Te ha’api’ira’a hōhonu ’e te ’oa’oa i roto i te Fatu
Ha’apurorora’a matahiti nā te mau ha’api’ira’a ’evanelia (Séminaire ’e te Institut) • 13 nō tiunu 2017
’Ua riro ïa ’ei ha’amaita’ira’a ’ia paraparau i te ’utuāfare nō te séminaire ’e te institut nā te ao ato’a nei. ’Ua here roa vau ia ’outou, ’e tē ’oa’oa nei au nō ’outou ’e nō te mau mea ato’a tā ’outou e rave nei, ’e nō tō ’outou huru. Tē pure nei au ’ia fāri’i ’outou i te ha’amaita’ira’a a te Fatu i ni’a iho ia ’outou i roto i te mau ’ohipa rahi e vai nei i mua ia tātou.
E au mau taea’e ’e mau tuahine here, e ’ohipa faufa’a te ha’api’ira’a, te fa’aineinera’a, te fa’ateiteira’a ’e te ha’apūaira’a i te u’i ’āpī. Tē mana’o nei au ē, e ’ohipa rū teie. Tē farerei nei te feiā ’āpī ’e te feiā ’āpī pa’ari o te ’Ēkālesia e rave rahi mau tauto’ora’a fifi ’e e rave rahi mau rāve’a. ’Ua ’ī te ao e hā’ati nei ia rātou i te mau rāve’a mātini ’aravihi o teie tau ’o tē fa’a’ohipahia nei ma te maita’i ’e ma te ’ino rahi ato’a. E rave rahi o rātou tē ora nei i roto i te mau fenua tama’i ’e te parau tama’i, te mau ’ohipa ri’ari’a, te ’ohipa ’ī’ino, te ha’amoura’a i te mau ’utuāfare, te mau ’ārepurepura’a poritita, ’e te ’ino o te veve, te ma’i ’e te o’e.
Terā rā, i rotopū i teie mau ’āehuehura’a ’e te ’ārepurepura’a, tē fa’aineine nei te Fatu Iesu Mesia i tōna bāsileia ’e i tōna mau ta’ata nō tōna ho’i-fa’ahou-ra’a mai. Te ’ohipa nei ’oia ma te mana nā te ao ato’a nei nō te ha’aputuputu ia ’Īserā’ela i ha’apurarahia, nō te patu i tōna bāsileia, ’e nō te ha’amau ia Ziona. ’Ua mahora tōna nā rima here ’e te aroha i ni’a i te feiā ’āpī ’e te feiā ’āpī pa’ari o te ’Ēkālesia, ma te ani manihini ia rātou ’ia fāri’i i tāna fa’aorara’a, te ha’apūaira’a ’e te mau mana fa’aorara’a i roto i tō rātou orara’a.
Te tama’i rahi i rotopū i te maita’i ’e te ’ino tei ha’amata i roto i te ao hou te tāhuti nei, tē tāmau noa nei ā te reira i te haere i te rahi o te pūai i te mau mahana hōpe’a nei. I roto i te reira tama’i ’aita te feiā ’āpī ’e te feiā ’āpī pa’ari e fa’aea noa nei ma te tama’i ’ore. Tei ni’a rā rātou i te rēni mātāmua, ’e e ha’uti rātou i te hō’ē tuha’a ’ohipa faufa’a roa i roto i te ’ohipa rahi a te Fatu. E fāriu ïa vau i ni’a ia ’outou.
Tei ni’a iho mau ’outou i te rēni mātāmua i pīha’i iho i te u’i ’āpī. ’Ia feruri ana’e au ia ’outou ’e te ’ohipa tā ’outou e rave nei i te mau mahana ato’a nō te ha’aputapū i te orara’a o te rahira’a hānere tauatini feiā ’āpī ’e te feiā ’āpī pa’ari o te ’Ēkalesia, e feruri au i te ’ōrama a Nephi nō tō tātou nei ’anotau :
« E ’ua hi’o ho’i au, ’o Nephi, i te mana o te Arenio a te Atua i te poura’a mai i ni’a iho i te feiā mo’a o te ’Ēkālesia a te Arenio ra, ’e i ni’a iho ho’i i te feiā i mā’itihia e te Fatu ra, ’o tei purara i te mau fenua o te ao ato’a nei ; ’o te parau-ti’a ’e te mana o te Atua i te hanahana rahi ra, ’o tā rātou ïa mauha’a ».1
Tē fa’a’ite nei Nephi i te hō’ē fa’anahora’a hanahana, e tuha’a faufa’a rahi ho’i tā ’outou i reira. ’Ia feruri ana’e ’outou i te ’ohipa tā ’outou e rave nei i te ha’api’ira’a i te séminaire ’e te institut, mea maita’i ē, e ha’amana’o ’outou i teie ’īrava. ’Ua riro ’outou ’ei mauha’a i roto i te rima o te Atua i roto i te hō’ē fa’anahora’a hanahana nā roto ho’i i te reira e ha’amaita’ihia ai tāna mau tamari’i faufa’a rahi nō te fafaura’a i te parau-ti’a ’e e fāri’i ho’i i tōna mana ’e tōna hanahana.
Teie tā ’outou e rave. E ha’api’i ’outou i teie feiā ’āpī nehenehe i te ’evanelia a Iesu Mesia, ’e e tauturu ’outou ia rātou ’ia fāri’i i te mana hanahana i roto i te autahu’ara’a, i roto i te hiero, i roto i te auhoara’a ’e te Vārua Maita’i, i roto i te mau pāpa’ira’a mo’a, i roto i te mau fafaura’a ’e te mau ’ōro’a mo’a. ’O te mana ïa o te Atua, ’o tāna e hōro’a i tāna mau tamaiti ’e te tamāhine faufa’a rahi, ’ia ti’a ho’i ia rātou ’ia here, ’ia ha’api’i, ’e ’ia tavini mā te fa’aro’o ’e te ti’aturi iāna, ma te rave i tāna ’ohipa ē hope noa atu tō rātou orara’a.
I te tahi taime e mea fifi roa ’ia fa’atū’ati i te ’ōrama fa’auru a Nephi i te huru mau o tā ’outou piha ha’api’ira’a ’evanelia i te hora 6:15 i te po’po’i, ’e ’aore rā, i te piha ha’api’ira’a institut i te pō, nō te rohirohi te mau pīahi ha’api’ira’a tuatoru. ’Ua ’ite a’enei au i tā’u tamari’i ’e te mata vare’a ta’oto i te po’po’i roa. ’Ua ’ite iho ā vau i te hōho’a o te pīahi ha’api’ira’a tuatoru tei rohirohi roa. Terā rā, ’ua ’ite a’enei au i te ’ohipa i tupu i ni’a i te reira feiā ’āpī ’e i te reira mau pīahi tuatoru, ’ia ha’api’i ana’e te hō’ē ’orometua here ia rātou ma te pe’ehia e te Vārua o te Fatu. ’Ua ’ite a’enei au i te ’ohipa i tupu i roto i tō rātou ’ā’au ’e i roto i tō rātou vārua ’a ’īriti ai taua ’orometua ha’api’i ra i te mana o te mau pāpa’ira’a mo’a ia rātou, ’e ’a tauturu ai ia rātou ’ia ha’api’i hōhonu mai tā te Fatu i rave ra. ’Ua ’ite au i te reira i te mea ē, ’o te reira tei tupu i ni’a i tā’u mau tamari’i pā’āto’a. E ’o te ’ohipa ïa e tupu nei i ni’a i tā’u mau mo’otua.
E mea fa’ahiahia te feiā ’āpī ’e te feiā ’āpī pa’ari tā ’outou e ha’api’i nei. Terā rā, tē hina’aro nei tātou ’ia fāri’i e rave rahi, e rave rahi atu ā o rātou i te mau ha’amaita’ira’a o te autahu’ara’a ’e o te hiero, ’ia rave i te hō’ē misioni, ’ia fa’aipoipo i roto i te hiero, ’ia fa’atupu i te ’utuāfare mure ’ore, ’ia tāvini i te Fatu i roto i tōna bāsileia, ’e ’ia riro ’ei māramarama nō te ao nei. Te aura’a ra, tītauhia ia ’outou ’ia haere noa i te maita’ira’a i roto i te ’ohipa tā ’outou e rave. Tē hina’aro nei te Fatu ’ia hau roa atu tō ’outou pūai ’e tō ’outou ’aravihi i roto i teie ’ohipa rahi.
Te ’oa’oa i roto i te Fatu
Tē hina’aro nei au e fa’a’ite atu ia ’outou, i teie mahana, i te tahi mau mana’o tā’u e ti’aturi nei ē, e tauturu te reira ia ’outou i roto i teie ’ōpuara’a hanahana. E mea ’ōhie roa tā’u parau poro’i : tītauhia ia tātou ’ia rave rahi atu ā nō te tauturu i te feiā ’āpī ’e te feiā ’āpī pa’ari o te ’Ēkālesia ’ia fāri’i i te ’oa’oa—te ’oa’oa mau, ’e te ’oa’oa vārua—i roto i te Fatu ra ia Iesu Mesia. Tē ti’aturi nei au ē, te rāve’a maita’i a’e nō te rave i te reira, nā roto ïa i te ha’api’ira’a hōhonu i te ha’api’ira’a tumu a te Mesia mai te au i te ravera’a a te Fatu. Tē fa’a’ite pāpū nei au ia ’outou ē, nā te ha’api’ira’a hōhonu i te ha’api’ira’a tumu a te Mesia e arata’i atu i te ’oa’oa i roto i te Fatu ra.
Mai tā te peresideni Nelson i ha’api’i :
« E au mau taea’e, e au mau tuahine, te ’oa’oa e tae mai, ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a.
« Tei ni’a te fa’atumura’a o tō tātou orara’a i te fa’anahora’a nō te fa’aorara’a a te Atua ’e ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna te ’oa’oa e tae mai ai. ’O ’oia te tumu nō te mau ’oa’oa ato’a ».2
Terā te ’oa’oa e tītauhia nō tō tātou feiā ’āpī ’ia fāri’i. Nā te reira e pāruru ia rātou i te ’ino, e fa’aitoito ia rātou ’ia vai parau ti’a noa, ’e fa’a’amu i tō rātou hina’aro ’ia fāri’i tāmau noa i te Vārua Maita’i i roto ia rātou, ’e e ’ume ia rātou i te Fatu ra.
’Ua hōro’a mai te Fa’aora ia tātou i te hō’ē hōho’a nehenehe i roto i te Buka a Moromona nō te tauturu i tā ’outou mau pīahi ’ia ’ite i te ’oa’oa i roto iāna :
« Nō reira, ’e fa’ateitei i tō ’outou māramarama, ’ia ’ana’ana atu i tō te ao nei. Inaha, ’ō vau ïa te māramarama tā ’outou ’e fa’ateitei i ni’a—maori rā ’o tā’u i rave i mua ia ’outou ra. Inaha, i hi’o a’enei ’outou iā’u ’a pure ai au i te Metua ra, ’e ’ua riro ana’e ’outou ’ei ’ite i te reira.
« ’E ’ua ’ite ’outou i tā’u i fa’aue atu ia ’outou, ’eiaha te hō’ē e haere ’ē atu, ’ia haere mai rā ’outou iā’u , e ti’a ïa ia ’outou i te fāfā mai ’e te ’ite mai ho’i ; ’e nā reira ato’a ’outou i tō te ao [’e ’aore rā i te mau pīahi] ».3
I tō te Fa’aora fāra’a mai i te mau ta’ata i te hiero nō Bountiful, ’ua here atu ’oia ia rātou, ’ua ha’api’i ia rātou i tāna ha’api’ira’a tumu, ’e ’ua ha’amaita’i ia rātou. ’Ua fāri’i rātou i te ’oa’oa rahi. I roto i teie ’īrava, tē pi’i mai nei te Fa’aora ia ’outou ’ia haere mai iāna ra ’e, nā roto i te mana o te Vārua Maita’i, ’ia hi’o iāna ’ia rave i te ’ohipa, ’ia fāri’i i tōna here, ’e ’ia fāri’i i tōna ’oa’oa. I muri iho tē fa’aue mai nei ’oia ia ’outou ’ia hōpoi i te mea tā ’outou i ’ite ’e i fāri’i, i tā ’outou mau pīahi ra : ’a here ia rātou, ’a ha’api’i ia rātou i tāna ha’api’ira’a tumu, ’a ani manihini ia rātou ’ia haere mai iāna ra ’e ’ia fāri’i i tōna ’oa’oa. Mai te mea ē, tei roto ia ’outou te here, te ha’api’ira’a tumu, te māramarama ’e te ’oa’oa o Iesu Mesia, e nehenehe tā ’outou e fa’auru ia rātou ’e e fa’aitoito ia rātou ’ia ’imi i tō rātou iho mau ’itera’a pae vārua i te Fatu.
Te ’oa’oa ’e te ha’api’ira’a hōhonu
Te ha’api’ira’a e arata’i atu i te ’oa’oa ra ’o te ha’api’ira’a hōhonu ïa i te ha’api’ira’a tumu a Iesu Mesia, ’e ’ia ravehia te reira ’ia au i te fa’anahora’a a te Fatu e ti’a ai. Te ha’api’ira’a hōhonu ’o te ha’api’ira’a ïa te vārua tā’āto’a—te ferurira’a, te ’ā’au, te tino, ’e te vārua tāhuti ’ore. E fa’atupu rahi te ha’api’ira’a hōhonu i te mana o te pīahi ’ia rave e toru mea :4
1. ’Ia ’ite ’e ’ia hāro’aro’a
’A tahi, ’ia ’ite ’e ’ia hāro’aro’a ’O te ’ite teie o te ferurira’a ’e o te ’ā’au. Fa’aauhia i te fa’aro’o ia Iesu Mesia, ’ei hi’ora’a, e ha’api’i te mau pīahi ē, te fa’aro’o i te Mesia, e parau tumu ’ohipa ïa ’e te mana. Nā roto i te fa’a’itera’a a te Vārua, e ’ite rātou i te parau mau o te reira parau tumu ’e e ha’amata rātou ’ia ’ite māramarama a’e, ’ia hina’aro hōhonu a’e, ’e ’ia hāro’aro’a hope roa atu i roto i tō rātou ’ā’au te ’ohipara’a taua parau tumu ra i roto i tō rātou orara’a.
2. ’Ia rave i te ’ohipa maita’i ’e te ’āfaro
Te piti, ’ia rave i te ’ohipa maita’i ’e te ’āfaro. E ha’api’i te mau pīahi nāhea ’ia fa’a’ohipa i te parau tumu o te fa’aro’o ia Iesu Mesia i roto i tō rātou orara’a ’e ’ia rave i te reira. ’Ei hi’ora’a, e nehenehe rātou e fa’aoti ’ia ’ohipa ma te fa’aro’o i roto i te Fa’aora nō te fāri’i i te itoito nō te ani i te hō’ē hoa ’ia tai’o i te Buka a Moromona. Mai te mea ē, e rave rātou ma te fa’aro’o iāna, e tupu i te rahi tō rātou ti’aturi iāna, ’e e ha’amaita’i te Fatu ia rātou i te fa’aro’o rahi a’e.
3. ’Ia riro hau atu mai tō tātou Metua i te Ao ra
Te toru, ’ia riro hau atu mai tō tātou Metua i te Ao ra. Te rirora’a, ’o te hō’ē ïa fa’anahora’a o te tauira’a o te huru ’e te nātura mau o te pīahi. E tupu te reira nā roto i te mana fa’aora ’e te ha’apūai o Iesu Mesia. ’Ia fa’aauhia i te parau tumu o te fa’aro’o i te Fa’aora, te aura’a ra, e riro mai te hō’ē pīahi ’ei ta’ata ha’apa’o maita’i ’a’e. E riro mai te fa’aro’o i te Mesia ’ei tuha’a o tō rātou huru, ’o vai rātou, mai te mea ē, e tupu tāmau noa rātou i roto i te ’itera’a ’e te hāro’aro’ara’a i te fa’aro’o i te Mesia, ’e ha’a ma te fa’aro’o iāna nō te rave i te mea tāna ’e hina’aro ’ia ravehia, ’e ’ia ’imi i tāna mau hōro’a ’e te mau ha’amaita’ira’a nō te riro mai iāna te huru.
Teie nā fāito e toru o te ha’api’ira’a hōhonu, e ’ohipa rātou ’e e ha’apuāi i te tahi ’e te tahi. Nā te rirora’a ’ei ta’ata ha’apa’o maita’i e fa’atupu i te rahi i te ti’ara’a o te pīahi ’ia ’ite ’e ’ia hāro’aro’a. Nā te hāro’aro’ara’a hōhonu e fa’aitoito hau atu i te ’ohipa maita’i, ’e nā roto i te reira, e hiti mai te mau hi’ora’a ’āpī, ’e e arata’i atu ho’i i te huru pūai a’e. Tē vai nei te ’oa’oa rahi i roto i te tuha’a tāta’itahi o te ha’api’ira’a hōhonu—te ’oa’oa i roto i te hāro’aro’ara’a ’āpī, te ’oa’oa i roto i te ’ohipa parau ti’a , te ’oa’oa i roto i te rirora’a hau atu mai te Metua ’e te Tamaiti.
Te fa’anahora’a a te Fatu nō te ha’api’i hōhonu
E toru anira’a manihini
E mea ’ōhie roa te fa’anahora’a a te Fatu nō te ha’api’i hōhonu, e mea puai rā. Teie te tātarara’a a te Fatu nō te ha’api’ira’a mai te au i tāna fa’anahora’a :
« E mai te mea ’ua rotahi tō ’outou mata i tō’u hanahana ra, e fa’a’īhia tō ’outou mau tino pā’āto’a i te māramarama.5
« ’Ia fa’aineine ia ’outou iho, ’e ’ia ha’amo’a ia ’outou iho.6
« ’Ia ha’api’i atu ’outou te tahi i te tahi ra i te ha’api’ira’a evanelia nō te bāsileia.7
« ’A ha’api’i itoito atu ’outou ’e e vai noa tō’u maita’i ia ’outou ».8
« ’A ’imi itoito ’outou ’e ’a ha’api’i atu te tahi i te tahi i te mau parau nō te pa’ari ».9
« ’A ’imi ho’i i te ’ite, ’oia ïa nā roto ho’i i te ha’api’i ’e nā roto ato’a i te fa’aro’o ».10
« ’A fa’ata’a na ’outou i te hō’ē ’orometua nō rotopū ia ’outou iho, ’eiaha te pā’āto’ara’a ’ia parau mai i te taime hō’ē ra ».11
« ’A tu’u rā i te hō’ē ’ia parau mai i te taime hō’ē ra ’e ’ia fa’aro’o ho’i te pā’āto’ara’a… ’ua ha’amaita’ihia ïa te pā’āto’ara’a te tahi i te tahi ».12
« ’E ’o tei hau roa a’e i te mau mea ato’a, ’a fa’a’ahu na ia ’outou iho na i te ru’uru’u o te aroha ».13
Tē fa’a’itehia nei i roto i teie mau ’īrava nehenehe nō te tuha’a 88 o te Buka Fafau e toru ’ohipa ’e te fa’aitoitora’a i roto i te fa’anahora’a a te Fatu nō te ha’api’i hōhonu : ’A tahi, e tuatāpapa, e ’imi, e fa’aineine ’e e ha’apa’o ma te itoito.14 Te piti, e ha’aputuputu nō te ha’api’i te tahi i te tahi, i roto i te natira’a o te aroha, ma te arata’ihia e te hō’ē ’orometua fa’auruhia, ma te tauturuhia e te aroha o Iesu Mesia. Te toru, te fari’ira’a i te heheura’a, te fa’aurura’a, ’e te tahi atu mau hōro’a vārua, e tae mai ïa nā roto i te mana o te Vārua Maita’i.
Te ’orometua i roto i te fa’anahora’a a te Fatu, e rave itoito ’oia, e fa’auru i te fa’aōra’a i te mau pīahi i roto i te mau tuha’a ato’a o te ha’api’ira’a hōhonu. E piti mea faufa’a roa : ’a tahit, ’ia vai te Vārua Maita’i i roto ia ’outou ’e ’ia here ’outou i te mau pīahi.
Tei ia ’outou na te hō’ē rāve’a nehenehe roa—te buka ha’api’ira’a Te ha’api’ira’a ’e te ’apora’a i te ’evanelia15—nō te tauturu ia ’outou ’ia ha’api’i ’ia ti’a i tā ’outou mau pīahi ’ia ha’api’i mai te au i te fa’anahora’a a te Fatu. Nō reira, tē hina’aro nei au e hōro’a ia ’outou i te hō’ē ’ohipa : Tē hina’aro nei au ’ia tai’o ’outou ’e ’ia tuatāpapa i te buka ha’api’ira’a nā roto i te hi’o o te ha’api’ira’a hōhonu, i te ha’api’ira’a tumu iho ā rā a te Mesia, ’o te arata’i atu i te ’oa’oa. ’Ia hāro’aro’a ana’e ’outou ē, ’o te ha’api’ira’a hōhonu e tae atu ai i te ’oa’oa tā ’outou ’ōpuara’a, e taui te reira i te huru nō tā ’outou fa’a’ohipara’a i te mau parau tumu pūai i vauvauhia i roto i te buka ha’api’ira’a. Teie e toru hi’ora’a ’ōhie (e rave rahi atu ā tē vai ra) :
-
E ani ’outou i tā ’outou mau pīahi ’ia fa’aineine i te ha’api’i te tahi ’e te tahi.
-
E tu’u ’outou i te ha’afaufa’ara’a i ni’a i te tauturura’a i tā ’outou mau pīahi ’ia fa’ahotu i te mau huru Mesia.
-
E fa’ariro ’outou i te ’oa’oa ’ei ’ōpuara’a ’āmui i roto i tā ’outou piha ha’api’ira’a, ’e e fa’a’ite tāmau noa te mau pīahi i te ’itera’a pāpū nō ni’a i te ’oa’oa.
E au mau taea’e ’e mau tuahine here, ’ua ’ite au ē, ’ua rave a’ena ’outou e rave rahi mau ’ohipa māere ’e te nehenehe nō te tauturu i tā ’outou mau pīahi ’ia fāri’i i te ’evanelia a Iesu Mesia i roto i te hōhonura’a o tō rātou ’ā’au ’e ’ia ’ite i te ’oa’oa i roto iāna. ’Ua ’ite au i tā ’outou fa’atūsiara’a ’e tō ’outou ha’apa’o maita’i. ’Oia ato’a te Fatu.
Tē hina’aro nei au e ’ōpani i teie mahana nā roto e toru anira’a. ’Ua ’ite au ē, mai te mea ē, e fa’a’ohipa ’outou i teie nau anira’a, e tauturu ïa ’outou i tā ’outou mau pīahi ’ia ha’api’i hōhonu atu ā i roto i te fa’anahora’a a te Fatu, ’e ’ia fāri’i rahi atu ā i te ’oa’oa i roto iāna.
Anira’a 1: Te hīro’a mure ’ore ’e te fā mure ’ore. Tē ani nei au ia ’outou ’ia tauturu i tā ’outou mau pīahi ’ia ha’api’i mai ’o vai mau rātou. ’A tauturu ia rātou ’ia hi’o, ’ia fāri’i ’e ’ia ’ite ē, e mau tamari’i mau rātou nā te Atua, e mau tamāiti ’e e mau tamāhine here nāna. ’A tauturu ia rātou ’ia hāro’aro’a i te aura’a ’e te tītaura’a o « Te ’utuāfare : E poroi i tō te ao » ’a fa’ahitihia ai ē, « e natura ’e e hōpe’ara’a hanahana… ’e e ihota’ata ’e e ’ōpuara’a mure ’ore »16 tō tā ’outou mau pīahi tāta’itahi.
’A tauturu ia rātou ’ia ’ite hōhonu i roto i tō rātou ’ā’au ē, e mau ta’ata vārua rātou e fāri’i nei i te ’itera’a tāhuti. ’Ua mamae te Fatu ’e te Fa’aora ’o Iesu Mesia ’e ’ua pohe nō rātou ’ia ti’a ho’i ia rātou « ’ia haere i mua i te maita’i roa ra, ’e ’ia fāri’i i te pae hope’a i tō rātou haere’a hanahana ’ei mau fatu ’āi’a nō te ora mure ’ore.17 Terā te fa’anahora’a a te Metua i te Ao ra nō rātou. ’A tauturu i te fa’arirora’a i teie fa’anahora’a ’ei ’ohipa mau nō rātou.
’A ha’api’i ia rātou ē, ’ua fānauhia rātou e te Metua i te Ao ra nō te ha’api’i ’e nō te tupu i te rahi ’e ’ia riro mai mai ia rātou. E mea faufa’a te ha’api’ira’a nō te ’ōpuara’a o te orara’a hou te tāhuti ’e nō te tāhuti nei, ’e nō tō rātou fa’aorara’a mure ’ore. Tītauhia ia rātou ’ia ha’api’i i te mau mea nō te Atua ’e i te mau mea nō te ao ’ia ti’a ho’i ia rātou ’ia fa’atupu i te mau ’ōpuara’a a te Atua i roto i tō rātou orara’a. ’A tauturu ia rātou ’ia ’ite ē, e mea faufa’a te ha’api’ira’a i roto i te fa’anahora’a mure ’ore a te Atua ē, nō reira, nō tā rātou ato’a ’ōpuara’a ’e te haere’a hanahana.
Anira’a 2 : Te ravera’a a te Fatu i te ha’api’ira’a hōhonu. Tē ani nei au ia ’outou ’ia tauturu i tā ’outou mau pīahi ’ia ha’api’i nāhea ’ia ha’api’i, mai te au i te ravera’a a te Fatu. E rave ’outou i te reira nā roto i te hi’ora’a. Mā te pūai rahi, te huru o tā ’outou ha’api’ira’a, ’o tā ’outou ïa e ha’api’i i tā ’outou mau pīahi nō ni’a i te ravera’a a te Fatu nō te ha’api’i mai. Mai te mea ē, e fa’atupu ’outou nō rātou i te mau ’itera’a nō te ha’api’i mai mai tā te Fa’aora e ha’api’i, e ha’api’i ïa rātou i tāna huru ravera’a. ’Ia ’ore rā, e’ita ïa rātou e ha’api’i.
Tē ti’aturi nei au ē, e ha’api’i ’outou i tā ’outou mau pīahi i te ravera’a a te Fatu nō te ha’api’i mai nā roto i tō ’outou iho hi’ora’a. Tē ti’aturi ato’a nei au ē, e ha’api’i ’outou ia rātou i tāna ravera’a ma te ’āfaro ti’a ’e ma te pāpū. Tē vai ra hō’ē rāve’a nehenehe roa nō te rave i te reira i roto i te Tāmaura’a ha’api’ira’a tumu, i reira te mau parau tumu nō te « Fāri’ira’a i te ’ite pae vārua » e ha’api’i maite nei i te ravera’a a te Fatu nō te ’apo i te ha’api’ira’a. Mai te mea ē, e ha’api’i ’outou i te reira mau parau tumu i roto i te roara’a o te matahiti, e ha’api’i ïa ’outou ia rātou i te ravera’a a te Fatu nō te ha’api’i. E nehenehe te reira ha’api’ira’a e rave-ato’a-hia i roto i te mau ha’api’ira’a tā ’outou e ha’api’i i te institut.
’A tauturu i tā ’outou mau pīahi ’ia ’ite ē, e tano te ravera’a a te Fatu i ni’a i te mau mea ato’a tā rātou e tuatāpapa. Te mau rāve’a ta’a ’ē tā rātou e ’ite i roto i tā rātou mau piha ha’api’ira’a i te tuarua ’e ’aore rā, i te tuatoru, tei te huru ïa o tā rātou ’orometua. Terā rā, e nehenehe i tā ’outou mau pīahi, i te mau taime ato’a, ’ia hōro’a ia rātou iho, ’ia itoito i roto i tā rātou tuatapapara’a, ’e ’ia ha’amaita’ihia i te auhoara’a o te Vārua Maita’i. ’A ani i tā ’outou mau pīahi ’ia hōpoi i te Vārua Maita’i nā muri iho ia rātou i te fare ha’api’īra’a.
Anira’a 3 : Te tātarahapara’a ’e te ha’api’ira’a. Tē ani nei au ia ’outou ’ia ha’api’i i tā ’outou mau pīahi ē, e faufa’a rahi tō te tātarahapa i roto i te ha’api’ira’a hōhonu. Tē tātarahapa ’o te fa’anahora’a ïa a te Fatu nō te ha’api’ira’a a te ta’ata iho, nō te tupura’a vārua, ’e nō te riro hau ’e hau atu mai iāna te huru. E ha’api’i tā ’outou mau pīahi i te ravera’a a te Fatu nā roto i te ha’ara’a te mana fa’aora ’e te ha’apūai o Iesu Mesia i roto i tō rātou orara’a, ma te ’īriti nō rātou i tōna maita’i ’e i tōna aroha.
’A tauturu i tā ’outou mau pīahi ’ia hāro’aro’a ē, te tātarahapa ’o te fa’anahora’a hanahana ïa nā roto i te reira e ti’a ai ia rātou ’ia riro hau atu mai te Fa’aora i te mau taime ato’a. I te tahi taime, tō rātou tātarahapa nō ni’a iho ïa i te hō’ē mea i tītauhia ia rātou ’ia fa’aea i te rave. I te tahi taime nō ni’a iho ïa i te hō’ē mea e tītauhia ia rātou ’ia ha’amata i te rave. ’A tauturu ia rātou ’ia ’ite ē, te tātarahapa ’ua hau roa atu ïa i te paraura’a i te Fatu ’e i tō rātou ’episekōpo ē, ’ua rave rātou i te hō’ē ’ohipa hape. Te hara, ’o te fāriu-’ē-ra’a ïa i te Fatu. Tē tātarahapa, ’o te ho’ira’a ïa iāna. Tītau te tātarahapa i te hō’ē tauira’a ’ā’au ’e te ferurira’a, hō’ē tauira’a orara’a ’ia au i tō te pīahi iho fāito.
Terā rā, ’a ha’api’i ato’a ia rātou ē, e nehenehe te tātarahapa e ha’amaita’i tāmau noa ia rātou. ’O te rāve’a ïa a te Fatu nō te tauturu ia rātou ’ia rave maita’i a’e ’e ’ia maita’i a’e ho’i rātou i roto i to rātou orara’a tā’āto’a. Tītau te reira ia rātou ’ia taui ’e ’ia tupu i te rahi, ’e te aura’a ra, tītauhia ïa ia rātou ’ia tātarahapa, ’ia fāriu hope atu i te Fa’aora, ’ia hōro’a hope i tō rātou ’ā’au iāna i te mau taime ato’a. Te reira fa’anahora’a fāriura’a, ’e te reira fa’anahora’a i hōro’ahia mai, nō te orara’a tā’āto’a ïa. E mea faufa’a te reira nō te ha’api’ira’a hōhonu.
’Itera’a pāpū
Tē hōro’a atu nei au ia ’outou i teie fafaura’a : Mai te mea ē, e ha’api’i ’outou i tā ’outou mau pīahi ē, ’o vai mau rātou, nāhea ’ia ha’api’i hōhonu mai te au i te fa’anahora’a a te Fatu, ’e te parau tumu hanahana o te tātarahapa, e ha’api’i hōhonu ïa rātou i te parau ha’api’ira’a a Iesu Mesia, e tupu tō rātou fa’aro’o iāna ’e te here iāna i te rahi, ’e e roa’a ia rātou te ’oa’oa i roto i te Fatu. E ’ite ’outou iho ’e tō ’outou mau pīahi i teie parau fafau fa’ahiahia a te Fatu : « ’Oia mau, ’oia mau, tē parau atu nei au ia ’oe ē, e tu’u atu vau i tā tō’u nei Vārua ia ’oe na, ’o te ha’amāramarama mai i tō ’oe ferurira’a, ’o te fa’a’ī ho’i i tō ’oe ’ā’au i te ’oa’oa.18
’Ua ’ite au ē, e parau mau te reira parau fafau. Tē hōro’a atu nei au ia ’outou i tō’u ’itera’a ē, tē ora nei te Atua tō tātou Metua. ’O Iesu te Mesia. Tē ora nei ’oia ! Nā rāua teie ’ohipa mo’a. Tō’u ïa ’itera’a tā’u e vaiiho atu nei ’e tō’u here, nā roto i te i’oa o Iesu Mesia ra ’āmene.
© 2017 nā Intellectual Reserve, Inc. Fatura’a pāruruhia. Parau fa’ati’a nō te reo peretāne : 5/17. Parau fa’ati’a nō te ’īritira’a : 5/17. ’Īritira’a nō « Deep Learning and Joy in the Lord. Tahitian. PD60004121 895