Te fa’afāriura’a o te mau tamari’i a te Atua
Ha’apurorora’a matahiti nā te mau ha’api’ira’a ’evanelia (Séminaire ’e te Institut) • 13 nō tiunu 2017
Tē ’oa’oa rahi nei au i te taera’a mai i roto i teie ha’apurorora’a pae vārua i teie mahana e ’outou ’o tē ’arata’i nei ’e tē ha’api’i nei i roto i tā tātou mau Ha’api’ira’a ’Evānelia nā te feiā ’āpī ’e te feiā ’āpī pa’ari ’e tō ’outou mau hoa fa’aipoipo. ’Ua farerei mātou e rave rahi ’o ’outou nā te ao nei, ’e e mea fa’ahiahia mau ’outou. Tē ti’aturi nei au ē tē vai nei te tahi mau tumu nō te reira. ’A tahi, e tihepu te ’Ēkālesia i te mau ta’ata ana’e tei mau i te hō’ē parau fa’ati’a nō te hiero, tei ’aravahi i te ha’api’i, ’e tei mā’itihia ’e tei fāri’ihia e te feiā fa’atere o te ’Ēkālesia ’e te Tomite fa’atere nō te ha’api’ira’a. ’Aita paha ’o ’outou te mau orometua ha’api’i tei pi’ihia i tītorotorohia mai te mau orometua ha’api’i ’aufauhia, terā rā, ’ia au i tō’u ’itera’a, e pi’i te feiā fa’atere nō te pāroita i te mau ta’ata maita’i roa a’e nō te ha’api’i i te ha’api’ira’a ’evanelia a te feiā ’āpī ’e te feiā ’āpī pa’ari. Te piti, tei roto roa ’outou i te ha’api’ira’a tumu a te Mesia, tā Nephi i parau « ’o teie ana’e ’o te rāve’a ora mau a te Metua, ’e tā te Tamaiti, ’e tā te Vārua Maita’i ho’i. »1 E horo’a mai te ha’api’ira’a i teie rāve’a i te fa’aitoitora’a tāmau ’ia ora i teie ha’api’ira’a, ’e ’o terā ho’i te tumu ’outou i maita’i roa ai. ’A nā reira noa !
E ’utuafare ha’api’ira’a ’evanelia tātou ! ’Ua pi’ihia vau ’ei peresideni nō te tītī nō Honolulu Hawaii e 32 matahiti i ma’iri a’enei. E 18 ’āva’e tō tā māua tamari’i hope’a ’e e 11 matahiti tō te matahiapo o tā māua nā tamari’i e maha. E mea rahi roa te tītaura’a i roto i ta’u nei tōro’a ’ohipa, ’e e au ra ē ’aita e taime fa’ahou nō te tahi atu pi’ira’a. ’Ua fārereihia vau e te feiā ha’apa’o ra i te ha’api’ira’a ’evanelia i roto i tō mātou titi ’e ’ua anihia vau, ma te tahi pāpū ’ore nō te huru nō tō māua ’utuāfare e tamari’i na’inai, « ’Ia mana’o ’oe, e nehenehe ānei i te tuahine Hallstrom ’ia ha’api’i i te ha’api’ira’a ’evanelia nā te feiā ’āpī ? » ’Aita māua i mātau i te pāto’i i te mau pi’ira’a, nō reira ’ua pāhono atu māua : « ’Ua ti’a roa. »
’O te ha’amatara’a ïa te reira o te hō’ē tau ’ohipa roa ’e te ho’ona rā nō tō mātou ’utuāfare. ’Ua ara tā’u vahine fa’aipoipo, ’o Diane, i te mau po’ipo’i ato’a i te hora 4 ’e te ’āfa nō te fa’aineine iāna nō te ha’api’ira’a ’evanelia i te hora 6 i te po’ipo’i. ’Ua tītau ato’a te reira iā’u ’ia fa’aara i te mau tamari’i, ’ia tauturu ia rātou ’ia hopu i te pape ’e ’ia ’ō’omo i te ’ahu, ’ia fa’aineine i te tāmā’ara’a po’ipo’i ’e ’ia ineine te mau mea ato’a hou ’a tapae mai ai ’o Diane i te hora 7. ’Ia nehenehe iā’u ’ia haere atu i te ’ohipa ’e ’ia Diane ’ia fa’ahoro atu ’oia i te mau tamari’i pa’ari i te fare ha’api’ira’a.
’Ua nā reira noa māua e va’u matahiti te maoro ē tae noa atu i te taime ’ua pi’ihia Diane ’ei peresideni nō te Feiā ’Āpī Tamāhine. E pae matahiti i muri mai ’ua haere fa’ahou mai te fa’atere nō te ha’api’ira’a ’evanelia e pātōtō i tō mātou ’ūputa ma te tāparu : « E mea fifi roa te piha hope’a nō te ha’api’ira’a ’evanelia ; e nehenehe ānei tā te tuahine Hallstrom ’ia ha’api’i fa’ahou i te ha’api’ira’a ’evanelia ? » Nō reira, ’ua ’āmui-fa’ahou-hia e toru matahiti i nā matahiti e va’u nā mua atu, ’e nā te hō’ē pi’ira’a nō ’ō mai i te peresideni Hinckley i tātara iāna i teie pi’ira’a. ’Ua pi’ihia vau ’ei Hui mana fa’atere, ’e ’ua tonohia atu māua i te fenua Tāpōnē nō tā māua ’ohipa mātāmua. Nō reira, e te mau ’orometua ha’api’i tei pi’ihia, ’a ha’apa’o maita’i ’ia hina’aro ’outou ē ’ia tātarahia ’outou i tō ’outou pi’ira’a—e’ita roa ’outou e ’ite i hea ’outou e tāpae ai !
E ha’amana’o māua i terā tau fifi, ’e te ’ohipa rahi ma te here ’e te māuruuru rahi. ’Ua here roa ’o Diane i tāna mau pīahi i roto i te ha’api’ira’a ’evanelia (’e ’ua here rātou iāna). ’Ua ha’api’i ato’a ’oia i te tā’āto’ara’a ’o tā māua mau tamari’i i roto i te ha’api’ira’a ’evanelia, ’e tā māua mau tamaiti ’e te mau tamāhine fēti’i, hō’ē tei riro mai ’ei fa’atere ha’api’ira’a ’evanelia nā te feiā ’āpī pa’ari, ’e tē ti’aturi nei au ē tē māta’ita’i nei ’oia i teie ha’apurorora’a. Ta’a ’ē noa atu i te reira, ’ua fa’ahōhonu teie ha’api’ira’a tu’utu’u ’ore i te ’ite o Diane nō ni’a i te ’evanelia ’e tōna ’itera’a pāpū—e tahi mea tei ha’amaita’i rahi iā’u nei ’e tō māua ’utuāfare. ’Ua « fa’ati’a » ato’a te reira iā’u ’ia pārahi mai i pīha’i iho i tā māua mau tamari’i i te taime ana’e rā o te mahana e vata tāmau ai au—’oia ho’i taua mau hora po’ipo’i roa ra o te hebedoma. ’Ua riro te reira ’ei ha’amaita’ira’a rahi roa nō’u ’e, tē ti’aturi nei au, nō rātou ato’a. Nō reira, tē ’ite nei ’outou, e riro mau te tahi o tā tātou mau hōpoi’a rahi ’ei mau ha’amaita’ira’a rahi roa a’e nō tātou.
Tē ’oa’oa nei au i teie mahana i te ti’ara’a i pīhai iho i te mau hoa ’ohipa tā’u e fa’atura rahi nei. ’Ei melo nō te Tomite fa’atere nō te ha’api’ira’a ’e te Piha fa’atere nō te tomite fa’atere nō te ha’api’ira’a, tē fārerei nei au e piti taime i te ’āva’e ia Elder Kim B. Clark, tō tātou ti’a rahi fa’ahiahia, ’e ia Chad H. Webb, te ti’a fa’atere nō te Séminaire ’e te Institut. Tē ’arata’i-maita’i-hia nei ’outou, ’o ’outou tei tihepuhia ’aore rā ’o tē tavini nei i roto i te mau ha’api’ira’a ’evanelia. Mai te rahira’a o ’outou tei ’ite, tē peresidenihia nei te tōmite ha’api’ira’a a te ’Ēkālesia e te peresideni Thomas S. Monson, ’e tē vai ato’a ra te peresideni Henry B. Eyring ’e te peresideni Dieter F. Uchtdorf. E melo ato’a ’o Elder Dallin H. Oaks nō te tōmite ha’api’ira’a ’e tē peresideni nei ’oia i te tōmite ’ohipa. ’O Elder Jeffrey R. Holland, te tuahine Jean B. Bingham ’e te tuahine Bonnie L. Oscarson te tahi atu ā mau melo nō te tōmite ha’api’ira’a ’e te tōmite ’ohipa. Tē māere tāmau noa nei au i te faufa’a rahi ’e te mau rāve’a e hōro’ahia nei nō te ha’api’ira’a i roto i te ’Ēkālesia.
E fa’a’ite atu vau i teienei i te tahi mau mana’o ia ’outou e ti’ara’a faufa’a rahi i roto i te ha’api’ira’a pae vārua o te feiā ’āpī o te ’Ēkālesia. ’Ua fa’ahiti a’ena vau i te parau nō ni’a i te ha’api’ira’a tumu a te Mesia. Nāhea teie ’Ēkālesia e tauturu ai i tōna mau melo ia māramarama ’e ’ia ora i teie ha’api’ira’a tumu ? Teie te tahi rāve’a ’ē atu nō te u’i i teie uira’a : « E aha ïa te mau tītaura’a mātāmua a te mau ’āpōsetolo a te ’Ēkālesia a Iesu Mesia i te Feiā Mo’a i te mau Mahana Hope’a Nei ? »
Te hō’ē rāve’a nō te ha’api’i mai i teie mau tītaura’a mātāmua ra ’ia māramarama ïa i te « ’ohipa nō te fa’aorara’a. » Te aura’a pāpū maita’i roa a’e nō te ’ohipa nō te fa’aorara’a tei roto ïa i te Buka arata’i 2. ’A ha’amana’o ē ’ua ha’amanahia te buka ’arata’i ’a te ’Ēkālesia e te Peresidenira’a Mātamua ’e te pupu nō te Tino ’Ahuru Ma Piti ’āpōsetolo. Tē parau nei te reira : « ’Ua tonohia te mau melo nō te ’Ēkālesia a Iesu Mesia ‘nō te rave i te ’ohipa i roto i tāna ra ’ō vine nō te fa’aorara’a i te mau vārua o te ta’ata nei’ (PH&PF 138:56). I roto i teie ’ohipa fa’aorara’a ’o te ’ohipa misionare ïa a te mau melo, te tāpe’ara’a mai i te feiā fa’afāriuhia, te fa’aitoitora’a i te mau melo paruparu, te ’ohipa hiero ’e te ’ā’amu ’utuāfare, ’e te ha’api’ira’a i te ’evanelia. »2
Te tahi atu hi’ora’a nō ni’a i teie mau tītaura’a mātamua ’o te fa’ahitira’a parau ïa i roto i te buka ’arata’i a te ’Ēkālesia i raro a’e i te upo’o parau « Te tumu o te ’Ēkālesia. » Tē tai’o nei : « ’Ua fa’anahohia te ’Ēkālesia a Iesu Mesia i te Feiā Mo’a i te mau Mahana Hope’a Nei e te Atua nō te tauturu i tāna ’ohipa ’ia fa’atupu i te fa’aorara’a ’e te fa’ateiteira’a o tāna mau tamari’i. Tē tītau manihini nei te ’Ēkālesia i te ta’ata ato’a ’ia ‘haere mai i te Mesia ’ia maita’i roa ’outou iāna’ (Moroni 10:32; hi’o ato’a PH&PF 20:59). Te tītaura’a manihini ’ia haere mai i te Mesia ra, nā te mau ta’ata ato’a ïa tei ora, ’aore rā ’o te ora mai, i ni’a i te fenua nei. »3
Tē parau fa’ahou nei teie fa’ahitira’a i roto i teie buka ’arata’i : « Nō te fa’atupu i tāna fā ’ia tauturu i te mau ta’ata tāta’itahi ’e te mau ’utuāfare ’ia noa’a te fa’ateiteira’a, tē rōtahi nei te ’Ēkālesia i ni’a i te mau hōpoi’a tei fa’ata’ahia mai e tō te ra’i. ’Oia ho’i, te tauturura’a i te mau melo ’ia ora i te ’evanelia a Iesu Mesia, te ha’aputuputura’a ia ’Īserā’ela nā roto i te ’ohipa misiōnare, te utuutura’a i te mau ta’ata ri’i ’e te veve, ’e te fa’ati’ara’a i te fa’aorara’a o te feiā pohe nā roto i te patura’a i te mau hiero ’e te ravera’a i te mau ’ōro’a nā roto i te monora’a ».4
Nō reira, hō’ē ā ana’e te « ’ohipa nō te fa’aorara’a » ’e teie mau « hōpoi’a tei fa’ata’ahia mai e tō te ra’i » ’e e ti’a te reira ’ia ’arata’i i te mau mea ato’a tā tātou e rave i roto i te ’Ēkālesia, ’e tae noa atu te ha’api’ira’a i tā tātou feiā ’āpī (penei a’e ’o terā mau).
I te pae hope’a, te mau mea ato’a tā tātou e rave nei—nō tātou iho, nō tō tātou mau ’utuāfare ’e i roto i tō ’outou nei mau ti’ara’a—’o te ha’api’ira’a ïa i te « ’ohipa no te fa’aorara’a » ’e teie mau « hōpoi’a tei fa’ata’ahia mai e tō te ra’i » nō te tauturu i te fa’afāriura’a mai o te mau tamāroa ’e te mau tamāhine a te Atua. ’O te ha’api’ira’a ïa mai ia Aarona ’e tōna mau taea’e Amona, Omonera, Himeni—’ia ha’api’i « mai te au i te Vārua tohu ’e te parau heheu, ’e te mana ho’i o te Atua », ’ia rahi te feiā ’o te fa’aro’o « i tā [’outou] a’ora’a ’e ’ia fāriu ho’i i te Fatu ra, ’e [e’ita roa atu rātou… e tāiva ».5
Mai tā te Peresidenira’a Mātamua i parau i te mau metua ’e i te feiā fa’atere o te feiā ’āpī : « ’Ua pi’ihia ’outou ’e te Fatu nō te tauturu i te feiā ’āpī ’ia fāriu atu i te ’evanelia. »6 Nā roto i te pe’era’a mai te au i tā te Fa’aora i ha’api’i, e ti’aturi ïa tātou ’e e ha’api’i mai ïa tā tātou feiā ’āpi nā roto i te hō’ē rāve’a hōhonu a’e ’o te ’arata’i atu i te fa’afāriura’a.
E ’ere te ha’api’ira’a i tā tātou feiā ’āpī te ha’api’i-noa-ra’a ia rātou i te ’ā’ai, ’o te ha’api’ira’a rā ia rātou i te ha’api’ira’a tumu ’o te tura’i ia rātou ’ia rave. Tā tātou ’ohipa ’ia « riro ïa ’ei mauha’a i te rima o te Atua »7 ’ia nehenehe ia rātou ’eiaha noa e fa’aro’o, ’ia ’ite ato’a rā, ’e ’ia nehenehe ia rātou ’ia rave i muri iho. Tā tātou ’ohipa ’ia « ha’api’i ïa ’e ’ia pāturu te tahi i te tahi »8 ’ia « tāpe’a ho’i tātou ia [tātou iho] ’ia rave i te ’ohipa mo’a noa. »9 Tā tātou ’ohipa ’o te ha’api’i ïa i te « fa’aro’o ē tae noa atu i te tātarahapa. »10
Nāhea ïa teie huru ha’api’ira’a e fa’atupu-maita’i-a’e-hia ai ? Te hōho’a ha’amauhia i roto i te ’Ēkālesia ’a te Fatu ’ia ha’amori mau ïa tātou i mua i te ta’ata, i roto i te ’utuāfare, ’e tā tātou iho ha’amorira’a. E tātara atu vau i te tufa’a tāta’itahi.
Te ha’amorira’a i mua i te ta’ata
Te ha’amorira’a i mua i te ta’ata ’ia ha’aputuputu ana’e ïa tātou ’ei mau tamari’i a te Atua, ’ei mau taea’e ’e ’ei mau tuahine, ’e ’ei hō’ē amuira’a ’o te feiā mo’a. I te tahi mau taime e mau rurura’a rahi ïa, mai te ’āmuira’a titi ’aore rā te ’āmuira’a rahi, ’aore rā i te tahi mau taime ’e mea na’ina’i ïa mai te purera’a a te pupu autahu’ara’a ’aore rā a te feiā ’āpī tamāhine ’aore rā te Sōtaiete Tauturu ’aore rā te hō’ē piha ha’api’ira’a ’evanelia a te feiā ’āpi ’aore rā a te feiā ’āpī pa’ari. Tā tātou rurura’a pae vārua i teie mahana ’e hō’ē ïa ha’amorira’a i mua i te ta’ata. I roto i teie mau rurura’a, tē pure nei, tē ha’api’i nei, tē fa’a’ite papū nei, ’e tē pāturu nei tātou—nō te fa’arahi i tō tātou māramarama nō ni’a i tō tātou Metua i te Ao ra, ia Iesu te Mesia, ’e te Vārua Maita’i. E hōpoi’a ïa nā tātou i muri iho ’ia fa’ariro i taua ’ite ra ’ei pa’ari—’ia tāmau noa i te fa’aiti i te ārea i rotopū i te mea tā tātou i ’ite ’e te huru o tō tātou orara’a.
’Ua riro te ha’amorira’a i roto i te hiero ’ei hō’ē huru mo’a nō te ha’amorira’a i mua i te ta’ata nō te mea tē fa’a’ohipahia ra te mau ’ōro’a ’e te mau fafaura’a o te tū’ati ia tātou i te Atuara’a. E aha ïa tō ’outou huru tū’atira’a i te hiero ’e tā ’outou mau fafaura’a ? Tē fa’a’ohipa tāmau ra ānei ’outou i teie huru ha’amorira’a i mua i te ta’ata nō te ha’apuai i tō ’outou ’ite ’e tō ’outou pa’ari ? Tē tauturu ra ānei ’outou i te feiā tā ’outou e ha’api’i nei ’ia tū’ati atu i te hiero ? Tē fa’aitoito ra ānei ’outou i tā ’outou feiā ’āpī ’ia ora parau-ti’a ’e ’ia mau i te hō’ē parau fa’ati’a hiero nō te hō’ē taime poto ’e ’ia fa’a’ohipa i te reira i roto i te hiero piri atu ia rātou ? E horo’a mai te ravera’a i te ’ohipa fa’aorara’a nā roto i te mā’imira’a i te mau i’oa ’utuāfare ’e te haerera’a i te hiero nō te bāpetizo ’e nō te ha’amau ia rātou nō tō rātou mau tupuna i te mau rāve’a ’ia fāri’i i te arata’ira’a vārua.
Te purera’a hau roa atu i te faufa’a ’o tā tātou mau purera’a ha’amorira’a i mua i te ta’ata, i rāpae ’au i te hiero, ’o te purera’a ’ōro’a ïa. Ta’a ’ē noa atu i te mau ’ohipa ha’amorira’a tei riro ’ei tufa’a nō te rahira’a o te mau purera’a a te ’Ēkālesia, e fa’atumu ïa teie purera’a i ni’a i te ’ōro’a ora nō te pāne ’e te pape. ’Ia ha’amata ’e ’ia fa’aoti tātou i te purera’a, ’e ’ia fa’aineine iho ā rā tātou ’ia rave i te ’ōro’a mo’a, e himene ’e e pure ïa tātou. Tē ha’apa’o maitai ra ānei tātou i teie ’ōro’a ? Tei ’ō nei rā ānei tō tātou mau mana’o ’e tō tātou mau ’ā’au, ’aore rā tei te tahi atu vāhi ? ’Ua tūpohehia ānei tā tātou mau niuniu paraparau, ’aore rā tē pāpa’i ’e tē ha’apono ra ānei tātou i te mau poro’i nā roto i te niuniu ’āfa’ifa’i (’aore rā rata uira nō tātou te feiā pa’ari a’e) i roto i te taime nō te ’ōro’a ’aore rā i te tahi atu tufa’a o te purera’a ? ’Ia a’o te feiā a’o, te feiā iho ā ra ’aita i ’aravihi roa i te a’o, e ha’apa’o ’ore ānei tātou ma te te’ote’o, ma te mana’o ē, « ’Ua fa’aro’o a’ena vau i te reira nā mua atu » ?
Mai te mea tē rave nei tātou i te hō’ē o teie mau hape, te mea tā tātou e rave ra ’o te fa’aiti ïa—penei a’e ’o te fa’a’ore—i te ’aravihi o te Vārua ’ia paraparau mai ia tātou. ’E nō reira tātou e māere ai nō te aha tātou i ’ore ai i fa’aitoitohia e te mau purera’a ’ōro’a ’e te tahi atu mau purera’a a te ’Ēkālesia ?
’Ua riro te ha’amorira’a i mua i te ta’ata ’ei hō’ē rāve’a fa’ahiahia nō te tauturu ia tātou pā’āto’a, tae noa atu te feiā ’āpī, nā ni’a i te ’ē’a nō te fa’afāriura’a.
Te ha’amorira’a i roto i te ’utuāfare
E ti’a i te ha’amorira’a i mua i te ta’ata ’ia fa’aitoito i te ha’amorira’a i roto i te ’utuāfare. I te matahiti 1999, ’ua a’o te Peresidenira’a Mātamua i te mau metua ’e te mau tamari’i « ’ia hōro’a i te ti’ara’a mātāmua i te pure ’utuāfare, te purera’a pō ’utuāfare, te tuatāpapara’a ’e te ha’api’ira’a ’evanelia, ’e te mau fa’a’oa’oara’a ’utuāfare maita’i. Noa atu te maita’i ’e te tano o te tahi mau tītaura’a ’aore rā fa’a’oa’oara’a, ’eiaha roa te reira e fa’ati’ahia ’ia fa’a’ore i te mau hōpoi’a fa’ata’ahia ’e te Atua tā te mau metua ’e te mau ’utuāfare ana’e e nehenehe e rave maitai. »11 ’Oia mau, ’ua ha’api’i-pinepine-hia teie ā mau ture ’e te mau feiā fa’atere e rave rahi nō te ’Ēkālesia nā roto i te mau rāve’a huru rau e rave rahi mau matahiti.
Tē ora nei tātou i roto i te hō’ē ao ’ohipa roa. Nā roto i tō’u mau tere nā roto i te ’Ēkālesia, e ui au i te tahi mau taime i te feiā fa’atere—e feiā mo’a maita’i teie—tē fa’atere ra ānei ’outou i te pure ’utuāfare ’e te purera’a pō ’utuāfare ? Tē tuatāpapa ra ānei ’outou i te ’evanelia ’ei ’utuāfare ? E pinepine au i te fāri’i i te tahi hōho’a mata ha’amā ’e te tātarara’a, « E mea ’ohipa roa mātou. E mea ’ohipa roa mātou nā roto i te ha’api’ira’a ’e te mau fa’a’oa’oara’a i muri a’e i te ha’api’ira’a a tā mātou mau tamari’i, te tārena tōtiare, ’e te mau ’ohipa i roto i te ’Ēkālesia. E mea ’ohipa roa tā’u vahine fa’aipoipo ’e ’o vau nei nō te ’ohipa, te ’Ēkālesia ’e te tahi atu mau tītaura’a. E mea varavara mātou i te pārahi ’āmui ’ei hō’ē ’utuāfare. » Te vārua o te a’o a te Peresideni Mātamua ’oia ïa ē mai te mea e mea ’ohipa roa tātou i te rave’ra’a i te mau mea maita’i ’e ’aita ho’i tō tātou e taime nō te mau mea faufa’a rahi, e ti’a ïa ia tātou ’ia ’imi i te mau rāve’a.
’Ia ’atu’atu-ana’e-hia te mau tamari’i nā te mau metua tei fa’afāriuhia ’e tei ha’amau i te hō’ē huru nō te ha’amorira’a i roto i te ’utuāfare, e ’ite vitiviti ïa rātou i te mana o te Vārua Maita’i i tō rātou ’āpīra’a ra ’e e pe’e ïa rātou i teie hōho’a parau-ti’a ē a muri noa atu. I reira ïa tā tātou ha’api’ira’a i roto i te fa’anahora’a a te ’Ēkālesia e rave ai i tāna ’ohipa ti’a ’ei fa’anahora’a tauturu i te ha’api’ira’a e ravehia ra i roto i te ’utuāfare.
Ta’a ’ē noa atu i te ha’amorira’a tāmau ’e te maita’i i roto i tō tātou iho mau ’utuāfare, e ti’a ïa i te mau ’orometua ha’api’i nō te feiā ’āpī ’ia fa’aitoito maita’i i te ha’amorira’a i roto i te ’utuāfare o tā rātou mau pīahi. Nō roto mai ho’i te tahi i te mau ’utuāfare e ravehia nei taua mau peu ra, ’e e nehenehe ïa tā ’outou ’ia ti’a noa i te hiti mā te ha’apoupou muhu ’ore noa ia rātou. Nō te tahi atu mau pīahi ’aita ïa te reira e tupu nei nō te mau tumu e rave rahi—mai te pīahi ’o ’oia ana’e te melo o te ’Ēkālesia i roto i tōna ’utuāfare (’aore rā ’o ’oia ana’e te melo itoito) ’e tae atu i te mau pīahi tei riro ’ei tufa’a nō te tahi ’utuāfare e haere tāmau nei i te mau purera’a a te ’Ēkālesia ’aita rā i roa’a ia rātou te ’ōrama nō te faufa’a nō te ha’amorira’a i roto i te ’utuāfare. Ma te haru ’ore i te mana ’e te hōpoi’a a te feiā fa’atere o te ’ekālesia ’e a te mau metua, ’a fa’ahōho’a noa ’e ’a ha’api’i i te mau hi’ora’a parau-ti’a ’e ’a tauturu i tā ’outou feiā ’āpī ’ia ’ite i te mau rāve’a ’o te nehenehe e riro mai ’ei tumu nō te fa’aurura’a nō tō rātou mau ’utuāfare i te fa’atupura’a i te mau peu nō te ha’amorira’a tāmau i roto i te ’utuāfare.
Te ha’amorira’a a te ta’ata iho
I te pae hope’a, te fa’afāriura’a ’e ’ohipa ïa nō te ta’ata iho. E arata’i atu te ha’amorira’a i mua i te ta’ata i te ha’amorira’a i roto i te ’utuāfare, ’o te ’arata’i atu ho’i i te ha’amorira’a a te ta’ata iho. Tei roto ïa te pure a te ta’ata iho, te tuatapapara’a i te ’evanelia a te ta’ata iho, ’e te ferurira’a i ni’a i tōna iho aura’a ’e te Atua. « Nāhea e ’ite ai te hō’ē ta’ata i te Fatu…’o tei vai ta’ata ’ē ra iāna, ’e tei te ātea ’ē te mau mana’o ’e te mau ’ōpuara’a o tōna ra ’ā’au ? »12
’Ua parau ’o Elder D. Todd Christofferson : « Te faufa’a nō te fāri’ira’a i te hō’ē aura’a nō te mea mo’a ’o teie noa ïa—mai te mea e ’ore te hō’ē e māuruuru i te mau mea mo’a, e ’ere ïa ’oia i te reira. Ma te mana’o fa’atura ’ore, e tupu ïa ’oia ma te mana’o tāu’a ’ore ’e te ha’apa’o ’ore i roto i tōna orara’a. E pāinu atu ’ē ïa ’oia i te mau tūtau tā tāna mau fafaura’a ’e te Atua e nehenehe e hōro’a mai. E iti mai ïa tōna mau mana’o ti’a’au i mua i te Atua ’e e mo’e atu ïa te reira i muri iho. I muri a’e i te reira, e ha’apa’o noa ïa ’oia i tōna noa iho maita’i ’e te ha’amāha i tōna iho mau hia’ai. I te pae hope’a, e au ’ore ïa ’oia i te mau mea mo’a, ’e tae noa atu i te Atua, ’e e au ’ore ’oia iāna iho. »13
E ’ite ïa tātou ē te tapa’o fa’a’ite rahi roa a’e nō te manuiara’a te pae vārua (tei fāitohia nā roto i te fa’atōro’ara’a i roto i te Autahu’ara’a a Melehizedeka, te fāri’ira’a i te ’ōro’a hiero, te tavinira’a i te hō’ē misiōni, te fa’aipoipora’a i roto i te hiero, ’e te fa’atupura’a i te hō’ē ’utuāfare parau ti’a) ’ia fari’i ïa te hō’ē tamāroa ’aore rā te hō’ē tamāhine i te mau fa’a’itera’a vārua i roto i tō raua ’āpīra’a ra—’ia ’ite ïa rāua i te mana o te Vārua Mo’a. E hau atu ïa i te vai-itoito-ra’a i roto i te ’Ēkālesia ; ’o te vai-itoito-ra’a rā i roto i te ’evanelia !
Tā ’outou fā nō te piha ha’api’ira’a tāta’itahi tā ’outou e ha’api’i, te ’āparaura’a tāta’itahi tā ’outou e ’arata’i, te mau fārereira’a ato’a i roto i te ārea piha ’ia riro ïa te Vārua Mo’a te ’orometua ha’api’i mau. Mai tā te Fa’aora i ha’api’i : « Nā te Fa’aa’o ra, nā te Vārua Maita’i ra, ’o tā te Metua e tono mai nā tō’u nei i’oa ra, nāna e ha’api’i mai ia ’outou i te mau mea ato’a, ’e e fa’a’ite fa’ahou mai ho’i ia ’outou i te mau parau ato’a tā’u i parau atu ia ’outou na. »14 E mana tō te Vārua Maitai i te fa’atano i te poro’i i te ta’ata tāta’itahi ’ia « ha’amāramaramahia ’oia e te Vārua nō te parau mau. »15 Nō reira, ’ia ha’api’i tātou i te ’ohipa nō te fa’aorara’a ’e te mau hōpoi’a tei ha’amauhia e tō te ra’i, tē nā reira ra ïa tātou nā roto i te hō’ē rāve’a ’o te pāturu, ’o te fa’ateitei, ’o te fa’auru, ’o te ’arata’i i te mau ta’ata tā tātou e ha’api’i nei i te fa’aro’o tei ha’apūaihia i roto i te Metua i te Ao ra, ’e ia Iesu Mesia ’e tāna tāra’ehara.
Ia ’outou te mau ’orometua ha’api’i ’evanelia fa’ahiahia, tē parau atu nei mātou : Māuruuru ! Māuruuru ! Māuruuru ! Nā ni’a i te i’oa o te fa’aterera’a o te ’Ēkālesia, māuruuru ! ’A ora i te orara’a parau ti’a, ’a ha’apa’o i tō ’outou mau ’utuāfare, ’e ’a tāvini i te Fatu—i te ’atu’atu-iho-ā-ra’a ra i te u’i ’āpī faufa’a rahi. Nā te ravera’a i te ’ohipa nō te fa’aorara’a ’e te mau hōpoi’a tei ha’amauhia e tō te ra’i, i raro a’e i te ’arata’ira’a ’e te mau tāviri a te mau ’āpōsetolo, e fa’ateitei ’e e tūra’i ia tātou.
Tē fa’a’ite nei au i te hanahana o tō tātou faufa’a ’āi’a ’e tō tātou ’aravihi i te fāri’i i « te ora mure ’ore, te hōro’a rahi hau a’e te reira i te mau hōro’a ato’a a te Atua. »16 Tē fa’a’ite pāpū nei au nō ni’a ia Iehova hanahana, fānauhia ’o Iesu, tei topahia ’o Iesu te Mesia, tei « fa’atāhinuhia. »17 Tē fa’a’ite pāpū nei au nō ni’a i tāna tāra’ehara fāito ’ore e nehenehe ai ia tātou tāta’itahi ’e te mau ta’ata ato’a tā tātou e ha’api’i nei ’ia ha’avī i te ao nei—’ia fano atu nā roto i te mau huru fifi ato’a nō te orara’a tāhuti ma te « hō’ē ti’aturira’a hanahana. »18 Ma te mau ha’amaita’ira’a nō te ’evanelia tei fa’aho’ihia mai e te hō’ē ’ēkālesia tei fa’aho’ihia mai, tei ia tātou ra ïa te mau mea ato’a e ti’a ia tātou ’ia fāri’i nō te tauturu ia tātou ’ia fa’aro’o, ’ia ’ite ’e ’ia rave. I te i’oa o Iesu Mesia, ’āmene.
© 2017 nā Intellectual Reserve, Inc. Fatura’a pāruruhia. Parau fa’ati’a nō te reo peretāne : 5/17. Parau fa’ati’a nō te ’īritira’a : 5/17. ’Īritira’a nō « The Conversion of the Children of God ». Tahitian. PD60004121 895