Kean̄ Jān Kabun̄ 2
Bok in Mormon ej katakin bwe “aolep rej āinwōt juon n̄an Anij,” ekobaik “rikilmeej im rim̧ouj, rikōm̧akoko im rianem̧kwōj, m̧aan im kōrā” (2 Nipai 26:33). Ilo bwebwenaton Kabun̄ in m̧aantak, armej in bwij otemjej im jikin jān laļ otemjej rekar peptaij im kar mour āinwōt ro retiljōk uwaan Kabun̄ in. Ilo tōrean mour eo an Josep Smith, jet rikilmeej uwaan Kabun̄ in kar kappit er n̄an priesthood eo. Itum̧aanin bwebwenaton, ritōl ro an Kabun̄ in rekar bōjrak aer likiti priesthood eo ioon em̧m̧aan rikilmeej ro rej jebar jān ri Afrika. Ļo̧o̧k ko an Kabun̄ rej letok ejjeļo̧k m̧elele ealikkar kōn jinoin im̧enene in. Ritōl ro an Kabun̄ in rekar ļōm̧nak bwe juon revelesōn jān Anij kar aikuji n̄an ukōt im̧enene in im ilo jar rekar pukkōt tōl. Revelesōn eo ekar itok n̄an President eo an Kabun̄ in Spencer W. Kimball im ekar kapene n̄an ritōl ro bar jet an Kabun̄ ilo Salt Lake Tampeļ ilo Juun 1, 1978 eo. Revelesōn in ekar kōmakit aolep kapenpen ko kōn jowi (race) eo im juon iien kar kōjerbale n̄an priesthood eo.
N̄an Jabdewōt Emaron̄ Jelōte:
Ilo Jeptōm̧ba 30, 1978, ilo Kwelo̧k eo Eļap an Kabun̄ eo an Jisōs Kraist im Armej ro Rekwōjarjar ilo Raan ko Āliktata kōmmane ruo alen ilo kajojo iiō, kein kajibukwi en̄oul ruwalitōk, ennaan in ilaļ kar jakem̧aantak jān President N. Eldon Tanner, Rikōkapilōklōk eo Kein Kajuon ilo Presidency eo Kein Kajuon an Kabun̄ in:
Ilo raan ko im̧aan ilo Juun in iiō in, Presidency eo Kein Kajuon eaar kōjjeļā ke em̧ōj kar bōke juon revelesōn jān President Spencer W. Kimball eo ej erļo̧keļo̧k priesthood eo im kōjeraam̧m̧an ko an tampeļ n̄an aolep em̧m̧aan ro uwaan Kabun̄ retōllo̧ki. President Kimball eaar kajjitōk bwe in karon̄ kwelo̧k in bwe ālikin an kar bōk revelesōn in, eo ekar itok n̄an e ālikin eļap kejakļo̧kjeņ im jar ilo ruum̧ ko rekwōjarjar ilo tampeļ eo ekwōjarjar, eaar jakem̧aantak n̄an rikōkapilōklōk ro an, ro rekar bōk e im rie. Innām kar jakem̧aanļo̧k n̄an Doulul eo an Jon̄oulruo Rijjilōk, ro rekar rie ilo juon wōt, im ālikin kar jakem̧aanļo̧k n̄an aolep Ritōl ro Reļļap jet, ro rekar rie ilo juon wōt.
President Kimball eaar kajjitōk bwe in kiiō kōnono n̄an kom̧ jān lōta in:
Juun 8, 1978
N̄an aolep opija ro an priesthood reļļap im reddik an Kabun̄ eo an Jisōs Kraist im Armej ro Rekwōjarjar ilo Raan ko Āliktata ipeļaakin aolepān laļ in:
Ro Jeiū im Jatū rejitōnbōro:
Āinwōt am kar kam̧oole eddekļo̧k in jerbal eo an Irooj ioon laļ in, kōm ar kam̧m̧oolol bwe armej ro jān elōn̄ laļ ko rekar uwaake ennaan eo an gospel in kar kōjepļaaketok, im kar kobatok ilo Kabun̄ in ilo oran ko rej ļapļo̧k wōt. Men in, waļo̧k in, eaar ļijur kōm kōn juon ikdeelel n̄an erļo̧keļo̧k n̄an aolep uwaan Kabun̄ in etōllo̧ke aolep utiej ko im kōjeraam̧m̧an ko me gospel eo ej ņa mellāer.
Jeļā kōn kallim̧ur ko kar kōm̧m̧ani jān rikanaan ro im president ro an Kabun̄ in ro im rekar itok m̧oktaļo̧k jān kōm bwe ilo jet iien, ilo karōk indeeo eo an Anij, aolep em̧m̧aan ro jeid im jatid im retōllo̧ke ren maron̄ bōk priesthood eo, im kōn am kam̧oole tiljek eo an ro im jān er em̧ōj dāpiji priesthood eo, kōm ar akweļap aetok im ilo kate otemjej kōn wōt rein, em̧m̧aan ro jeiūm̧ im jatim retiljek, im bōk elōn̄ awa ko ilo Ruum̧ eo Ilōn̄ in Tampeļ eo oware jān Irooj tōl jān lan̄.
E eaar ron̄ jar ko am, im jān revelesōn Eaar kapen bwe raan eo etto kar jan̄nuwaade emoottok n̄e aolep em̧m̧aan etiljek, im etōllo̧ke ilo Kabun̄ in emaron̄ bōke priesthood eo ekwōjarjar, kōn kajoor n̄an kōjerbale kajoor eo an jān lan̄, im lem̧ōņōņō ippān ro rejitōnbōro ippān aolep kōjeraam̧m̧an ej to̧o̧rļo̧k jān e, ekitbuuj kōjeraam̧m̧an ko an tampeļ eo. Kōn menin, aolep em̧m̧aan ro retōllo̧ke uwaan Kabun̄ in remaron̄ ekkapit n̄an priesthood eo ilo ejjeļo̧k kalijekļo̧k kōn bwij ak mōōr. Ritōl ro an priesthood eo ren ļoore unin tōl in ilo kanooj etale aolep jake m̧aantak etaer n̄an ekkapit n̄an priesthood eo an Aron ak Melkizedek Priesthood eo n̄an kanooj lale bwe em̧ōj aer tōpari jon̄ok ko em̧ōj kar karōki n̄an tōllo̧ke.
Kōmij kabun̄bun̄ļo̧k kōn ļōmņak ealikkar bwe Irooj eaar kiiō kwaļo̧k ankilaan kōn kōjeraam̧m̧an eo an aolep ro nejin ipeļaakin laļ in ro im renaaj eo̧ron̄ ainikien ro kōmaron̄ er rikarejeran, im kōpooj er n̄an bōk aolep kōjeraam̧m̧an an gospel eo.
Ro rejitōnbōro ippemi,
Spencer W. Kimball
N. Eldon Tanner
Marion G. Romney
Presidency eo Kein Kajuon
Kōnke jej kile Spencer W. Kimball āinwōt rikanaan, rilolo, im rikkwaļo̧k revelesōn eo, im president eo an Kabun̄ eo an Jisōs Kraist im Armej ro Rekwōjarjar ilo Raan ko Āliktata, ej pepe eo in bwe kōj āinwōt riņa ainikien ro rekoba jen bōke revelesōn in āinwōt naan eo im ej ankilaan Irooj. Aolep ro ej errā jouj im kaalikkare jān kotake peimi ianbwijmaron̄. Jabdewōt āinjuon kōn ejja kakōļļe in wōt.
Vote eo n̄an rejetake pepe in im̧aanļo̧k eaar juon wōt ilo errā kake.
Salt Lake City, Utah, Jeptōm̧ba 30, 1978.