I te ’āpo’o pape, nā Crystal Suzanne

I te ’āpo’o pape, nā Crystal Suzanne

12 nō Fepuare

Nāhea vau ’ia ha’amaita’i i tā’u ha’amorira’a i te Atua ?

Ioane 2–4

ītona ’āpo’o

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, ’a fa’ahiti tāhō’ē i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a Aarona I muri iho, ’a arata’i i te hō’ē tāu’ara’a parau nō ni’a i te ’ohipa o te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea tātou i te ha’afātata atu i te Fa’aora ? Nāhea tātou i te tāmata ’ia riro hau atu mai iāna te huru ?

• Aupuru i te feiā tei hina’aro i te tauturu ’O vai tei vai mai i roto i tō tātou ferurira’a ’aita i maoro a’e nei ? Nāhea tātou i te tauturu i teie mau ta’ata ?

• Ani i te mau ta’ata ato’a ’ia fāri’i i te ’evanelia. Nāhea tātou ’ia pāhono i te mau uira’a a tō tātou mau hoa nō ni’a i te ’Ēkālesia, ma te ha’apūaihia tō rātou fa’aro’o i te Fa’aora ?

• Tāhō’ē i te mau ’utuāfare ē a muri noa atu. E aha te tahi mau rāve’a, e nehenehe ai tātou e fa’atū’ati maita’i a’e atu i te mau melo o te ’utuāfare rarahi, mai te mau metua rū’au ’e te mau taea’e fēti’i ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Te vahine nō Samaria i fa’a’itehia i roto i te Ioane 4, e au ē pinepine ’oia i te haere i te ’āpo’o pape nō te huti mai i te pape. I teie rā taime e mea ta’a ’ē ïa. ’Ua fārerei ’oia i te hō’ē ’āti Iuda tei ani mai iāna i te inu. I te reira noa peu e mea mātaro-’ore-hia ho’i, nō te mea ē ’aita roa te mau ’āti Iuda e ’āmuimui nei i tō Samaria. Tē vai ra rā te tahi atu ’ohipa mātaro-’ore-hia nō ni’a i teie ta’ata. Te ’itera’a teie vahine ē, e peropheta paha ’oia, uiui atu ra ’oia iāna nō ni’a i te ha’amorira’a i te Atua. E mea tano ānei ’ia ha’amori i te Atua i Samaria ? ’Aore rā e ti’a i te mau ta’ata ’ia ha’amori i Ierusalema, mai te au i te parau a te mau ’āti Iuda ? (hi’o Ioane 4:19–20). Fa’ata’a mai ra taua ta’ata ra ē, e’ita te vāhi tā tātou e ha’amori ra i te mea faufa’a, ’o te huru rā o tā tātou ha’amorira’a : « E ha’amori ai i te Metua te feiā ha’amori mau ra, ma te vārua ’e te parau mau : ’o te huru ïa o te feiā ha’amori tā te Metua e tītau nei ». (Ioane 4:23). I muri iho, parau atu ra taua ta’ata nei iāna, ’o vai ’oia—o ’oia te Mesia, te Fa’aora o te ao nei (hi’o Ioane 4:25–26).

Tē hāro’aro’a ra ānei te feiā ’āpī ’o tā ’oe e ha’api’i nei, i te aura’a ’ia ha’amori i tō tātou Metua i te ao ra ? Ta’a ’ē noa atu te ha’amorira’a i te fare purera’a (hi’o Te Ha’api’ira’a Tumu ’e te mau Fafaura’a 59:9–10), e aha te tahi atu mau rāve’a tā rātou e rave nei nō te ha’amori iāna, tae noa atu tera tā rātou i ’ore paha i ’ite ’ei ha’amorira’a ? E tauturu te mau ha’amāramaramara’a i muri nei ia ’oe ’ia fa’aineine i te ha’api’i ia rātou, e nāhea ’ia ha’amaita’i i tā rātou ha’amorira’a i te Atua : Salamo 95:1–7 ; Mataio 4:8–10 ; Alama 32:4–11 ; Te Ha’api’ira’a Tumu ’e te mau Fafaura’a 20:17–19 ; 93:19–20, ’e te a’ora’a a te episekōpo Dean M. Davies « Te mau ha’amaita’ira’a nō te ha’amorira’a » (Liahona, Novema 2016, 93–95).

Ha’api’i ’āmui

Nō te ha’amata i te hō’ē ’āparaura’a nō ni’a i te ha’amaita’ira’a i te ha’amorira’a, e ani ’oe i te mau melo o te piha ’aore rā o te pupu ’ia hi’o fa’ahou ’ei ta’ata hō’ē i te Ioane 4:19–26 ’e ’ia pāpa’i i te mau pāhonora’a i te mau uira’a mai teie : Nō te aha vau e ha’amori ai i te Atua ? E aha te aura’a nō’u te parau e ha’amori te Atua ? E riro ato’a ’ei tauturu ’ia hi’o ’āmui fa’ahou i te aura’a o te parau i raro a’e i te « Ha’amorira’a » i roto i te Arata’i nō te mau pāpa’ira’a mo’a ((scriptures.ChurchofJesusChrist.org). I muri a’e i tō rātou taime nō te feruri i teie mau uira’a, e ani ia rātou ’ia fa’a’ite mai i tō rātou mau mana’o. E tauturu te mau ’ātivite i muri nei ia rātou ’ia fāri’i i te mau muhumuhu a te Vārua Maita’i.

• E mau mana’o faufa’a mau tō te mau melo o tā ’oe piha ’aore rā pupu, nō ni’a i te aura’a o te ha’amorira’a i te Atua. E nehenehe ’oe e ani ia rātou ’ia fa’ati’a mai i te mea tei tupu nō rātou, ’a ’ite ai rātou ē, tē ha’amori nei rātou i te Atua. Nā roto i te mau pāpa’ira’a mo’a mai teie i muri nei, e rahi atu ā tō rātou hāro’aro’ara’a ’e e hōro’a ia rātou i te mau mana’o e nāhea rātou ’ia fa’ariro i tā rātou ha’amorira’a i te Atua ’ei mea faufa’a a’e : Salamo 95:1–7 ; Mataio 4:8–10 ; Alama 32:4–11 ; Te Ha’api’ira’a Tumu ’e te mau Fafaura’a 20:17–19 ; 93:19–20. E nehenehe ato’a rātou e tāu’aparau i te fa’ahitira’a parau a Elder Bruce R. McConkie i roto i te « Pu’e parau ha’amāramaramara’a ».

• Nō te tauturu i te feiā ’āpī ’ia ha’amaita’i i tā rātou ha’amorira’a i te Atua, ’a feruri i te pāpa’i i teie mau upo’o parau i ni’a i te tāpura ’ere’ere : ’O vai, Nō te aha, I hea, ’e Nāhea. E ani ia rātou ’ia hi’o fa’ahou i te mau pāpa’ira’a mo’a tei tāpurahia i roto te « Ha’amorira’a » i roto te Arata’i nō te mau pāpa’ira’a mo’a (scriptures.ChurchofJesusChrist.org), ma te ’imi mai i te mau ’īrava e tauturu ia rātou ’ia māramarama, ’o vai, nō te aha, i hea, ’e nāhea tātou ’ia ha’amori. ’A ’ite mai ai rātou i te hō’ē ’īrava e tū’ati, e ani ia rātou ’ia ’āparau i te reira ’e tō te piha ’aore rā tō te pupu ’e ’ia pāpa’i i te fa’ahorora’a i raro a’e i te upo’o parau tano. ’A fa’aitoito ia rātou ’ia fa’a’ite mai i te mau ’itera’a rau, ’a ’ite ai rātou ’ua fātata atu rātou i te Atua nā roto i te ha’amorira’a.

• Tei roto i te a’ora’a a te ’episekōpo Dean M. Davies « Te mau ha’amaita’ira’a nō te ha’amorira’a » te mau hi’ora’a o te mau ta’ata e ha’amori ra i te Atua. E nehenehe ’outou e tai’o ’āmui i te tuha’a « E aha te ha’amorira’a ? » I muri iho, e hi’o fa’ahou mai te ta’ata tāta’itahi i te hō’ē o te mau hi’ora’a o te mau ta’ata e ha’amori ra, e ’itehia i roto i nā tuha’a e toru i muri nei o te a’ora’a. E aha tā te hi’ora’a tāta’itahi e ha’api’i nei ia tātou nō ni’a i te ha’amorira’a i te Atua ? E aha tā te tuha’a hope’a o te a’ora’a e ha’api’i nei nō ni’a i te mau ha’amaita’ira’a e tae mai nā roto i te ha’amorira’a iāna ma te paieti ? E aha tei fa’auruhia ia tātou ’ia rave nō te ha’amaita’i i tā tātou ha’amorira’a i te Atua ?

feiā ’āpī tamāroa e tai’o ra

Te ha’amorira’a tei roto te tuatāpapara’a i te pāpa’ira’a mo’a ’e te tahi atu mau ravera’a e fa’a’ite nei i te ha’amorira’a ’e te here i te Atua.

Rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i i te mea tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, ’ia fa’a’ite mai rātou i tō rātou mau mana’o. ’A tītau ia rātou ’ia feruri nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• « Te mau rāve’a nō te ha’amori », Te mau ha’api’ira’a a te mau Peresideni o te ’Ēkālesia : David O. Mckay (2003), 29–37

• Donald L. Hallstrom, « The Conversion of the Children of God (Te fa’afāriura’a o te mau tamari’i a te Atua) » (Ha’apurorora’a seminaire ’e Institut, 13 nō Tiunu 2017), broadcasts.ChurchofJesusChrist.org

• ’Ua ha’api’i Elder Bruce R. McConkie : « Te ha’amorira’a mau ’e te maita’i roa ra, ’o te pe’era’a ïa i te mau ta’ahira’a o te Tamaiti a te Atua ; nā roto i te ha’apa’ora’a i te mau fa’auera’a ’e i te ha’apa’ora’a i te hina’aro o te Metua, mai te mea ra ē tē nu’u atu ra tātou mai te maita’i ’e te maita’i roa atu, e tae roa atu i te taime e fa’ahanahanahia ai tātou i roto i te Mesia mai iāna i roto i tōna ra Metua. ’Ua hau roa atu te reira i te pure, i te a’ora’a ’e i te hīmene. ’O te orara’a ’e te ’ohipara’a ’e te ha’apa’ora’a ïa. ’O te pe’era’a ïa i te orara’a o te Hi’ora’a rahi » (« How to Worship », Ensign, Tītema 1971, 130 ; pāpa’i rahi ’āpī).

Ha’api’ira’a mai tā te Fa’aora

E mana te ha’api’ira’a tumu e ’itehia mai i roto i te mau pāpa’ira’a mo’a ’e i roto i te mau parau a te mau peropheta nō te mau mahana hope’a nei, nō te taui i te ’ā’au ’e nō te ha’apūai i te fa’aro’o. Mai ia ’oe ’e te feiā tā ’oe e ha’api’i nei « ’ia tāmata [’outou] i te mana nō te parau a te Atua », e ’ite ’oe ē, tei roto te « ’rāve’a rahi nō te arata’i i te mau ta’ata ’ia rave i te ’ohipa ti’a » (Alama 31:5).