Itok n̄an Kraist—Mour āinwōt Armej ro Rekwojarjar ilo Raan ko Āliktata
Jemaron̄ kōm̧m̧ani men ko reppen im jipan̄ ro jet kōm̧m̧an ejja āinwōt in, kōnke jejeļā wōn eo jej lōke.
Kom̧ool, Elder Soares, kōn naan in kam̧ool eo am̧ ekajoor im ej kanaan kōn Bok in Mormon. Raan ko ļo̧k, ekar wōr aō iien em̧m̧an n̄an jibwe juon iaan peij ko jinointata me em̧ōj jeje ioon ko an Bok in Mormon. Ilo peij in, ej kab kein kajuon ilo epepen in, naan kein rekajoor an Nipai kar je: “Inaaj ilo̧k im kōm̧m̧ani men ko Irooj eaar kean̄, bwe ijeļā Irooj ejjamin letok kien ko n̄an ro nejin armej, eļan̄n̄e Ejjab kōpooj juon iaļ n̄an aer kōtōprak men eo Ej kean̄ er.”1
Ilo aō kar jibwe peij in, ikar obrak kōn kam̧m̧oolol kōn kijejeto ko an Josep Smith ke ekar 23 an iiō, eo ekar ukōt Bok in Mormon kōn “menin letok im kajoor an Anij.”2 Iaar bar kam̧m̧oolol kōn naan ko an Nipai ke je likao, eo eaar kajjitōk n̄an kōm̧m̧ane juōn jerbal eo epen n̄an būki pilej brass ko jān Leban.
Nipai eaar jeļā bwe eļan̄n̄e enaaj mije wōt Irooj, enaaj tōprak n̄an kakūrm̧ool ta eo Irooj eaar kean̄ e. Eaar depdep wōt ippen Rilo̧mo̧o̧r ilo aolepen mour eo an men̄e eaar ioon mālijon̄ ko, apan̄ ko ilo ānbwin, im men̄e jet iaan baam̧le eo an raar liaakeļo̧k.
Nipai eaar jeļā wōn eo En lōke.3 Ālkin eaar lam̧ōj, “O n̄a armej in en̄taan! Aaet, buruwō ej būrom̧ōj kōn kanniōkū,”4 Nipai eaar ba, “Aō Anij ekar aō rijipan̄; Eaar tōl eō ilubwiljin en̄taan ko aō ilo āne jem̧aden; im eaar oņaake eō ioon dān ko rekanooj m̧wilaļ.”5
Āinwōt rikaļoor ro an Kraist, jejjab kōjekdo̧o̧n men ko reppen im mellijon̄ ko ilo mour ko ad. Ekkā ad aikuj in kōm̧m̧ani men ko reppen me, eļan̄n̄e jej kajjieon̄i make iaad, enaaj ken̄taanan im bōlen pen. Ilo ad bōk kūr eo an Rilo̧mo̧o̧r n̄an “itok n̄an eō,”6 Enaaj letok jipan̄, innem̧m̧an, im aenōm̧m̧an eo me remenin aikuj, āinwōt An kar kōm̧m̧an n̄an Nipai im Josep. Men̄e mālijjon̄ ko ad reļļap, jemaron̄ bōk en̄jake in iakwe eo An ilo ad lōke E im bōk Ankilaan. Jemaron̄ en̄jake m̧ōņōņō eo em̧ōj kōpooje n̄an rikaļoor ro An retiljek, bwe Kraist ej m̧ōņōņō.”7
Ilo 2014, ke iaar jerbale juon mijen elikio, baam̧le eo am raar ioon juon iien eo me rekar jab kōtmene. Ke ekar jikeetbo̧o̧t laļļo̧k ilo juon tōļ eju kōn juon jikeetbo̧o̧t eaitok, ļaddik eo nejum̧ ediktata ekar tubar im ekar jorrāān kōmelij eo an. Jekjek eo ekar pād ie ekar lukkuun nana, taktō eo eaar m̧ōkaj kake n̄an jikin m̧wijm̧wij eo.
Baam̧le eo am rekar bukwelōlō ilo juon iaan ruum̧, ko ejjeļo̧k kobban ilo aujpitļ, im kōm kar wūjlepļo̧k būruwōm̧ n̄an Anij. Ilo tōre in me kōm kar tarpok im lukkuun metak, kōm kar obrak kōn iakwe im aenōm̧m̧an eo an Jemedwōj Ilan̄.
Kōmij jab kar jeļā ta im̧aan ak eļan̄n̄e kōm naaj bar lo an ļaddik eo nejum̧ mour. Kōm kar jeļā bwe mour eo an ļaddik eo ej pād ilo pein Anij im uwaak ko jet, kōn juon ļōmņak ejjeļo̧k jem̧ļo̧kin, enaaj em̧m̧an n̄an e im bar n̄an em̧m̧an eo am. Kōn menin letok eo an Jetōb, kōm kar lukkuun pojak n̄an bōk jabdewōt uwaak.
Ekar jab pidodo! Uwaak in jorrāān eo eaar aikuj pād ilo aujpitōl ruo-allōn̄ ke kōmij lale 400 mijinede ro rej jerbal aolep raan. Ļaddik eo nejum̧ eaar en̄jake an jako ememļo̧kjeņ eo an. Eaar to an ājmour im apan̄ ilo ānbwin, kōnono, im jerbal in kāājimourur ko. Apan̄ ko rekar pād wōt, ak kōm eaar lo juon kabwilōn̄lōn̄.
Kōm kar lukkuun meļeļe bwe aolep apan̄ ko jej iooni reban kajju waļo̧k tōprakier. Ijoke, ilo ad ped wōt ippān Kraist, jenaaj en̄jake aenōm̧m̧an im lo menin kabwilōn̄lōn̄ ko an Anij, mekarta remaron̄ waļo̧k, ilo tōre im wāween eo An.
Enaaj wōr iien ko jeban maron̄ lo jabdewōt wāween me juon jekjek jepād ie kiiō enaaj em̧m̧an jemļo̧kin im maron̄ waļo̧k, āinwōt Nipai, “Buruō ej būrom̧ōj kōn kanniōkū.”8 Emaron̄ wōr juon iien me kōjatdikdik eo wōt epād ippād ej ilo Jisōs Kraist. Ej juon kōjeraam̧m̧an n̄an bōk kōjatdikdik in n̄an lōke E. Kraist ej juon eo enaaj kōjparok kallim̧ur ko An aolep iien. An aenōm̧m̧an em̧ool ej n̄an aolep ro rej itok n̄an E.9
Ritōl ro ad relukkuun kōņaan bwe jen en̄jake aenōm̧m̧an im ineem̧m̧an eo ej itok kōn lōke im mije wōt Rilo̧mo̧o̧r Jisōs Kraist.
Rikanaan eo ad Emour, Būreejtōn Russell M. Nelson, eto an kōnono kōn visōn eo an Irooj n̄an laļ in im membōr ro an Kabun̄ eo an Kraist: “Ennaan eo ad n̄an laļ in eļam̧ waan im em̧ool: jej karuwaineneik aolep ajri ro nejin Anij me rej pād ilo turājet ko jim̧or ilo rōn̄ōļ eo n̄an itok n̄an Rilo̧mo̧o̧r eo aer, bōk kōjeraam̧m̧an ko an tampeļ eo ekwojarjar, bōk lan̄lōn̄ in kijenmej, im karbōb n̄an bōk mour indeeo.”10
Kūr in n̄an “itok n̄an Kraist” ewōr tokjen eļaptata n̄an Armej ro Rekwojarjar ilo Raan ko Āliktata.11 Āinwōt membōr ro an Kabun̄ eo an Rilo̧mo̧o̧r, em̧ōj ad kōm̧m̧an bujen ko Ippān n̄an erom̧ jetōb ļaddik im leddik ro rejitōn bōro Nejin.12 Em̧ōj ad bar leļo̧k iien em̧m̧an n̄an jerbal n̄an Irooj n̄an kūr tok ro jet n̄an itok n̄an E.
Ilo ad jerbal n̄an Kraist, mije eo ad eļaptata eaikuj in ijjino ilowaan kapijuknen ko ad make. Enaaj wōr iien ko n̄an ro uwaan baam̧le ko im ro m̧ōttaer repaaktata renaaj ioon apan̄ ko. Ainikien ko an laļ in, im bōlen kōņaan ko aer make, maron̄ kōm̧m̧an bwe ren kajjitōkin m̧ool eo. Jej aikuj kōm̧m̧an jabdewōt men jemaron̄e n̄an jipan̄ er en̄jake iakwe eo an Rilo̧mo̧o̧r im iakwe eo ad. Ij keememej juon eoon ilo jeje ko rekwojarjar me em̧ōj an erom̧ juon al eo em̧m̧an ippam̧, “Love One Another” me ej katakin kōj, “Ilo men in … armej renaaj jeļā … kom̧ij rū kaļora, eļan̄n̄e kom̧ij yokwe doon.”13
Ad iakwe n̄an ro rej kajjitōkin m̧ool in, rikōjdāt an aolep m̧ōņōņō emaron̄ in kajjieon̄ kōm̧m̧an bwe jen liaakeļo̧k ro jej iakwe er eļan̄n̄e jej make etal wōt im mour kake tarlep in gospel in n̄an kwaļo̧k m̧ool ko.
Maron̄ eo ad n̄an jipan̄ ro jet n̄an itok n̄an Kraist ak oktak ļo̧k n̄an Kraist enaaj ļapļo̧k an alikkar kōn waanjon̄ak eo jej kōm̧m̧ane itok jān wūjlepļo̧k ko ad make n̄an pād wōt ilo iaļen bujen.
Eļan̄n̄e kōņaan eo ad em̧ool n̄an lo̧mo̧o̧ren ro jej iakwe er, kōj make jej aikuj dim ilo Kraist n̄an dāpij Kabun̄ in An im tarlep in gospel in An.
Oktakļo̧k n̄an bwebwenato in Nipai, jejeļā bwe en̄jake eo an Nipai n̄an lōke Irooj ekar im̧we jen ro jinen im jemen n̄an lōke Irooj im waanjon̄ok eo aer jān kōjparok bujen eo. Ej juon waanjon̄ok em̧m̧an ilo visōn eo an Liai kōn wōjke in mour. Ālkin bōk m̧ōttan leen wōjke eo etōn̄al im enno, Liai “[mejen] eaar rito reitak, bwe [en] maron̄ lo baam̧le eo [an].”14 Eaar lo Saraia, Sam, im Nipai “raar jutak āinwōt rej jab jeļā ia rej aikuj etal ie.”15 Innām Liai eaar ba, “Iaar jeeaaļetok er; im iaar barāinwōt ba n̄an er kōn juon ainikien eļļaaj bwe ren aikuj itok n̄an ippa, im m̧ōn̄ā leen wōjke eo.”16 Jouj keememej bwe Liai eaar jab eļļo̧k jen wōjke in mour eo. Eaar dim wōt ilo jetōb ippān Irooj im kar kūr baam̧le eo an n̄an itok n̄an ijo eaar bōk m̧ōttan wōjke eo.
Rikapo eo emaron̄ m̧ōņe jet n̄an eļļo̧k jen m̧ōņōņō eo an gospel in n̄an kōjenolo̧k katak ko an Kraist jān Kabun̄ in An. Ekōņaan bwe jen tōmak bwe jemaron̄ dim ilo iaļen bujen eo ad make, kōn mour in jetōb eo ad make, jutak pen make iaad ilo Kabun̄ in An.
Ilo raan kein āliktata, Kabun̄ eo an Kraist ekar jepļaaktok bwe en maron̄ jipan̄ ajri in bujen ro an Kraist n̄an pād wōt ilo iaļen bujen in An.
Ilo Katak im Bujen ko jej riit, “Lo, en̄in ej katak eo Aō—jabdewōt eo ej ukeļo̧k im itok n̄an Ippa, ejja wōt ej kabun̄ eo Aō.”17
Kōn Kabun̄ eo an Kraist, jej kajoorļo̧k itok jān en̄jake ko ad āinwōt juon jukjuk in pād in Armej ro Rekwojarjar. Jej ron̄ Ainikien jen rikanaan ro An, rilolo ro, im ribōk m̧adenļo̧k ro. Men eo eaorōktata, ilo Kabun̄ in An em̧ōj letok n̄an kōj aolep kōjeraam̧m̧an ko kōn Pinmuur eo an Kraist me maron̄ kile wōt itok jān ad bōk koņaad ilo kain̄i ko an rekwojarjar.
Kabun̄ eo an Jisōs Kraist im Armej ro Rekwojarjar ilo Raan Ko Āliktata ej Kabun̄ eo an Kraist ioon laļ in, kar jepļaaktok ilo raan kein āliktata n̄an kōjeraam̧m̧an aolep ro nejin Anij.
Ij kam̧ool bwe ilo ad itok n̄an Kraist eo emour āinwōt Armej ro Rekwojarjar ilo Raan ko Āliktata, jenaaj jeraam̧m̧an kōn iakwe eo An eļap, An m̧ōņōņō, im An aenōm̧m̧an. Āinwōt Nipai, jemaron̄ kōm̧m̧ani men ko reppen im jipan̄ ro jet kōm̧m̧an ejja āinwōt in, kōnke jejeļā wōn eo jej lōke.18 Kraist ej ad meram, ad mour, im ad lo̧mo̧o̧r.19 Ilo etan Jisōs Kraist, amen.