Kūrm̧ool in Kanaan eo
Kanaan ko me em̧ōj aer kūrm̧ool kōn Jepļaaktok eo an tarlep in gospel eo an Jisōs Kraist rellōn̄.
Ro Jeiū im Jatū rejitōnbōro, eļap aō m̧ōņōņō in kōnono ilo kweilo̧k in eļap ilo bwebwenato n̄an kakeememej Visōn eo M̧oktata an Josep Smith kōn Anij Jemed im eo Nejin, Jisōs Kraist, kōn ta eo ej, ilo ejjeļo̧k pere, juon Bukun Wōjke Ekwojarjar. Visōn in ekar juon ijjino eo ekabwūlōn̄lōn̄ kōn Jepļaaktok eo an gospel eo im aolep men ko me rekar jepļaaktok, jān Bok in Mormon n̄an jepļaaktok eo an mālim eo an priesthood im kii ko, laajrak in doulul eo an Kabun̄ eo em̧ool an Irooj, tampeļ ko an Anij, im rikanaan ro im rijilōk ro ro rej tōl jerbal in ilo raan kein āliktata.
Kōn karōk eo ekwojarjar, rikanaan ro etto an Anij, ke rekar em̧akūt kōn Jetōb Kwojarjar, kar kanaan kōn Jepļaaktok eo im ta eo enaaj kar itok ilo tōre kein ad, epepen eo ilo raan ko āliktata im tarlep in iien ko. Lukkuun jerbal eo ekar “kauruur jetōb ko” an rilolo ro etto.1 Ilo aolepān epepen ko, rikanaan ro etto rekar kanaan kake, ettōņake, lo ilo visōn, im kanaan kōn ilju im jekļaj eo an aelōn̄ in kiin̄ eo an Anij ioon laļ in, Aiseia ekar ņa etan “juon jerbal men in bwilōn̄.”2
Kanaan ko me em̧ōj aer kūrm̧ool kōn Jepļaaktok eo an tarlep in gospel eo an Jisōs Kraist, ekoba Kabun̄ eo an Jisōs Kraist im Armej ro Rekwojarjar ilo Raan Ko Āliktata, rellōn̄. Rainin, ijoke, inaaj kwaļo̧k jet wōt iaan kanaan ko rem̧m̧an tata ippa. Men kein kar katakin eō kake jān rūkaki in Būraimere eo aō ejitōnbōro im ikar ekkatak jān ippān enjeļ eo jinō.
Daniel, eo kar jolaļļo̧k ilo ron̄ in ļaion ko kōn tōmak eo an ilo Irooj Jisōs Kraist im kōn jipan̄ eo jān enjeļ ro an Anij, kar juon eo ekar lo raan kein ilo visōn. Kōmeļeļeik juon ettōņak n̄an Kiin̄ eo an Babilon Nebukadnezar, Daniel ekar kanaan bwe Kabun̄ eo an Irooj enaaj jutak ilo raan ko āliktata āinwōt juon dōkā jidikdik “em̧ōj jeke dekā eo jān juon toļ im ear kapedakilkili.”3 “Ear kapedakilkili,” meļeļein kōn juon jipan̄ ekwojarjar, Kabun̄ eo an Irooj enaaj ļapļo̧k ilo oran bōnbōn m̧ae iien etōpar aolepān laļ in, “im jamin ko̧kkure … [ak] enaaj jutak n̄an indeeo.”4
Ej juon kam̧ool eo ekabwūlōn̄lōn̄ bwe naan ko an Daniel rekar kūrm̧ool āinwōt an membōr ro an Kabun̄ in, jān aolepān laļ in, rej alooje im ron̄jake kweilo̧k in eļap rainin.
Rijilōk Piter eo etiljek ekar kōmeļeļeiki “iien karōk men otemjej … jān jinoin an laļ in ejaak.”5 Rijilōk Paul ekar je bwe ilo tarlep in iien ko, Anij enaaj “kobaik … men ko otemjej ilo Kraist,”6 “Jisōs Kraist make lukkun dem̧an em̧.”7 Ekar lukkuun kajoor aō en̄jake kanaan ko ke ikar bōk koņaaō ilo aje eo an Rome Italy Tampeļ. Aolep rikanaan ro im rijilōk ro rekar kwaļo̧k aer naan in kam̧ool kōn Jisōs Kraist, Ripinmuur an laļ in, ilo ejja wāween eo wōt Piter im Paul rekar kwaļo̧k. Kabun̄ in ej juon waanjon̄ak eo jej loe kōn jejjet iien ko, ro jeiū im jatū, im membōr ro rej rikam̧ool ro kōn kanaan ko rekwojarjar etto.
Josep eo ilo Egypt ekar kanaan bwe ilo raan kein āliktata “juon rilolo Irooj aō Anij enaaj kotak e, eo enaaj juon rilolo eo ejenolo̧k jān leen lo̧jiō.”8 “Bwe enaaj kōm̧m̧an jerbal eo an [Irooj].”9 Josep Smith, rikanaan eo an Jepļaaktok eo, eo ekar juon rilolo.
Jon Ribōk revelesōn ekar kanaan kōn juon enjeļ an Eo ekajoorpōtata me ej boktok im kobaik men ko raorōk ippān doon ilo Jepļaaktok eo kōn naan kein: “Im iar lo bar juon enjeļ ej kāke i mejatoto, im ippān gospel ej indeeo, bwe en kwaļo̧k e n̄an ro rej jokwe ioon laļ, im n̄an aolep kain armej, bwij, kajin, im aelōn̄.”10 Moronai ej enjeļ eo kar kanaan kake. Ekar lo raan kein ad āinwōt kar rekoote ilo Bok in Mormon. N̄an kwaļo̧k kadkadin elōn̄ kōttan, ekar kōpooj Josep Smith n̄an jerbal in kwaļo̧k naan eo an, ekoba ukook eo an Bok in Mormon: Bar Juon Kallim̧ur kōn Jisōs Kraist.
Rikanaan ro jet rekar kōnnaan kōn raan kein ad. Malakai ekar kōnono kōn an Ilaija naaj ukōt “būruon jemāer n̄an ro nejier, im būruon nejier n̄an ro jemāer.”11 Ilaija em̧ōj an itok, im āinwōt juon tōprak, rainin ewōr 168 tampeļ ko ilo peļaakin laļ in. Kajjojo tampeļ ej jipan̄ membōr ro reerreo rej kōm̧m̧an bujen ko rekwojarjar im bōk kain̄i in kōjeraam̧m̧an ko ilo etaer make im etan ro jibūer im jim̧m̧aer etto. Jerbal in ekwojarjar Malakai ekar kōmeļeļeiki ej “dilepen karōk eo an Rikōm̧anm̧an eo n̄an jipadpad eo n̄an mour indeeo an ajri ro Nejin.”12
Jej mour ilo juon tōre kar kanaan kake, kōj jej armej em̧ōj letok ad eddo, bwe jen aiintok ro nejin Anij, ro me renaaj ron̄ im kaorōk m̧ool, bujen, im kallim̧ūr ko an gospel eo n̄an indeeo. Būreejtōn Nelson ekar ņa etan “idajon̄jon̄ eo eļap, kōttōpar eo eļap, im jerbal eo ilo laļ [in] rainin.”13 Kōn menin bwūlōn̄ in ij kwaļo̧k aō kam̧ool.
Kōn kūr in ijjitōn̄ eo jān Būreejtōn Russell M. Nelson, ilo Pāpode ilo iiō in ikar aje im kōjeraam̧m̧an Durban South Africa Tampeļ eo. Ekar juon raan eo inaaj keememej ilo aolepān mour eo aō. Ikar pād ippān membōr ro, ro me rekar oktak tok n̄an gospel in āinwōt Jeremaia ekar kanaan kake etto—“juon jikin kweilo̧k, im ruo jān juon jowi.”14 Katak eo an Jisōs Kraist ej kakobaik kōj aolep—ipeļaakin laļ in—āinwōt ļaddik im leddik ro nejin Anij, āinwōt ro jeimjati ro ilo gospel in. Jekdo̧o̧n wāween kalimjōk kōj ak paaktokid, jej aolep juon wōt ippān Jemed Ilan̄ eo me karōk eo an jān jinoion ekar im ej n̄an baam̧le eo An n̄an bar koba ippān doon ilo aer kōm̧m̧ani im kōjparoki bujen ko an tampeļ.
Kar juon iien aiintok doon an rikabwijer priesthood ro ilo jikin jikuuļ eo ilo Kirtland, Ohio, ilo 1834, Rikanaan Josep ekar kanaan, “Edik wōt oran priesthood rein kwom̧ij loe ijin joteenin, ak Kabun̄ in enaaj kobrak Tueōn im Turōk in Amedka—enaaj kobrak laļ in.”15
Ilo iiō ko rej jem̧ļo̧kļo̧k ikar ekkāke ilo peļaakin laļ in n̄an ioon membōr ro an Kabun̄ in. Em̧m̧aan ro Jeiū im Jatū ilo Doulul eo an Jon̄oulruo ro em̧ōj kar bar aer en̄jake ejja kain ijjitōn̄ rōt in. Eo me, emaron̄ ļoor wōt jikejuuļ eo an rikanaan eo ad ejitōnbōro, Būreejtōn Nelson, eo me ekar ekkāke ilo iiō ko ruo jinoin an Būreejtōn n̄an Kabun̄ ekar bōk eō n̄an ioon Armej ro Rekwojarjar ilo 32 laļ ko im jikin ko an Amedka16 n̄an kam̧ool kōn Kraist eo emour.
Ij keememejļo̧k ke ikar bōk kūr eo aō n̄an mijen āinwōt juon likao. Ikar kōņaan mijen ilo Germany, āinwōt jema, ļeo jeiū, im brother in law eo aō. Ikar jab maron̄ kar kōttar jabdewōt n̄an tōpar m̧weo, ikar kōkairiirļo̧k n̄an jikin māāl eo im kilin leta eo me kūr eo aō epād ilowaan. Ikar riiti ke em̧ōj kūr eō n̄an Eastern States Mission, eo me ej pād ilo New York City. Ikar inepata, kōn menin ikar deļon̄ļo̧k n̄an lowaan m̧weo im kar kōpeļļo̧k jeje ko rekwojarjar n̄an pukot kaeņōm̧m̧an. Ikar jino riiti ilo Katak im Bujen ko: “Lo, im lo, ekanooj lōn̄ armej Ippa ilo ijin, ilo ijoko ipeļaakin ijin; im juon kōjām em̧m̧an enaaj peļļo̧k ilo ijoko ipeļaakin ijin ilo jikin ko itureaer.”17 Kanaan eo, kar letok n̄an Rikanaan Josep Smith ilo 1833, ekar juon revelesōn n̄an eō. Ikar jeļā jān iien eo ke em̧ōj kūr eō n̄an mijen eo ejejjet me Irooj ekar kōņaan bwe in jerbal ie. Ij katakin kōn Jepļaaktok eo im jon̄an ļap in ijjino eo ke Jemed Ilan̄ ekar kōnono n̄an Josep Smith im ekar ba, “En̄in ej Nejū JitōnBōro. Ron̄jake E!”18
Men eo eaorōk tata ilo aolepān Kabun̄ in ej kanaan eo an Aiseia, kar kanaan kake elōn̄ļo̧k jān 700 iiō ko rem̧ootļo̧k m̧okta jān ļotak eo an Jisōs Kraist: “Im ilo raan ko āliktata, naaj kapen toļ in im̧ōn Irooj bwe en ļapļo̧k jān aolep toļ ko, … im ro ri aelōn̄ ko renaaj to̧o̧rtok n̄an e.”19
Ilo ļōmņak eo aō rainin, ij pijaikļo̧k milien membōr ro ad im ro m̧ōttad me rej koneek n̄an kein jerbal ko raan kein ilo tipi, intōrnōt, im kein jerbal ko jet. Jej jijet ippān doon āinwōt n̄e jej aolep koba ippān doon “ilo jabōn toļ eo eutiej.”20 Kar Brigham Young eo ekar kōnono kōn naan in kanaan ko “En̄in ej jikin eo in.”21 Armej ro Rekwojarjar, jet iaer pianier ro jibū im jim̧m̧aō etto, rekar kate er n̄an kalōk Zaion ilo Rocky Mountains “kōn ankilaan im m̧ōņōņō eo An eo me ej kakien laļ ko ilo aolepān laļ in.”22
Ij jutak rainin ilo juon jikin in ekwojarjar me ej kanōltok milien rilotok ro. Ilo 2002, Salt Lake City ekar kōm̧m̧an juon iien jie ņa etan Winter Olympic Games. Kuwaer eo ekar kōpeļļo̧k kōn al ilo iien kōpeļļo̧k eo, im Kabun̄ in ekar kōm̧m̧an iien alooj im būrokūraam̧ ko n̄an rilotok ro im ro rej bōk koņaer jān elōn̄, elōn̄ laļ ko. Inaaj keememej aolep iien aō kar loe an tampeļ eo ilo bākūraun ilo joteen eo rekar kadiwōjļo̧k nuuj eo imejatoto ipeļaakin laļ in.
Ium̧win elōn̄ iiō ko, būreejtōn eo an United States, kiin̄, riekajet ro, prime minister ro, ambassador ro, im ritōl ro jet an kien jān elōn̄ jikin ko rekar itok n̄an Salt Lake City im ioon ritōl rein ad. Būreejtōn Nelson ekar karuwaineneiktok ritōl ro an National Association for the Advancement of Colored People, juon doulul an United States ekar kallim̧ur n̄an kajokun wōt juon aolep ilo ejjeļo̧k kalijōkļo̧k kōn kilim ak kwe ria. Ij keememejļo̧k aō jutak im kōm kar jibwe airan doon rein m̧ōttad im ritōl rein ke Būreejtōn Nelson, Chairman Leon W. Russell, im rūkaki Amos Brown n̄an kūr n̄an jokņe im inem̧m̧an jekdo̧o̧n kwe ria ak kil ta eo kilim ilo laļ in.23
Elōn̄ļo̧k ro rekar itok n̄an Tampel Square im kar ioon doon ilo ko̧o̧njeļ ippān ritōl ro an Kabun̄ in. N̄an waanjon̄ak, iiō eo ļo̧k, n̄an et ko jejjo wōt, jej karuwaineneik, juon ippān doon eo ipeļaakin laļ in im ej kab kōm̧m̧an juon kōttaan itulikin New York City. Kōm kar ioone Kamiti eo an Vietnam ikkijeen Jem̧jerā ko an Kabun̄ im ambassdor ro jān Cuba, the Philippines, Argentina, Romania, Sudan, Qatar, and Saudi Arabia. Jej barāinwōt karuwaineneik rijeje eo eutiej an Doulul eo an Muslim ilo Laļ in.
Ta eo ij kōmeļeļeiki ej juon kūrm̧ool in kanaan eo an Aiseia bwe ilo raan ko āliktata, laļ ko renaaj ipeptok n̄an “toļ in im̧ōn Irooj.”24 Jikin eo eļap Salt Lake Tampeļ ej juon ilo ioļapan ijo eļap im aibojooj.
Ejjab kōn jikin eo me ej kan̄ōltok armej, men̄e jikin eo elukkuun aibojooj; ej kōn Kabun̄ eo em̧ool ej kwaļo̧k ilo jetōb, eddōkļo̧k, em̧m̧an, im jouj an Kabun̄ eo an Jisōs Kraist im Armej ro Rekwojarjar ilo Raan Ko Āliktata im armej ro an; ad iakwe āinwōt iakwe an Anij; ad wūjlepļo̧k n̄an juon kōttōpar eo eļap, me Josep Smith ekar ņa etan “kōttōpar an Kraist.”25
Jejjab jeļā n̄āāt Rilo̧mo̧o̧r enaaj bar jepļaaktok, ak menin jejeļā. Jej aikuj kōppopo ilo buruōd im ļōmņak ko ad, erreo n̄an bōk E, im utiej n̄an erom̧ m̧ōttan aolep men ko kar kanaan kaki etto.
Ij kam̧ool bwe Būreejtōn Russell M. Nelson ej rikanaan eo an Irooj ioon laļ in, im ilo jait eo an rej Rijilōk ro kar kūr jān Anij, kar rejtake er āinwōt rikanaan, rilolo, im ribōk revelesōn ko. Im, ro jeiū im jatū rejitōnbōro, Jepļaaktok eo ej wōnm̧aanļo̧k wōt.
Ij kōjem̧ļo̧k naan kein aō kōn kanaan eo an Josep Smith, naan ko me ij kam̧ool bwe rem̧ool: “Ejjelo̧k pe ettoon emaron̄ kabwōjrak jerbal in jān an wōnm̧aanļo̧k; kōjdāt emaron̄ waļo̧k, rinana ro remaron̄ kuk ippān doon, jarin tariņae remaron̄ kuk ippān doon, kariab emaron̄ kananaik, ak m̧ool eo an Anij enaaj etal wōt kōn kajoor, peran, jutak ļo̧k iaan, m̧ae pedejaake aolepān laļ in, tōparļo̧k aolep jikin ko, depļo̧ke aolep laļ, im lo̧jiļn̄i otemejeļo̧k renaaj ron̄, m̧ae jibadbad eo an Anij enaaj dedeļo̧k, im bwe Jeova Eļap enaaj ba jerbal in ededeļo̧k.”26 Ij kam̧ool kōn menin bwe kanaan kein an Josep Smith em̧ōj aer kūrm̧ool.
Ij kallim̧ur bwe eļan̄n̄e kwoj ļoor kapilōk eo eim̧we an rikanaan eo ad, Būreejtōn Russell M. Nelson, rikakpilōklōk ro an, Rijilōk ro, im ritōl ro jet an Kabun̄ in, im ilo am̧ eo̧ron̄ rikanaan ro etto ro me rekar kanaan kōn raan kein ad, kwonaaj obrak, ilo tum̧ūlaļ in buruōm̧ im am̧, kōn jetōb im jerbal in Jepļaaktok eo. Ij kallim̧ur bwe kwonaaj lo pein Anij ilo mour eo am̧, ron̄jake unoojdikdik ko An, im en̄jake iakwe eo An. Ilo etan Jisōs Kraist, kōn kam̧m̧oolol kōn Jepļaaktok eo an gospel eo An im Kabun̄ eo An, kam̧ool kōn iakwe eo An jejjab maron̄ keidi, amen.