“Mwiin En Ekkal n̄an Āt eo Eta”
Bujen ko kar būki im kain̄i ko kar kōm̧m̧ani ilo tampeļ rej aorōk n̄an kakwojarjar būruwōd im n̄an mour indeeo an ļaddik ro im leddik ro nejin Anij.
Ilo bukwin wōjke ko rekwojarjar 200 iiō ko remootļo̧k, likao jidikdik eo Josep Smith eaar loe im kōnono ippān Anij, Jemād Indeeo, im Nejin, Jisōs Kraist. Jān Er, Josep eaar jeļā kōn m̧oolin piktok in Doulul in Anij im an revelesōn ilo visōn in kar kwaļo̧ke ilo raan ko āliktata “n̄an tarlep in iien ko rejjejjet.”1
Turinļo̧k jilu iiō ko tokālik, ilo uwaak n̄an tiljek in jar joteen eo ilo Jeptōm̧ba 21, 1823, ruum̧ in kiki eo an Josep eaar obrak kōn meram m̧ae eaar “meram ļo̧k jān rālep”2 Juon armej eaar waļo̧ktok iturin peet eo an, kūr ļaddik in kōn etan, im kwaļo̧k bwe “ekar juon rikwojmeļan jilkintok jān im̧aan mejān Anij … im bwe etan ej Moronai.”3 Eaar kōmeļeļeik Josep kōn itok eo an Bok in Mormon.
Innām Moronai eaar kout jān Bok in Malakai ilo Kalim̧m̧ur M̧okta, jidik oktak ewōr tokjān ilo kajin eo kōjerbal ilo King James Version eo:
“Lo, I naaj kwaļo̧k n̄an kom̧ Priesthood eo, jān pein Ilaija rikanaan eo, m̧okta jān itok eo an raan eo eļap im rōkaammijak an Irooj. …
“Im e naaj kalōlō ilo būruōn ro nejier kallim̧ur ko kar kōm̧m̧ani n̄an ro jim̧m̧aer, im būruōn ro nejier renaaj oktakļo̧k n̄an ro jemāer. Eļan̄n̄e en kar jab āindein, aolepān laļ naaj kar kanooj ko̧kkure ilo itok eo An.”4
Men eo eaorōktata, Moronai eaar katakin Josep Smith kōn jerbal eo an Ilijah kōn tampeļ im jerbal in menmenbwij an baam̧le ilo raan kein āliktata im ekar juon kii n̄an kōjepļaaktok “men otemjej, Anij ear kōnono kaki kōn lo̧n̄iin ri kanaan rekwōjarjar ro jān iien m̧oktata.”5
Ij jar kōn jipan̄ an Jetōb Kwojarjar ilo ad ekkatak ippān doon kōn bujen ko, kain̄i ko, im kōjeraam̧m̧an ko me rej pād n̄an kōj ilo tampeļ ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Jepļaaktok eo an Ilijah
Inaaj ijjino kōn juōn kajjitōk eaorōk: etke jepļaaktok eo an Iļijah eaorōk?
“Jej ekkatak jān revelesōn ko raan kein bwe Ilijah eaar kabwijer kajoor eo an liāp ilo Priesthood eo an Melkisedek”6 im ekar rikanaan eo āliktata n̄an kōm̧m̧ane menin m̧okta jen tōre eo an Jisōs Kraist.”7
Rikanaan Josep Smith eaar ba: “Jetōb eo, kajoor, im kūr eo ean Ilaija ej, bwe ewōr ippān kajoor n̄an kabwijer kii in … tarlep eo an Priesthood eo an Melkisedek … ; im n̄an … bōk … aolep kain̄i ko an aelōn̄ in kiin̄ eo an Anij, em̧ool n̄an ukōt būruwōn ro jemāer n̄an ro nejier, im būruwōn ro nejier n̄an ro jemāer, em̧ool bar ro ilo lan̄.”8
Mālim in liāp in ekwojarjar eaorōk bwe “jabdewōt men eo kwō naaj liāpe ioon laļ, naaj liāpe i lan̄: im jabdewōt men eo kwō naaj kōtļo̧k ioon laļ, naaj kōtļo̧ke i lan̄.”9
Josep eaar kalikkare: “Elmen an Anij naaj lo̧mo̧o̧ren epepen in? Enaaj jilkintok Ilaija rikanaan eo. … Ilaija eaar itok n̄an kwaļo̧k bujen ko an liāp n̄an ukōt būruwōn ro jemāer n̄an ro nejier im ro nejier n̄an ro jemāer.”10
Ilaija eaar waļo̧k n̄an Moses ioon To̧l Eutiej im kar leļo̧k mālim in ioon Piter, Jemes, im Jon.11 Ilaija eaar bar waļo̧k ippān Moses, Iliaj ilo Eprōļ 3, 1836, ilo Kirtland Temple im kar leļo̧k ejja kii ko an ejjab priesthood eo wōt n̄an Josep Smith im Oliver Cowdery.12
Jepļaaktok eo an mālim in liāp jān Ilijah ilo 1836 eo ekar aorōk n̄an kōpooj laļ in n̄an Itok eo Kein Karuo an Rilo̧mo̧o̧r n̄an kōppeļļo̧k im kalōn̄ļo̧k im itok limo eo an aolepen laļ in kōn menmenbwij an baam̧le.
Oktak, oktaļo̧k, im Karreoik Bōro ko
Naan eo bōro ej 1,000 alen an jerbal ilo bok ko jilu rekwojarjar. Epidodo ak naan eo ekkā an aorōk ilo en̄jake ko an kajjojo. Būruwōd—ej waļo̧k in ikdeleel ko ad, karōk ko, un ko, im m̧wil ko—rej kōmeļeļeik wōn kōj im kwaļo̧k ta eo jenaaj erom. Aorōk in jerbal eo an Irooj ej oktak, ukōt, im karreoik bōro ko jen bujen ko an gospel im kain̄i ko jān priesthood eo.
Jejjab kalōki ak delo̧n̄i tampeļ ko rekwojarjar bwe en wōr ad ememļo̧kjeņ ak en̄jake an baam̧le. Ijoke, bujen ko kar būki im kain̄i ko kar kōm̧m̧ani ilo tampeļ rej aorōk n̄an kakwojarjar būruwōd im n̄an mour indeeo an ļaddik ro im leddik ro nejin Anij.
Katōk ilo būruwōn ro nejier kallim̧ur ko kar kōm̧m̧ani n̄an ro jemāer—aaet Ebream, Aisek, im Jekab—ukōt būruwōn ro nejier n̄an ro jemāer make; im kōm̧m̧ani menmenbwij an baam̧le, im kain̄i ko rellōn̄ ilo tampeļ eo rej jerbal ko me rej kōjeraam̧m̧an kajjojo ilo turājet eo juon. Ilo ad bōk kuņaad ilo jerbal in ekwojarjar, jej pokake kien ko n̄an iakwe im jerbal n̄an Anij im ro rituriid.13 Im ilo jerbal in jipan̄ in ej jipan̄ kōj n̄an “Ron̄jake E!”14 im tok n̄an Rilo̧mo̧o̧r.15
Bujen im kain̄i ko rekwojarjar an priesthood maron̄ buki wōt ilo juon tampeļ—m̧weo Im̧ōn Irooj. Aolep men eo ekkatak im aolep men eo kōm̧m̧ani ilo tampeļ eo ej kwaļo̧k kwojarjar eo an Jisōs Kraist im jerbal eo An ilo karōk in m̧ōņōņō eo eļap an Jemedwōj Ilan̄.
Jān Tulowa
Būreejtōn Ezra Taft Benson eaar kōmeļeļeik juon jon̄ok eo aorōk kōn ta eo jerbal eo an Rilo̧mo̧o̧r “n̄an bōktok mour jab wabanban im mour indeeo an armej.”16 Eaar ba: “Irooj ej kalimjōk tulowa. Laļ in ej kalimjōk tunam̧ōj. Laļ emaron̄ bōk armej ro jen jikin ko renana. Kraist ej bōk nana ko jen armej ro, innām rej make bōk nana jen er make. Laļ emaron̄ ukōt armej jen ukōt kapijuknen eo aer. Kraist ej ukōt armej, ro renaaj ukōt kapijuknen eo aer. Laļ emaron̄ kōkm̧anm̧an m̧wilin armej, ak Kraist emaron̄ ukōt piktokin armej.”17
Bujen im kain̄i ko an priesthood rej io̧lepen jerbal in bar lo̧tak im oktak, raorōk ilo an Irooj jerbal ippād kajjojo jān tulowa. Bujen ko kōjparoki, keememeji iien otemjej, im kar je “kōn Jetōb an Anij e mour … ilo buruemi tebōl in kanniōk ko ”18 letok kōttōbar im kile kōjeraam̧m̧an ko ilo mour in im n̄an mour indeeo. Kain̄i ko me rej bōk ilo erreo im keememeji wōt rej kōpeļļok jekjek ko rekwojarjar kōn kajoor in āinwōt anij emaron̄ jiōb tok n̄an mour ko ad.
Jejjab itok n̄an tampeļ n̄an nooj ak ko jen nana ko an laļ in. Ijoke, jej itok n̄an tampeļ n̄an anjo̧ jen nana eo an laļ in. Ilo ad karuwaineneik “kajoor in āinwōt anij”19 n̄an bōk kain̄i ko an priesthood im kōm̧m̧ani im kōjparok bujen ko rekwojarjar, jej jeraam̧m̧an jen kajoor eo ad make20 n̄an anjo̧ ioon kapo ko im apan̄ ko an mour in im n̄an kōm̧m̧ani im erom̧ em̧m̧an.
Bun̄bun̄ eo an Mwiin Enaaj Erakerakļo̧k
Tampeļ eo jinointata ilo epepen in kar kalōke ilo Kirtland, Ohio im kar aje ilo Maaj 27, 1836.
Ilo juon revelesōn n̄an Rikanaan Josep Smith juon wiik ālkin aje eo, Irooj eaar kwaļo̧k:
“Būruōn aolep armej ro Aō ren m̧ōņōņō, ro rekar, kōn maron̄ eo aer, kalōke m̧wiin n̄an eta. …
“Aaet būruōn to̧ujin ko im jon̄oul in to̧ujin ko renaaj kanooj m̧ōņōņō āinwōt waļo̧k in kōjeraam̧m̧an ko me naaj lutōkleplepļo̧k, im mennin letok ekwōjarjar eo im kake kar kōjeraam̧m̧an ro karejera ilo m̧wiin.
“Im bun̄bun̄ eo an m̧wiin enaaj erakrakļo̧k n̄an āne ko rettoļo̧k; im en̄in ej jinoin kōjeraam̧m̧an eo me enaaj lutōkleplepļo̧k ioon bōran armej ro Aō.”21
Jouj keememej naan in būruwōn to̧ujin im jon̄oul in to̧ujin ko renaaj kanjooj m̧ōņōņō im bun̄bun̄ eo an m̧wiin enaaj lutōkleplepļo̧k. Menin ekar kean̄ eo ilo Eprōļ 1836, ke Kabun̄ in ekar jejjo̧ wōt membōr in im juon tampeļ.
Rainin ilo 2020, ewōr 168 tampeļ ko rej jerbal. En̄oul ratimjuon bar tampeļ ko rej kalōki ak em̧ōj kar kōjjeļļāik kaki. Moko im̧ōn Irooj em̧ōj kar kalōki ilo “āne ko ilojet”22 im ilo laļ ko im jikin ko ļōmņaki m̧oktaļo̧k n̄an kalōk juon tampeļ.
Kōjeraam̧m̧an eo an bōk menin letok kwojarjar eo ej kiiō waļo̧k ilo 88 kajin ko im naaj waļo̧k ilo elōn̄ļo̧k kajin ko ilo an tampeļ ko ekkal n̄an kōjeraam̧m̧an ro nejin Anij. Ilo iiō kein 15, oran kajin ko ilo kain̄i ko an tampeļ enaaj lōn̄ļo̧k.
Iiō in jenaaj aje bwidej im jino kalōk 18 tampeļ ko. N̄an keidi, ebōk 150 iiō ko n̄an kalōk tampeļ ko 18, jān ejaak eo an Kabun̄ in ilo 1830 n̄an aje Tokyo Japan Temple jān Spencer W. Kimball ilo 19880.
Ļōmņak kōn m̧ōkaj an jerbal in tampeļ kar bōk jikin ilo tōre in an Būreejtōn Russell M. Nelson. Ke Būreejtōn Nelson ekar lo̧tak ilo Jeptōm̧ba 9, 1924, Kabun̄ in ekar wōr wōt jiljino tampeļ ko.
Ke eaar ekkapit āinwōt juon Rijilōk ilo Eprōļ 7, 1984, 60 iiō tok ālik, 26 tampeļ ko rekar jerbal, 20 tampeļ lōn̄ļo̧k ium̧win 60 iiō ko.
Ke Būreejtōn Nelson ekar rejetak āinwōt Būreejtōn eo an Kabun̄ in, 159 tampeļ ko rekar jerbal, 133 tampeļ lōn̄ļo̧k ium̧win 34 iiō ko jen ke ekar jerbal āinwōt juon membōr in Doulul eo an Jon̄oul.
Jān ke eaar erom Būreejtōn an Kabun̄ in ilo Jānwōde 14, 2018 eo, Būreejtōn Nelson eaar kōjjeļļā kōn 35 tampeļ ko rekāāl.
Ratimjuonn̄oul-jiljino bōjjān in tampeļ ko em̧ōj aer aje ilo tōrein mour an Būreeejtōn Nelson, 84 bōjjān em̧ōj aer aje jen ke eaar ekkapit āinwōt juon Rijilōk.
Aolep Iien Pedped Wōt Ioon Men ko Raorōktata
Āinwōt membōr ro an Kabun̄ eo an Irooj em̧ōj an jepļaaktok, ej ļo̧kjeņ ad ilo jerbal in An ilo raan kein āliktata. Im elōn̄ļo̧k tampeļ ko rej itok.
Brigham Young eaar kanaan, “N̄an kadedeļo̧k jerbal in enaaj aikuj in wōr ejjab juon wōt tampeļ, bōtaab taujin iaer, im taujin ko im n̄oul taujin ko em̧m̧aan ro im kōrā ro renaaj ilo̧k n̄an lowaan tampeļ ko im jerbal n̄an armej ro raar mour likļo̧k to̧o̧n wōt eo Irooj enaaj kwaļo̧ke.”23
Ealikkar, kōjjeļā ko kōn kajjojo tampeļ ej juon unjen lan̄lōn̄ eļap im juon tokjen n̄an leļo̧k kam̧m̧oolol ko n̄an Irooj. Ijoke, jibadbad eo ad eaikuj in pedped ioon bujen im kain̄i ko me jemaron̄ ukōt būruwōd im kapenļo̧k wūjlepļo̧k eo ad n̄an Rilo̧mo̧o̧r im jab baj ilo jikin ak em̧ eo eaiboojoj.
Eddo eo epād iood aolep āinwōt membōr ro an Kabun̄ eo an Irooj em̧ōj an jepļaaktok rej (1) n̄an “Ron̄jake E!”24 im būruwōd make en oktak kōn bujen ko im kain̄i ko im (2) n̄an lukkuun kakūrm̧ool ijjitōn̄ eo ekwojarjar n̄an leļo̧k kōjeraam̧m̧an ko an tampeļ n̄an aolep baam̧le ilo turājet eo juon. Kōn tōl im jipan̄ an Irooj, em̧ool jenaaj kakūrm̧ool eddo kein rekwojarjar.
Kalōk Zaion
Rikanaan Josep Smith ekar kwaļo̧k:
“Ekkal eo an Zaion ej juon jerbal eo me ekar kaitok limoin armej ro an Anij ilo aolepān tōre ko; ej juon unin tōl eo me rikanaan ro, priest ro im kiin̄ ro rekar pād im mour ie ilo lan̄lōn̄; rekar erreim̧aanļo̧k kōn lan̄lōn̄ eo rekar kōtmene raan eo me jenaaj mour ie; im obrak kōn kōtmene ko jān lan̄ im rekalan̄lōn̄ me rekar al im je im kanaan kake ilo raan kein; ak rekar mej ilo aer jab loi; … repād wōt n̄an kōj bwe jen loi, bōk koņaad im jipan̄ iuun m̧aanļo̧k aibojooj eo an Raan ko Āliktata.”25
“Priesthood eo an lan̄ enaaj kobaik ippān laļ, n̄an boktok un ko reļļap; … juon jerbal me Anij im enjeļ rekar erreim̧aanļo̧k kake kōn lan̄lōn̄ kōn epepen ko m̧oktaļo̧k; me ekar kobrak jetōb ko an petriak ro etto im rikanaan ro; juon jerbal me kar ļōme n̄an kakkure kajoor ko an marok, kōkāāl an laļ in, aibojooj an Anij, im lo̧mo̧o̧r an baam̧le.”26
Ij kam̧ool bwe Jemed im Nejin raar waļo̧k n̄an Josep Smith, im Ilaija eaar kōjepļaaktok mālim in liāp eo. Bujen im kain̄i ko rekwojarjar an tampeļ remaron̄ kōkajoorļo̧k kōj im karreoik būruwōd ilo ad “Ron̄jake E!”27 im bōk kajoor in anij ran ilo mour ko ad. Im ij kam̧ool bwe jerbal in ekwojarjar ilo raan ko āliktata enaaj kakkure kajoor ko an maroklep im bōktok lo̧mo̧o̧r an aolep baam̧le. Men kein ij lan̄lōn̄ ilo aō kam̧o̧ol ilo āt eo ekwojarjar etan Irooj Jisōs Kraist, amen.