Fakataha Sāpate Faá
ʻI he Sāpate fā ʻo e māhina kotoa pē, ʻe aleaʻi ai ʻe he kōlomu kaumātuʻá, mo e Fineʻofá ha tefito ne fili ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. ʻE fakatonutonu e ngaahi tefito ki he Sāpate faá hili e konifelenisi lahi kotoa pē. Ko e tefito he taimí ni ʻo aʻu ki he konifelenisi lahi hokó, ko e “Ngāue Fakaetauhi ki he Niʻihi Kehé.” Mahalo naʻa fili ʻe he kau takí pe faiakó he māhina takitaha, ke tataki e fealēleaʻakí ʻi ha taha pē ʻo e ngaahi tefitoʻi moʻoni ko ʻeni ʻoku felāveʻi mo e ngāue fakaetauhí.
Ko e hā hono ʻuhinga ʻo e ngāue fakaetauhí?
Ko e hā e ʻuhinga ʻo e ngāue fakaetauhi ki he kāingalotu ʻi homou uōtí pe koló? Ke ʻilo iá, te ke lava ʻo tohiʻi ʻa e Ngāue Fakaetauhi ʻi he palakipoé pea fakaafeʻi e kalasí ke nau tohi ha ngaahi foʻi lea takatakai ai, ʻoku felāveʻi mo e ngāue fakaetauhí. ʻE lava ʻe he kāingalotú ʻo kumi ha ngaahi foʻi lea pe kupuʻi lea mei he folofolá hangē ko ʻení: Mātiu 25:34–40; Luke 10:25–37; 2 Nīfai 25:26; Mōsaia 18:8–9; 3 Nīfai 18:25; mo e Tokāteline mo e Ngaahi Fuakava 81:5. Ko e hā ʻoku tau ako mei he ngaahi veesi ko ʻení ʻo fekauʻaki mo e ngāue fakaetauhí? Te ke ala kole ki he kalasí ke nau vahevahe ha ngaahi sīpinga ʻo e ngāue fakaetauhí kuo nau mātā. ʻE tokoni fēfē ʻetau ngāue fakaetauhí ke feau e ngaahi fie maʻu fakalaumālie mo fakatuʻasino ʻa e kakaí? ʻE tokoni fēfē ia ke ʻomi e kakaí ke ofi ange kia Kalaisí?
Ko e Fakamoʻuí ʻa e sīpinga haohaoa ʻo e ngāue fakaetauhí.
Ke ako fekauʻaki mo e founga ngāue fakaetauhi leleí, ʻe lava ke vahevahe ʻe he kāingalotú ha ngaahi talanoa mei he folofolá naʻe ngāue fakaetauhi ai ʻa e Fakamoʻuí ki he niʻihi kehé—ʻe maʻu ha ngaahi sīpinga ʻi he Sione 4–6 and Maʻake 2:1–12. ʻE lava ke vahevahe ʻe he kāingalotú ʻa e meʻa ʻoku nau ongoʻi fekauʻaki mo e ngaahi talanoa ko ʻení mo e ngaahi tefitoʻi moʻoni ʻoku nau ako fekauʻaki mo e ngāue fakaetauhí. Hangē ko ʻení, ko e hā e founga naʻe ʻai ai ʻe he Fakamoʻuí ke fakatāutaha ʻEne tokoni ki he niʻihi kehé? Naʻá Ne feau fēfē ʻa e ngaahi fie maʻu fakalaumālie mo fakatuʻasino ʻa e kakaí? ʻE lava ke vahevahe ʻe he kalasí ha ngaahi taimi kuo nau mātā ai ki hono fakaʻaongaʻi ʻe he kakaí e ngaahi tefitoʻi moʻoni ko ʻení ʻi heʻenau ngāue fakaetauhí.
Ko e ngāue fakaetauhí ʻoku fakalotoa ia ʻe he ʻofa faka-Kalaisí.
Ke vakaiʻi e mālohi ʻo e ngāue fakaetauhi ʻoku fakalotoa ʻe he ʻofa faka-Kalaisí, te ke lava ʻo tohi ʻa e ʻū sētesi ko ʻení ʻi he palakipoé pea fakaafeʻi e kalasí ke nau fokotuʻu atu ha ngaahi founga ke fakakakato ʻaki ʻa e ngaahi laine ʻoku ʻataá: ʻI he taimi ʻoku ou moʻoni ai ʻi he kakai ʻoku ou tokoniʻí, ʻoku ou . ʻI he taimi ʻoku ou tokoni ai koeʻuhí ko ha ngaahi ʻuhinga kehé, ʻoku ou . Ko e hā te tau lava ʻo fai ke fakapapauʻi ko e ʻofa faka-Kalaisí ʻokú ne fakalotoa ʻetau ngāue fakaetauhi ki he niʻihi kehé? Te tau fakatupulaki fēfē ʻa e ‘ofa faka-Kalaisí kiate kinautolu ʻoku vahe mai ke tau ngāue fakaetauhi ki aí? (vakai, Molonai 7:45–48). Mahalo ʻe lava ke vahevahe ʻe he kalasí ha ngaahi sīpinga ʻo e ngāue fakaetauhí naʻe fakalotoa ʻe he ʻofa faka-Kalaisí.
‘Oku finangalo ʻa e ʻOtuá ke tokangaekina mo tokoniʻi ʻEne fānaú kotoa.
Naʻe pehē ʻe Palesiteni Lāsolo M. Nalesoni, “Ko ha fakaʻilonga maʻu pē ʻo e Siasi moʻoni mo moʻui ʻo e ʻEikí, ʻa e ngāue kuo fokotuʻutuʻu maau mo tataki ke faitokonia e fānau fakafoʻituitui ʻa e ʻOtuá mo honau ngaahi fāmilí.” (“Ko e Ngāue Fakaetauhi ʻi he Mālohi mo e Mafai ʻo e ʻOtuá,” Liahona, Mē 2018, 69.). Ko e hā ʻoku akoʻi ʻe Palesiteni Nalesoni ko ha ngaahi founga “fokotuʻutuʻu maau, ʻoku tokoniʻi ai kitautolu ʻe he Siasí ke lelei ange ʻetau tokangaekina e fakafoʻituituí? Ko e hā ʻoku hoko ai e ngaahi ngāue ko ʻení “ko ha fakaʻilonga ʻo e Siasi moʻoni mo moʻui ʻo e ʻEikí”? (vakai, Mōsaia 18:21–22 mo Molonai 6:4–6 ki ha ngaahi fakakaukau). Ko e hā ha ngaahi tāpuaki kuo hoko ki heʻetau moʻuí pe ko e moʻui ʻa e niʻihi kehé koeʻuhí ko e ngāue fakaetauhi e kakaí ʻi honau ngaahi uiuiʻí pe fatongiá?
ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá
ʻOku fakatātaaʻi ʻe he ngaahi aʻusia ʻa e ngaahi foha ʻo Mōsaiá, e founga ʻoku hanga ai ʻe heʻetau vakai ki he kakaí ʻo uesia ʻetau founga ngāue fakaetauhi kiate kinautolú. Te ke lava ʻo hiki ʻi he palakipoé ʻa e Founga e vakai ʻa e Kau Nīfaí ki he Kau Leimaná mo e Founga ne vakai ai ʻa e ngaahi foha ʻo Mōsaiá ki he Kau Leimaná. Hili iá pea fakaafeʻi e kāingalotú ke nau fekumi ʻi he Mōsaia 28:1–3 mo e ʻAlamā 26:23–26 ke ʻilo e ngaahi foʻi lea pe kupuʻi lea ke hiki ʻi lalo ʻi he ongo sētesí. Ko e hā ʻoku akoʻi mai ʻe he fakafehoanaki ko ʻení ʻo fekauʻaki mo e founga ʻoku hanga ai ʻe heʻetau vakai ki he kakaí ʻo uesia e founga ʻetau ngāue fakaetauhi kiate kinautolú? Ko e hā ha founga ʻe lava ke tau ako ai ke vakai lahi ange ki he kakaí ʻo hangē ko e ʻafio mai e ʻOtuá kiate kinautolú? (vakai, T&F 18:10–16).
ʻOku tokanga taha e kau ngāue fakaetauhi moʻoní, ki he ngaahi fie maʻu ʻa e niʻihi kehé.
Ke tokoni ke mahino lelei ange ki he kāingalotú e mahuʻinga ʻo e tokanga taha ki he ngaahi fie maʻu ʻa e niʻihi kehé ʻi heʻetau ngāue fakaetauhí, te ke lava ʻo fakafehoanaki ʻa e ngāue fakaetauhí ki hono foaki mo maʻu mai ʻo ha meʻaʻofá. Kuo tau maʻu nai ha meʻaʻofa mahuʻingamālie mei ha taha naʻá ne ʻilo moʻoni e meʻa naʻa tau fie maʻú pe fakaʻamu ki aí? Ko e hā ha founga ʻoku faitatau ai e ngāue fakaetauhí mo hano foaki ha meʻaʻofa ne fakakaukauʻi lelei? Fakakaukau ke aleaʻi e ngaahi talanoa mei he konifelenisi lahi fakamuimuitahá ʻokú ne fakahaaʻi e founga ʻoku ngāue fakaetauhi ai e kakaí ʻo fakatatau mo e ngaahi fie maʻu ʻa e niʻihi kehé (hangē ko ʻení, Jean B. Bingham, “Ko e Ngāue Fakaetauhi Hangē ko e Fakamoʻuí,” Liahona, Mē 2018). ʻE lava ke vahevahe foki ʻe he kāingalotú ha ngaahi talanoa kehe ʻoku nau fakatātaaʻi e tefitoʻi moʻoni ko ʻení.
Te tau ʻilo fēfē e ngaahi meʻa ʻoku fie maʻu ʻe he niʻihi kehé? Fakaafeʻi e mēmipa takitaha ke hiki ha lisi ʻo ha kakai ʻoku nau ngāue fakaetauhi ki ai. ʻI he tafaʻaki ʻo e hingoa takitaha, te nau lava ʻo hiki ai ha tali ki he fehuʻi, “Ko e hā ʻoku fie maʻu ʻe he tokotaha ko ʻení ka toe ofi ange kia Kalaisi?” Kapau ʻoku kaunga ki ai, poupouʻi ʻa e kāingalotú ke nau fakakau e ngaahi ouau ʻe ala fie maʻu ke maʻu ʻe he tokotaha takitaha. Fakaafeʻi e kāingalotú ke hokohoko atu ʻenau fakakaukau ki he fehuʻi ko ʻení mo fekumi ki ha ueʻi fakalaumālie ke tokoniʻi kinautolu ke feau e ngaahi fie maʻu ʻa e niʻihi kehé.
ʻOku finangalo ʻa e ʻEikí ke tau tali e ngāue fakaetauhi mai e niʻihi kehé.
Naʻe pehē ʻe ʻEletā Lōpeti D. Heili, “Ko e palani ʻo e ongoongoleleí, ʻoku fie maʻu ki ai e foaki atú mo e tali e foaki maí. … ʻOku faʻa lea ʻaki ʻe he niʻihi fakafoʻituitui ʻoku faingataʻaʻiá ʻo pehē: ʻTe u fai tokotaha pē ʻe au,’ … ‘ʻOku ou lava pē ʻo tokangaʻi au.’ Kuo faʻa taku ʻo pehē ʻoku ʻikai ha taha ʻe fuʻu koloaʻia ke ne taʻe fie maʻu ai ha tokoni mei ha taha kehe, pea ʻoku ʻikai ha taha ʻe fuʻu masiva pea ʻikai ha founga ʻe ʻaonga ai ki hono kāingá. ʻOku totnou ke hoko ko ha konga hotau natula totonú, ʻa e fili ko ia ke kole tokoni mei he niʻihi kehé ʻi he loto-falalá, pea foaki ia ʻi he angaʻofá” (“We Can’t Do It Alone,” Ensign, Nov. 1975, 91, 93). Ko e hā ʻoku tau faʻa momou ai ke tali e tokoni mei he niʻihi kehé? Ko e hā ha founga ʻoku hanga ai ʻe heʻetau fiemālie ke tali e tokoní, ʻo faitāpuekina e niʻihi ʻoku nau tokoniʻi kitautolú? Tuku ha kiʻi taimi ke fakalaulauloto ai ʻa e kalasí ki he ngaahi founga te nau lava ai ʻo tali loto tauʻatāina e ngāue fakaetauhi ʻa e niʻihi kehé. Ko e hā ʻoku fokotuʻu mai ʻi he 1 Kolinitō 12:13–21 fekauʻaki mo e ʻuhinga ʻoku tau fie maʻu ai e niʻihi kehé?
ʻOku lahi ha ngaahi founga te tau lava ai ʻo ngāue fakaetauhi ki he niʻihi kehé.
Ke tokoni ki he kalasí ke nau fakakaukau ki he ngaahi founga kehekehe te tau lava ai ʻo ngāue fakaetauhi ki he niʻihi kehé, te ke lava ʻo fakaafeʻi kinautolu ke nau toe fakamanatu e pōpoaki ʻa ʻEletā Sefilī R. Hōlaní, “Ke Ne ʻIate Kinautolu mo Fakamālohia ‘a Kinautolu” (Liahona, Mē 2018, 101–3; vakai foki, “Ngaahi Tefitoʻi Moʻoni ʻo e Ngāue Fakaetauhí” ʻi ha ngaahi tatau ʻamui ange ʻo e Liahona). ʻE lava ke vahevahe ʻa e kalasí ki ha fanga kiʻi kulupu, pea ʻe lava ke fakakaukau e kulupu takitaha ki ha ngaahi tūkunga kehekehe ʻe fie maʻu tokoni ai ha taha. Hili iá te ke mou lava ʻo felīngiaki hoʻomou ngaahi fakakaukau ki he founga kehekehe ʻe lava ke fai ai ʻe he kakaí e ngāue fakaetauhí ke feau e fie maʻu fakalaumālie mo fakatuʻasino ʻa e niʻihi kehé. Kole ki he ngaahi kulupú ke nau vahevahe ʻenau ngaahi fakakaukaú mo fakalaulauloto pe ʻe lava ʻe ha taha ʻo e ngaahi fakakaukau ne aleaʻí, ʻo tāpuekina ha kakai ʻoku nau ngāue fakaetauhi ki ai.