Ron̄jake E
Jemed Ilan̄ ejeļā ke n̄e jej jepooļ kōn men ko rejjab alikkar im mijak, ta eo enaaj jipan̄ kōj eļaptata ej n̄an ron̄jake eo Nejin.
Ro jeiū im jatū rejitōnbōro, eļap aō kam̧m̧oolol bwe kōn kōjerbal technology jekar maron̄ jelm̧ae doon im kabun̄ jar ilo Jibbon̄ in Jabōt in. Eļap ad jeraam̧m̧an ilo ad jeļā bwe gospel eo an Jisōs Kraist em̧ōj an jepļaaktok n̄an laļ in!
Ilo jejjo wiik rem̧ootļo̧k, elōn̄ iaad rekar en̄jake kaburbur im jorrāān ko ilo mour ko aer kajjojo. Em̧akūtkūt in laļ, uruur in kijeek, ibwūjleplep, nan̄inmej, im jekjek ko rekar kakkure iien ko ad im kōm̧m̧an an jabwe m̧ōn̄ā, kein karreo, im jāān in kakkoņ.
Ilubwiljin aolep men kein, jej nōbar im kam̧m̧oolol kom̧ ilo ami kālet n̄an ron̄jake naan ko an Irooj ilo iien in epen ilo ami kobatok ippam n̄an kweilo̧k in eļap. Marok in me ej ļapļo̧k ippān tok melijjon̄ ko rej kōm̧m̧an bwe meram eo an Jisōs Kraist en ļapļo̧k wōt an romaak. Ļōmņak kōn em̧m̧an eo me kōj kajjojo jemaron̄ kōm̧m̧ane ilo iien jorrāān in eļap ilo peļaakin laļ in. Iakwe eo im tōmak eo ami ilo Rilo̧mo̧o̧r emaron̄ m̧ōkaj ļo̧k an armej jeļā kōn Jepļaaktok eo an tarlep in gospel eo an Jisōs Kraist.
Ilo iiō ko ruo rem̧ootļo̧k, Sister Nelson im n̄a kom̧ro kar ioon taujin iaami ipeļaakin laļ in. Kōm kar kweilo̧k ippāmi ilo jikin ko nabōj im ilowaan jikin kweilo̧k ko ilo hotel ko. Ilo kajjjojo jikin ko, ikar en̄jake bwe ikar pād ippān ro kālet in Irooj im bwe ikar lo ippān doon eo an Israel ej bōk jikin im̧aan meja.
Jej mour ilo juon raan eo me “ro jemād rekar kōttare kōn eļap kōtmāne.”1 Jej pād ilo jea ko m̧aantata n̄an kam̧oole kōn mejed ta eo rikanaan Nipai ekar loe wōt ilo visōn, bwe “kajoor eo an Ļaam an Anij” naaj jilkinlaļtak “ioon armej in bujen ro an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap.”2
Kom̧, ro jeiū im jatū, kom̧ ej pād ilubwiljin em̧m̧aan, kōrā, im ajri ro me Nipai ekar lo wōt etto. Ļōmņak kōn menin!
Jekdo̧o̧n ia eo kwoj jokwe ie ak jekjek ta ko kwoj pād ie, Irooj Jisōs Kraist ej ami Rilo̧mo̧o̧r, im rikanaan eo an Anij Josep Smith ej ami rikanaan. Ekar ekkapit m̧okta jān kōm̧anm̧an eo an laļ bwe en erom̧ juon rikanaan ilo epepen in āliktata, n̄e “ejjeļo̧k naaj dāpiji”3 jān Armej ro Rekwojarjar. Revelesōn ej wōnm̧aanļo̧k wōt im itok jān Irooj ilo iien in me jerbal in ej wōnm̧aanļo̧k wōt kōn jepļaaktok eo.
Ta meļeļein n̄an kom̧ bwe gospel eo an Jisōs Kraist em̧ōj an jepļaaktok n̄an laļ in?
Ej meļeļein bwe kwe im baam̧le eo am̧ remaron̄ liāp ippān doon n̄an indeeo! Ej meļeļein bwe kōnke kwar peptaij ippān juon eo ewōr an mālim jān Jisōs Kraist im em̧ōj kapene āinwōt juon member in Kabun̄ eo An, kwomaron̄ lan̄lōn̄ kōn emakijkij in jem̧jerā eo an Jetōb Kwojarjar. Enaaj tōl im kōjparok kom̧. Ej meļeļein kom̧ jāmin atajinemjen ak jāmin bōjrak jān ami tōpar kajoor an Anij n̄an jipan̄ kom̧. Ej meļeļein bwe kajoor in priesthood emaron̄ kōjeraam̧m̧an kom̧ ilo ami bōk kain̄i ko remenin aikuj im kōm̧m̧ani bujen ko ippān Anij im kōjparoki. M̧ool kein rej juon emjak n̄an jetōb ko ad, eļaptata ilo iien kein ilo an ļapļo̧k jorrāān ko renana me jeban maron̄ dāpiji.
Bwebwenato in Bok in Mormon ej kōnnaan kōn ruo kurup in armej ro rekar kajoor im bar wōtļo̧k. Bwebwenato ko aer rej kwaļo̧k jon̄an an pidodo n̄an elōn̄ armej ro n̄an meļo̧kļo̧k Anij, jum̧ae kakkōl ko an rikanaan ro an Irooj, im pukot kajoor, bun̄bun̄, im kein kam̧ōņōņō ko an mour in kanniōk.4 Elōn̄ kōttan ba, rikanaan ro m̧oktaļo̧k rekar kwaļo̧k “men ko reļļap im kabwilōn̄lōn̄ n̄an armej ro, ko raar jab lōke.”5
Ejjeļo̧k oktak jān raan kein ad. Ilowaan iiō ko ļo̧k, men ko reļļap im kabwilōn̄lōn̄ kar ron̄ kaki jān lokatok ko rekwojarjar ipeļaakin laļ in. Jekdo̧o̧n elōn̄ armej rejjab kaorōk m̧ool kein—emaron̄ kōnke rejjab jeļā ia eo ren kappukoti ie6 ak kōnke rej ron̄jake ro rejjab jeļā tarlep in m̧ool eo ak kōnke em̧ōj aer kar jum̧ae m̧ool bwe ren kōm̧m̧ani kōņaan ko an laļ in.
Eo enana emāletlet. Ium̧win taujin iiō ko ellakar kōm̧m̧an bwe em̧m̧an en nana im nana en em̧m̧an.7 Ennaan ko an rekoļap, rekajju, im rejejjej.
Ijoke, ennaan ko an jān Jemedwōj Ilan̄ relukkuun oktak. E ej kōnono ippād ilo juon wāween epidodo, elur, im kōn alikkar ko rekabwilōn̄lōn̄ me jeban pok kōn ta eo Ej ba.8
N̄an waanjon̄ak, jabdewōt iien E ekar kwaļo̧k kajjien Nejin eo Emake Wōt n̄an armej ioon laļ in, E ekar kōm̧m̧ane kōn jet naan ko me reaibojooj. Ilo ioon Toļ ijo rekar waļo̧k n̄an Piter, Jemes, im Jon, Anij ekar ba, “E in Nejū: Kom̧win kāron̄jake.”9 Naan ko An n̄an Rinipai ro ilo Bountiful etto rekar “Lo in Nejū Jitōnbōro, eo ilo E, Ebun̄-buruō, ilo E Iaar kaiboojoj Eta—kom̧in ron̄jake E.”10 Im n̄an Josep Smith, ilo kean̄ eo an kabun̄ in me ekar kōpeļļo̧k epepen in, Anij ekar ba, “En̄in Nejū Jitōnbōro. Kwōn Ron̄jake E!”11
Kiiō, ro jeiū im jatū rejitōnbōro, ļōmņak kōn m̧ool eo bwe ilo waanjon̄ak kein jilu rekar kwaļo̧ki, m̧okta jān an Jemān kwaļo̧k kajjien eo Nejin, armej ro rekar pād ilo juon mejatoto in mijak im, im jet iien, lukkuun aikuj.
Rijilōk ro rekar mijak ke rekar loe Jisōs Kraist kar jepo̧o̧le kōn kōdo̧ ioon Toļ me rekar waļo̧k im kōnono ippāer.
Rinipai ro rekar mijak kōnke rekar jelm̧ae kakkure im marok ium̧win jejjo raan.
Josep Smith ekar jab bar make ļo̧k iaan kōn jeļā eo kōn loļo̧k eo an Moronai im pileij gold ko.
Jemed Ilan̄ ejeļā ke n̄e jej jepo̧o̧l kōn men ko rejjab alikkar im mijak, ta eo enaaj jipan̄ kōj eļaptata ej n̄an ron̄jake eo Nejin.
Kōnke n̄e jej kappukot n̄an ron̄jake—lukkuun ron̄jake—eo Nejin, jenaaj bōk tōl n̄an jeļā ta eo n̄an kōm̧m̧ane ilo jabdewōt jekjek ko.
Naan eo jinointata ilo Katak im Bujen ko ej eo̧ron̄.12 Ej meļeļein “n̄an ron̄jake kōn lukkuun kōttōpar n̄an pokake.”13 N̄an eo̧ron̄ ej meļeļein n̄an “Ron̄jake E”—n̄an ron̄jake ta eo Rilo̧mo̧o̧r ej ba innem n̄an eo̧ron̄ kapilōk eo An. Ilo naan ko ruo— “Ron̄jake E”—Anij ej letok jon̄ak ko n̄an jeraam̧m̧an, m̧ōņōņō, im lan̄lōn̄ ilo mour in. Jej aikuj ron̄jake naan ko an Irooj, eo̧ron̄ i, im pokake ta eo Ekar ba n̄an kōj!
Ilo ad kappukot n̄an erom̧ rikaļoor ro an Jisōs Kraist, kijejeto ko ad n̄an ron̄jake E rej aikuj itok jān lukkuun ikdeleel em̧ool. Ej bōk kijejeto eo ealikkar im emakijki n̄an kobrak mour ko ad aolep raan kōn naan ko An, katak ko An, m̧ool ko An.
Jejjab maron̄ pedped wōt ioon meļeļe ko me jej loi ilo social media. Kōn bilien naan ko ilo online im ilo juon laļ eo eobrak kōn kadeleel ko remakijkij ekoba kijejeto ko rekoļap im rejerawiwi an rinana eo, ia eo jemaron̄ etal n̄an e n̄an ron̄jake E?
Jemaron̄ ālōkļo̧k n̄an jeje ko rekwojarjar. Rej katakin kōj kōn Jisōs Kraist im gospel eo An, jon̄an depakpak in Pinmuur eo An, im karōk in lo̧mo̧o̧r eo ekam̧ōņōņō an Jemed Ilan̄. Lin̄ūri naan ko an Anij aolep raan eaorōk n̄an mour ilo jetōb, eļaptata ilo raan kein me eļapļo̧k jorrāān ko. Ilo ad kwojkwoj ioon naan an Kraist aolep raan, naan ko an Kraist enaaj ba n̄an kōj wāween jelm̧ae iien ko reppen n̄e jej ļōmņak jeban kar ioone.
Jemaron̄ barāinwōt Ron̄jake E ilo tampeļ. M̧weo im̧ōn Irooj ej juon im̧ōn ekkatak. Ijeņ, Irooj ej katakin ilo wāween eo An make. Ijeņ, Rilo̧mo̧o̧r ej katakin kōn kajjojo kain̄i ko. Ijeņ, jej ekkatak wāween n̄an kōpeļļo̧k ran̄ōl eo im alikkar ad kōnono ippān lan̄. Ijeņ jej ekkatak wāween ad kōbōjrak rinana eo im epaake kajoor in priesthood eo an Irooj n̄an kōkajoorļo̧k kōj im ro rejitōnbōro ippad. Ewi jon̄an ad aikuj kijorjor n̄an kappukot likapejn̄ak ijeņ.
N̄e m̧o kein an jidik wōt iien ikkijeen COVID-19 redikļo̧k, jouj im kōm̧m̧an ami iien n̄an kabun̄ jar im jerbal ilo tampeļ. Kajjojo minit in aolep iien kane, renaaj kōjeraam̧m̧an kom̧ im baam̧le ko ami ilo wāween ko me ejjelo̧k juon men emaron̄ kōm̧m̧ane. Bōk iien n̄an kejo̧kļo̧kjeņ kōn ta eo kwoj ron̄ im en̄jake n̄e kwopād ijeņ. Kajjitōk ippān Irooj n̄an katakin kom̧ wāween n̄an kōpeļļo̧k lan̄ ko n̄an kōjeraam̧m̧an mour im mour ko an ro rejitōnbōro ippami im jipan̄ er.
Ilo an kilōk tampeļ ko n̄an kabun̄ jar ie, Ij kūr kom̧ n̄an kōļapļo̧k ami bōk koņaami ilo menmenbwij an baam̧le, ekoba kappukot menmenbwij ko ad im ejaake ak kakoņe. Ij kallim̧ur bwe ilo ami kōļapļo̧k iien ko ami ilo tampeļ im jerbal in menmenbwij an baam̧le, enaaj ļapļo̧k im em̧m̧anļo̧k maron̄ eo ami n̄an ron̄jake E.
Jej barāinwōt ron̄jake E ilo an alikkar ilo ad karreoik maron̄ eo ad n̄an kile unoojdikdik eo an Jetōb Kwojarjar. Ejjan̄in kar kabwūlōn̄lōn̄ n̄an jon̄an in n̄an jeļā ekōjkan an Jetōb kōnono n̄an kom̧ jān kiiō. Ilo taitōl an Anij, Jetōb Kwojarjar ej ribokto boktak enaan eo. Enaaj boktok ļōmņak n̄an kōļmenļo̧kjeņ ko ami eo me Jemed Ilan̄ im eo Nejin rekōņaan bwe kom̧ in bōki. E ej Rikaenōm̧m̧an eo. E enaaj boktok juon en̄jake in aenōm̧m̧an ilo buruōmi. Ej kam̧ool kōn m̧ool im enaaj kapene bwe em̧ool, ilo ami ron̄jake im riit naan ko an Irooj.
Ij kōkāāl kajjitōk eo aō n̄an kom̧ n̄an kōm̧m̧an jabdewōt men eo ej bōk n̄an kōļapļo̧k maron̄ eo ami ilo jetōb n̄an bōk revelesōn ko ami make.
Ilo ami kōm̧m̧ane menin enaaj jipan̄ eok jeļā wāween ami wōnm̧aanļo̧k wōt ilo mour eo ami, ta eo n̄an kōm̧m̧ane ilo iien ko reppen, im ekōjkan n̄an kālet im kōjekdo̧o̧n kapo ko im m̧oņ ko an rinana eo.
Im, āliktata, jej ron̄jake E ilo ad eo̧ron̄ naan ko an rikanaan ro, rilolo ro, im ribōk revelsōn ro. Rijilōk ro an Jisōs Kraist aolep me em̧ōj kapit er, aolep iien rej kam̧ool kōn E. Rej kwaļo̧k iaļ eo ilo ad jelm̧ae men ko reppen an mour in men ko rekaburomōjmōj ko jej en̄jaki ilo mour in.
Ta eo enaaj waļo̧k ilo ami lukkuun kōttōpar n̄an ron̄jake, eo̧ron̄, im pokake ta eo Rilo̧mo̧o̧r ekar ba, im ta eo E ej ba kiiō itok jān rikanaan ro? Ij kallim̧ur bwe kom̧ naaj jeraam̧m̧an kōn kajoor eļapļo̧k n̄an jelm̧ae kapo ko, apan̄, im m̧ōjņo ko. Ij kallim̧ur kōn menin bwūlōn̄ renaaj bōk jikier ilo mour in m̧are ko ami, jem̧jerā ko an baam̧le eo, im jerbal ko aolep raan. Im ij kallim̧ur bwe maron̄ eo ami n̄an en̄jake lan̄lōn̄ enaaj ļapļo̧k jekdo̧o̧n n̄e tarpok ko rej ļapļo̧k ilo mour eo ami.
Eprōļ 2020 Kweilo̧k eo Eļap ej ad iien n̄an kakeememej juon m̧akūtkūt eo me ekar ukot laļ in. Ilo ad jelm̧ae rubuki iiō in kakeememeje Visōn eo M̧oktata, Būreejtōnji eo Kein Kajuon im Doulul eo an Jon̄oulruo Rijilōk ro rekar ļōmņak kōn ta eo jemaron̄ kōm̧m̧ane n̄an kakeememej ilo jejjetin m̧akūtkūt in me ekar bōk jikin.
Waļo̧ktok eo an Anij im eo Nejin ekar jino Jepļaaktok eo an tarlep in gospel eo an Jisōs Kraist im ekar tōl ilo epepen in tarlep in iien ko.
Jekar ļōmņak eļan̄n̄e juon building ak statue ej aikuj kōm̧m̧an. Ak ke kōm kar ļōmņake bwebwenato in me ej make wōt im eļap an kōm̧m̧an oktak ilo aolep laļ kōn Visōn eo M̧oktata, jekar en̄jake im̧we n̄an ejaake juon statue ejjab kōn granite ak dōkā ak naan—naan ko kōn kean̄ eo eaorōk im ekwojarjar—em̧ōj je, ejjab n̄an kōm̧m̧an annan̄ in jeje ioon “tebōļ dekā” ak ilo buruemi “tebōļ kanniōk ko.”14
Jān iien eo Kabun̄ in ekar ejaak, kar ļalem wōt kean̄ ko em̧ōj kōmālimi, kōn kean̄ eo āliktata “Baam̧le Eo: Juon Naan in Kean̄ n̄an Laļ in,” kar kwaļo̧k kadkadin jān Būreejtōn Gordon B. Hinckley ilo 1995.
Kiiō jej kejo̧kļo̧kjeņ kōn iien in eaorōk ej kab juon kōttan ilo bwebwenato ilo laļ in im Irooj ej kakien n̄an kakobaik Israel eo ekar ejeplōklōk n̄an kōppopo n̄an Itok eo Kein Karuo an Jisōs Kraist, kōm, Būreejtōnji eo an Kein Kajuon im Doulul eo an Jon̄oulruo Rijilōk ro, kōmij kōmālim kean̄ in. Taitōl eo an ej “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in n̄an Keememej Rubuki Iiō in Jepļaaktok Eo.” Em̧ōj kōmālimi jān Būreejtōnji eo Kein Kajuon im Doulul eo an Rijilōk ro Jon̄oulruo an Kabun̄ eo an Jisōs Kraist im Armej ro Rekwojarjar ilo Raan Kein Āliktata. Kar je raan eo Eprōļ 2020. N̄an kōppopo n̄an rainin, ikar rekoote m̧oktaļo̧k ilo kean̄ eo ilo Bwukōn Wōjke ko Rekwojarjar, ijo Josep Smith ekar lo Jemān im eo Nejin.
“Jej kean̄ bwe Anij ej iakwe ajri ro Nejin ilo aolepān laļ in. Anij Jemed ekar letok n̄an kōj kwojarjar in ļotak, mour eo jab maron̄ keidi, im katok in pinmuur eo ejjeļo̧k jem̧ļo̧kin an eo Nejin Ejitōnbōro, Jisōs Kraist. Kōn kajoor eo an Jemān, Jisōs ekar jerkak im bōk anjo̧ ioon mej. E ej ad Rilo̧mo̧o̧r, ad Riwaanjon̄ak, im ad Ripinmuur.
“Rubuki iiō ko rem̧ootļo̧k, ilo juon jibbōn̄ in jibūriin̄ ilo 1820, likao Josep Smith, ej kappukot n̄an jeļā ewi wōt kabun̄ in n̄an kobaļo̧k, ekar etal n̄an bukwōn wōjke ko im jar iturin m̧weo im̧ōn ilo New York, USA. Ekar wōr an kajjitōk ikkijeen lo̧mo̧o̧r n̄an jetōb eo an im ekar lōke bwe Anij enaaj tōl e.
“Ilo ettā, jej kwaļo̧k bwe uwaak n̄an jar eo an, Anij Jemed im eo Nejin, Jisōs Kraist, rekar waļo̧k n̄an Josep im kar jinoe iien ko ‘iien karōk men otemjej’ (Jerbal 3:21) āinwōt kar kanaan kake ilo Baibōļ. Ilo visōn in, ekar ekkatak bwe ālkin kar mej eo an Rijilōk ro jinointata, Kabun̄ eo an Jisōs Kraist ilo Kallim̧ur M̧okta ekar jako jān laļ in. Josep enaaj erom̧ juon kein jerbal ilo jepļaaktok eo.
“Jej kam̧ool bwe ium̧win tōl eo an Jemān im Nejin, riboktok boktak enaan eo ekar itok n̄an katakin Josep im bar ejaake Kabun̄ eo an Jisōs Kraist. Jon Ripeptaij eo me ekar jerkakpeje ekar kōjepļaaktok mālim eo n̄an peptaij kōn tuļo̧k n̄an bōk jeorļo̧k in jerawiwi. Jilu iaan Rijilōk ro jon̄oulruo jinointata—Piter, James, im Jon—ekar kōjepļaaktok tōl eo an rikaļoor im kii ko an mālim in priesthood. Ro jet rekar itok, ekoba Ilaija, eo me ekar kōjepļaaktok mālim eo n̄an kakobaik baam̧le ko n̄an indeeo ilo jem̧jerā eo n̄an indeeo me ej eļļā jān mej.
“Jej kam̧ool eļapļo̧k bwe Josep Smith ekar letok menin letok im kajoor an Anij n̄an ukot rekoot ko etto—Bok in Mormon—Bar Juon Kallim̧ur kōn Jisōs Kraist. Peij ko ilo jeje in ekwojarjar ekoba iien kwaļo̧k eo an Jisōs Kraist ilubwiljin armej ilo Western Hemisphere ejjab to ālkin Jekakpeje eo An. Ej katakin kōj kōn jibadbad eo an mour in im ej kōmeļeļeik kōn katak an Kraist, eo ej dilepen jibadbad eo. Āinwōt m̧ōttan Baibōļ eo, Bok in Mormon ej kam̧ool bwe aolep armej rej ļaddik im leddik ro nejin Jemedwōj Ilan̄ eo ej iakwe kōj ilo Lan̄, bwe E ewōr juon an karōk ekwojarjar n̄an mour ko ad, im bwe Eo Nejin, Jisōs Kraist, ej kōnono rainin āinwōt an kar kōnono etto.
“Jej kwaļo̧k bwe Kabun̄ eo an Jisōs Kraist im Armej ro Rekwojarjar ilo Raan Ko Āliktata, kar ejaake ilo Eprōļ 6, 1830, ej Kabun̄ eo an Jisōs Kraist ilo kar Kallim̧ur M̧oktata me em̧ōj an bar jepļaaktok. Kabun̄ in ej amjak ilo mour in ewānōk an lukkuun dōm̧an em̧, Jisōs Kraist, im ilo Pinmuur eo ejjeļo̧k jem̧ļo̧k im Jerkakpeje eo em̧ool. Jisōs Kraist ekar bar kūr juon alen Rijilōk ro im kar leļo̧k n̄an er mālimi an priesthood. Ej karuwaineneik kōj aolep n̄an itok n̄an E im Kabun̄ eo An, n̄an bōk Jetōb Kwojarjarj, kain̄i ko an lo̧mo̧o̧r, im bōk lan̄lōn̄ eo ejjeļo̧k jem̧ļo̧kin.
“Rubuki iiō ko remootļo̧k ej kiiō eļļāļo̧k wōt jān tōre eo Jepļaaktok in ekar ijjino jān Anij Jemed im Eo Nejin Ejitōnbōro, Jisōs Kraist. Milien armej ipeļaakin laļ in em̧ōj aer bōk im kaorōk jeļāļo̧kjeņ in kōn m̧akūtkūt kein kar kanaan kaki.
“Jej lukkuun m̧ōņōņō bwe Jepļaaktok eo kar kallim̧ur kake ej wōnm̧aanļo̧k wōt kōn revelesōn ko rejjab jem̧ļo̧k. Laļ in eban bar āinwōt m̧okta, āinwōt an Anij naaj ‘kuktok ippān doon ilo juon wōt kōn men otemjej ilo Kraist’ (Epesōs 1:10).
“Kōn kautiej im kam̧m̧oolol, jej āinwōt Rijilōk ro An jej karuwaineneik aolep n̄an jeļā—ilo ad kōm̧m̧ane—bwe lan̄ ko ren peļļo̧k. Jej kam̧ool bwe Anij ej kalikkar kōn Ankilaan n̄an ro ļaddik im leddik ro Nejin rejitōnbōro. Jej kam̧ool bwe ro rej ekkatak ilo tiljek im jar kōn enaaj eo an Jepļaaktok eo im mour kake ilo tōmak renaaj jeraam̧m̧an n̄an bōk kam̧ool ko aer make kōn kwojarjar eo an im jibadbad eo an n̄an kōpooj laļ in n̄an Itok eo Kein Karuo an ad Rilo̧mo̧o̧r, Jisōs Kraist.”15
Ro jeiū im jatū rejitōnbōro, ej kean̄ eo am n̄an laļ in n̄an kakeememej rubuki iiō in Jepļaaktok eo an tarlep in gospel eo an Jisōs Kraist. Em̧ōj an ukook ilo 12 kajin ko. Kajin ko jet renaaj kōm̧m̧an ejjab to. Enaaj pojak iien eo em̧ōkajtata ilo website eo an Kabun̄ in, bwe kom̧ en maron̄ bōk juon ami kape. Ekkatak kake ippam̧ make im ippān baam̧le eo ami im ro m̧ōttami. Kejo̧kļo̧kjeņ kōn m̧ool ko im ļōmņak kōn m̧ool kein me renaaj kōm̧m̧an oktak ilo mour eo am̧ eļan̄n̄e kwonaaj ron̄jake er, eo̧ron̄ n̄an er, im pokake kien ko im bujen ko me rej m̧ōttan wōt m̧ool kein.
Ijeļa bwe Josep Smith ej rikanaan eo kar kapiti ilo mour eo m̧okta eo me Irooj ekar kālet e n̄an kōpeļļo̧k epepen in āliktata. Kōn e, Kabun̄ eo an Irooj ekar jepļaaktok n̄an laļ in. Josep ekar liāpe naan in kam̧ool eo an kōn bōtōktōkin. Eļap aō iakwe im kautiej e!
Anij emour! Jisōs ej Kraist eo! Kabun̄ eo an em̧ōj an jepļaaktok! E im Jemān, Jemedwōj Ilan̄, rej lale kōj. Ij kwaļo̧k aō kam̧ool ilo et eo ekwojarjar etan Jisōs Kraist, amen.