Naan in Kōppeļļo̧k eo
Jej pukot, ilo jabdewōt wāween jemaron̄e, n̄an ron̄jake Jisōs Kraist, eo ej kōnono n̄an kōj kōn kajoor im jerbal in karejar eo an Jetōb Kwojarjar.
Ro jeiū im jatū rejitōnbōro, ilo ad karuwaineneik kom̧ n̄an Eprōļ 2020 kweilo̧k eo eļap ilo bwebwenato an Kabun̄ eo an Jisōs Kraist im Armej ro Rekwojarjar ilo Raan Ko Āliktata, kōn un ko kom̧ij jeļā, ij jutak im̧aami ilo m̧wiin ejjeļo̧k kobban.
Jidik wōt aō kar jeļā, ke ikar kallim̧uri kom̧ ilo kar Oktoba 2019 kweilo̧k eo eļap bwe Eprōļ kweilo̧k in enaaj erom̧ “ememļo̧kjeņ” im “jamin meļo̧kļo̧k,” bwe ij kōnono n̄an juon jarlepju ilowaan m̧wiin im edikļo̧k jān 10 armej ro me renaaj kōm̧m̧an bwe kweilo̧k in en juon ememļo̧kjeņ im jāmin meļo̧kļo̧ke n̄an n̄a Aaet jeļāļo̧kjeņ eo me kwoj bōk koņaam ie me ej diwōjļo̧k ilo electronic, im wāween an aiboojoj kuwaer eo kōn “It Is Well with My Soul,” ej bōktok aenōm̧m̧an n̄an jetōb eo aō.
Āinwōt ami jeļā, jon̄an armej ro ilo kweilo̧k in eļap em̧ōj kar lukkuun jon̄ake āinwōt m̧ōttan wōt kijejeto eo ad n̄an ad maron̄ erom̧ citizen ro rem̧m̧an aolepān laļ in im kōm̧m̧an jon̄an ad maron̄ jab kajedeed COVID-19. Kij in nan̄inmej in eļap kilaan ilo aolepān laļ in. Ej barāinwōt kabōjrak kweilo̧k ko ad ilo Kabun̄ in, jerbal in mijenede, im jerbal in tampeļ barāinwōt.
Mo̧ ko rainin rejelet juon kij in nan̄inmej eo em̧ōkaj an ajedeed, mālijjon̄ ko an mour ko ad rej kwaļo̧k bwe mālijjon̄ ko an mour ekitbuuj ta ko reļļapļo̧k em̧ōj ad jelm̧ae ilo iien in kōn ajedeed in. Mālijjon̄ ko ilju im jekļaj remaron̄ tōpran juon kūrāāj in wa, jorrāān waļo̧k jān mejatoto im laļ, ak juon metak ob eo ejjeļo̧k kar kōtmene kake.
Ewi wāween ad kijenmeje kain mālijjon̄ kein? Irooj ekar ba n̄an kōj bwe “eļan̄n̄e kom̧ij pojak kom̧ jamin mijak.”1 Aaet, jemaron̄ kakkoņkoņ m̧ōn̄ā ko kijed make, dān, im joortoklik ko ad. Bōtaab ej barāinwōt aorōk ad aikuj in kanne im̧ōn kakkoņkoņ ko ad make ilo jetōb kanniōk kōn tōmak, m̧ool, im naan in kam̧ool.
Jan̄uwaade eo ad eļap ilo mour in ej n̄an m̧aanjabpopo n̄an ioon ad Rikōm̧anm̧an. Jej kōm̧m̧ane menin ilo ad kajjieon̄ aolep iien erom̧ āinwōt ad Rilo̧mo̧o̧r, Jisōs Kraist.2 Im jej kōm̧m̧ane menin ilo ad ukweļo̧k aolep raan im bōk karreo eo An, kōmour, kajoor in kōkajoorļo̧k. Jemaron̄ en̄jake jān kijenmej aenōm̧m̧an im lan̄lōn̄, aaet ilo iien ko reppen. En̄in ej etke Irooj ekar kajjitōk ippād n̄an jutak ilo jikin ko rekwōjarjar im “jab em̧m̧akūt.”3
Iiō in, jej kakeememeje 200th iiō rūtto in juon iaan m̧akūtkūt ko rem̧m̧antata ilo bwebwenato in laļ in—etan, waļo̧ktok eo an Anij Jemed im Nejin Jitōn Bōro, Jisōs Kraist, n̄an Josep Smith. Ilo baj kar visōn in, Anij Jemed ekar jitōn̄ļo̧k Jisōs Kraist im ba: “En̄in ej Nejū Jitōnbōro. “Kwon Ron̄jake E!”4
Naan in rōjan̄ in kar leļo̧k n̄an Josep ej n̄an kōj kajjojo. Jej pukot, ilo jabdewōt wāween jemaron̄e, n̄an ron̄jake Jisōs Kraist, eo ej kōnono n̄an kōj kōn kajoor im jerbal in karejar eo an Jetōb Kwojarjar.
Unleplep eo an menin im aolep kweilo̧k ko reļļap ej n̄an jipan̄ kōj ron̄jake E. Jekar jar, im karuwaineneiktok kom̧ n̄an jar, bwe Jetōb eo an Irooj enaaj pād ippād ilo wāween eļap bwe kom̧win maron̄ ron̄jake ennaan ko me Rilo̧mo̧o̧r eo ewōr ippān n̄an kom̧—ennaan ko me renaaj bōkwaj aenōm̧m̧an n̄an jetōb ko ami. Ennaan ko me renaaj kōmour bōro ko rerub. Ennaan ko me renaaj kōmeram ļōmņak eo am̧. Ennaan ko me renaaj jipan̄ eok jeļā bwe ta eo kwoj kōm̧m̧ane ilo am̧ em̧m̧akūt m̧aanļo̧k ilo iien ko reppen im mālijjon̄.
Jej jar bwe kweilo̧k in enaaj juon ememļo̧kjeņ im jāmin meļo̧kļo̧k kōnke ennaan ko kwonaaj ron̄jaki, kōjjeļļā ko rejenolo̧k ko rekar kōm̧m̧an, im en̄jake ko naaj karuwaineneik eok n̄an am̧ bōk koņaam ie.
N̄an waanjon̄ak, ilo jem̧ļo̧kin m̧wen̄an eo an jibbon̄ in Jabōt, jenaaj ippān doon āinwōt juon kūrub ilaļ in ippān doon ilo juon wōt jibadbad n̄e inaaj tōl kom̧ ilo Lam̧ōj Hosana ekwojarjar. Jej jar bwe menin enaaj juon m̧akūtkūt eaorōk ilo jetōb n̄an kom̧ ilo ad kwaļo̧k ilo laļ in ippān doon ad lukkuun kam̧m̧oolol n̄an Anij Jemed im Nejin Jitōnbōro ilo nebar Er ilo wāween in ejenolo̧k.
Kōn en̄jake in ekwojarjar, jej kōjerbal an̄kijeeb ko remouj im erreo. Ak eļan̄n̄e ejjeļo̧k juon am̧, komaron̄ baj jeale ak wave i peiūm. Ilo jem̧ļo̧kin Lam̧ōj Hosanna eo, jarlepju eo enaaj kobatok ippān kuwaer eo im al “Jetōb an Anij.”5
Ro jeiū im jatū, kweilo̧k in enaaj lukkuun em̧m̧an. Iiō in enaaj maron̄ ļapļo̧k ilo ad mijōk wōt ilo ad leļo̧k ad n̄an Rilo̧mo̧o̧r eo im jepļaaktok eo an gospel eo An. Jekjek ko raorōk āliktata an kweilo̧k in eļap ilo bwebwenato enaaj maron̄ ukōt būruwōd ilo ad jino juon kajjitōk aolepān mour eo ad n̄an ron̄jake E.
Kwoj ruwainene n̄an Eprōļ 2020 kweilo̧k eo eļap! Ijeļā bwe Anij, Jemedwōj Ilan̄, im Nejin, Jisōs Kraist, rej ļōmņak kōn kōj. Renaaj pād ippād ilo aolepān kweilo̧k kein an raan kein ruo rekwojarjar ilo ad pukot n̄an kepaakļo̧k er im kautiej Er. Ilo āt eo ekwojarjar etan Jisōs Kraist, amen.