Jekjōn 55
Revelesōn letok kōn Josep Smith Rikanaan eo n̄an William W. Phelps, ilo Kirtland, Ohio, Juun 14, 1831. William W. Phelps, juon printer, im baam̧le eo an rej kab tōpraktok ilo Kirtland, im Rikanaan eo eaar kappukot Irooj kōn meļeļe ko kōn ļein.
1–3, William W. Phelps kar kūri im kāālet e bwe en peptaij, n̄an kapit e juon elder, im n̄an kwaļo̧k naan kōn gospel eo; 4, E ej barāinwōt itōn jeje bok ko n̄an ajri ro ilo jikuuļ ko an Kabun̄; 5–6, E ej itōn etal n̄an Missouri, ijo me enaaj jikin kōm̧m̧ani jerbal kein an.
1 Lo, āindein Irooj ej ba n̄an eok, rikarejera William, aaet, em̧ool Irooj in aolepān laļ, kwe em̧ōj kūr eok im kāālet eok; im ālikin am kar peptaij jān dān, eo eļan̄n̄e kwōj kōm̧m̧ane kōn juon reim̧aanļo̧k n̄an aiboojoj eo Aō, kwo naaj bōk juon jeorļo̧k in jero̧wiwi ko am im bōk Jetōb Kwōjarjar jān likūt pā ko ioom;
2 Innām kwōn ekkapit jān pein rikarejera Josep Smith, Jun., n̄an juon elder n̄an kabun̄ in, n̄an kwaļo̧k naan kōn ukeļo̧k im jeorļo̧k in jero̧wiwi ko jān iaļan peptaij ilo etan Jisōs Kraist, eo Nejin Anij emour.
3 Im ioon jabdewōt kwōnaaj likūt peim ioon, eļan̄n̄e rej ettā Im̧aō, enaaj wōr am kajoor n̄an leļo̧k Jetōb Kwōjarjar.
4 Im bar juon alen, kwōnaaj ekkapit n̄an jipan̄ rikarejera Oliver Cowdery n̄an kōm̧m̧ane jerbal in print eo, im in kāāleti im jei bok ko n̄an jikuuļ ko ilo kabun̄ in, bwe ajri ro reddik ren barāinwōt bōk tōl Im̧aō āinwōt ej kam̧ōņōņō n̄an Eō.
5 Im bar juon alen, em̧ool Ij ba n̄an eok, kōn un in kwōnaaj bōk ito-itak eo am ippān ro rikarejera Josep Smith, Jun., im Sidney Rigdon, bwe maron̄ tokļo̧kiāne ilo āneo āneen am jolōt n̄an kōm̧m̧ane jerbal in.
6 Im bar juon alen, kōtļo̧k rikarejera Josep Coe bwe en barāinwōt bōk ito-itak eo an ippāer. Bwe eo naaj kaalikkare tok ālik, em̧ool āinwōt I kōņaan. Amen.