Sa Noda Lalawa na Saumaki

Na inaki ni kena vulici ka vakatavulici taucoko na kosipeli oya me vakatitobutaka na noda saumaki ka vukei keda ni vakataki Jisu Karisito vakalevu cake. Oqo na vuna, ni da vulica tu na kosipeli, eda sega walega ni vakaraica na itukutuku vou, eda sa vinakata meda “buli vou” (2 Korinica 5:17). Sa kena ibalebale oqo na vakararavi tu kivua na Tamada Vakalomalagi kei Jisu Karisito me vukei keda ni veisautaka na lomada, noda rai, noda ivalavala, kei na keda ituvaki sara ga.

Ia, na mataqali vuli kosipeli e vaqaqacotaka na noda vakabauta ka muataki ki na cakamana ni saumaki e sega ni yaco kecega ena dua na gauna. E tete yani ki na taudaku ni rumu ni vuli ki na loma kei na itikotiko ni tamata yadua. E sa gadreva na sasaga gumatua e veisiga, me kila dei tu ka bulataka na kosipeli. Na saumaki dina sa gadreva na veivakayarayarataki ni Yalo Tabu.

Na Yalo Tabu sa tuberi keda ki na ka dina ka vakadinadinataka na dina oya (raica na Joni 16:13). E vakararamataka na noda vakasama, vakatotolotaka na noda kilaka, ka tara na lomada ena vakatakila mai vua na Kalou, na ivurevure ni ka dina kecega. Na Yalo Tabu e vakasavasavataka na lomada. E sa vakauqeta vei keda na gagadre meda bulataka na ka dina, ka vakasolokakanataka vei keda na sala me vakayacori kina. E dina, “na Yalo Tabu … ena vakavulici [keda] ena ka kecega” (Joni 14:26).

Oqo na vuna, ena noda sasaga ni bulataka, vulica, ka vakatavulica na kosipeli, sa dodonu meda vakasaqara taumada kina na veitokani ni Yalotabu. Na lalawa oqo sa dodonu me vakatulewataka na noda digidigi ka dusimaka na noda vakanananu kei na ivalavala. Sa dodonu meda qara na veika e sureta na veivakayarayarataki ni Yalotabu ka vakanadakuya na veika e kauta tani na veivakayarayarataki oya—ni da kila kevaka eda sa rawa ni bula kilikili kaya na Yalo Tabu, sa rawa talega ni da bula kilikili kaya ni bula vata tu kei na Tamada Vakalomalagi kei na Luvena, o Jisu Karisito.