi n̄an lo̧mo̧o̧r.

59 Bwe Irooj enaaj pād ilubwiljier, im An aiboojoj enaaj pād ioer, im E naaj aer kiin̄ im aer rileļo̧k kakien.

60 Im kiiō, lo, Ij ba n̄an eok, ejamin bar lewōj n̄an eok n̄an jeļā jabdewōt eļapļo̧k kōn jebta in, m̧ae Kallim̧ur Ekāāl ej ukok, im ilo e men kein naaj kwaļo̧ki;

61 Kōn menin Ij lewōj n̄an eok bwe kwōn kiiō maron̄ ukōt e, bwe kwōn maron̄ pojak n̄an men ko rej itok.

62 Bwe em̧ool Ij ba n̄an kom̧, bwe men ko reļļap rej kōttar kom̧;

63 Kom̧ij ron̄ kōn tariņae ko ilo aelōn̄ ko rettoļo̧k; ak, lo, Ij ba n̄an kom̧, rej epaaktok, em̧ool repād ilo kōjām ko ami, im ej jab lōn̄ iiō ko jān kiiō kom̧ naaj ron̄ kōn tariņae ko ilo aelōn̄ in ami make.

64 Kōn menin N̄a, Irooj, Iaar ba, kom̧in aintok doon jān bwidej ko iturear, kom̧in kobaiktok kom̧ make ippān doon kom̧ elder ro an kabun̄ eo Aō; kom̧in ilo̧k n̄an bukwōn ko iturilik, kūr ioon ro rej pād ie n̄an ukeļo̧k, im toun wōt aer ukeļo̧k, kalōkļo̧k jarlepju in rijar ro n̄an Eō.

65 Im kōn juon bōro im kōn juon ļōmņak, ainitok m̧weiie ko ami bwe kom̧in maron̄ wiaik juon jolōt eo tokālik naaj jitōn̄ n̄an kom̧.

66 Im e naaj ņa etan Jerusalem eo Ekāāl, juon āneen aenōm̧m̧an, juon jikin kwelo̧k in ko, juon jikin jokane n̄an ro rekwōjarjar an Anij eo Eutiejtata;

67 Im wōj eo an Irooj enaaj pād ijo, im rōkaammijak an Irooj barāinwōt enaaj pād ijo, jon̄an ro renana reban itok n̄an e, im e naaj ņa etan Zaion.

68 Im enaaj waļo̧k ilubwiljin ro renana, bwe aolep armej eo ejamin naaj kotak jāje eo an ņae eo riturun eaikuj in ko n̄an Zaion n̄an jokane.

69 Im enaaj wōr aintok n̄an e jān aolep laļ ko ium̧win lan̄; im enaaj armej ro dein rej jamin naaj tariņae ņae doon.

70 Im enaaj ba ilubwiljin ro renana: Jen jab wanlōn̄ļo̧k n̄an pata ņae Zaion, bwe ro rej pād ilo Zaion rekanooj lāj; kōn menin jeban jutak.

71 Im enaaj waļo̧k bwe ro rewānōk renaaj kuktok jān ilubwiljin aolep laļ ko, im naaj itok n̄an Zaion, im al kōn al ko in lan̄lōn̄ ejjeļo̧k jem̧ļo̧kin.

72 Im kiiō Ij ba n̄an kom̧, dāpij men kein jān aer diwōjļo̧k n̄an laļ m̧ae n̄e e mennin aikuj ilo N̄a, bwe kom̧in maron̄ kōtōprak jerbal in ilo mejān armej raņ, im ilo mejān rikōjdat ro ami, bwe ren maron̄ jab jeļā jerbal ko ami m̧ae ami kar kōtōprak men eo me Iaar jiron̄ kom̧;

73 Bwe n̄e renaaj jeļā kake, bwe ren maron̄ watōki men kein.

74 Bwe n̄e Irooj enaaj waļo̧k E naaj kanooj rōkaammijak n̄an er, bwe lōļn̄o̧n̄ emaron̄ jibwe er, im renaaj jutak ettoļo̧k im wūdiddid.

75 Im aolep laļ ko renaaj mijak kōnke rōkaammijak eo an Irooj, im kajoor in maron̄ eo An. Em̧ool āindein. Amen.