Jabōt Juon Kweilo̧k ko an Ko̧o̧njeļ

Ilo Jabōt juon in kajjojo allōn̄, kweilo̧k ko an doulul eo an elder ro im Doulul eo an Kōrā ro juon rūkaki ejjab kobaiktok juon katak ie. Ijello̧kin, būreejtōnji ko an doulul eo an elder ro im Doulul eo an Kōrā ro rej tōl kweilo̧k in ko̧o̧njeļ ko. Ilo kweilo̧k in ko̧o̧njeļ kein ilo Jabōt-juon, kajjojo doulul an elder ro im Doulul eo an Kōrā ro rej kapilōk ippān doon kōn eddo ko ijo jokwe ie, iien ko rem̧m̧an, im apan̄ ko; katak jān ļōmņak ko im en̄jake ko an doon; im karōk wāween ko n̄an jerbali im̧we ko kar būki jān Jetōb. Ekōnono kein rej aikuj pedped ioon eoon ko rekkar im katak ko an rikanaan ro remour.

Ejjab aolep kweilo̧k in ko̧o̧njel ko renaaj eier wōt juon. Ijin rej jet iaan unin tōl n̄an jipan̄ būreetjōnji ko tōl juon ko̧o̧njel ejejjet.

M̧okta jān kweilo̧k in ko̧o̧njel eo

Kōm̧m̧ani:

Kile aikuj ko ijo jokwe ie, iien ko rem̧m̧an, im apan̄ ko.
Kālet kōn jar unin kōnono kōnono ko n̄an ekōnono kaki.
Karuwaineneik ro uwaan doulul ko ak kōrā ro ilo Doulul eo an Kōrā ro n̄an itok ilo aer pojak n̄an kwaļo̧k ļōmņak ko im en̄jake ko aer.

Jab kōm̧m̧ane:

Kōpooj juon katak.
Itok kōn juon uwaak āinjuon ak karōk in jerbal ilo kōļmenļo̧kjeņ.

Ilo iien kweilo̧k in ko̧o̧njeļ eo

Kōm̧m̧ane:

Kūr ro uwaan n̄an kwalo̧k en̄jake ko raar jerbale kōn im̧we ko im karōk ko jān kweilo̧k ko m̧oktaļo̧k.
Kwaļo̧k kadkad in unin kōnono eo im rōjan̄ membōr ro n̄an kapilōk ippān doon kake, pukōt uwaak ko im tōl eo jān jeje ko rekwojarjar, naan ko an rikanaan ro, im Jetōb Kwojarjar.
Karōk n̄an kōm̧m̧ani ta ko kar ekōnono kaki. Menin emaron̄ koba karōk ko an juon kumi ak karōk ko an kajjojo kar kōm̧m̧ani kōn er make.

Jab kōm̧m̧ani:

Peek bwebwenato eo.
Kajjieon̄ kareel ro jet kōn ļōmņak ko am̧.
Ekōnono kōn unin kōnono ko rem̧wilaļ im ittin̄o̧.
Kwaļo̧k juon katak.
Kipel juon n̄an bōk kuņaan.

Ālkin kweilo̧k in ko̧o̧njeļ eo

Kōm̧m̧ane:

Etale karōk ko im ijjitōn̄ ko kar kōm̧m̧ani ilo iien kweilo̧k in ko̧o̧njeļ eo.
Kappukot wāween ko n̄an kobaik ro me rejjab maron̄ pād ilo kweilo̧k ko kōnke kōn kūr ko ak un ko jet. Kōjeļļāik er kōn karōk ko me raar kōm̧m̧ani.
Leļo̧k n̄an ro uwaan iien ko rem̧m̧an n̄an kwaļo̧k en̄jake ko ilo kweilo̧k ko tokālik.

Unin kōnono ko n̄an Kweilo̧k in Ko̧o̧njeļ eo ilo Jabōt-Juon

Ļōmņak ko n̄an unin kōnono ko kōn ekōnono kaki an kweilo̧k in ko̧o̧njeļ eo remaron̄ itok jān kweilo̧k ko an būreejtōnji eo, ward ko̧o̧njeļ kweilo̧k ko, karōk eo an eria, im̧we ko an ritōl ro kar būki ilo aer jerbal in karejar n̄an membōr ro, im im̧we ko jān Jetōb Kwojarjar. Unin kōnono ko itulaļ rej elmakot wōt. Ritōl ro remaron̄ jeļā kōn aikuj ko an ro jet me rej en̄jake im̧we n̄an ekōnono kaki.

Ta eo jemaron̄ kōm̧m̧ane n̄an jerbal n̄an ro ipeļaakid? (lale Mosaia 23:18).
Ekōjkan ad maron̄ kōllaajrak oktak in eddo ko ad?
Ekōjkan ad naaj kwaļo̧k gospel eo ippān ro m̧ōttad im ro rūturid? (lale Alma 17).
Ekōjkan ad maron̄ kōjparok kōj make im baam̧ļe ko ad jān kein kaloojoj ko rōjekkar im pija im bok ko renana?
Ta eo jenaaj kōm̧m̧ane n̄an jipan̄ im kōkajoorļo̧k ajri ro nejid im jodikdik ro ilo ward eo ad?
Ekōjkan ad maron̄ kōļapļo̧k ad bōk kuņaad ilo jerbal in menmenbwij an baam̧le im ad kabun̄jar ilo tampeļ?
Ekōjkan ad maron̄ karuwaineneiktok jipan̄ eo an Irooj ilo ad pukōt uwaak ko n̄an kajjitōk ko ad ilo gospel eo im pukōt juon meļeļe em̧wilaļļo̧k an gospel eo?
Ekōjkan ad maron̄ kōkajoorļo̧k naan in kam̧ool ko ad kōn Irooj im gospel eo An im jipan̄ baam̧le ko ad erom un̄n̄are peier make ilo jetōb.