Iesu ’e te vahine i mauhia e fa’aturi ra

26 nō Fepuare

Nāhea te mau ha’api’ira’a a te Fa’aora i te tauturu iā’u ’ia feruriruri ma te ti’a ?

Mataio 6–7

ītona ’āpo’o

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, e fa’ahiti ’āmui i te Parau tai’o a te Feiā ’Āpī Tamāhine ’aore rā i te Parau tai’o a te pupu Autahu’ara’a a Aarona. I muri iho, ’a arata’i i te hō’ē tāu’ara’a parau nō ni’a i te ’ohipa o te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha te mau tumu parau tā te ’episekōpora’a i ’āparau i roto i tā tātou ’āpo’ora’a pāroita nā te feiā ’āpī ? E aha tā tātou e rave ’ei piha ’aore rā ’ei pupu, nō ni’a i te tumu o teie mau ’āparaura’a ?

• Aupuru i te feiā tei hina’aro i te tauturu. Nāhea tātou ’ia toro i te rima i te mau ta’ata mai te Huru Mesia, ’ia ’ite ana’e tātou i te hepohepo ’e ’aita rā tātou i ’ite e aha te parau atu ?

• Ani i te mau ta’ata ato’a ’ia fāri’i i te ’evanelia. E aha tā tātou i ’ite mai i roto i te ’evanelia a Iesu Mesia ’o te hōro’a mai ia tātou te ’oa’oa ? Nāhea tātou ’ia fa’a’ite atu i te reira ’oa’oa ia vetahi ’ē ?

• Tāhō’ē i te mau ’utuāfare ē a muri noa atu. E aha tā tātou e rave nei nō te ’ite mai i te mau i’oa o te mau tupuna e hīna’aro nei i te mau ’ōro’a o te hiero ? E aha tā tātou e rave nō te tauturu ia vetahi ’ē ’ia ’imi mai i te mau i’oa o tō rātou mau tupuna ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Tē vai nei i roto ia tātou tāta’itahi te hō’ē peu—e fa’ahope’ara’a nō tō tātou nātura tāhuti—’ia feruri ia vetahi ’ē i te tahi taime ma te ti’a ’ore ’aore rā ma te fa’aahaaha. ’Ua ha’api’i rā te Fa’aora, « ’eiaha e ha’avā ma te parauti’a ’ore, ’ia ’ore ’outou ’ia ha’avāhia mai ; ’a ha’avā rā i te ha’avāra’a parauti’a » ((’Īritira’a a Iosepha Semita, Mataio 7:1 [i roto Mataio 7:1, nota raro a]). ’A feruri nāhea te pe’era’a i teie a’o i te ha’amaita’i ia ’oe ’e ia rātou tā ’oe e ha’api’i ra. ’Ua fa’a’ite mai te Fa’aora nā roto i te hi’ora’a i te mea tāna e parau parau ra « te ha’avāra’a parauti’a ». ’Ei hi’ora’a, ’a feruri na, nāhea ’oia i te ravera’a i te vahine tei ’itehia tē fa’aturi ra. ’Aita ’oia i fa’ahapa iāna, ’aita ato’a rā ’oia i fa’a’ore i tāna hara. ’Ua ani manihini ’oia iāna ’ia « haere, ’eiaha rā ’ia hara fa’ahou » (Ioane 8:11). E aha tā ’oe i ha’api’i mai nō ni’a i te ha’avāra’a parauti’a nā roto mai i te Fa’aora ?

’A feruri ai ’oe e nāhea i te tauturu i te feiā ’āpī ’ia māramarama i te ha’avāra’a parauti’a, ’a tuatāpapa ai ’oe i te Mataio 7:1–2 ’e te a’ora’a a Elder Lynn G. Robbins « Te ha’avā parauti’a » (Liahona, Novema 2016, 96–98).

Ha’api’i ’āmui

’A ha’amata i te hō’ē ’āparaura’a nō ni’a i te ha’avāra’a parauti’a nā roto i te anira’a i te mau melo o te piha ’aore rā o te pupu, ’ia feruri i te hō’ē taime ’a ha’avā-hape-hia ai rātou e vetahi ’ē. E aha te mea tā rātou i fāri’i ? E aha tā tātou i ha’api’i mai nō ni’a i te ha’avāra’a nā roto mai i te mau ha’api’ira’a a te Fa’aora i roto i te Mataio 7:1–5 ? (hi’o ’Īritira’a a Iosepha Semita i roto te fa’ahorora’a 1a). E aha te aura’a te parau « ha’avāra’a parauti’a » ? E ’āparau ’outou i teie mau ’īrava ma te ani i te mau melo o te piha ’aore rā o te pupu, ’ia fa’ahiti fa’ahou mai i te ’īrava tāta’itahi ’ia au i tā rātou iho mau parau. E tauturu ato’a te mau ’ātivite mai teie i muri nei i tā ’oe mau pīahi ’ia ha’avā ma te parauti’a.

• E tauturu te mau ha’api’ira’a a te Fa’aora i roto i te Mataio 6–7 ia tātou ’ia « ha’avā rā i te ha’avāra’a parauti’a ». Nō te tauturu i te mau melo o te piha ’aore rā o te pupu ’ia ’ite mai i teie mau ha’api’ira’a, ’a hōro’a ia rātou tāta’itahi te hō’ē o teie mau tuha’a parau i muri nei nō te feruri : Mataio 6:14–15 ; 7:3–5 ; 7:12 ; 7:15–20. E aha tā te mau parau a te Fa’aora e parau nei i roto i teie mau ’īrava nō ni’a i te aura’a ’ia ha’avā ma te parauti’a ? E aha tā tātou i ha’api’i mai nā roto mai i te hi’ora’a o te Fa’aora i roto i te Ioane 8:1–11 ’e te Mataio 9:10–13 ? E aha te mau ta’a-’ē-ra’a tā tātou e ’ite nei i rotopū i te huru ha’avāra’a a te Fa’aora ia tātou, ’e te huru ha’avāra’a tā tātou e rave pinepine nei nō vetahi ’ē ?

• Nō te mea e ti’amāra’a tō tātou pā’āto’a, e ti’a ia tātou e ha’avā tāmau noa i te mea tā tātou e rave ’e e ’ore e rave. ’Ei feiā pe’e rā i te Fa’aora, tē tūtava nei tātou ’eiaha e ha’avā ’aore rā e fa’a’ino ia vetahi ’ē. Nō te tauturu i te feiā ’āpī ’ia māramarama i te ta’a-’ē-ra’a, ’a fa’a’ite ia rātou i te fa’ahitira’a parau a te peresideni Dallin H. Oaks i roto te « Pu’e parau ha’amāramaramara’a ». ’Ei piha ’aore rā ’ei pupu, ’a ha’a ’āmui nō te feruri i te mau hi’ora’a nō te ha’avāra’a i te hō’ē tupura’a ’ohipa—mai te hō’ē ’ātivite, hō’ē ’ohipa e tupu ra ’aore rā hō’ē ’āparaura’a—’eiaha rā e ha’avā i te hō’ē ta’ata i roto. Nō te aha e mea maita’i a’e ’ia fāito i te hō’ē hete i te hō’ē ta’ata ? E mau uira’a paha tā te feiā ’āpī nō ni’a i te fāitora’a ma te ti’a (hi’o te mau hi’ora’a i roto te « Pu’e parau ha’amāramaramara’a »). ’A tāu’aparau i tā rātou mau uira’a ma te fa’a’ohipa i te ha’amāramaramara’a i raro a’e te « Pu’e parau ha’amāramaramara’a » nō te ’ite mai i te mau pāhonora’a. E ani i te feiā ’āpī ’ia fa’a’ite mai i te mea tā rātou i fa’auruhia ’ia rave, nō te mea tā rātou i ha’api’i mai.

• I roto i tāna a’ora’a nō te ’āmuira’a rahi « Fa’ananea i te ha’avāra’a maita’i e ’eiaha e ha’avā ia vetahi ’ē » (Liahona, Mē 2010, 103–5), ’ua fa’ati’a Elder Gregory A. Schwitzer e piti ’ā’amu—nō te hoa o Iesu ’o Mareta ’e nō te hō’ē ta’ata tā Elder Schwitzer i tauturu. E aha tā teie nā ’ā’amu e haʼapiʼi nei nō ni’a i tā tātou ferurirurira’a ’e tā tātou huru ravera’a ia vetahi ’ē ? E aha te mau parau tumu e tauturu ia tātou ’ia riro hau atu mai te Huru Mesia ’e ’ia ha’avā parauti’a ?

feiā ’āpī pa’ari e paraparau ra

’A ha’api’i mai ai tātou ’ia riro hau atu mai te Huru Mesia, e ha’avā parauti’a hau atu ā tātou.

Rave ma te fa’aro’o

’A fa’aitoito i te mau melo o te piha ’aore rā o te pupu, ’ia feruri ’e ’ia pāpa’i i te mea tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A ani ia rātou ’ia feruri e nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• Mau hi’ora’a nō te mau uira’a nō ni’a i te ha’avāra’a ia vetahi ’ē : « ’Ua ha’api’ihia vau ’ia mā’iti maita’i i tō’u mau hoa. E nāhea rā vau ’ia rave i te reira ma te ’ore e feruriruri i te ta’ata ? » « ’Ia tāmata ana’e au i te ora i te ’evanelia, e parihia vau tē hā’avā nei au i te ta’ata Nāhea vau ’ia vai ha’apa’o maita’i noa i te mea tā’u e ti’aturi nei ’e ’ia fa’a’ite i te here i te feiā ’aita e tū’ati nei i tō’u mana’o ? »

• Samuela I 16:7 ; Moroni 7:12–19 ; Te Ha’api’ira’a Tumu ’e te mau Fafaura’a 11:12

• Mau parau tumu nō te ’evanelia, « Judging Others [Ha’avāra’a ia vetahi ’ē] », topics.ChurchofJesusChrist.org

• ’Ua ha’api’i te peresideni Dallin H. Oaks : « Nā roto i te mau rāve’a ato’a, e ha’apae tātou i te ha’avā i te ta’ata ’e ’ia ha’avā noa i ni’a te mau tupura’a ’ohipa. E mea faufa’a te reira i te mau taime ato’a ’a tāmata ai tātou i te ha’a ’ia au i te mau fa’aturera’a ’e’ē, ’e te feiā tā tātou e ti’a e tā’ati atu—i te fare, i te ’ohipa, ’aore rā i roto orara’a huira’atira. E nehenehe tātou e ha’amau ’e e rave mai te au i te mau fa’aturera’a teitei nō tātou iho ’aore rā nō tō tātou nohora’a ma te ’ore e fa’ahapa i te feiā e rave ’ē nei » (« ’Judge Not’ and Judging, Ensign, ’Ātete 1999, 11).

Ha’api’ira’a mai tā te Fa’aora

E pāturu tā ’oe mau tauto’ora’a i te mau tauto’ora’a a te mau metua. ’A fa’a’ite i te mau metua o te feiā ’āpī i te mea tā ’oe e ha’api’i nei. ’A fārerei atu ia rātou nō te ’ite i te mau hina’aro o te feiā ’āpī o tā ’oe piha ’e te mau rāve’a maita’i roa a’e nō te tauturu i te pāhono i taua mau hina’aro ra.