’Ia au i tā ’oe parau, nā Elspeth Young

’Ua fa’a’ite Maria i te hō’ē ’itera’a pāpū pūai nō te misiōni a te Fa’aora (hi’o Luka 1:46–55). ’Ia au i tā ’oe parau, nā Elspeth Young

8 nō Tēnuare

Nāhea vau i te ha’amaita’i ia vetahi ’ē ma tō’u ’itera’a pāpū nō Iesu Mesia ?

Mataio 1 ; Luka 1

ītona ’āpo’o

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a e 10–20 minuti

I te ’ōmuara’a o te rurura’a, ’a fa’ahiti tāhō’ē i te Parau tai’o a te Feiā ’Āpī Tamāhine ’aore rā i te Parau tai’o a te pupu Autahu’ara’a a Aarona. I muri iho, ’a arata’i i te hō’ē tāu’ara’a parau nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 10.2, 11.2, ChurchofJesusChrist.org). ’A fa’anaho i te mau rāve’a nō te fa’a’ohipa i te mea tā ’oe i tāu’aparau.

• Ora i te ’evanelia. E aha tā tātou i ’āparau na i te fārereira’a i ma’iri a’e nei, ’e e aha te mau tītaura’a ’aore rā te mau fa’auera’a i ravehia ? E aha tā tātou i rave nō te fa’atupu i teie mau anira’a ’aore rā mau fa’auera’a ?

• Aupuru i te feiā tei hina’aro i te tauturu E aha tā tātou e rave ’aore rā e parau nō te toro i te rima i te feiā e mana’o mo’emo’e ’aore ra ’ua ātea i tō tātou Metua i te ao ra ?

• Ani i te mau ta’ata ato’a ’ia fāri’i i te ’evanelia. E aha te tahi mau rāve’a e nehenehe ai tātou e tauturu ia vetahi ’ē ’ia ’ite i te here o Iesu Mesia ?

• Tāhō’ē i te mau ’utuāfare ē a muri noa atu. E aha te mau manaʼo tā tātou e faʼaʼite i te tahi ʼe te tahi nō te tauturu i te ha’apūaira’a i tō tātou mau ’utuāfare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Mai te mau ’āti Iuda ha’apa’o maita’i i tōna ra tau, e hina’aro rahi tō Maria i te taera’a mai o te Mesia. I muri a’e i tōna ’itera’a nā roto i te hō’ē melahi ē, ’ua fātata roa te tīa’ira’a i te hope—’e e riro ’oia ’ei metua vahine nō te Fa’aora i fafauhia—’ua hōro’a Maria i te hō’ē ’itera’a pāpū nehenehe nō « te Atua tō’u Fa’aora ». ’Ua pāpa’ihia teie ’itera’a pāpū i roto i te Luka 1:46–55, ’e ’ua herehia e te mau keresetiāno nā te ao ato’a nei. ’Ia tai’o ’oe i teie mau ’īrava, ’a feruri i te feiā i roto i tā ’oe piha ’aore rā pupu. Mai ia Maria, tē fa’aineine ra rātou nō te taera’a mai o Iesu Mesia—i teie rā taime, nō tōna tae-piti-ra’a mai hanahana. ’E mai ia Maria ato’a, e nehenehe tō rātou ’itera’a pāpū e fa’auru pūai i ni’a i te fa’aro’o o te feiā ’ati a’e ia rātou.

E aha te mana’o o te feiā ’āpī tā ’oe e ha’api’i ra nō ni’a ia Iesu Mesia ? Nāhea tō rātou ’itera’a pāpū nō ni’a iāna i te ha’amaita’i ia vetahi ’ē ? ’A fa’aineine ai ’oe i te ha’api’i, e tuatāpapa ato’a ’oe i te 2 Nephi 25:23–26 ’e te poro’i a Elder Neil L. Andersen « Tē paraparau nei tātou nō te Mesia » (Liahona, Novema 2020, 88–91).

Ha’api’i ’āmui

Hō’ē rāve’a rahi nō te tauturu i te feiā ’āpī ’ia feruri i ni’a i tō rātou ’itera’a pāpū nō Iesu Mesia, ’o te hi’o-’āmui-ra’a ïa i te ’itera’a pāpū o Maria i roto i te Luka 1:46–55. Penei a’e e fa’a’ite mai rātou i te tahi ’e te tahi te mau pereota e fa’ata’a nei i te mea tā Maria i ti’aturi ’e i fāri’i nō ni’a i te Fa’aora. Tei hea o teie mau pereota e fa’ata’a ato’a nei i te mea tā tātou e fāri’i nei nōna ? ’Ei hi’ora’a, e aha te tumu i « ’oa’oa » ai tō tātou vārua « i te Atua » ? (’īrava 47). E aha te « rāve’a rahi » tāna i rave nō tātou ? (’īrava 49). Nāhea ’oia i te fa’a’itera’a i tōna pūai i roto i tō tātou orara’a ? (hi’o ’īrava 51). E riro te mau mana’o nō te ’ātivite i raro nei i te arata’i i te mau ’āparaura’a nō ni’a i te huru e riro ai tō tātou ’itera’a pāpū nō te Mesia e riro ai ’ei ha’amaita’ira’a nō vetahi ’ē.

• E tauturu te poro’i a Elder Neil L. Andersen « Tē paraparau nei tātou nō te Mesia » ’ia fa’ata’a nō te aha e ti’a ia tātou ’ia paraparau matara hau atu ā nō te Fa’aora—’e nāhea tātou ’ia rave i te reira. E tai’o ’āmui i te mau tuha’a o te a’ora’a a Elder Andersen. E nehenehe te mau melo o te piha ’aore rā o te pupu e ’āparau i te mau tumu tāna i hōro’a mai, nō te fa’a’ite i tō tātou ’itera’a pāpū nō Iesu Mesia ’e tāna a’o e nāhea i te rave i te reira. E aha te mau mea ta’a ’ē tā tātou e rave nō te paraparau matara hau atu ā nō te Mesia ?

• ’Ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua ’ite tātou i te mau parau mau faufa’a roa nō ni’a ia Iesu Mesia, ’o tā tātou e nehenehe e fa’a’ite atu. Nāhea ’oe i te tauturu i te feiā ’āpī ’ia feruri i ni’a i teie mau parau mau ? E ani ’oe ia rātou ’ia tuatāpapa i « Te Mesia Ora : Te ’itera’a pāpū o te mau ’āpōsetolo » ’o rātou ana’e ’aore rā ’ei pupu, ma te ’imi i te mau pāhonora’a i te uira’a « E aha te mau parau mau nō ni’a i te Fa’aora, tei riro ’ei aura’a ta’a ’ē nō ’outou ? » E ani ia rātou ’ia fa’a’ite mai i te mau parau mau tei ’itehia mai e rātou, ’e ’ia fa’ata’a mai nō te aha e aura’a tō teie mau parau mau nō rātou. E nehenehe rātou e fa’a’ite mai i te mau pāpa’ira’a mo’a ’e i tō rātou iho mau ’itera’a rau, ’a ’ohipa ai rātou i te reira. I muri iho, e tāu’aparau rātou i te mau parau mau nō ni’a i te Fa’aora ’o tā rātou e ha’aparare i ni’a i te mau natira’a tōtiare, ’e te hō’ē hoa tei tāpetepete te ’itera’a pāpū, ’aore rā i te hō’ē ta’ata e’ita i te melo nō tā tātou ’Ēkālesia.

• Hau atu i te Luka 1:46–55, e rave rahi tuha’a ’īrava o te pāpa’ira’a mo’a ’o te nehenehe e fa’auru ia tātou, ’ia fa’aite i te mea tā tātou i ’ite nō ni’a ia Iesu Mesia. ’Ua tāpurahia te tahi mau hi’ora’a i roto i te « Pu’e parau ha’amāramaramara’a » ’A feruri e tai’o ’āmui i teie mau pāpa’ira’a mo’a. E aha tā tē reira e ha’api’i nei ia tātou nō ni’a i te fa’a’itera’a i tō tātou ’itera’a pāpū nō Iesu Mesia ia vetahi ’ē ? E aha atu ā tā tātou i ’apo mai roto mai i teie mau ’īrava ? ’Ia fa’a’ite ato’a mai te mau melo o te piha ’aore rā o te pupu i te mea tā rātou i ha’api’i mai nā roto mai i te mau ta’ata tā rātou i mātau, ’o tei fa’a’ite hua nei i tō rātou fa’aro’o nō Iesu Mesia.

te feiā ’āpī tamāhine e tuatapapa ra i te mau pāpa’ira’a mo’a

’A ha’api’i mai ai tātou ’ia ’ite maita’i ’e ’ia here i te Fa’aora, e ’ite mai tātou te mau rāve’a nō te fa’a’ite i tō tātou ’itera’a pāpū nōna.

Rave ma te fa’aro’o

’A fa’aitoito i te mau melo o te piha ’aore rā o te pupu, ’ia feruri ’e ’ia pāpa’i i te mea ’o tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A tītau ia rātou ’ia feruri nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• Mataio 5:14–16 ; Petero I 3:15 ; 2 Nephi 25:26 ; Alama 5:43–50 ; Te Ha’api’ira’a Tumu ’e te mau Fafaura’a 100:5–8

• Peresideni Russell M. Nelson, « ’Ia ’itehia tō ’outou fa’aro’o » (Liahona, Mē 2014, 30)

• Cristina B. Franco, « Te ’itera’a mai i te ’oa’oa i roto i te fa’a’itera’a i te ’evanelia » (Liahona, Novema 2019, 83–86)

Ha’api’ira’a mai tā te Fa’aora

E ui i te mau uira’a ’o te fa’aitoito i te mau pīahi ’ia fa’a’ite mai i tō rātou ’itera’a pāpū, penei a’e e riro ’ei rāve’a pūai nō te tītau i te Vārua. E ui atu i te mau uira’a mai teie te huru « Nāhea ’outou i te ’itera’a ē, ’ua aufau Iesu Mesia i tā ’outou mau hara ? » ’aore rā « Nāhea tō ’outou ’ā’au māuruuru i te tupura’a nō te mea tā te Fa’aora i rave nō tātou i Getesemane ? »