Kweilo̧k ko an Jabōt Ruo im Jilu
Ilo Jabōt ruo im jilu in kajjojo allōn̄, doulul ko an elder ro im Doulul ko an Kōrā ro renaaj katak jān katak ko an ritōl ro an Kabun̄ in jān kweilo̧k eo eļap ekāāl tata. Kalikkar ej aikuj in kōm̧m̧an n̄an ennaan ko jān ro uwaan Būreejtōnji eo Kein Kajuon im Doulul eo an Jon̄oulruo Rijilōk ro. Ijowōt ke, pedped ioon aikuj ko ijo jokwe ie im im̧we jān Jetōb, jabdewōt ennaan jān kweilo̧k eo ekāāl tata maron̄ in ekōnono kake.
Ilo enan̄in aolep jekjek ko, būreejtōnji eo an doulul eo an elder ro im Doulul eo an Kōrā ro renaaj kālet juon ennaan an kweilo̧k eo n̄an ekkatak kake pedped ioon aikuj ko an membōr, mekarta bisop eo ak stake būreejtōn eo remaron̄ lelo̧k aer ļōmņak. Ritōl ro remaron̄ kālet juon ennaan eiookļo̧k unin kōnono eo kar ekōnono kake ilo juon kweilo̧k in ko̧o̧njeļ ejjab etto ilo Jabōt-juon, ak remaron̄ kālet juon ennaan ilo juon unin kōnono eoktak, pedped ioon im̧we eo jān Jetōb.
Ritōl ro im rūkaki ro raikuj pukōt wāween ko n̄an kōketak ro uwaan n̄an riiti ennaan ko kar kāleti m̧oktaļok im itok ilo aer pojak n̄an kwaļo̧k m̧ool ko im ļōmņak ko kōn ekōjkan jerbali. M̧akūtkūt in katak ko kar elmakoti itulaļ, ko rej pedped ioon pedped ko ilo Katakin ilo Wāween eo an Rilo̧mo̧o̧r (Teaching in the Savior’s Way), emaron̄ jipan̄ membōr ro katak jān ennaan ko an kweilo̧k eo eļap.
M. Russell Ballard, “Menin Letok ko Raorōk jān Anij,” 9–11
Ennaan eo an Būreejtōn Ballard ej uwaake elōn̄ unin kōnono ko—ekoba rikanaan ro, tōmak ilo Kraist, kwojkwoj eo, im jerbal in jipan̄—im ro uwaan doulul eo ami ak Doulul eo an Kōrā ro maron̄ lo unin kōnono ko roktak eļaptata meļeļeier. Karuwaineneik membōr ro n̄an kwaļo̧k juon men jān ennaan in me eim̧we er. Ta kūr ko ak kōjeraam̧m̧an ko kar kallim̧ur kaki jej loi ilo ennaan eo an Būreejtōn Ballard? Ļōmņak in karuwaineneik ro uwaan n̄an kejōkļo̧kjeņ ium̧win jet minit ko ta eo rej en̄jake kar im̧we er n̄an kōm̧m̧ane āinwōt tōprak in ekōnono in.
Gary E. Stevenson, “Būruwōn Juon Rikanaan,” 17–20
N̄an jipan̄ ro uwaan “meļeļe kōn ļap” eo an kūr eo an juon rikanaan kāāl, komaron̄ karuwaineneik membōr ro n̄an ekkatak kōn ennaan eo an Elder Stevenson, pukōt m̧ool ko im ļōmņak ko me ejipan̄ er meļeļe aiboojoj im kwojarjar eo an jerbal in ijjitōn̄ in ekwojarjar. Ļōmņak in karuwaineneik ro uwaan n̄an kwaļo̧k ta eo raar en̄jake ilo iien rejtake eo ekwojarjar eo me kar rejtake Būreejtōn Nelson āinwōt Būreejtōn eo an Kabun̄ in. Komaron̄ barāinwōt pijaki juon menono ioon boot eo im kajjitōk ippān membōr ro n̄an je jet naan ko ak eoon ko me rej kōmeļeļeik būruwōn im kadkad eo an Būreejtōn Nelson. Ta eo eaar katakin me eaar kōjeraam̧m̧an kōj?
Neil L. Andersen, “Rikanaan an Anij,” 24–27
Ekōnono kōn ennaan eo an Elder Andersen emaron̄ kōkajoorļo̧k tōmak eo an membōr ro ilo rikanaan ro remour. Komaron̄ kūr er n̄an kappukot ilo ennaan eo an juon men me ejipan̄ er meļeļe etke Anij eaar illik rikanaan ro iion laļ in im etke jej ļoor er. Ewi wāween ad kar jeraam̧m̧an kōnke ewōr juon ad rikanaan? Membōr ro remaron̄ kwaļo̧k ekōjkan aer kar bōk juon naan in kam̧ool bwe Būreejtōn Russell M. Nelson ej rikanaan eo an Irooj im bwe ej Būreejtōn an Kabun̄ eo an Jisōs Kraist im Armej ro Rekwojarjar ilo Raan-ko Āliktata.
David A. Bednar, “Ineem̧m̧an im Ettā Bōro,” 30–33
N̄an im̧we juon ekōnono kōn ennaan eo an Elder Bednar, komaron̄ je ioon boot eo Ineem̧m̧an ej … im Ineem̧m̧an ej jab … Innām ro uwaan remaron̄ katak ennaan eo an Elder Bednar im je ioon boot eo ennaan ko rej loi me rej kadedeļo̧k ennaan kein Ta eo jej katak jān ennaan in me ej im̧we kōj n̄an ļapļo̧k ad ineem̧m̧an? Ta waanjon̄ak ko an ineem̧m̧aan jemaron̄ ļōmņak kaki? Ekōjkan ad maron̄ kōjerbal kapilōk eo an Elder Bednar n̄an an ļapļo̧k ad ineem̧m̧an?
Bonnie L. Oscarson, “Jiron̄ ro ilo Jerbal in,” 36–38
Kajjitōk ko rej juon wāween n̄an karuwaineneik kejōkļo̧kjeņ. Ļōmņak in je ioon boot eo jet kajjitōk ko me ennaan eo an Sister Oscarson ej uwaaki, āinwōt Ewi wāween ad maron̄ kōjerbal jiron̄ ro ilo jerbal eo an Irooj? Karuwaineneik membōr ro n̄an katak ennaan eo an n̄an uwaak ko n̄an kajjitōk kein im ekōnono kōn ta eo rej katak. Ta kōjeraam̧m̧an ko rej itok n̄e jiron̄ ro rej koba ilo jerbal in karejar? Bōlen ro uwaan kūlaj eo remaron̄ kwaļo̧k en̄jake ko ewōr ippāer ilo aer jerbal in karejar ippān jiron̄ ro. Pedped ioon ekōnono ko ad, ta eo jej en̄jake eim̧we n̄an kōm̧m̧ane?
Dale G. Renlund, “Menmenbwij im Jerbal an Tampeļ: Liāp im Kōmour,” 46–49
Elder Renlund eaar kōnono kōn visōn eo an Ezekiel kōn juon tampeļ kōn an dān jiōbļo̧k jān e (lale Ezekiel 47:8–9). Bōlen juon membōr in doulul eo ak Doulul eo an Kōrā emaron̄ jin̄aik juon pija in visōn in ioon boot eo. Ewi wāween an kōjeraam̧m̧an ko an jerbal in tampeļ im menmenbwij an baam̧le āinwōt dān eo ilo visōn eo an Ezekiel? Komaron̄ karuwaineneik ro uwaan kūlaj eo n̄an kwaļo̧k kōjeraam̧m̧an ko an jerbal in tampeļ im menmenbwij an baam̧le me raar en̄jaki. Ta eo jemaron̄ kōm̧m̧ane n̄an kōm̧m̧an bwe jerbal in tampeļ im menmenbwij an baam̧ļe en ļapļo̧k an m̧ōttan mour ko ad aolep raan?
D. Todd Christofferson, “Doulul eo an Elder ro,” 55–58
Ilo doulul eo an elder ro, komaron̄ karuwaineneik membōr ro an doulul eo n̄an riiti jekjōn in ennaan eo an Elder Christofferson taitōļ in “Doulul eo an Elder ro.” Ta eo jemaron̄ kōm̧m̧ane n̄an lale bwe jej kadedeļo̧k un kein? Ilo Doulul eo an Kōrā ro, komaron̄ kajjitōk ippān juon n̄an ba ilo tukadu in oktak ko n̄an doulul ko an Melkesidek Priesthood eo me Elder Christofferson ej kōmeļeļeik. Innām sister ro remaron̄ kile pedped ko rej kwaļo̧k ilo oktak kein me remaron̄ jerbal n̄an jerbal eo an Doulul eo an Kōrā ro. Ilo doulul eo an elder ro ak Doulul eo an Kōrā ro, ro uwaan remaron̄ ekōnono kōn ta eo rej katak jān bwebwenato eo an Brother Goates im ekōjkan an jerbal n̄an jerbal eo aer.
Ronald A. Rasband, “Lo! Juon Jarin Tariņae an Irooj,” 58–61
Bōlen al, ron̄jake, ak riiti naan ko an “Behold! A Royal Army” (Al, nō. 251) ippān doon maron̄ im̧we ekōnono eo kōn ennaan eo an Elder Rasband. Ewi wāween an doulul ko an priesthood im Doulul ko an Kōrā ro āinwōt juon jarin tariņae an irooj? Membōr ro remaron̄ barāinwōt kappukōt im ekōnono kōn “inelap in kōjeraam̧m̧an ko” Elder Rasband ej kwaļo̧k renaaj itok n̄an bar ejake eo an doulul ko an priesthood. Ta kōjeram̧m̧an ko jet jaar būki—ak jej kōjatdikdik n̄an būki—jān kōm̧m̧ani oktak kein? Ekōjkan an Doulul ko an Kōrā ro maron̄ barāinwōt ļapļo̧k aer bōk kōjeraam̧m̧an ko āinwōt “menin letok ko rokoktaktak” im “katakin”?
Henry B. Eyring, “Kōketak Jerbal in Karejar,” 61–64
Būreejtōn Eyring ej ba kōn ruo kōnono ko ilo kweilo̧k in kwojkwoj eo kōn jerbal in karejar eo me eaar kabwilōn̄ e. Bōlen komaron̄ kajjitikin jimettan in membōr ro an doulul eo an Elder ro ak Doulul eo an Kōrā ro n̄an etali naan ko an ļaddik eo 14 iiō-dettan im jimettan eo juon n̄an etale bwebwenato eo kōn rūkaki in m̧weo. Ilo aer riit, ro uwaan remaron̄ ļōmņak kōn rōjan̄ eo remaron̄ leļo̧k n̄an juon likao ak jiron̄ me ej kab m̧ōj jitōn̄e n̄an karejar n̄an juon. Ekōjkan ad maron̄ “erom em̧ool ļapļo̧k im̧we im jouj ilo … jerbal in karejar in jipan̄ eo ad”?
Dallin H. Oaks, “Kajoor ko an Priesthood eo,” 65–68
N̄an jino juon ekōnono, komaron̄ je taitōl ko n̄an jekjōn ko emān in ennaan eo an Būreejtōn Oaks ioon boot eo. Innām karuwaineneik kajjojo ro uwaan n̄an riiti juon jekjōn ilo ikōņ innām je ioon boot eo juon eoon me ej ba tukadu in ennaan eo eļap an jekjōn jab eo. Innām membōr ro remaron̄ kwaļo̧k ta eo rej en̄jake eim̧we n̄an kōm̧m̧ane kōnke kōn ta eo rej riiti. Ewi wāween an jerbal in jipan̄ eo ad āinwōt rikabwijer priesthood eo ak kōrā ro ilo Doulul eo an Kōrā ro em̧m̧anļo̧k ilo ad kōjerbal katak ko ilo ennaan eo an Būreejtōn Oaks?
Russell M. Nelson, “Jerbal in Karejar kōn Kajoor im Maron̄ an Anij,” 68–75
Būreejtōn Nelson ej karuwaineneik rikabwijer ro an priesthood n̄an “jutak lōn̄ļo̧k” n̄an kōjerbal priesthood eo im kōjeraam̧m̧an ajri ro nejin Jemedwōj Ilan̄. Karuwaineneik ro uwaan doulul eo am̧ ak Doulul eo an Kōrā ro n̄an kappukōt waanjon̄ak ko ej litok im ekōnono kake ekōjkan aer jipan̄ kōj meļeļe ekōjkan an priesthood eo maron̄ kōjerbale n̄an kōjeraam̧m̧an baam̧le ko aer im ro jet. Ta en̄jake ko jemaron̄ kwaļo̧k n̄e kar kōjeraam̧m̧an kōj jān kajoor an priesthood? Ewi wāween ad maron̄ jipan̄ ro jet ak kōj make wōr tōmak n̄an kōjerbal priesthood eo an Anij n̄an “kwaļo̧k ilo etan”?
Reyna I. Aburto, “Bōro Wōt Juon,” 78–80
Ennaan eo an Sister Aburto ej letok juon iien em̧m̧an n̄an doulul eo am̧ ak Doulul eo an Kōrā ro n̄an etale ewi jon̄an an em̧m̧an ami jerbal ilo juon wōt n̄an kōm̧m̧ane jerbal eo an Irooj. N̄an jipan̄ ro uwaan kōm̧m̧ane menin, kwoj aikuj kwaļo̧k pija in irooj in babbūb ko, loļo̧k eo an Rilo̧mo̧o̧r n̄an Rinipai ro (lale Gospel Art Book, 82, 83, 84), im jerbal eo an Church humanitarian eo (lale LDS.org). Membōr ro remaron̄ etale ennaan eo im lo wāween an Sister Aburto kar kōjerbal waanjon̄ak kein n̄an katakin kōn jibadbad ko im kōjeraam̧m̧an ko an jerbal ilo juon wōt. Ta eo jemaron̄ kōm̧m̧an n̄an jerbal “bōro wōt juon”?
Henry B. Eyring, “Jetōb eo An en Pād Ippāmi,” 86–89
N̄an kōļapļo̧k ikdeelel eo ad im maron̄ eo n̄an bōk Jetōb Kwojarjar, Būreejtōn Eyring ej kwaļok jet en̄jake ko an make im letok tōl eo āinjuon. Ālkin etali en̄jake ko an, ta ememļo̧kjeņ ko reier wōt juon membōr ro an doulul eo am̧ ak Doulul e an Kōrā ro remaron̄ in kwaļo̧k n̄e Jetōb Kwojarjar eo eaar un̄ur būruweer ak kapen m̧ool eo? Bōlen membōr ro remaron̄ kōllaajrak ioon boot eo tōl eo me Būreejtōn Eyring ej kwaļo̧k n̄an jipan̄ “kōpeļļo̧k būruweer n̄an bōk jipan̄ eo an Jetōb.” Ewi wāween ļoor tōl eo an naaj jipan̄ kōj ilo mour ko ad make im ilo mour an baam̧le ko ad? Ilo doulul eo ad ak Doulul eo an Kōrā ro?
Dallin H. Oaks, “Men ko Reddik im Relam Waan,” 89–92
Ennaan eo an Būreejtōn Oaks epād ie kōkaļļe ko me rej katakin ekōjkan an men ko reddik in ļam waan maron̄ wōr juon kilaan eļap n̄an em̧m̧an ak nana. Kōkaļļe kein ekoba okar in wōjke, juon kumi in aōņōņ, riāāj to ro, im pililil in dān. Ro uwaan remaron̄ riiti kōkaļļe kein im ekōnono kōn ta eo rej katakin kōn kajoor in kōm̧m̧ani men ko reddik ļam waan ejjab m̧ūjkōk. Ta men ko reddik im ļam waan me rej bōktok kareel eo an Jetōb Kwojarjar n̄an mour ko ad? Karuwaineneik membōr ro n̄an kejekļo̧kjeņ kōn ta eo rej bwilōn̄ kake n̄an kōm̧m̧ane n̄an ļoor kapilōk eo an Būreejtōn Oaks.
Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” 93–96
Ilo ennaan eo an, Būreejtōn Nelson ej akweļap ippād n̄an kōļapļo̧k ad “maron̄ in jetōb n̄an bōk revelesōn.” N̄an jipan̄ ro uwaan ļoor tōl eo an, komaron̄ je kajjitōk ko āinwōt kein ioon boot eo: Etke jej aikuj revelesōn? Ekōjkan ad maron̄ kōļapļo̧k maron̄ eo ad n̄an bōk revelesōn—jim̧or kajjojo im āinwōt ilo ad kapilōk ippān doon? Ta kōjeraam̧m̧an ko Būreejtōn Nelson eaar kallim̧ur kaki eļan̄n̄e jenaaj kappukōt revelesōn? Ajije ro uwaan n̄an kumi ko, im karuwaineneik kajjojo kumi n̄an pukōt im kwaļo̧k uwaak ko n̄an juon iaan kajjitōk ko.
Gerrit W. Gong, “Krasit, Irooj E, Ear Jerkakbije Rainin,” 97–98
Ta eo membōr ro an doulul eo am̧ ak Doulul eo an Kōrā ro remaron̄ katak jān ennaan eo an Elder Gong kōn bujen ko ad im Pinmuur eo an Jisōs Kraist? Komaron̄ karuwaineneik ro uwaan n̄an etale ennaan eo, kappukōt kōjeraam̧m̧an ko me Pinmuur eo an Rilo̧mo̧o̧r eo im bujen ko ad—rej jerbal ippān doon—rej letok n̄an kōj. Innām ļōmņak in kajjitōk kajjitōk ko āinwōt kein kōn ta eo raar loe: Ekōjkan an bujen ko ad im Pinmuur eo jerbal ippān doon n̄an “kōmaron̄ im kōm̧anm̧anļo̧k” kōj? Ta eo rej jipan̄ kōj dāpiji wōt im kōtļo̧ke?
Ulisses Soares, “Rikanaan ro rej Kōnono kōn Kajoor in Jetōb Kwojarjar,” 98–99
Ennaan eo an Elder Soares emaron̄ im̧we kōj n̄an jerbal ilo tōmak n̄e jej en̄jake likjab ilo kōm̧m̧ane ankilan Irooj. Ewi wāween an Elder Soares bōk kaenōm̧m̧an im kallim̧ur eo ke eaar bōk kūr kāāl eo an āinwōt juon Rijilōk? Ta eo eaar katak jān en̄jake eo an jān an kar kūr āinwōt juon mijen būreejtōn? Ta eo jemaron̄ katak jān en̄jake ko an? Lelo̧k n̄an ro uwaan iien n̄an kwaļo̧k en̄jake ko ke raar en̄jake jab jeļā kōn juon men Irooj eaar kōņaan bwe ren kōm̧m̧ane. Ta eo raar kōm̧m̧ane n̄an pukōt tōmak eo n̄an bun̄ m̧aanļo̧k?
Jeffrey R. Holland, “Pād Ippāer im Kōkajoor Er,” 101–3
Ilo an ro uwaan doulul eo am̧ ak Doulul eo an Kōrā ro kar katak kōn oktak ko n̄an “pedped eo an jerbal in karejar an priesthood im Doulul eo an Kōrā ro,” ta kajjitōk ko ewōr ippāer? Ennaan eo an Elder Holland emaron̄ letok uwaak ko. Ro uwaan remaron̄ pukōt pedped ko an gospel eo me Elder Holland ej katakin rej pedped eo an oktak kein. Ta kūr ko jej loi ilo ennaan eo an? Ta kōjeram̧m̧an ko kallim̧ur kaki? Ewi wāween an wāween jerbal in karejar kein rekāāl jipan̄ kōj erom “rikaļoor ro rem̧ool an Kraist”?
Jean B. Bingham, “Jerbal in Karejar āinwōt Rilo̧mo̧o̧r ekar Kōm̧m̧ane,” 104–7
Ilo ennaan eo an, Sister Bingham ej karuwaineneik kōj n̄an kajjitikin kōj make kajjitōk ko me remaron̄ tōl kijejeto in jerbal in karejar ko ad. Ro uwaan remaron̄ ekōnono kōn ekōjkan an kajjitōk kein maron̄ tōl kijejeto ko aer innām kappukōt uwaak ko n̄an kajjitōk eo an Sister Bingham, “Kōn menin ewi kōjellin [jerbal in karejar eo]?” Komaron̄ joļo̧k iien im etale jet iaan waanjon̄ak ko Sister Bingham ej kwaļo̧k an kajjojo jerbal in karejar im karuwaineneik ro uwaan n̄an kwaļo̧k waanjon̄ak ko aer make. Ta eo jej loe ilo ennaan eo an Sister Bingham me ej kōļapļo̧k meļeļe eo ad kōn etke im ekōjkan ad kwaļo̧k?
Dieter F. Uchtdorf, “Lo Armej eo!,” 107–10
Ewi wāween ad jipan̄ juon meļeļe bwe en̄taan in pinmuur eo im Jerkakpeje eo an Jisōs Kraist rekar iien ko raorōk tata ilo bwebwenato an laļ in? Karuwaineneik ro uwaan n̄an kejekļo̧kjeņ kōn kajjitōk in ilo aer riiti jidik in ennaan eo an Elder Uchtdorf. Ta ko rej loi me enaaj jipan̄ kōmeļeļeik etke iien kein rej lukkuun in aorōk n̄an er? Ākin ekōnono in, ro uwaan kūlaj eo remaron̄ kōnono kōn ta meļeļe in n̄an er n̄an “lo armej eo.” Ekōjkan ad kar katak n̄an “lo armej eo”?
Quentin L. Cook, “Maanjāppopo n̄an iioon Anij,” 114–17
Komaron̄ jino ekōnono eo am̧ kōn ennaan an Elder Cook kōn kūr juon uwaan n̄an ba ilo tukadu in jepļaaktok eo an kii ko an priesthood eo ilo Kirtland Tampeļ. Ekkar n̄an ennaan eo an Elder Cook, ta eddo ko an kar Kabun̄ in me reiookļo̧k kii kein? Ewi wāween an eddo kein waļo̧k ilo Kabun̄ in rainin? Je naan ko mour jim̧we, ippān doon, im jon̄an wōt juon ioon ioon boot eo, im kajjitōk ippān ro uwaan n̄an kwaļo̧k ļōmņak ko rej būki kōn kajjojo pedped kein jān ennaan eo an Elder Cook. Ekōjkan an pedped kein jipan̄ kōj kakūrm̧ool eddo ko rekwojarjar an Kabun̄ in.