feiā ’āpī tamāroa e tai’o ra i te pāpa’ira’a mo’a

Fa’aʼohipara’a i te Mai, peʼe mai—nō te mau pupu Autahu’ara’a a Aarona ʼe te mau piha Feiā ʼĀpī Tamāhine

E aha te mau fā o tā tātou mau rurura’a piha ’e tā tātou mau rurura’a pupu ?

’Ua hōro’a mai te Fatu ia ’oe i te hō’ē ti’aturira’a mo’a : ’Ua pi’i ’oia ia ’oe nō te tāvini i roto i te hō’ē peresidenira’a nō te Feiā ’Āpi Tamāhine ’aore rā te hō’ē peresidenira’a nō te pupu Autahu’ara’a a Aarona. Hō’ē tuha’a o tā ’oe hōpoi’a ’o te arata’ira’a ’e te fa’aterera’a i tā ’oe mau rurura’a piha ’e pupu i te sābati. Nō te rave i te reira, e mea maita’i ’ia māramarama nō te aha teie mau rurura’a e fa’atupuhia ai.

E mea ta’a ’ē te mau rurura’a piha Feiā ’Āpī Tamāhine ’e te mau rurura’a pupu Autahu’ara’a a Aarona i te mau piha ha’api’ira’a a te ’Ēkālesia, mai te Ha’api’ira’a Sābati ’aore rā te ha’api’ira’a ’evanelia séminaire. I roto i te mau rurura’a pupu autahu’ara’a ’e piha tamāhine, e ha’api’i mai tātou nō ni’a i te ’ohipa tā te Atua i hōro’a mai ia tātou, ’e e fa’anaho tātou i te mau melo nō tā tātou piha tamāhine ’aore rā pupu autahu’ara’a, nō te rave i taua ’ohipa ra i roto i tō tātou mau ’utuāfare, i roto i te ’Ēkālesia, ’e i roto i tō tātou huira’atira. I roto i teie mau rurura’a, e’ita tātou e paraparau noa nō te ’ohipa—e rave ato’a rā tātou i te mau fa’anahora’a nō te rave fa’aoti i tō tātou ti’ara’a ’ei tino nu’u fa’ehau feiā ’āpī nā te Fatu, mai te tauturura’a i te ha’aputuputura’a ia ’Īserā’ela.

feiā ’āpī tamāhine i roto i te piha ha’api’ira’a

I roto i te mau rurura’a piha tamāhine ’e pupu autahu’ara’a, e rave tātou i te mau fa’anahora’a nō te rave fa’aoti i tō tātou ti’ara’a ’ei tino nu’u fa’ehau feiā ’āpī nā te Fatu.

Teie fa’atumura’a i ni’a i ’ohipa e ’ere i te parau ē, e vaiiho tātou nā te Ha’api’ira’a Sābati noa te mau ’āparaura’a nō ni’a i te ha’api’ira’a tumu. ’Oia mau, e mea faufa’a ’ia ’apo mai i te ha’api’ira’a tumu i roto i te mau rurura’a nō te piha Feiā Āpī Tamāhine ’e nō te pupu Autahu’ara’a a Aarona—nō te ha’apūai i tō tātou aura’a ’e Iesu Mesia, nō te māramarama i te fa’anahora’a a te Metua i te ao ra, ’e nō te rave i tā tātou tuha’a i roto i tā rāua ’ohipa. ’A tuatāpapa ’āmui ai tātou i te ’evanelia, e nehenehe te mau parau mau tā tātou e ha’api’i mai e taui i tō tātou ’ā’au ’e e tauturu ia tātou ’ia ’ite e nāhea ’ia rave hau atu mai te huru Mesia. E nehenehe tātou e fāri’i i te mau muhumuhura’a nō ni’a i te mau rāve’a nō te fa’atupu « i te rahi ’e te pa’ari, ’e te herehia e te Atua ’e te ta’ata ato’a » (Luka 2:52). ’A fa’afāriu-rahi-hia atu ai tātou ia Iesu Mesia ’e i tāna ’evanelia, e ’itehia ia tātou te ’oa’oa ’e te hina’aro ’ia tauturu ia vetahi ’ē i ni’a i te ’ē’a nō te fafaura’a.

Nā vai e arata’i i teie mau rurura’a ?

’Ua pi’i te Atua ia ’outou ’ei mau peresidenira’a nō te piha ’e nō te pupu, ’e ’ua hōro’a mai ia ’outou i te parau fa’ati’a nō te arata’i. Nō reira, e arata’ihia te rurura’a tāta’itahi o tā ’outou piha ’aore rā pupu nā te hō’ē melo o te peresidenira’a o tā ’outou piha ’aore rā pupu. E mea ti’a i te feiā fa’atere pa’ari ’ia hōro’a i te arata’ira’a ʼe te pāturura’a, ’eiaha rā rātou e rave mai i te fa’aterera’a. Hi’o i te tuha’a pi’ihia « Tāu’aparau ʼāmui » i te ʼōmuara’a o te arata’i ha’api’ira’a tāta’itahi o teie buka, nō te mau mana’o, nō te tauturu ia ’outou ’ia ’ite e nāhea ’ia arata’i i te hō’ē rurura’a ’e ’ia fa’atupu te mau ’ōpuara’a mau nō te reira. E fa’a’ohipa i te mau ’āpo’ora’a a te peresidenira’a nō te fa’anaho e nāhea ’outou i te fa’atere i teie mau rurura’a i te sābati.

Nā vai e hōro’a i te ha’api’ira’a ?

E nehenehe te feiā fa’atere ta’ata pa’ari, te hō’ē melo nō te peresidenira’a piha ’aore rā pupu, ’aore rā te tahi atu melo nō te piha ’aore rā nō te pupu, e hōro’a i te ha’api’ira’a. ’Ei peresidenira’a nō te piha ’aore rā nō te pupu, ’a farerei atu i tō ’outou feiā fa’atere ta’ata pa’ari nō te mā’iti ’o vai te nehenehe e hōro’a i te ha’api’ira’a. E ha’amana’o ē, e tauturu rahi mai tō ’outou feiā fa’atere ta’ata pa’ari. E mata na i te ’apo mai i tō rātou mau ’itera’a rau ’e mau ’itera’a pāpū. Tē vai ato’a ra te maita’i i roto i te anira’a i te feiā ’āpī ’ia hōro’a i te ha’api’ira’a—e nehenehe te ha’api’ira’a e tauturu i te fa’ahōhonu i tō rātou fa’afāriura’a ’e e patu pūai atu ā i te mau aura’a ’e te tahi atu mau melo nō te piha ’e nō te pupu. Nō reira, ’a hōro’a ia rātou i te mau rāve’a tano nō te ha’api’i i te tā’āto’ara’a ’aore rā, te hō’ē tuha’a o te ha’api’ira’a, ma te vai i roto i te ferurira’a i te mau hina’aro ’e te mau ’aravihi o te mau ta’ata i roto i tā ’outou piha ’aore rā pupu. ’Ei hi’ora’a, e ha’api’i pinepine paha te feiā fa’atere ta’ata pa’ari i roto i te mau piha ’aore rā te mau pupu i te feiā ’āpī ’āpī a’e ’aore rā i te feiā ’āpī ’aita i ’aravihi roa nō te ha’api’i i te ’evanelia. ’Ia ani-manihini-ana’e-hia te feiā ’āpī ’ia hōro’a i te ha’api’ira’a, e mea ti’a ’ia tauturu atu te hō’ē metua ’aore rā, te hō’ē tauturu ta’ata pa’ari i te fa’aineinera’a ia rātou, mai te mea e tītauhia.

E nehenehe te feiā tei anihia e hōro’a i te ha’api’ira’a e fa’a’ohipa i te tuha’a tei pi’ihia « Ha’api’i i te ha’api’ira’a tumu » i roto i te mau arata’i ha’api’ira’a tāta’itahi nō teie buka, nō te tauturu ia rātou ’ia fa’aineine. Tei roto i terā tuha’a te mau mana’o tauturu nō te ha’api’i ʼe nō te ’āparau i te ha’api’ira’a tumu nō terā hepetoma, ’eiaha rā te mau ’orometua e tāʼōti’a ia rātou i teie noa mau mana’o nei. Mai tei arata’ihia e te Vārua, e nehenehe te mau ’orometua e fa’atano i teie mau mana’o ’aore rā e fa’aʼohipa i tō rātou iho nō te ha’api’i, ’o te pāhono maita’i a’e i te mau hina’aro o te mau melo o te piha ’aore rā o te pupu, ’e ’o tē tauturu ia rātou ’ia māramarama maita’i i te ha’api’ira’a tumu.

E aha te tumu parau nō te ha’api’ira’a tumu tā tātou e ’āparau i roto i tā tātou mau rurura’a ?

Te tumu parau nō te hepetoma tātaʼitahi ’o te hō’ē ïa tumu parau o te ha’api’ira’a tumu ’o tei mā’itihia ’e tei fa’atanohia i ni’a i te tai’ora’a o te Faufa’a ’Āpī i tāpurahia nō taua hepetoma ra, mai tei ’itehia i roto i te Mai, pe’e mai—nō te ta’ata hō’ē ’e te ’utuāfare. Nā roto i teie rāve’a, e pāturu te mau ’āparaura’a nō te ha’api’ira’a tumu i roto i te mau rurura’a a te piha ’aore rā a te pupu, i te mau mea tā te feiā ’āpī i ha’api’i mai i te fare.

Noa atu ē ’ua ha’api’ihia te mau tumu parau rarahi i te tahi atu mau sābati, e nehenehe noa ’outou e ’āparau i te tahi atu mau tumu parau o te ha’api’ira’a tumu, ’ia au i te mau hina’aro o tā ’outou piha ’aore rā pupu.

Tē vai nei i roto i teie buka te mau arata’ira’a ha’api’ira’a nō te hepetoma tātaʼitahi, e tupu ai te mau rurura’a a te mau piha Feiā ʼĀpī Tamāhine ’e a te pupu Autahu’ara’a a Aarona. I te tahi taime, e tītauhia ia ’outou ’ia ha’apae i te hō’ē ha’api’ira’a nō te mea e ’āmuira’a titi ’aore rā nō te tahi tumu ta’a ’ē.

E aha te ti’ara’a o tō tātou feiā fa’atere ta’ata pa’ari ?

E tuha’a ’ohipa faufa’a rahi tā te feiā fa’atere ta’ata pa’ari i roto i te mau piha Feiā ’Āpī Tamāhine ’e te mau pupu Autahu’ara’a a Aarona. E arata’i rātou ʼe e aʼo rātou ia ’outou i roto i tō ’outou pi’ira’a feiā fa’atere. E pāturu rātou ʼe e fa’aitoito rātou ia ’outou, ’a rave ai ’outou i te ’ohipa nō tā ’outou piha ’aore rā pupu. E ha’api’i rātou ia ’outou i te ha’api’ira’a tumu, ʼe e ha’amaita’i rātou ia ’outou nā roto i tō rātou hi’ora’a maita’i, tō rātou ’itera’a rau ʼe te ’itera’a pāpū.