M̧ōttan Ko Kāāleti Jān Ukok Eo An Baibōļ Eo Kōm̧m̧an In Josep Smith

Ijin ilaļ ej m̧ōttan ko kāāleti jān Ukok eo an Kiin̄ Jemes Version in Baibōļ eo kōm̧m̧an in Josep Smith (JS—Ukok). Irooj eaar kabab-laļ Rikanaan Josep Smith n̄an kōjepļaakitok m̧ool kein n̄an jeje ko jei ilo Kiin̄ Jemes Baibōļ eo ko im kar juļo̧k ak ukōti jān kar naan ko kar jei ilo jinointata. M̧ool kien kōjepļaakitok rej kaalikkarļo̧k katak ko im kōkōm̧anm̧anļo̧k meļeļe jeje ko rekwōjarjar.

Kōnke Irooj eaar kwaļo̧kļo̧k n̄an Josep jet m̧ool ko im rijeje ro m̧oktata rekar jei juon iien, Ukok eo an Josep Smith ej jab āinwōt jabdewōt ukok an Baibōļ eo ilo laļ in. Ilo jekjek in, naan in ukok kar kōjerbale ilo juon wāween edepakpakļo̧k im oktak jān eo ekkā jeļā kake, bwe ukok eo an Josep ekar ļapļo̧k wōt revelesōn ie jān lukkuun ukok jān juon kajin n̄an bar juon.

Josep Smith Ukok in Kiin̄ Jemes Baibōļ eo ewōr ekkejelļo̧k ko an ippān ak em̧ōj ekonono kake ilo elōn̄ jekjōn ko ilo Katak im Bujen Ko (lale jekjōn kein 37, 45, 73, 76, 77, 86, 91, im 132). Barāinwōt, Bok eo an Moses im Josep Smith—Matu rej m̧ōttan ko jān Ukok eo an Josep Smith.

N̄an m̧elele ko reļļapļo̧k kōn Ukok eo an Josep Smith, lale “Ukok eo an Josep Smith (JS—Ukok)” ilo Unin Tōl eo n̄an Jeje Ko Rekwōjarjar.

Waanjon̄ok in ilaļ ej kwaļo̧k juon jam̧bōļ kāālet jān Ukok eo an Josep Smith:

JS—Ukok, Matu 4:1, 5–6, 8–9. Keidi Matu 4:1, 5–6, 8–9; oktak ko āier wōt kein rekar kōm̧m̧an ilo Luk 4:2, 5–11

Jetōb eo ej tōlļo̧k Jisōs, ej jab Setan.

1 Innām kar tōllōn̄ļo̧k Jisōs jān Jetōb eo, ļo̧k ilo āne jem̧aden, n̄an pād ippān Anij.

5 Innām Jisōs kar bōklōn̄ļo̧k ilo jikin kwelo̧k ekwōjarjar eo, im Jetōb eo eaar likūt E ioon jeeban tampeļ eo.

6 Innām devil eaar itok n̄an Ippān im ba, Eļan̄n̄e kwōj Nejin Anij, kwōn kālo̧k laļļo̧k: bwe em̧ōj jeje, E enaaj lewōj enjeļ ro An n̄an kōjparok Eok: im ilo pā ko peier renaaj bo̧uri Eok, bwe Kwōn jab kaitaake Neem ippān juon dekā.

8 Im bar juon alen, Jisōs ekar pād ilo Jetōb eo, im eaar bōklōn̄ļo̧k E n̄an juon toļ ekanooj utiej, im kwaļo̧k n̄an E aelōn̄ in kiin̄ ko an laļ im aiboojoj eo aer.

9 Im devil eaar itok n̄an e bar juon alen, im ba, Aolep men kein otemjeļo̧k inaaj liwōj n̄an Eok, eļan̄n̄e Kwōj bukwelōlō im kabun̄-jar n̄an eō.

Eoon in jipan̄ in ilo jeje ko remeej ej eoon eo ilo ukok eo an Kiin̄ Jemes Baibōļ eo kōm̧m̧an in Josep Smith. Kōnke ukok eo an ej kōjepļaakitok naan ko n̄an jeje ko ilo Baibōļ eo, nōm̧ba ko an eoon kein remaron̄ oktak jān edition eo kwōj kōjerbale.

Eoon in jipan̄ in ej kalikkar eoon eo ilo Baibōl eo am im kwōj aikuj keidi n̄an ukok eo an Josep Smith.

Ennaan in ej kōmmeļeļeik katak eo Josep Smith eaar kaalikkarļo̧k kōn ukok in an.

En̄in ej jeje ko āinwōt an kar Josep Smith ukōt e. (Jeje ko reookōpāpe kar kobaikitok n̄an kwaļo̧k oktak ko jān naan ko ilo Kiin̄ Jemes Version eo.)