Te fa’aro’o ’ei parau tumu nō te ’ohipa ’e te mana
Ha’apurorora’a matahiti nā te mau ha’api’ira’a ’evanelia (Séminaire ’e te Institut) • 13 nō tiunu 2017
E tīa’i maoro noa vau i teie fārereira faufa’a rahi ’e ’outou. ’A fa’aineine ai au nō teie putuputura’a, ’ua tāparu vau i te Fatu nō te ’ite e aha tāna e hina’aro e rave tātou nō tāna mau tamari’i e pārahi i roto i tā tātou mau piha ha’api’ira’a ’e tō tātou fare. I te taime hau, ’ua putapū vau i tōna mana’o fāri’i nō tā ’outou tauto’ora’a tu’utu’u ’ore ’e te mau fa’atusiara’a rahi. ’Ua putapū ato’a vau i tōna hina’aro rahi e ha’amaita’i ia ’outou ’e i tō ’outou ’utuāfare. ’E ’ua putapū ato’a vau i tōna hia’ai e ha’amaita’i i tā ’outou mau pīahi i te here ’e i te ’itera’a pāpū nō tāna Tamaiti here.
E’ita te reira e tupu nā roto noa i te fa’arahira’a ’e te ha’amaita’ira’a i te mau fa’anahora’a, te mau ha’api’ipi’ira’a ’aore rā te mau rāve’a ’āpī, inaha e’ita roa atu hō’ē o teie mau mea e mono i te fa’ati’a’ia semeio o te ra’i i te orara’a o tā tātou mau pīahi. Te mea tā tātou e tīa’i ra, e tae noa mai ïa ’ei tao’a nō ’ō mai i tō tātou Metua here i te Ra’i ’e e tītau te reira i tōna mana nō te fa’atupu i te mau semeio i roto i te orara’a o te ta’ata.
E tītau te reira ia tātou ’ia fa’a’ohipa i te fa’aro’o rahi a’e nō te mea e nā mua te fa’aro’o i te mau semeio ato’a. ’Ua parau Elder Dallin H. Oaks : « ‘Te fa’aro’o ’aore e ’ohipa e mea pohe ïa’. [’Ei reira ’ua parau ’oia] te ’ohipa ’aore e fa’aro’o, tō mua roa atu ïa te pohe ».1 ’Oia ho’i, e’ita tā tātou ’ohipa rahi e fa’atupu i te mea e tīa’ihia ra mai te peu ’aore e fa’aro’o. Inaha ho’i e parau tumu te fa’aro’o nō to’opiti te ’ohipa ’e te mana. Te fa’arahira’a i tō tātou fa’aro’o ’āmui, e riro ïa ’ei tāpa’o i te Fatu nō tō tātou tūru’ira’a i ni’a iāna ’e tō tātou ti’aturi i tōna mana nō te fa’auru, nō te fa’afāriu, nō te ha’apūai, nō te fa’aineine ’e nō te pāruru i te u’i ’āpī. E riro te fa’arahira’a i te fa’aro’o i te Fa’aora i te ha’apūai i tā tātou ha’api’ira’a, te mau anira’a i te feiā ’āpī ’e te feiā ’āpī pa’ari ’ia haere mai i te séminaire ’e te institut ’aore rā ’ia tai’o i te mau pāpa’ira’a mo’a, ha’apūai ato’a i tō tātou aura’a ’e te mau metua ’e te feiā fa’atere autahu’ara’a. Nō reira, i te mau hepetoma ’e te mau ’āva’e i muri nei, e ’āmui ānei ’outou iā’u nō te ani i tō tātou Metua i te Ra’i e fa’arahi i tō tātou fa’aro’o ? Tē ti’aturi nei au ē, tē ti’a ineine nei ’oia nō te tauturu mai, ’ia ani noa atu tātou.
Fa’a’ohipa i te fa’aro’o ’ei parau tumu nō te ’ohipa
’Ua ha’api’i Iosepha Semita ē, e tītau te fa’a’ohipara’a i te fa’aro’o i te Atua i te ’apora’a i « te mana’o tano nō ni’a i tōna huru, tōna maita’i-roa-ra’a ’e tōna hīro’a » ’e te « ’ite ē, te ’avei’a orara’a [tā tātou] e horo nei, ’ua tū’ati ïa i ni’a i tōna hina’aro ».2 E tītau nā tītaura’a e piti i te fa’a’ohipara’a tātou i te fa’aro’o ’ei parau tumu nō te ’ohipa.3
I te ’āmuira’a rahi i ma’iri a’enei, ’ua fa’a’ite te peresideni Russell M. Nelson hō’ē rāve’a e hi’o i te tītaura’a mātāmua :
« ’Ia rahi ana’e tō tātou ’ite nō ni’a i te tāvinira’a ’e te misiōni a te Fa’aora—e rahi atu ā ïa tō tātou hāro’aro’ara’a i tāna ha’api’ira’a ’e te mea tāna i rave nō tātou—e rahi atu ā tō tātou ’ite ē e nehenehe tāna e hōro’a mai i te mana o tā tātou e hina’aro nō tō tātou orara’a.
I te ’ōmuara’a o teie matahiti, ’ua ani au i te Feiā ’Āpī Pa’ari o te ’Ēkālesia ’ia fa’ata’a i te hō’ē tufa’a o tō rātou taime i te mau hepetoma ato’a ’ia tuatāpapa i te mau mea ato’a tā Iesu i parau ’e i rave tei pāpa’ihia i roto i te mau pāpa’ira’a mo’a. ’Ua ani au ia rātou ’ia fa’ariro i te mau fa’ahitira’a nō ni’a ia Iesu Mesia e vai nei i roto i te Buka Arata’i nō te mau tumu parau ’ei buka ha’api’ira’a tumu nā rātou.
« ’Ua hōro’a vau i taua tītaura’a ra nō te mea ’ua fāri’i a’ena vau iho i te reira. ’Ua tai’o ’e ’ua tāpa’o vau i te mau ’īrava ato’a tei fa’ahitihia nō ni’a ia Iesu Mesia, mai tei tābulahia i raro a’e i te upo’o parau tumu ’e nā 57 upo’o parau ri’i i roto i te Buka Arata’i nō te mau tumu parau. I tō’u fa’aotira’a i teie ’ohipa fa’ahiahia, ’ua ani mai tā’u vahine fa’aipoipo iā’u e aha te maita’i tei fāri’ihia e au. ’Ua parau atu vau iāna, « ’ua taui tō’u huru ! »4
’Ua hina’aro vau e fa’aha’amana’o i teie anira’a nō te mea ’ua ’ite mata vau iho i te maita’i o teie tuatāpapara’a rōtahi ’e ’ua ’ite au ē, rahi noa atu tātou i te māramarama ’e te here i te Fa’aora, rahi noa ato’a atu tō tātou fa’aro’o iāna.
Mai tā’u i fa’ahiti a’enei, ’ua ha’api’i te peropheta Iosepha ē, te tahi atu tuha’a pāpū nō te fa’aro’o, ’o te ha’api’ira’a ïa e fa’atū’ati i tō tātou orara’a i ni’a i te hina’aro o te Fatu. ’Ei fa’ahōho’ara’a, teie te tahi hi’ora’a e au maita’i mai te mau metua vahine i’ō nei :
E metua vahine ’āpī ’o Celeste Davis, e toru tamari’i ’e te hō’ē pēpe e ara noa i te pō. Ha’amata a’era ’oia i te pure ’ia ti’a ia rāua tāna pēpe e ta’oto ri’i ’ia māhā te rohirohi. Mai te huru ra ē, ’aita tāna mau pure i pāhonohia. ’Ua hina’aro atura ’oia ’ia māramarama maita’i a’e i te pure, ’e nō te aha ’aita i ha’amāhāhia tōna rohirohi. ’Ua ha’api’i ihora ’oia i roto i te Bible Dictionary ē, « e pure tātou i te i’oa o te Mesia ’ia riro ana’e tō tātou mana’o i te mana’o o te Mesia, tō tātou hia’ai i te hia’ai o te Mesia… I muri mai, e ani tātou i te mea ’ua ti’a i te Atua ’ia hōro’a mai. E rave rahi pure ’aita e pāhonora’a nō te mea ’aita roa atu te reira i ravehia nā roto i te i’oa o te Mesia ; e ’ere roa atu i tōna mana’o, nō roto mai rā i te pīpiri o te ’ā’au ta’ata nei ».5
Fa’aoti atura Celeste e tāpura i te mau mea tāna i pure atu. I te otira’a tāna tāpura, ’ua ’ite mai ’oia ē, ’ua riro tāna mau pure i te anira’a nā mua roa i te Metua i te Ao ra i tāna i hina’aro, ’oia ho’i ’ia taui te Atua i te huru o tōna orara’a. Fa’aoti atura ’oia e hāmani i te tahi fa’ahou tāpura, nō te mau mea tāna i pāpū ’ua hina’aro te Metua i te Ao ra nōna. ’Aita iho ā nā tāpura i tū’ati ’ore noa—’ua here te Atua ia tātou ’e ’ua hina’aro ho’i ’oia ’ia ’oa’oa tātou. E ha’api’ira’a ’e e parau mau rā e vai ra i roto i teie ’ohipa iti. ’Ua hina’aro ’oia e taui i te huru o tōna orara’a, ’ua hina’aro rā te Atua e taui iāna. Nō reira ’ua fa’aoti ’oia e fa’atano i tāna hi’ora’a i te pure nō te fa’atū’ati i tōna hina’aro i ni’a i tō te Metua i te Ao ra. ’Ua pāpa’i ’oia :
« E rāve’a ’ohie tā’u i ’ite mai nō te tauturu i ta’u mau pure. E mea ’ōhie—’ia ani ’outou i te hō’ē mea ’ua hina’aro ’outou ’e ’aita ’outou i pāpū roa e mea ānei ’ua hina’aro te Atua, ’a tu’u i te parau ‘’aita ana’e rā’, i reira e parau atu ai i te mea ’ua pāpū ia ’outou ’ua hina’aro te Atua nō ’outou.
« ’Ei hi’ora’a : ‘[E te Atua], tauturu mai na e ta’oto ri’i i teie pō, ’aita ana’e rā, tauturu mai iā’u ’ia nava’i tō’u pūai nō te vai au noa ’e nō te ’ohipa.’ ‘[E te Atua], ha’amaita’i na i tā’u tamari’i ’ia ora i teie ma’i ’e ’ia maita’i mai, ’aita ana’e rā, tauturu mai ia mātou ’ia ti’aturi ia ’oe ’e ’ia fa’a’oroma’i te tahi i te tahi.’ ‘[E te Atua], ha’amaita’i na iā’u ’ia fāri’ihia vau ’e teie mau hoa, ’aita ana’e rā, noa atu ’o vau ana’e, tauturu mai iā’u ’ia hāmani maita’i i te ta’ata ’e ’ia hōro’a’ ».
Tē parau fa’ahou nei ’oia :
« Hō’ē matahiti i teienei au i te tāmatara’a i te reira, e nehenehe e parau ē, ’ua rahi roa ’ino te mau pure manuia…
« E au ē, tē tae mai nei te mana’o ē, tē fa’atupu ra vau i te fā mau o te pure, ’oia ho’i ’eiaha e tāu’aparau noa i tō’u hina’aro, e fa’atū’ati ato’a rā iā’u i ni’a i te Atua…
« Hō’ē maita’i tīa’i-’ore-hia, ’oia ho’i ’aita vau e mata’u nei i te mau tāfifira’a ’aore rā te noa’a-’ore-ra’a tā’u i hina’aro mai te mātāmua ra, nō te mea ’ua ’ite au ’e ’ua putapū ho’i i te pāhonora’a te Atua i ta’u mau pure, tō’u mau hina’aro ’e te mau ‘’aita ana’e rā’ ».6
E hōho’a te ’ohipa i tupu nō Celeste ’o te nehenehe e tauturu ia tātou ’e tā tātou mau pure ’e te tauto’ora’a e fa’a’ohipa i te fa’aro’o ’ei parau tumu nō te ’ohipa. ’Ia pāpū maita’i ē, e’ita te fa’aro’o e rave ’ē i te ti’amāra’a ’ia mā’iti o tā tātou mau tamari’i ’e mau pīahi, ’e e’ita ato’a te reira e ’īriti i te mau fifi ’e te mau tāmatara’a o tō tātou orara’a. E nehenehe rā te reira e tauturu mai e fa’a’oroma’i maita’i ’e e ’apo ato’a mai i te tahi mea i roto i te taime fifi. E taui ato’a te reira i te huru tātou e hi’o i tā tātou mau pīahi (’e tā tātou mau tamari’i), nā reira ato’a te huru e pure tātou nō rātou. E taui te reira i tā tātou mau tāu’aparara’a i roto i te piha ha’api’ira’a ’e i te fare. E tauturu te reira ia tātou ’ia ti’a ma te tīa’i, te ’oa’oa ’e te ’ana’anatae i roto i te hō’ē ao tē pōiri noa atu ra. E fa’atupu te reira i te mau rāve’a heheura’a nō tātou iho ma te fa’atae mai i te mana i roto i tā tātou ha’api’ira’a. E ta’ita’i te reira i tō tātou ’itera’a pāpū i te ’ā’au o te feiā tā tātou i here.
E fa’a’ore te fa’aro’o mau i te hāmanira’a i tōna iho mana’o. E arata’i ho’i te reira i te hi’opo’ara’a iāna iho, ’o te arata’i ho’i i te tātarahapara’a mau ’e te tupura’a pāpū. E fa’ahepo te reira ia tātou ’ia ’ape i te herepata e tīa’i i te mau rāve’a i roto noa i te tauira’a ia vetahi ’ē, ’ia parau tātou ē, « ’āhani ’ua pāturu tō’u nā metua ’aore rā tō’u feiā fa’atere iā’u, ’aita ïa vau mai te reira ». ’Aita te reira huru hi’ora’a e tūru’i i ni’a i te Fa’aora, nō reira, e’ita tōna mana e noa’a mai. E’ita te reira e fa’atupu i te semeio tā tātou e hina’aro nei. ’Ua nava’i tā tātou ’e ’ua nava’i tātou nō te fa’atupu i te ’ohipa a te Fatu mai te mea e nava’i tō tātou fa’aro’o nō te ani ateate iāna e taui ia tātou ’e e hāmani ia tātou ’ei mauha’a i roto i tōna rima.
E parau mau te reira, noa atu ā tō tātou mana’o ’aifāito ’ore ’e te teimaha. ’Ua ha’api’i au i te reira ’ei taure’are’a e fa’aineine ra nō te misiōni. ’Ua mana’o iho ā vau e haere au, i tō’u rā ’āpīra’a, ’ua taiā roa vau ’a feruri ai i te reira. ’Aita roa atu vau i au e paraparau i mua i te ta’ata. E tatie e parau noa nei ē, ’aita ’oia i ’ite i tō’u poro mata ē taure’are’a roa atu nō te mea e haere noa vau ma te pi’o i te upo’o, ma te tāhuna i tō’u hōho’a mata. I te collège, e D ta’u fāito i roto i te piha ha’uti ta’ata ora, te ha’eha’a roa ïa. ’Aita iho ā tā’u e nehenehe e ti’a i mua i te piha, noa atu ’ua pāpa’ihia te mea e parau ’o tā tō’u ’orometua i hōro’a mai.
I te fāri’ira’a vau i tō’u pi’ira’a misiōni nō Mehiko, ’ua anihia vau e paraparau i roto i te hō’ē purera’a pae auahi nā te feiā ’āpī, māua tō’u tua’ana. E pae noa minuti tā’u i rave, te toe’a nāna ïa. ’Ia mana’o vau, ’aita i hape ’ia parau ē, o ta’u a’ora’a paha te a’ora’a ’ino roa a’e i hōro’ahia i roto i teie ’ēkālesia ’e te tahi noa atu ’ēkālesia ’ē. I te otira’a te purera’a pae auahi, ’ua ’āpapa te feiā ’āpī nō te aroha i tō’u tua’ana. Hō’ē ta’ata ’ā’au maita’i tei tīpu’u mai te ’āpapara’a nō te parau mai : « Māuruuru. E a’ora’a maita’i ». ’Ua mana’o roa vau : « māuruuru pa’i, e parau ha’avare tā ’oe ». ’Ua ho’i au i te fare ma te mana’o paruparu ’e te uiui, nāhea pa’i au i te tāvini i te hō’ē misiōni. ’Ua mana’o vau, ’aita vau i tano nō te ha’api’i i te ’evanelia nā roto i te reo peretāne, e aha atu pa’i ïa nā roto i te reo pāniora tei ti’a iā’u ’ia ha’api’i.
Ma’a mahana i muri iho, ma te ’ā’au teimaha, ’ua ’īriti au i te mau pāpa’ira’a mo’a ’e ’ua tai’o atura i te ’ā’amu o Enoha. I te fa’auera’ahia Enoha e pi’i i te ta’ata ’ia tātarahapa, tē nā ’ō ra te ’īrava 31 : « ’ua tīpapa ihora ’oia i raro i te fenua, i mua i te Fatu, ’e ’ua parau ihora i te Fatu, nā ’ō atura : Nō te aha ho’i i ’ite-au-hia mai ai au i mua ia ’oe na, ’e e tamaiti ’āpī ho’i au, ’e ’ua au ’ore mai ho’i te mau ta’ata iā’u; e ta’ata reo maumau vau; ’e nō te aha e riro ai au ’ei tāvini nō ’oe ? »7 ’Ei pāhonora’a i te fē’a’a o Enoha iāna iho ’e te huru ’erera’a tōna ti’aturi i tōna pi’ira’a, ’ua hōro’a te Fatu i teie pāhonora’a nehenehe ’e te tāmarū, i te ’īrava 34 : « Inaha, tei ni’a iho tō’u Vārua ia ’oe, nō reira e fa’ati’a vau i tā ’oe ato’a ra mau parau; ’e e haere ’ē atu te mau mou’a mai mua atu ia ’oe, ’e e tīpu’u ’ē atu te mau ’ānāvai pape i tō rātou ra tahera’a; ’e ’ei roto ’oe iā’u nei pārahi ai, ’e ’ei roto vau ia ’oe; nō reira, ’a haere mai nā muri iā’u ».8
Ma te taiā tā’āto’a, te pāpū ’ore iā’u, ’e te ineine ’ore nō te mea i mua mai, ’ua tāpe’a noa vau i teie mau parau mai te tahi taura ora ’e ’ua ta’uma vau i ni’a i te manureva nō te taime mātāmua o tō’u orara’a ’e ’ua rere atura i Mehiko nō te tāvini. I reira tō’u ha’api’ira’a ē, ’ia ti’a mau ia tātou, e nehenehe mau tā tātou e haere nā muri i te Fatu. ’Ua ’apo vau ē, e parau tā te peresideni Ezra Taft Benson i parau : « Te tāne ’e te vahine o te fa’afāriu i tō rātou orara’a i ni’a i te Atua, e ’ite ïa rātou ē, e rahi atu tāna e fa’atupu i roto i tō rātou orara’a i tā rātou iho e nehenehe e fa’atupu ».9
Fa’a’ohipa i te fa’aro’o ’ei parau tumu nō te mana
I roto i te ’ā’amu o Enoha, e ’ohipa ’ē ato’a tā’u i ’apo nō ni’a i te fa’aro’o. Fa’aro’o mai na i te fa’a’itera’a nō te mea i tupu nō teie tamaiti ’āpī reo maumau ’e te au-’ore-hia e te ta’ata. Tē tai’o nei Mose 7:13 : « ’E nō te rahi o te fa’aro’o o Enoha, ’ua arata’i atura ’oia i te mau ta’ata o te Atua, ’e ’ua haere mai tō rātou mau ’enemi e ’aro ia rātou; ’e ’ua parau atura ’oia i te parau a te Fatu, e rūrūta’ina ihora te fenua, e reva ’ē atura te mou’a mai te au i tāna ra parau. ’Ua tīpu’u ’ē atura te mau anavai pape i tō rātou tahera’a, ’e ’ua fa’aro’ohia te ’ū’uru o te mau liona nā te medebara mai. E mata’u rahi roa a’era tō te mau nūna’a ato’a i te [mana] rahi o te parau a Enoha, ’e te [mana] o te reo tā te Atua i hōro’a iāna ra ».10 ’Aita e hōho’a tamaiti reo maumau terā e parauhia ra. E ta’ata fa’aro’o rā, tei haere nā muri i te Fatu ’e tei fa’anu’u i te mau mou’a.
I te tahi taime e parau tātou e « fa’anu’u i te tai’o hora » ’aore rā « fa’anu’u i te nira » nō te parau i te tahi mau ha’amaita’ira’a ri’i tītauhia, ’aita rā te Fatu i ani ia tātou ’ia fa’anu’u i te nira. ’Ua ani mai ’oia ia tātou e fa’anu’u i te mau mou’a. ’Ua parau ’oia : « ’Āhīrī e fa’aro’o tō ’outou, e mai te hō’ē huero sinapi noa iho te rahi, e ti’a ïa ’ia ’outou ’ia parau noa atu i teie nei mou’a, ’A haere i’ō atu, e nāna ïa e haere noa; ’e ’aita roa e mea e ’ore te ti’a ia ’outou ».11
Teie fa’aro’o e fa’anu’u i te mau mou’a—te mou’a mau ānei ’aore rā te fa’ahōho’ara’a—’o te hō’ē fāito fa’aro’o ’ē ïa. Mai tā Elder D. Todd Christofferson i ha’api’i :
« [Tē vai ra] te hō’ē fāito fa’aro’o e tū’ati i te mau ha’apāpūra’a pae vārua ’o te fa’atupu i te mau ’ohipa maitata’i, te ha’apa’ora’a iho ā rā i te mau parau tumu ’e te mau fa’auera’a o te ’evanelia. E fa’aro’o mau teie i te Mesia…
« Teie rā, tē vai ato’a ra te hō’ē fāito fa’aro’o e’ita e fa’atere noa i tā tātou ravera’a, ’o tē ha’amana ato’a rā ia tātou e taui i te mea e vai ra ’e e fa’atupu i te mau mea e’ita e tupu ’āhani ’aita tātou. Tē parau nei au nō te fa’aro’o ’ei parau tumu nō te ’ohipa, ’ei parau tumu ato’a nō te mana ».12
’O te huru fa’aro’o teie e fa’a’itehia nei i roto i te Hebera 11 tei fa’a’ohipahia e Enoha, Aberahama, Sara ’e Mose. ’O terā fa’aro’o i fa’a’ohipahia e te mau peropheta nō te « [ha’apau i] te mau bāsileia… ’e ’ua rave i te parau ti’a ra, ’e ’ua noa’a tei parauhia maira, ’ua ’ōpani i te vaha o te liona, ’ua tīnai ho’i i te pūai o te auahi, ’ua ora i te mata ’o’e ra, ’ua fa’a’eta’etahia i te paruparura’a ra… ’e i noa’a fa’ahou ho’i tā te mau vahine tamari’i i pohe ra ».13
’O te huru fa’aro’o teie e fa’a’itehia nei i roto i te Etera 12, nō ni’a ia Alama, Amuleka, Nephi, Lehi ’e Amona.14 ’O te fa’aro’o teie i fa’a’itehia e « te taea’e o Iareda [’a parau ai ’oia] i te mou’a ra, ’o Zerina, e haere ’ē atu—’e ’ua haere ’ē atura ïa. ’E ’āhiri ’aita tōna e fa’aro’o, ’aita ïa i nā reira i te haere ’ē atu ».15 ’E i te hope’a, « e rave rahi tei roto ia rātou te fa’aro’o rahi roa atu, e ’ore ai e ti’a ai ’ia tāpe’ahia rātou ’ia ’ore ’ia tae i roto i te pāruru »—’a fa’aro’o na rā i teie parau—« ’ua ’itea rā i tō rātou mata te mau mea tei hi’ohia e te mata o te fa’aro’o ra ».16
E mau fa’ahōho’ara’a ana’e teie nō te fa’aro’o ’ei parau tumu nō te mana. ’O te hi’ora’a hope’a rā tā’u i fa’ahiahia roa. ’Ua hi’o nā mua rātou i te mau mea ’e te mata nō te fa’aro’o hou ’a ’ite ai ’e tō rātou mata tāhuti nei. E hi’ora’a rahi i tō tātou nei anotau nō te reira, nō roto mai i te peresideni Brigham Young. ’Ua parau ’oia nō ni’a i te vāhi e ti’a ra te hiero nō Roto Miti : « Varavara vau i te parau nō te mau heheura’a ’e te mau ’ōrama, te mea pāpū rā… ’ua ti’a vau i’ō nei ’e ’ua ’ite vārua vau i te hiero… ’Aita tō’u mata i hi’o a’enei i teie vāhi, i reira rā tā te ’ōrama i fa’a’ite mai ».17
Te fāri’ira’a i te ’ōrama nō te mea e nehenehe e riro, nō te hina’aro o te Fatu, e tītaura’a ïa nō te fa’a’ohipara’a i te fa’aro’o ’ei parau tumu nō te mana.
E ti’a ānei ia ’outou ’ia hi’o i te semeio ’ua hina’aro tātou nā roto i te mata o te fa’aro’o ? E ti’a ānei ia ’outou ’ia hi’o ia ’outou iho tē ha’api’i ra i te mau piha ma te ti’aturi rahi atu i te Fatu, tāna parau ’e tā ’outou mau pīahi ? E ti’a ānei ia ’outou ’ia hi’o i tā ’outou mau pīahi tē fa’aru’e ra i tā ’outou piha ha’api’ira’a ma te tūru’i rahi atu ā i ni’a i te mau ha’api’ira’a ’e te tāra’ehara a te Fa’aora, ma te pāto’i rahi atu ā i te hara ’e ma te ineine rahi atu ā ’ia rave i te mau mea ato’a e ani te Fatu ia rātou ? ’E e ti’a ānei ia ’outou ’ia hi’o ma te mata nō te fa’aro’o i e rave rahi atu ā feiā ’āpī, te mau melo ’e rātou ato’a e ’ere nō tō tātou fa’aro’o, tē pāhono ra i tā tātou anira’a e haere mai ’e e ’āmui mai i teie semeio ? E aha tā te Fatu e rave mai te peu e fa’a’ohipa tātou i tō tātou fa’aro’o ’āmui, ’ei parau tumu nō te ’ohipa ’e ’ei parau tumu ho’i nō te mana ?
« Teie Iehova tei ia tātou nei ; ’eiaha roa e mata’u atu »
Hou vau ’a fa’aoti ai, ’ua hina’aro vau e fa’a’ite i te tahi hi’ora’a hope’a. Tē vai ra i roto i ta’u piha tōro’a te hō’ē rā’au olive tei taraihia te fa’ahōho’ara’a o te hō’ē ’ā’amu au roa nā’u o te pāpa’ira’a mo’a, ’o tē riro nei ’ei fa’ahamana’ora’a tāmau iā’u i te hina’aro nō te fa’aro’o. E fa’ahōho’ara’a nō Kaleba ’e Iosua, tei tonohia e Mose, rāua ’e e 10 fa’ahou ta’ata nō te hi’o haere i te fenua ra nō Kana’ana ’e e ’āfa’i mai i te parau fa’a’ite. ’Ua ho’i mai nā ta’ata e 10 ma te parau ē : « Te ta’ata o taua fenua ra, [e mea] ’eta’eta ïa ’e te ’oire ho’i ’ua ’āuahia, ’e rahi ho’i ».18
« ’Āre’a ’o Kaleba tāmanino ihora ’oia i taua mau ta’ata ra i mua i te aro o Mose, nā ’ō atura, Mai haere tātou i teienei e rave, e pau noa ïa ia tātou.
« ’Āre’a te mau ta’ata i haere ato’a ’e ’oia ato’a ra, ’ua nā ’ō a’era ïa, E’ita e ti’a ia tātou ’ia ti’i e ’aro i te reira feiā; e pūai rahi tō rātou i tō tātou nei ».19
Nō te mea ’ua ’ere rātou i te fa’aro’o, « ’ua fa’a’ino haere ho’i rātou i taua fenua… ra, ’ua nā ’ō rātou ē… tā mātou i hi’o i reira, e ta’ata rarahi ana’e ïa… mai te vivi ri’i nei mātou i tō mātou iho hi’ora’a ».20
Pāhono atura Iosua ’e Kaleba : « Teie Iehova tei ia tātou nei; ’eiaha roa e mata’u atu ».21
’Aita rā i roa’a i te nūna’a, mai teie nā ve’a fa’aro’o tāpetepete e 10, i te ’ite e aha tā te Fatu i hina’aro e rave ’e ’aita atura i pe’e ia Iosua ’e Kaleba. Nō te mea ’ua ’ere rātou i te fa’aro’o, ’ua ’ōvere noa atura te nūna’a i roto i te medebara hau i te 39 matahiti. I roto te reira naho’a ta’ata, ’o Iosua noa rāua Kaleba tei ora mai ’e tei fa’ati’ahia e tomo i roto i te fenua i parauhia. Tē ha’amana’o ra paha ’outou i te mau parau a Kaleba ’a ti’a ai rāua Iosua i mua i te mou’a Heberona, te vāhi mau tā rāua i hi’o haere e rave rahi matahiti nā mua atu. ’Ua parau Kaleba :
« Tē vai nei rā tō’u ’eta’eta te huru ā te huru i teie nei mahana, mai te mahana ’a tono ai Mose iā’u…
« ’E teienei, hō mai i teie nei mou’a nō’u ».22
Nō tōna fa’aro’o, ’ua fatu ’āi’a ’oia ’e tōna ’utuāfare terā u’i ’e terā u’i i tāna mou’a i te fenua i parauhia.
E mau tāmatara’a i mua ia tātou. E fa’ahemahia paha tātou e fē’a’a ’e e fa’aho’i mai i te parau fa’a’ite ’ino tei ’ī i te mata’u ’e te fē’a’a. E’ita te ’erera’a te ti’aturi i te Fatu e fa’atae ia tātou i te fenua i parauhia. Mai ia Kaleba rāua Iosua te huru, tītau-roa-hia ’ia ha’apae tātou i tō tātou mata’u i te hiti ’e ’ia fa’a’ohipa i tō tātou fa’aro’o nō te pi’i i te mau ha’amaita’ira’a tāna i fa’aherehere nō tātou. E ti’a roa ia tātou ’ia hi’o i te mau tāmatara’a ato’a ’e te mau fifi o tō tātou orara’a ’ei rāve’a nō te fa’ahōhonu atu ā i tō tātou fa’aro’o ia Iesu Mesia.
E aha tā te Fatu e rave mai te mea e mono ’āmui tātou i te mata’u ’e te fē’a’a, i te tīa’i ’e te fa’aro’o ? ’Ia ti’aturi au, e ’ere te nira noa tāna e fa’anu’u, ’o te mou’a rā—’ia tupu te mau semeio i roto i te orara’a o te feiā ’āpī ’e te feiā ’āpī o te ’Ēkālesia. ’A rahi noa ai tō tātou fa’aro’o, ’a rahi ato’a ai te fa’aro’o o rātou tā tātou e ha’api’i nei. ’Ua ’ite au e ha’amaita’i te Metua i te Ra’i ia ’outou ’e e ha’amaita’i ’oia i tā tātou mau pīahi ’ia fa’a’ohipa tātou i tō tātou fa’aro’o i tāna Tamaiti here ’e te maita’i roa, te Fa’aora, te Tāra’ehara ’e te Ta’ata fa’aora i te ao. Nā roto i te i’oa o Iesu Mesia ra, ’āmene.
© 2017 nā Intellectual Reserve, Inc. Fatura’a pāruruhia. Parau fa’ati’a nō te reo peretāne : 5/17. Parau fa’ati’a nō te ’īritira’a : 5/17. ’Īritira’a nō « Faith as a Principle of Action and Power ». Tahitian. PD60004121 895