Dagiti Miting itiMaikapat a Domingo

Iti maikapat a Domingo ti tunggal bulan, paglilinnawagan dagiti elders quorum ken Relief Society ti maysa a topiko a pinili ti Umuna a Panguluen ken ti Korum dagiti Sangapulo-ket-dua nga Apostol. Ma-update dagitoy a topiko kalpasan ti tunggal sapasap a komperensia. Manipud ita agingga iti sumaruno a sapasap a komperensia, ti topiko ket “Ministering kadagiti Dadduma.” Tunggal bulan, mabalin a pilien dagiti lider wenno mannursuro ti mangidaulo kadagiti panaglilinnawag iti ania man kadagiti sumaganad a pagbatayan a mainaig iti ministering.

Para kadagiti nayon a resources a mangsuporta kadagiti panaglilinnawag maipapan iti ministering, kitaen iti ministering.lds.org ken kadagiti artikulo iti “Ministering Principles” kadagiti masakbayan nga isyu ti Liahona.

Ania ti kaipapanan ti agminister?

Ania ti kayat a sawen ti ministering kadagiti miembro ti ward wenno branchmo? Tapno maammuan, mabalinmo nga isurat ti Ministering iti pisarra ket kalpasanna awisem dagiti miembro a mangisurat kadagiti balikas iti lawlaw daytoy nga adda pakainaiganda iti ministering. Mabalin a sapulen dagiti miembro dagiti balikas wenno ragup dagiti balikas a mangnayon iti listaan manipud kadagiti nasantuan a kasuratan a kas iti sumaganad: Mateo 25:34–40; Lucas 10:25–37; 2 Nephi 25:26; Mosiah 18:8–9; 3 Nephi 18:25; ken Doktrina ken Katulagan 81:5. Ania ti masursurotayo manipud kadagitoy a bersikulo maipapan iti ministering? Mabalinmo a kiddawen kadagiti miembro a mangibinglay kadagiti pagarigan ti ministering a nakitadan. Kasano a makatulong ti ministeringtayo a mangipaay kadagiti naespirituan ken temporal a kasapulan? Kasano a makatulong daytoy kadagiti tao nga ad-adda nga umasideg ken ni Cristo?

Ti Mangisalakan ti naan-anay a pagwadantayo iti ministering.

Tapno masursuro ti maipapan no kasano ti agminister a sisasamay, mabalin dagiti miembro ti mangibinglay kadagiti estoria manipud kadagiti nasantuan a kasuratan a nakapagserbian ti Mangisalakan kadagiti dadduma—masarakan ti sumagmamano a pagarigan iti Juan 4–6 ken Marcos 2:1–12. Mabalin dagiti miembro ti mangibinglay no ania ti makaawis iti riknanda maipapan kadagitoy nga estoria ken no ania dagiti pagbatayan a masursuroda maipapan iti ministering. Kas pagarigan, kasano nga inyaplikar ti Mangisalakan ti panagserbina kadagiti dadduma? Kasano nga impaayna dagiti naespirituan a kasapulan kasta met dagiti temporal a kasapulan dagiti tao? Mabalin dagiti miembro ti klase ti mangibinglay iti panawen idi nakitadan dagiti tao a nangusar kadagitoy a pagbatayan iti panagserbida.

Ti ministering ket paregtaen ti ayat a kas ken ni Cristo.

Tapno agsukisok iti bileg ti ministering a pinaregta ti ayat a kas ken ni Cristo, mabalinmo nga isurat dagiti sumaganad a binatog iti pisarra ket awisem dagiti miembro a mangisingasing kadagiti wagas a mangpunno kadagiti blangko: No sipupudno nga ay-ayatek dagiti tao a pagserbiak, Siak . No agserbiak para iti dadduma pay a gapu, Siak . Ania ti maaramidtayo tapno mapennek a ti panagministertayo kadagiti dadduma ket paregtaen ti ayat a kas ken ni Cristo? Kasano a mapadur-astayo ti ayat a kas ken Cristo para kadagiti tao a naidutok kadatayo a pagserbian? (kitaen iti Moroni 7:45–48). Nalabit a mabalin nga ibinglay dagiti miembro dagiti pagarigan ti ministering a pinaregta ti ayat a kas ken ni Cristo.

Kayat ti Dios a mabantayan ken maaywanan ti amin nga annakna.

Kinuna ni Presidente Russell M. Nelson, “Ti sagudayen ti pudno ken sibibiag a Simbaan ket kanayonto nga agbalin a naurnos, naiturong a panagkagumaan nga agserbi iti tunggal maysa kadagiti annak ti Dios ken dagiti pamiliada” (“Ministering with the Power and Authority of God,” Liahona, Mayo 2018, 69.). No ania ti isuro ni Presidente Nelson ket sumagmamano a “naurnos, masinunuo” a wagas a pakatulongan ti Simbaan kadatayo a nasaysayaat a mangaywan kadagiti indibidual? Apay a dagitoy a panagkagumaan ti “sagudayen ti pudno ken sibibiag a Simbaan ti Apo”? (kitaen iti Mosiah 18:21–22 ken Moroni 6:4–6 para iti sumagmamano a kapanunotan). Ania dagiti bendision a sumangbay iti panagbiagtayo wenno iti biag dagiti dadduma gapu ta nagserbi dagiti tao kadagiti takem wenno naidutok nga aramidenda iti Simbaan?

Napateg dagiti kararua iti imatang ti Dios.

Dagiti padas dagiti annak a lallaki ni Mosiah ti mangiladawan a ti wagas a panangkitatayo kadagiti tao ket mangapekto iti no kasano ti panagserbitayo kadakuada. Mabalinmo nga isurat iti pisarra ti Kasano a nakita dagiti Nephite dagiti Lamanite ken Kasano a nakita dagiti lallaki nga annak ni Mosiah dagiti Lamanite. Kalpasanna awisem dagiti miembro a mangsukisok iti Mosiah 28:1–3 ken Alma 26:23–26 a mangsapul kadagiti balikas ken ragup ti balikas nga isurat iti babaen ti tunggal maysa kadagitoy a palawag. Ania ti isuro kadatayo daytoy panangidasig maipapan no kasano ti wagas a panagministertayo ket mangapekto iti wagas a panagserbitayo kadakuada? Kasano a masursurotayo a mangkita kadagiti tao nga ad-adda pay kas iti panangkita ti Dios kadakuada? (kitaen iti DkK 18:10–16).

Ipamaysa dagiti pudno a minister dagiti kasapulan dagiti dadduma.

Tapno matulongan dagiti miembro a maawatanda a nasaysayaat ti pateg ti panangipamaysa kadagiti kasapulan dagiti dadduma kabayatan ti panangministertayo, mabalinmo nga idilig ti ministering iti panangted ken panangawat kadagiti sagut. Nakaawattayo kadin iti maysa a napateg a sagut manipud iti maysa a tao a silalawag nga ammona no ania ti kasapulan wenno kayattayo? Kasano a maipada ti ministering iti panangted iti naayat a sagut? Ibilang ti panangilawlawag kadagiti estoria manipud iti kaudian a sapasap a komperensia a mangipakita no kasano a nagserbi dagiti tao a mayannurot kadagiti kasapulan dagiti dadduma (kitaen, kas pagarigan, iti Jean B. Bingham, “Ministering as the Savior Does,” Liahona, Mayo 2018). Mabalin pay nga ibinglay dagiti miembro ti dadduma pay nga estoria a mangipakita iti daytoy a pagbatayan.

Kasano a maammuantayo no ania dagiti kasapulan dagiti dadduma? Awisen ti tunggal miembro a mangaramid iti listaan ti sumagmamano kadagiti tao a pagserbianda. Iti abay ti tunggal nagan mabalinda nga isurat ti sungbat iti saludsod “Ania ti kasapulan daytoy a tao tapno ad-adda nga umasideg ken ni Cristo?” No mayapllikar, allukoyem dagiti miembro a mangiraman kadagiti ordinansa a mabalin a nasken nga awaten ti tunggal tao. Mangawis kadagiti miembro a mangituloy a mangpanunot maipapan iti daytoy a saludsod ket agkalikagum a manggun-od iti pammaregta a mangtulong kadakuada a mangipaay iti kasapulan dagiti dadduma.

Kayat ti Apo nga awatentayo ti ministering manipud kadagiti dadduma.

Kinuna ni Elder Robert D. Hales: “Agkasapulan ti plano ti ebanghelio iti panangted ken panangawat. … Masansan a marigatan nga isao dagiti tao ti: ‘Aramidekto daytoy a sisiak,’ … ‘Maaywanak ti bagik.’ Nakuna nga awan ti tao a nakabakbaknang a dina kasapulan ti tulong ti sabali, awan ti tao a nakapangpanglaw a saan a napateg iti sumagmamano a wagas iti padana a tao. Ti ugali a dumawat iti tulong manipud iti dadduma nga addaan iti panagtalek, ken patgan daytoy nga addaan iti panangngaasi, nasken a paset ti mismo a kinataotayo” (“We Can’t Do It Alone,” Ensign, Nob. 1975, 91, 93). Apay a no dadduma agduaduatayo nga umawat iti tulong manipud kadagiti sabali? Kasano a mangparabur kadagiti agserbi kadatayo ti kinatallugodtayo nga umawat ti tulong? Ikkan dagiti miembro ti sumagmamano a kanito nga agutob maipanggep kadagiti wagas a pakapagbalinanda nga ad-adda a nakasagana nga umawat iti ministering dagiti dadduma. Ania ti isingasing ti 1 Taga Corinto 12:13–21 maipapan no apay a kasapulantayo ti tunggal maysa?

Adu dagiti wagas a makapagserbitayo kadagiti dadduma.

Tapno matulongan dagiti miembro a mangibilang kadagiti adu a wagas a makapagministertayo iti tunggal maysa, mabalinmo nga awisen ida a mangrebyu iti mensahe ni Elder Jeffrey R. Holland “Be With and Strengthen Them” (Liahona, May 2018, 101–3; kitaen met iti “Ministering Principles” kadagiti umay nga isyu ti Liahona). Mabalin a bingayen dagiti miembro iti babassit a grupo, ket mabalin a panunoten ti tunggal grupo ti sumagmamano a senario a mabalin a pakasapulan ti tao iti tulong. Kalpasanna mabalinda nga i-brainstorm iti nadumaduma a wagas a pakapagserbian dagiti tao kadagiti espiritual ken temporal a kasapulan dagiti tao. Idawat kadagiti grupo a mangibinglay kadagiti kapanunotanda ken utoben no makabendision met laeng kadagiti tao a nagserbianda dagiti ania man a kapanunotan a nailawlawag.