Te Kauoua- ao te Kateniua n Tabati ni Bowi
N te Kauoua ao te Kateniua n Tabati ni katoa namwakaina, kooram n unimwaane ao Bootaki n Aine ana anga reirei man aia reirei mataniwi n te Ekaretia man te maungatabu ni kabuta ae tibwa nako. E riai ni kanakoaki kamatatakina n aia rongorongo kaain te Moan ni Beretitentii ao te Kooram n Abotoro n te Tengaun ma Uoman. E ngae n anne, ni boboto iaon kainnanoia kain te tabo ao kairi mairoun te Tamnei, te rongorongo man te maungatabu ae tibwa nako a na kona ni maroroakinaki.
N angiin te tai, te kooram n unimwaane ke te beretitentii n te Bootaki n Aine e na rinea te rongorongo man te maungatabu ae na kamatebwaiakaki ae boboto iaon kainnanoia membwa, e ngae ngke te bitiobi ke te beretitenti n te titeiki a anga aia taeka. A kona mataniwi n rinea te rongorongo ae kaineti ma atuun te reirei ae maroroakinaki n ni bowin te kauntira n te Moan Tabati, ke a kona n rinea atuun te reirei ae kaokoro, ae boboto iaon ana kairi te Tamnei.
A riai mataniwi ao taan reirei ni kakaai kawai ae ana kaungaia membwa ni wareka te rongorongo are e rineaki imwain taina ao n roko n tauraoi n tibwauai koaua n te euangkerio ao iango bwa ko na kanga ni karaoi nanoia. Iango n anga reirei aika oti inano, aika a boboto iaon reirei n ana kawai n Anga Reirei te Tia Kamaiu, a kona ni buokiia membwa n reirei man rongorongo n te maungatabu ni kabuta.
M. Russell Ballard, “Bwiantangira aika Kakawaki mairoun te Atua,” 9–11
Ana rongorongo Beretitenti Ballard e taekin reirei aika kakaokoro—n raonaki ma burabeti, te onimaki iroun Kristo, te toa, ao te ibuobuoki—ao kaain ami kooram ke te Bootaki n Aine a kona ni kakaea atuun te reirei ae kaokoro riki ae iai nanona. Kaoia membwa bwa ana tibwaua te bwai teuana man te rongorongo are a rotaki nanoia iai. Tera kakao ke kakabwaia ake a tia ni beritanaki aika ti karekei n ana rongorongo Beretitenti Ballard? Iangoia ni kaoia membwa bwa a na iango tabeua te miniti bwa tera ae a tia n namakinna ae ana karaoia imwiin te marooro aei.
Gary E. Stevenson, “Buroon te Burabeti,” 17–20
Ni buokiia membwa “n ataa kakawakin” weteakin te burabeti ae boou, ko kona ni kaoia membwa bwa ana ukoukora ana rongorongo Unimwaane Stevenson, n ukoukori koaua ao atatai aika a nano are e na buokiia n ataa kakawakin ao mimitongin te kawai mai ieta aei. Iangoia ni kaoia membwa bwa ana tibwaua te bwai ae a namakinna n tain te nebonebo ae mimitong aei are e a kamatoaki iai Beretitenti Nelson bwa ana Beretitenti te Ekaretia. Ko kona ni korea naba tamnein te buroo iaon te burakibooti ao tuangiia membwa bwa ana koreia inanona taeka ke kibu n taeka are e kabwarabwara te buroo ao katein Beretitenti Nelson. Tera ae e a tia n iangoia ae a tia ni kakabwaiaira?
Neil L. Andersen, “Ana Burabeti te Atua,” 24–27
Maroroakinan ana rongorongo Unimwaane Andersen e kona ni kakorakorai aia onimaki membwa irouia burabeti aika maiu. Ko kona ni kaoia bwa ana ukoukora ana rongorongo ibukin te bwai ae na buokiia n ataia bwa bukin tera iai ana burabeti te Atua iaon te aba ao bukin tera ti irii. Ti kanga n tia ni kakabwaiakaki bukina bwa iai ara burabeti? A kona membwa n tibwauaia bwa a kanga n tia ni karekea te kakoaua bwa Beretitenti Russell M. Nelson bon ana burabeti te Uea ao te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira.
David A. Bednar, “Nimamannei man Nanorinano Inanoia,” 30–33
Bwa e na kairaki mai ieta te marooro iaon ana rongorongo Unimwaane Bednar, ko na koreia iaon te burakibooti Nimamannei bon … ao Nimamannei bon tiaki … A kona membwa n ukoukora ana rongorongo Unimwaane Bednar ao ni koroia iaon te burakibooti taeka aika a kunei aika a na katabwanin rongorongo aikai. Tera ae ti reiakinna man te rongorongo aei are e kaungaira bwa ti na rangin n nimamannei? Tera katooto n te nimamannei ae ti kona n iangoia? Ti na kanga ni kona n irii ana reirei Unimwaane Bednar n riki n nimamannei riki?
Bonnie L. Oscarson, “Ataeinnaine n te Mwakuri,” 36–38
Titiraki bon te kawai teuana ibukin karekean te iango. Iangoia ni koroi iaon te burakibooti tabeua titiraki are e kaekai tabeua titiraki n ana rongorongo Titita Oscarson, n aron ae Ti na kanga ni karekerekeia ataeinnaine n ana mwakuri te Uea? Kaoia membwa bwa ana ukoukora ana rongorongo ibukin kaeka nakon titiraki aikai ao maroroakina te bwai ae a reiakinna. Tera kakabwaia aika a na roko ngkana a irekereke ataeinnaine ma te ibuobuoki? Tao a kona kaain te kiraati n tibwauai taneiai ae a tia ni karekei n aia ibuobuoki ma ataeinnaine. E boboto iaon ara marooro, tera ae ti namakinna bwa ti tangiria ni kani karaoia?
Dale G. Renlund, “Rongorongon te Utu ao te Mwakuri n te Tembora: Te Kabaebae ao te Kamaiu,” 46–49
Unimwaane Renlund e taekina miin Etekiera n te tembora ma te ran ae raanga nako mai iai (taraa Etekiera 47:8–9). Tao e kona temanna kaain te kooram ke te Bootaki n Aine ni korea tamnein te mii aei iaon te burakibooti. A kanga kakabwaia n te tembora ao n te mwakuri n rongorongon te utu n riki n aekan te ran aei ni miin Etekiera? Ko na bae ni kaoa kaain te kiraati bwa e na tibwaua ana kakabwaia n te tembora ao n te mwakuri n rongorongon te utu ae a tia n rinanona. Ti na kanga ni karika te mwakuri n rongorongon te utu ao n te tembora bwa mwakoron maiura n tainako?
D. Todd Christofferson, “Te Kooram n Unimwaane,” 55–58
Inanon te kooram n unimwaane, ko na kaoia kaain te kooram bwa ana wareka mwakoron ana rongorongo Unimwaane Christofferson ae atunaki n ae “Te Kantaninga n Taian Bitaki Aikai.” Tera ae ti kona ni karaoia ni kakoaua bwa ti kakoroi bukin kaantaninga aikai? Inanon te Bootaki n Aine, ko kona n titirakina temanna bwa e na taekinna ni kakimototoa taekan bitaki nakon te kooram n te Nakoanibonga ae te Merekitereka n aron are e kabwarabwara Unimwaane Christofferson. A kona ngkanne aine ni kinai reirei aika kabonganaaki ni bitaki aikai aika kona ni kabonganaaki nakon ami Bootaki n Aine. A kona kaain te kooram n unimwane ke te Bootaki n Aine, ni maroroakina te bwai ae a tia n reiakinna man ana karaki te Tari Goates ao a kanga ni kabonganaaki n aia mwakuri.
Ronald A. Rasband, “Noria! Ana Taanga ni Buaka te Uea,” 58–61
Tao anenea, kakauongo nakon, ke wareka taekan “Noria! Ana Taanga ni Buaka te Uea” (Anene, nambwa. 251) ni kabane ana kaungaa te marooro iaon ana marooro Unimwaane Rasband. A kanga kooram n te nakoanibonga ao te Bootaki n Aine n riki kanga ana taanga ni buaka te Uea? A kona naba membwa n tarataraia ao ni maroroakin “kakabwaia aika mwaiti” Unimwaane Rasband e taekinna bwa e na roko man manga bairean te kooram n te nakoanibonga. Tera riki kakabwaia aika ti a tia ni karekei—ke iai ara kantaninga ni karekei—man karaoakin bitaki aikai? Ana kanga Bootaki n Aine ni karekei riki kakabwaia n aron “kakaokoron bwai n tituaraoi” ao te “tia reirei”?
Henry B. Eyring, “Te <wakuri n Ibuobuoki ae Kairaki Mai Ieta,” 61–64
Beretitenti Eyring e taekin uoua taetae n te bootaki n toa iaon te ibuobuoki are e kakukureia nanona. Ko kona n tuangiia iteran te kooram ke kaain te Bootaki n Aine n rinanon ana taeka te ataeinimwaane ae 14-ana ririki ao iterana are teuana n rinanon karakinan te tia reirei n te mweenga. Ngkai a wareware, a kona membwa n iangoa te kaetieti ae ana angan te ataeinnaine are e tibwa rineaki ni buoka temanna. Ti na kanga “ni kairaki riki mai ieta ao n tangira n ara … ibuobuoki n te mwakuri n ibuobuoki”?
Dallin H. Oaks, “Mwakan te Nakoanibonga,” 65–68
Ni moana te marooro, ko kona ni korei atuun tiekition ake aua n ana rongorongo Beretitenti Oaks iaon te burakibooti. Ngkanne kaoia membwa n tatabemaniia bwa ana wareka te tiekition teuana ni karaurau ao imwiina koroia iaon te burakibooti teuana te tiententi are e kakimototoa boton te rongorongo n te tiekition anne. A kona ngkanne membwa n tibwaua te bwai ae a namakinna mai ieta ae ana karaoia ibukin te bwai ae a warekia. E na kanga ara Ibuobuoki n te nakoanibonga ke aine n te Bootaki n Aine n nakoraoi ngkana ti kabongana te reirei n ana rongorongo Beretitenti Oaks?
Russell M. Nelson, “Te Mwakuri n ibuobuoki ma te Mwaaka ao te Kariaiakaki iroun te Atua,” 68–75
Beretitenti Nelson e kaoia kaain te nakoanibonga bwa ana “teirake” ao ni kabongana te nakoanibonga ni kakabwaiaia natin te Tama are i Karawa. Kaoia kaain am kooram ke te Bootaki n Aine ni ukoukori katooto ake e anga ao maroroakinna bwa a kanga ni buokiira n ataia bwa e na kanga te nakoanibonga ni kabonganaki ni kakabwaiai aia utu ao tabeman. Tera taneiai aika ti kona n tibwauai ngkana ti a tia ni kakabwaiaki man mwaakan te nakoanibonga? Ti na kanga ni buokiia tabeman ke bon ngaira ni karekea te onimaki ni kabongana ana nakoanibonga te Atua ni “buokiia n Arana”?
Reyna I. Aburto, “Ma te Nano ae ti Teuana,” 78–80
Ana rongorongo Titita Aburto e karekea te tai ibukin am kooram ke te Bootaki n Aine n rinanona bwa ko kanga ni karaoa ana mwakuri te Uea n te katiteuanaki. NI buokaia membwa bwa ana karaoa aei, kaoti tamneia manibwebwe aika korakora, mwanangan te Tia Kamaiu nakoia Nibwaite (taraa Gospel Art Book, 82, 83, 84), ao ana mwakuri ibukiia ana aomata te Ekaretia (taraa LDS.org). A kona membwa n ukoukora te rongorongo ao ni kunea bwa e kanga Titita Aburto ni kabonganai katooto aikai n reirei taekan taian kantaninga ao kakabwaia n te katiteuanaaki ni mwakuri. Tera ae ti kona ni karaoia “ma te nano ae ti teuana”?
Henry B. Eyring, “Bwa E na Memena Tamneina Iroum,” 86–89
Ni kakorakora nanora ao ara konabwai ni karekea te Tamnei ae Raoiroi, Beretitenti Eyring e tibwauai tabeua ana taneiai ao n anga kaetieti aika onoti. Imwiin rinanoan ana taneiai, tera ururing ae aekan aikanne ae a kona membwa n am kooram ke te Bootaki n Aine n tibwauaia ngke a riingaki nanoia ma te Tamnei ae Raoiroi ke koaua aika kamatoaki? A kona membwa n karinani iaon te burakibooti te kairi are e tibwauaia Beretitenti Eyring ni buokia ni “kauki nanora ni karekea ana ibuobuoki te Tamnei.” E kanga irakin ana kaetieti ni buokira ni maiura ao n ara utu? n ara kooram ke n te Bootaki n Aine?
Dallin H. Oaks, “Bwaai aika Uarereke ao ni Bebete,” 89–92
Ana rongorongo Beretitenti Oaks iai inanona kabotau are e reirei bwa a kanga bwaai aika uarereke ao ni bebete n iai mwiia aika korakora ibukin ae raoiroi ke ae buakaka. Kabotau aikai iai inanona wakaa ni kai, tiim ni bwenarina, robu, ao te ran ae mwaitorotoro. A kona membwa ni wareki kabotau aikai ao ni maroroakina te bwai ae anga reirei iaon taekan mwakan teimatoan karaoan bwaai aika uarereke man bebete. Tera bwaai aika uarereke man bebete are e uota ana kairoro te Tamnei ae Raoiroi nakon maiura? Kaoia membwa bwa ana iangoa te bwai ae a tangiria ni karaoia n ira ana reirei Beretitenti Oaks.
Russell M. Nelson, “Te Kaotioti ibukin te Ekaretia, Te Kaotioti ibukin Maiura,” 93–96
N te rongorongo aei, Beretitenti Nelson e bubuti ma ngaira ni karikirakea ara “konabwai ni karekea te kaotioti.” Ni buokia membwa bwa ana ira ana kaetieti, ko kona ni koroi titiraki n aron aikai iaon te burakibooti: Bukin tera ti kainnanoa te kaotioti? Ti na kanga ni kakorakora ara konabwai ni karekea te kaotioti—n tatabemaniira ao ngkana ti botaki n reirei? Tera taian reirei ae e a tia ni beritanna Beretitenti Nelson ngkana ti na ukoukora te kaotioti? Tibwauaia membwa nakon uoua te kurubu, ao kaoia kurubu n tatabeua nako bwa ana tibwauai kaeka nakon teuana te titiraki.
Gerrit W. Gong, “Kristo te Uea e a Uti n te Bong Aei,” 97–98
Tera ae a kona n reiakinna membwa n am kooram ke te Bootaki n Aine man ana rongorongo Unimwaane Gong iaon ara berita aika tabu ao Ana Mwakuri ni Kamaiu Iesu Kristo? Ko kona ni kaoia membwa bwa ana ukoukora te rongorongo, ukeri kakabwaia n ana Mwakuri ni Kamaiu ao ara berita aika tabu—ni uaia ni mwakuriia—n aron are e a tia n anganiira. Imwiina iangoia n titiraki n titiraki n aron aikai iaon te bwai ae a kunea: A kanga ara berita aika tabu ao te mwakuri n te Mwakuri ni kamaiu ni uaia ni mwakuri ni “kariaia ao ni karine” ira? Tera ae a karaoia bwa ana buokira n taua ao ni kanakoa?
Ulisses Soares, “Burabeti a Taetae man Mwaakan te Tamnei ae Raoiroi,” 98–99
E kona ana rongorongo Unimwaane Soares ni kaungaira ni mwakuriia n te onimaki ngkana ti namakinna bwa tiaki tau ni karaoa ana kantaninga te Uea. E kanga Unimwaane Soares ni karekea te mwengaraoi ao te koaua ngke e karekea ana wewete ae boou bwa te Abotoro? Tera ae reiakinna man ana taneiai ni weteana bwa te beretitenti n te mition? Tera ae ti kona n reiakinna man ana taneiai? Anganiia membwa aia tai n tibwauai aia taneiai ngke a namakina te aki koaua n te bwai are e tangiria te Uea bwa ana karaoia. Tera ae a karaoia ni kakaea te onimaki bwa ana waaki nako?
Jeffrey R. Holland, “Raonia ao ni Kakorakoraia,” 101–3
Ngkai kaain am kooram ke te Bootaki n Aine a reiakin taekan bitaki nakon “te iango n te ibuobuoki n te nakoanibonga ao te Bootaki n Aine,” tera titiraki aika iai irouia? Ana rongorongo Unimwaane Holland e kona ni karekei kaeka. A kona membwa ni kakaai reirein te euangkerio ake e reirei Unimwaane Holland bwa ngaia bon aan raoi bitaki aikai. Tera kakao aika ti kunei n ana rongorongo? Tera berita ake a tia ni beritanaki? A kanga kawai n ibuobuoki aika boou aikai ni buokiira n riki bwa ana “reirei ni koaua Kristo”?
Jean B. Bingham, “Mwakuri n Ibuobuoki n Aron ae Karaoia te Tia Kamaiu,” 104–7
N ana rongorongo, Titita Bingham e kaoira bwa ti na titirakiniira n titiraki aika a na kona ni kairi ara mwakuri ibuobuoki. A kona membwa ni maroroakinna bwa a kanga titiraki aikai ni kona ni kairi aia mwakuri ao ni kakaai kaeka nakon ana titiraki Titita Bingham, “Ngaia ae e kanga tarakin te [mwakuri n ibuobuoki]?” Ko na bae ni kabanea te tai n rinanon tabeua katooto aika e tibwauai Titita Bingham iaon te ibuobuoki irouia n tatabemaniia ao kaoia membwa bwa ana tibwauai oin aia katooto. Tera ae ti kunea n ana rongorongo Titita Bingham are e karikirakea otara bwa bukin tera ao ti na kanga n ibuobuoki?
Dieter F. Uchtdorf, “Noria te Aomata!,” 107–10
Ti na kanga ni buoka temanna bwa ana anga karea ni kamaiu ao Mangautin Iesu Kristo bon bwaai aika riki aika moan te kakawaki n rongorongon te aonaaba? Kaoia membwa bwa ana iangoa te titiraki aei ngkai a wareki mwakoron ana rongorongo Unimwaane Uchtdorf. Tera ae a kunea ae na buokia ni kabwarabwara bwa bukin tera a rangin ni kakawaki taai aikai nakoia? Imwiin te marooro aei, a kona kaain te kiraati n taekinna bwa tera nanon “noria te aomata” nakoia Ti kanga n tia n reiakina “noria te aomata”?
Quentin L. Cook, “Katauraoi n Noora te Atua,” 114–17
Ko kona ni moana am marooro iaon ana rongorongo Unimwaane Cook man kaoakin te membwa bwa e na kabwarabwara ni kakimototoa kaokan kiing n te nakoanibonga n te Kirtland Tembora. Ni kaineti ma ana rongorongo Unimwaane Cook, tera taben te Ekaretia ake a irekereke ma kiing aikai? A kanga mwakuri aikai ni kaotaki inanon te Ekaretia n te bong aei? Koroi taeka te raoiroi, katiteuanaki, ao ti tebo iaon te burakibooti, ao tuangiia membwa bwa ana tibwauai aia atatai aika nano ae a karekea iaon taekan reirei aikai man ana rongorongo Unimwaane Cook. A kanga reirei aikai ni buokira ni kakoroi nanon taben te Ekaretia aika tabu?