Kaua n Tabati Bootaki
N te kaua n Tabati ni katoa namwakaina, kooram n unimwaane ao n te Bootaki n Aine ana maroroakina atun te reirei ae rineaki man te Moan Beretitentii ao te Kooram n Abotoro n te Tengaun ma Uoman. Atun te reirei n te kaua n Tabati ana bane ni manga rinanoaki imwiin maungatabu ni kabuta. Ma ngkai ni karokoa te maungatabu ni kabuta are imwiina, e na bwainaki atuun te reirei bwa te “Mwakuri n Ibuobuoki nakoia Tabeman.” Ni katoa namwakaina, mataniwi ao taan reirei ana kona ni kairii marooro iaon teuana te reirei aikai ae kaineti ma te ibuobuoki.
Tera ae nanonaki bwa ko na ibuobuoki?
Tera ae nanonaki n te mwakuri n ibuobuoki nakoia membwa n am uoote ke n am mwaanga? Kakaeana, ko kona ni korea Mwakuri n ibuobuoki iaon te burakibooti ao kaoia membwa bwa ana koroi taeka ni katobibia ake a irekereke ma te ibuobuoki. A kona membwa ni kakai taeka ke mwakoro n taeka ni karin nakon taeka man booki aika tabu n aron aikai: Mataio 25:34–40; Ruka 10:25–37; 2 Nibwaai 25:26; Motiaea 18:8–9; 3 Nibwaai 18:25; ao Reirei ao Berita aika Tabu 81:5. Tera ae ti reiakinna man kiibu aikai iaon taekan te ibuobuoki? Ko kona n tuangia membwa bwa ana tibwauai katooto n te ibuobuoki ae a tia n noori. Ana kanga ara ibuobuoki ni buoki kainnanoia aomata n tamneia ao n rabwataia? E na kanga ni buokia aomata ni kaniia riki ma Kristo?
Te Tia Kamaiu bon ara banna ni katooto ae kororaoi n te mwakuri n ibuobuoki.
N reiakinna bwa ko na kanga ni karaoa te ibuobuoki ae nakoraoi, a kona membwa n tibwaua aia karaki man booki aika tabu are e karaoa naba iai te ibuobuoki te Tia Kamaiu nakoia tabeman—a kona n reke tabeua katooto n Ioane 4–6 ao Mareko 2:1–12. A kona membwa n tibwaua te bwai ae kakorakoraia man taian karaki aikai ao tera reirei ae a reiakin iaon taekan te mwakuri n ibuobuoki. Te katooto, e kanga te Tia Kamaiu ni karaoa oin Ana ibuobuoki nakoia tabeman? E kanga ni kaitarai kainnanoia aomata n tamneia ao n ni kainnanoia naba n rabwataia? A kona membwa n tibwauai taai ngkana a tia n noria aomata ni kabonganai reirei aikai ni karaoa te mwakuri n ibuobuoki.
Te mwakuri n ibuobuoki e kaungaki man ana tangira Kristo.
Ni ukoukora mwakan te mwakuri n ibuobuoki ae kaungaki man ana tangira Kristo, ko kona ni koroi titiraki aikai iaon te burakibooti ao kaoia membwa bwa ana iangoi kawai ni kanoai taabo ake akea kanoaia: Ngkana I tangiriia ni koaua aomata aika I beku ibukiia, I . Ngkana I beku N iai bukina riki tabeua, I . Tera ae ti kona ni karaoia ni kakoaua bwa ara mwakuri n ibuobuoki nakoia tabeman e kaungaaki man ana tangira Kristo? Ti na kanga ni karikirakea ana tangira Kristo ibukiia naake ti mwiokoaki irouia bwa ti na karaoa te mwakuri n ibubuoki ibukiia? (taraa Moronaai 7:46–47). Tao a kona membwa n tibwauai aia katooto n te mwakuri n ibuobuoki are e kairaki mai ieta man ana tangira Kristo.
Te Atua e tangiriia ni kabane Natina bwa ana tararuaaki raoi ao n tabeakinaki.
E taku Beretitenti Russell M. Nelson, “Rianakon tamaroan ana Ekaretia te Uea ae koaua ao ni maiu bon te mwakuri ae e na baireaki, ao ni kaetaki n tainako, ni karaoa te mwakuri n ibuobuoki nakoia natin te Atua n tatabemania ao aia utu” (“Mwakuri n ibuobuoki ma Mwaakan ao ana Kariaia te Atua,” Riaona, Meei 2018, 69.). Tera ae reirei Beretitenti Nelson bon kawai tabeua aika “barongaki, kairaki” are e na buokiira iai te Ekaretia n tabeakiniia n tatabemaniia? Bukin tera mwakuri aikai “a kaota aron nakoraoin ana Ekaretia ae koaua ao ni maiu te Uea”? (taraa Motiaea 18:21–22 ao Moronaai 6:4–6 ibukin iango riki tabeua). Tera kakabwaia aika a tia n roko nakon maiura ke ni maiuia tabeman bukina bwa aomata a ibuobuoki n aia wewete n te Ekaretia ke ni mwiokoaia?
Kakawakin taian tamnei e korakora i matan te Atua.
Aia taneiai natin Motiaea mwaane e kabwarabwara bwa te kawai are ti taraia iai aomata a rota aron ara ibuobuoki nakoia. Ko kona ni koreia iaon te burakibooti A kanga Nibwaite n noriia Reimwanaite ao A kanga natin Motiaea mwaane n noriia Reimwanaite. Ngkanne kaoia membwa bwa ana ukoukora Motiaea 28:1–3 ao Aramwa 26:23–26 ni ukoukori taeka ao kibun taeka ni koroi iaan rongorongo aikai. Tera ae reireiniira te kabotau aei n aron te kawai are ti taraia aomata n rota te kawai ae ti ibuobuoki nakoia? Ti na kanga n reiakinna n noria aomata aika mwaiti riki n aron ae nori te Atua? (taraa R&B 18:10–16).
Te mwakuri n ibuobuoki ni koaua e tarai kainnanoia tabeman.
Ni buokiia membwa bwa ana ataa riki aron kakawakin kabanean aia iango iaon kainnanoia tabeman ngkana ti ibuobuoki, ko kona ni kabotaua te mwakuri n ibuobuoki nakon te angaanga ao karekean bwaintangira. Ti a tia ni karekea te bwaintangira ae uaana mairoun temanna ae ata raoi te bwai ae ti kainnanoia ke n tangiria? E kanga te mwakuri n ibuobuoki n ti tebo ma te anga te bwaintangira ae ko a tia n iangoia raoi? Iangoia ni maroroakin karaki man te maungatabu ni kabuta ae tibwa nako are e kabwarabwara aroia aomata ni karaoa te ibuobuoki nakon kainnanoia tabeman (taraa, te katooto, Jean B. Bingham, “E Karaoa te Mwakuri n Ibuobuoki n aron ae e karaoia te Tia Kamaiu,” Riaona, Meei 2018). A kona membwa n tibwauai karaki tabeua are e kamataata te reirei aei.
Ti na kanga ni kona n reiakin kainnanoia tabeman? Kaoia membwa n tatabemaniia ni koroi araia tabeman aomata ake a buokiia. Irarikin aara ni kabane a kona ni korea te kaeka nakon te titiraki “Tera ae kainnanoia te aomata aei bwa e aonga ni kaan riki nakon Kristo?” Ngkana e riai, kaungaia membwa bwa ana karin otenanti ae a kainnanoia aomata ni karekei. Kaoia membwa bwa ana teimatoa n iangoa te titiraki aei ao n ukoukora te kairi mai ieta ni buokiia ni buoki kainnanoia tabeman.
Te Uea e tangiria bwa ti na butimwaea te mwakuri n ibuobuoki mai irouia tabeman.
E taku Unimwaane Robert D. Hales: “Ana babaire te euangkerio e kainnanoa te angaanga ao te anganaki. … Naake a kaitara ma te kakaitara n tainako ana taekina: I kona ni karaoi kainnanou bon Irou,’ … ‘I kona n tararuai bon irou.’ E taekinaki bwa akea ae rangin ni kaubwai ae na aki kainnanoa ana ibuobuoki temanna, akea ae rangin ni kainnano bwa te aomata anne e aki kona ni kakawaki ni kawai tabeua nakoia raoraona. Te katei ni bubuti ibukin te ibuobuoki mairouia tabeman ma te koaua, ao ni karaoia ma te akoi, e riai n riki bwa mwakoron aron kateira” (“Ti Aki Kona Ni Karaoia Ti Iroura,” Ensign, Nobembwa 1975, 91, 93). Bukin tera n tabetai ti rawa ni butimwaea te ibuobuoki mairouia tabeman? A kanga nanora ni kan buokiia tabeman ni kakabwaiaia naake ko beku ibukiia? Anganiia membwa tabeua te tai bwa ana iangoi kawai ae a na kona iai ni karekea buokaia tabeman. Tera ae taekinaki n 1 I-Korinto 12:13–21 ae kaotia bwa bukin tera ti kainnanoira?
A mwaiti kawai aika ti kona n ibuobuoki iai nakoia tabeman.
Ni buokiia membwa bwa ana iangoi kawai aika mwaiti aika ti na kona n ibuobuoki iai imarenara, ko kona ni kaoia bwa ana rinanon ana rongorongo Unimwaane Jeffrey R. Holland “N Raoniia ao ni Kakorakoraia” (Riaona, Meei 2018, 101–3; taraa naba “Reirei n te Mwakuri n Ibuobuoki” inanon te Riaona). A kona membwa n tibwauaki inanon kurubu aika uarereke, ao kurubu aikanne a kona n iangoi taabo tabeua ae na kainnanoa iai te ibuobuoki te aomata. A kona ni waekoa n iangoi kawai aika a kona aomata n ibuobuoki nakon kainnano n tamnei ao n rabwata n tatabemaniia n te tabo anne. Tuangiia kurubu bwa ana tibwauai aia iango ao n iangoia bwa iango aika tia ni maroroakinaki a kona ni kakabwaiaia aomata aika buokiia.