Wāween an Priesthood eo kōjeraam̧m̧an Jodikdik ro
Kōn priesthood eo, emaron̄ kōketak kōj. Priesthood eo ej boktok meram n̄an laļ in ad.
Eļap aō kam̧m̧oolol bwe imaron̄ pād ijin. Ke ikar jeļā ke enaaj wōr aō iien em̧m̧an n̄an kōnono n̄an kom̧ rainin, ikar en̄jake aō lukkuun kijoroor ak ejja iien eo wōt ikar lukkuun en̄jake ettā. Ikar joļo̧k eļap iien n̄an ļōmņak kōn ta eo inaaj kwaļo̧k, im ij kōjatdikdik bwe Jetōb ej kōnono n̄an eok im un̄n̄ūr eok kōn ennaan in aō.
Ilo Bok in Mormon, Liai ej leļo̧k juon kōjeraam̧m̧an n̄an ļōmaro nejin m̧okta jān an mej, eo me enaaj jipan̄ er kile kajoor eo aer im ta eo remaron̄ erom̧ n̄an indeeo. N̄a diktaktak iaan ruwalitōk ajri ro nejin jinō im jema, im iiō eo ej jem̧ļo̧kļo̧k illakkar make wōt ajri ilo m̧weo ej kab kein kajuon. Ilo an jako ro jeiū iturū im ejjeļo̧k juon en in bwebwenato ippān ekar lukkuun pen n̄an n̄a. Elōn̄ bon̄ ko ij en̄jake aō ajimakeke. Eļap aō kam̧m̧oolol kōn jinō im jema, ro rekar kate er jon̄an wōt aer maron̄ n̄an jipan̄ eō. Juon waanjon̄ak kōn menin ej kōn iien eo jema ekar letok n̄an eō juon kōjeraam̧m̧an an priesthood n̄an kaenōm̧m̧an eō ilo juon iien epen. Ālkin kōjeraam̧m̧an eo an, men ko rekar jab kajju em̧m̧an, ak ikar maron̄ en̄jake aenōm̧m̧an im iakwe jān Jema Ilan̄ im jān jema. Ikar en̄jake aō jeraam̧m̧an kōn juon jema eo ej mour jim̧we eo me emaron̄ letok kōjeraam̧m̧an ko an priesthood jabdewōt iien ij aikuji im eo ej jipan̄ eō n̄an kile kajoor eo aō im ta eo imaron̄ erom̧ n̄an indeeo, āinwōt Liai ekar kōm̧m̧ane ke ekar kōjeraam̧m̧an ajri ro nejin.
Jekdo̧o̧n jekjek ta eo kwoj pād ie, kwomaron̄ aolep iien tōpar kōjeraam̧m̧an ko an priesthood. Emaron̄ jān ro uwaan baam̧le eo am̧, ro mōttam̧, rikarejar m̧aan, ritōl ro an priesthood, im Jemedwōj Ilan̄ eo me ejamin likjab jān eok, kwomaron̄ bōk kōjeraam̧m̧an ko an priesthood. Elder Neil L. Andersen ekar ba: “Kōjeraam̧m̧an ko an priesthood rekajoorļo̧k jān armej eo me ej leļo̧k kōjeraam̧m̧an eo. … Ilo ad mour erreo, kain̄i ko an priesthood eo rej kōkm̧anm̧anļo̧k mour ko ad.”1
Jab āliklik n̄an kajjitōk kōn juon kōjeraam̧m̧an n̄e kwoj aikuj eļapļo̧k tōl. Ej ilo iien ko reppen me jej aikuj Jetōb eo n̄an jipan̄ kōj eļaptata. Ejjeļo̧k juon ewāppen, im jej aolep jelm̧aeiki men ko reppen. Jet iaad jemaron̄ en̄taan kōn mijak, inepata, an̄n̄ūrlep, ak en̄jake ko ke ejjab lukkuun ļap tokjed. Kōjeraam̧m̧an ko an Priesthood remaron̄ jipan̄ kōj eļļā ioon apan̄ kein im bōk aenōm̧m̧an ilo ad wōnm̧aanļo̧k wōt n̄an ilju im jekļaj. Ij kōjatdikdik bwe jej kajjieon̄ mour erreo n̄an bōk kōjeraam̧m̧an kein.
Bar juon wāween an priesthood eo ej kōjeraam̧m̧an kōj ej kōn kōjeraam̧m̧an ko an petriak. Ikar ekkatak ke ij aikuj riiti petriak kōjeraam̧m̧an eo aō jabdewōt iien ij en̄jake būrom̧ōj ak ajimakeke. Kōjeraam̧m̧an eo aō ej jipan̄ eō kile ta eo imaron̄ erom̧ im karōk eo an Anij n̄an eō. Ej kaenōm̧m̧an eō im jipan̄ eō n̄an loe ilōn̄inļo̧k jeļā eo aō ilo mour in. Ej kakemeemej eō kōn menin letok ko aō im kōn kōjeraam̧m̧an ko inaaj bōki eļan̄n̄e inaaj mour erreo. Ej barāinwōt jipan̄ eō n̄an kakemeemej im en̄jake ilo aeņōm̧m̧an bwe Anij enaaj letok uwaak im kōppeļļo̧k iaļan jeraam̧m̧an ko n̄an eō ilo iien eo me ij lukkuun aikuji.
Kōjeraam̧m̧an ko an petriak ej jipan̄ kōpooj kōj n̄an jepļaakļo̧k im mour ippān Jemedwōj Ilan̄. Ijeļā bwe kōjeraam̧m̧an ko an petriak ej itok jān Anij im emaron̄ jipan̄ kōj ukot m̧ōjņo̧ ko ad bwe ren erom̧ kajoor. Enaan kein rejjab itok jān ribubu ro; kōjeraam̧m̧an kein rej ba n̄an kōj ta eo jej aikuj ron̄. Rej āinwōt juon Liaona n̄an kōj kajjojo. N̄e jej likūt Anij m̧okta im tōmak ilo E, E enaaj tōl kōj n̄an depļo̧ki iaļ ko ad make me reppen.
Āinwōt Anij ekar kōjeraam̧m̧an Josep Smith kōn priesthood eo bwe kōjeraam̧m̧an ko an gospel ren maron̄ jepļaaktok, jemaron̄ bōk kōjeraam̧m̧an ko an gospel eo ilo mour ko ad kōn priesthood eo. Kajjojo wiik em̧ōj letok n̄an kōj maron̄ eo im iien em̧m̧an n̄an bōk kwojkwoj eo. Kōn kain̄i in an priesthood, jetōb eo emaron̄ pād ippād iien otemjej, me emaron̄ karreoik kōj. Eļan̄n̄e kwoj en̄jake ad aikuj joļo̧k jet men ko jān mour eo am̧, kōnono n̄an juon ritōl eo kwoj lōke eo emaron̄ jipan̄ eok jepļaak n̄an iaļ eo ejim̧we. Ritōl ro am̧ remaron̄ jipan̄ eok n̄an tōpar aolepān kajoor ko an Pinmuur eo an Jisōs Kraist.
Kam̧m̧oolol kōn priesthood eo, jemaron̄ barāinwōt bōk kōjeraam̧m̧an ko kōn kain̄i ko an tampeļ. Jān iien eo ilakar maron̄ deļo̧n̄e tampeļ, ikar kōm̧m̧ane bwe en juon aō kōttōpar im men eo m̧oktata n̄an kōmakijkij aō pād ilo tampeļ. Ilo aō kōm̧m̧an aō iien im kōm̧m̧ani kaarmājete ko aō me remenin aikuj bwe jen epaakeļo̧k Jemedwōj Ilan̄ ilo m̧weo Im̧ōn ekwojarjar, em̧ōj kōjeraam̧m̧an eō ilo aō bōk revelesōn im unoojdikdik ko me rekar lukkuun jipan̄ eō ilo aolepān mour eo aō.
Kōn priesthood eo, emaron̄ kōketak kōj. Priesthood eo ej boktok meram n̄an laļ in ad. Elder Robert D. Hales ekar ba: “N̄e ejjeļo̧k kajoor in priesthood, ‘aolepān laļ in naaj kar kanooj ko̧kkure’ (lale K&B 2:1–3). Enaaj ejjeļo̧k meram, ejjeļo̧k kōjatdikdik—marok wōt.”2
Anij ej m̧ōņōņō kōn kōj. Ekōņaan bwe jen jepļaak n̄an Ippān. Ejeļā wōn kōj. Ejeļā wōn kwe. E ej iakwe kōj. Ejeļā kōn ta ko jej jelm̧aeiki aolep iien im ej kōjeraam̧m̧an kōj jekdo̧o̧n n̄e jej en̄jake ke ejjab ekkar n̄an kōj. Ejeļā ta eo jej aikuji im n̄aat eo jej aikuji.
“Kajjitōk, im naaj lewōj n̄an kom̧; kappukot im kom̧ naaj lo; kaļļaļļaļ, im naaj kapeļļo̧k n̄an kom̧:
“Bwe eo ej kajjitōk ej bōk, im eo ej kappukot ej lo, im eo ej kaļļaļlaļ naaj kapeļļo̧k n̄an e” (Matu 7:7–8).
Eļan̄n̄e ejjan̄in kar lōn̄ juon am̧ naan in kam̧ool kōn priesthood eo, ij rojan̄ eok n̄an jar im kajjitōk n̄an jeļā ippam̧ make kōn kajoor, innem riiti jeje ko rekwojarjar n̄an ron̄jake naan ko an Anij. Ijeļā bwe eļan̄n̄e jej kōm̧m̧an juon kijejeto n̄an en̄jake kajoor in priesthood eo an Anij ilo mour ko ad, jenaaj jeraam̧m̧an. Ilo etan Jisōs Kraist, Amen.