’O ’outou te māramarama o teie nei ao, nā Simon Dewey

’O ’outou te māramarama o teie nei ao, nā Simon Dewey

22 nō Tēnuare

Nāhea Iesu Mesia e riro ai ’ei māramarama i roto i tō’u orara’a ?

Ioane 1

ītona ’āpo’o

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, ’a fa’ahiti tāhō’ē i te Parau tai’o a te Feiā ’Āpī Tamāhine ’aore rā i te Parau tai’o a te pupu Autahu’ara’a a Aarona. I muri iho, ’a arata’i i te hō’ē tāu’ara’a parau nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’oe i tāu’aparau.

• Ora i te ’evanelia. E aha te mau ’ohipa i tupu a’enei tei ha’apūai i tō tātou ’itera’a pāpū ?

• Aupuru i te feiā tei hina’aro i te tauturu ’O vai tei hina’aro i tā tātou tauturu ’e i tā tātou mau pure ? E aha te mea e tūra’ihia nei ia tātou ’ia rave nō te tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea tātou e nehenehe ai e riro ’ei māramarama nō te mau melo o te ’utuāfare, ’aore rā nō te mau hoa ’aita e fāri’i nei i tō tātou mau ti’aturira’a ?

• Tāhō’ē i te mau ’utuāfare ē a muri noa atu. Nāhea tātou i te fa’a’ite hau atu ā i te here ’e i te turu nō tō tātou ’utuāfare, ’e ’ia rave i te ta’a-’ē-ra’a maita’i i roto i tō tātou fare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

’Ua ’īriti te ’āpōsetolo Ioane i tāna ’Evanelia nā roto i te fa’aaura’a ia Iesu Mesia i te hō’ē māramarama tei « ’ana’ana mai … i te pōuri » (Ioane 1:5). Tē tupu tino nei te mau melo o tā ’oe piha ’aore rā o te pupu i roto i te hō’ē tau pōiri i te pae vārua. E taime ato’a rā e roa’a ai te « māramarama fa’ahiahia » o te Fa’aora nō te tauturu ia rātou ’ia hi’o māramarama ’e ’ia ’ite mai i tō rātou ’ē’a (Petero 1 2:9).

’A tai’o ai ’oe i te Ioane 1 i teie hepetoma, ’a feruri nō te aha e mea faufa’a rahi te māramarama ’e nō te aha te Fa’aora i riro ai ’ei māramarama i roto i tō ’oe orara’a (hi’o ato’a ’Īritira’a a Iosepha Semita, Ioane 1:1–34 [i roto i te Parau hi’u Bibilia]). Nāhea tōna māramarama i te ha’amaita’i i te feiā tā ’oe e ha’api’i ra ? Nāhea ’oe i te fa’auru ia rātou ’ia haere nā roto i tōna māramarama ? Nō te tauturu ia ’oe ’ia feruri i teie mau uira’a, ’a tuatāpapa i Te Ha’api’ira’a Tumu ’e te mau Fafaura’a 88:5–13, 67 ; 93:2–9 ’e te a’ora’a a te tuahine Sharon Eubank « Te Mesia : Te māramarama e ’ana’ana i roto i te pōiri »(Liahona, Mē 2019, 73–76).

Ha’api’i ’āmui

Pinepine, e mea faufa’a ’ia ha’amata i tā ’oe ’āparaura’a nā roto i te hōro’ara’a i te rāve’a i te piha ’aore rā i te pupu, ’ia paraparau mai i te mea tā rātou i ha’api’i mai nā roto mai i tā rātou tuatāpapara’a i te pāpa’ira’a mo’a. ’Ei hi’ora’a, i teie hepetoma e ani ia rātou ’ia hōro’a mai i te hō’ē ta’o ’aore rā i te hō’ē pereota, nō roto mai i te Ioane 1:1–17 ’o tē ha’api’i nei ia rātou nō ni’a i te Fa’aora. ’A vaiiho ia rātou ’ia parau mai nō te aha rātou i mā’iti ai i tā rātou ta’o ’aore rā pereota, ’e e aha tā te reira e ha’api’i nei ia rātou nō ni’a ia Iesu Mesia. ’A fa’a’ite ia rātou e mea nāhea Iesu Mesia i te rirora’a ’ei māramarama i roto i tō ’oe orara’a. Nā te mau ’ātivite i raro nei e tauturu ia ’oe ’ia tāmau ā i tā ’outou ’āparaura’a.

• Nō te tauturu ia rātou tā ’oe e ha’api’i ra ’ia māuruuru i te māramarama o te Fa’aora, e nehenehe te hō’ē o te piha ’aore rā o te pupu e fa’a’ite mai, mai te aha te huru i roto i te pōiri. Tē vai nei hō’ē ’ā’amu pāturu, e ’itehia i te ha’amatara’a o te a’ora’a a Elder Timothy J. Dyches « Tē ’ati atu nei te māramarama i te māramarama » (Liahona, Mē 2021, 112–15). Nō te aha te ta’ata e mata’u ai i te tahi taime i te pōiri ? Nō te aha tātou e hina’aro ai i te māramarama ? Nō te aha Iesu Mesia i pi’ihia ai te Māramarama o teie nei ao ? E ani i te feiā ’āpī ’ia tuatāpapa i te a’ora’a a Elder Dyches ma te ha’amata « E nehenehe ānei iā’u ’ia hōro’a i te mana’o ē, penei a’e paha, ’ua tae i te taime ’ia ui ia ’outou iho ». E nehenehe rātou e ’imi i te mea tā tātou e nehenehe e rave nō te fa’atae hope atu ā i te māramarama o te Fa’aora i roto i tō tātou orara’a.

• E tauturu te mau pāpa’ira’a mo’a i tāpurahia i raro a’e « Pu’e parau ha’amāramaramara’a » i tā ’oe piha ’aore rā pupu ’ia hāro’aro’a maita’i a’e i te māramarama tā Iesu Mesia e pūpū nei. E tai’o ’e e tāu’a parau ’ei piha ha’api’ira’a, i te tahi mau pāpa’ira’a mo’a mātāmua. I muri iho, ’a pāpa’i i ni’a i te tāpura ’ere’ere Nāhea tātou i te ’āfa’i mai i te māramarama o te Fa’aora i roto i tō tātou orara’a ? ’e e ani i te feiā ’āpī ’ia tīti’a i te mau pāhonora’a tei roa’a mai ia rātou i roto i te piti o te tuha’a pāpa’ira’a mo’a. ’A fa’anaho i te feiā ’āpī ’ei pea ’e e ani ia rātou ’ia fa’a’ite i te tahi ’e te tahi, e mea nāhea Iesu Mesia i te rirora’a ’ei māramarama i roto i tō rātou orara’a.

• ’Ua parau te tuahine Sharon Eubank, « Hō’ē o te mau hina’aro faufa’a roa a’e nō te tupu i te rahi, ’o te fa’aea-tū’ati-noa-ra’a ïa i te puna nō te māramarama—’o Iesu Mesia » (« Te Mesia : Te māramarama e ’ana’ana i roto i te pōiri, » 73). ’A fa’ahōho’a i te reira ma te hō’ē ha’api’ira’a tao’a—’oia ho’i e fa’a’ite ānei i te hō’ē mōrī pata ’aore rā te hō’ē niuniu paraparau ’āfa’ifa’i ’e e ’āparau ai nō te aha e mea faufa’a te puna o tōna tū’amara’a uira. I muri iho ’ia tai’o fa’ahou te mau melo nō te piha ’aore rā nō te pupu i te a’ora’a a te tuahine Eubank, ma te ’imi mai i te mau rāve’a a Sātane « nō te tāpū i te uira [o tā tātou tū’amara’a] ». Nāhea tātou ’ia fa’aea-tū’ati-pūai-noa ia Iesu Mesia ? E aha te fa’auera’a ’o tā tātou i ’ite mai i roto i te a’ora’a a te tuahine Eubank ?

• Tē fa’a’ite pāpū nei te mau hīmene mai te « ’O te Fatu ra tō’u māramarama » ’e « Arata’i mai, e tēna ti’arama » (Te mau Hīmene, N°43,°49) ē, ’o Iesu Mesia tō tātou māramarama. ’A ha’amana’o i te hīmene ’āmui i te reira (’aore rā, i te tahi ’o tā ’oe i mātau) ’e ’a hi’o mai i te mau ta’o ’aore rā i te mau pereota, e ha’api’i nei ia tātou mai te aha Iesu Mesia i riro ai ’ei māramarama. Nāhea vetahi ’ē i te ’āfa’ira’a mai i te māramarama o te Fa’aora i roto i tō tātou orara’a ? Nāhea tātou ’ia fa’a’ite i tōna māramarama ia vetahi ’ē ?

A Gift of Light [E hōro’a nō te māramarama], nā Eva Timothy

A Gift of Light [E hōro’a nō te māramarama], nā Eva Timothy

Rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i, i te mea tā rātou e rave nō ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A tītau ia rātou ’ia feruri nāhea te ha’ara’a i ni’a i tō rātou mau mana’o i te ha’apūai i tō rātou mau aurara’a ’e tō rātou Metua i te ao ra ’e ia Iesu Mesia.

Pu’e parau ha’amāramarama

• Salamo 27:1 ; Isaia 60:19–20 ; Ioane 8:12 ; 3 Nephi 18:16, 24 (’O te Fa’aora te māramarama)

• Maseli 4:18–19 ; Ioane I 2:8–11 ; Te Ha’api’ira’a Tumu ’e te mau Fafaura’a 50:23–24 ; 93:26–28 ; 138:20–24 (Nāhea tātou i te ’āfa’i i te māramarama o te Fa’aora i roto i tō tātou orara’a)

• « Patterns of Light : The Light of Christ [Te mau hōho’a o te māramarama : Te māramarama o te Mesia] » (video), ChurchofJesusChrist.org

Ha’api’ira’a mai tā te Fa’aora

’A ha’apa’o ai ’oe i te mea e tupu ra i roto i te orara’a o tā ’oe mau pīahi, e ’ite atu ’oe i te mau rāve’a maita’i nō te ha’api’i. E nehenehe te mau mana’o e fa’a’itehia mai e te mau pīahi ’aore rā te mau uira’a tā rātou e ui mai, e riro ’ei taime nō te ha’api’ira’a.