Vakayagataki ni Lako Mai, Mo Muri Au—Me Baleta na iTikotiko kei na Lotu

E Baleti Cei Na iVurevure Oqo?

Na ivurevure oqo e sa baleta e dua ga ka vinakata me vuli mai na iVola i Momani—vakaikoya, vakamatavuvale, kei na kalasi eso ena Lotu. Kevaka o sega ni vulica wasoma tu na ivolanikalou ena gauna sa oti, na ivurevure oqo e rawa ni vukei iko mo tekivutaka. Kevaka o sa matau tu ena vulici ni volanikalou, na ivurevure oqo e rawa ni vukei iko me vakaibalebale sara na veika o sotava.

Tamata Yadua kei na Matavuvale e Vale

Na vanua momona me vulici kina na kosipeli oya na itikotiko. Era rawa ni tokoni iko na nomu qasenivuli ena lotu, ka rawa ni o vakayaloqaqataki mai vei ira na lewe ni tabanalevu tale eso. Ia mo tiko vakayalo tu, sa gadrevi mo na vakabulabulataki kei na nomu matavuvale ena veisiga mai na “vosa vinaka ni Kalou” (Moronai 6:4; raica talega na Russell M. Nelson, “iDola ni Vosa,” Liaona, Nove. 2018, 6–8).

Vakayagataka na ivurevure oqo ena sala cava ga e veivuke kina vei iko. Na ituvatuva e vakatakilakilataka eso na dina tawamudu e kune ena iVola i Momani ka vakatura na vakasama kei na itaviqaravi eso me vukei iko ni vulica tu na ivolanikalou, kei na nomu matavuvale, se veitokani. Ni ko vuli, muria na veituberi ni Yalotabu mo raica na dina tawamudu eso e vakaibalebale tu vei iko. Vakaraica na itukutuku ni Kalou me baleti iko, ka muria na veivakauqeti o ciqoma.

Qasenivuli kei na Gonevuli ena Lotu

Kevaka o vakatavulica e dua na kalasi ni Lalai, kalasi ni tabagone se uabula ena Matawilivola ni Sigatabu, na kuoramu ni Matabete i Eroni, se kalasi ni Goneyalewa, o sa vakauqeti mo vakayagataka na ituvatuva ena ivurevure oqo ni o vakavakarau mo veivakatavulici. Lako Mai, Mo Muri Au—Me Baleta na iTikotiko kei na Lotu e sa lewenivuli ni nomu kalasi ni Sigatabu. Na vakasama ni vuli eso ena ivurevure oqo sa vakarautaki tu me baleta na vuli e vale kei na lotu. Ni o vakavakarau mo veivakatavulici, tekivu ena veika o vakila tu vakataki iko ena ivolanikalou. Na nomu vakavakarau bibi duadua ena yaco ni ko wilika na ivolanikalou ka qara na veivakauqeti ni Yalo Tabu. Vakaraica na dina tawamudu eso e vukei iko mo vakataka cake na Tamada Vakalomalagi kei Jisu Karisito. Lako Mai, Mo Muri Au e rawa ni vukei iko ni kila eso na dina oqo ka kila vakamatata na tiki ni ivolanikalou.

Nanuma dei tiko na vulici ni kosipeli, me vinaka duadua, sa yavutaki e vale ka tokona tu na Lotu. Ena vosa tale eso, sa nomu itavi bibi mo tokoni ira na tamata o vakatavulica ena nodra sasaga mera vulica ka bulataka na kosipeli e vale. Solia na madigi eso me ra wasea na veika era sotava, nanuma, ka taroga me baleta na veitikina ena ivolanikalou. Sureti ira me ra wasea na dina tawamudu eso era sa raica. Oqo e bibi cake mai na kena wasei e dua na tiki ni vola.

Lalai

Na nomu vakavakarau ni vakavulica na Lalai sa tekivu ena vulici ni iVola i Momani vakai iko kei na nomu matavuvale. Ni ko vakayacora, vakila na veivakauqeti vakayalo kei na veivakararamataki ni Yalo Tabu me baleti ira na gone ena nomu kalasi ni Lalai. Dau masumasu, ka na rawa ni vakauqeti iko na Yalotabu ena vakasama eso mera vukei kina ni vulica na kosipeli i Jisu Karisito.

Ni ko vakavakarau mo veivakavulici, o rawa ni rawata na ikuri ni veivakauqeti ena dikevi ni vakasama ni veivakatavulici ena ivurevure oqo. Na ituvatuva yadua ena Lako Mai, Mo Muri Au—Me Baleta na iTikotiko kei na Lotu e dua tiko na kena wase ka vakatokai “Nanuma Eso ni Nodra Vakavulici na Gone.” Vakasamataka na nanuma eso oqo me vakatutu ni kena kidava na nomu veivakauqeti. O kilai ira tu na gone ena nomu kalasi ni Lalai— ka na yaco mo kilai ira vinaka cake sara ni o veitaratara vata kei ira ena kalasi. Sa kilai ira talega na Kalou, ka na vakauqeti iko ena sala momona eso mo vakavulici ka vakalougatataki ira kina.

E rawa ni ra sa cakava oti na gone ena nomu kalasi eso na itaviqaravi ena Lako Mai, Mo Muri Au kei na nodra matavuvale. Sa daumaka oya. Sa vinaka ni caka wasoma. Navuca ni sureta na gone me ra veiwaseitaka vakai ira na ka era sa vulica mai vale—ni sa dodonu talega mo tuvanaka na sala eso mera vakaitavi kina na gone kevaka mada ga era sega ni vuli tiko e vale. E dau mana cake nodra vulica na dina eso vakosipeli na gone ni vakavulici vakaveitaravi tu na dina oqo ena veimataqali taviqaravi eso. Kevaka o raica ni sa mana vei ira na gone e dua na itaviqaravi vakavuli, navuca mo tokaruataka, vakauasivi ke o vakavulici ira tiko na gone sobu. Sa rawa talega ni o railesuva na itaviqaravi mai na dua na lesoni sa oti.

Ena vula era lima kina na Sigatabu, sa vakauqeti na qasenivuli ni Lalai me ra sosomitaka na ituvatuva ni Lako Mai, Mo Muri Au enai kalima ni Sigatabu ki na dua se sivia na itaviqaravi ni vuli ena “iKuri ni iVakamacala B: Me Baleti Ira na Lalai—Nodra Vakarautaki na Gone ki na Bula Taucoko ena Salatu ni Veiyalayalati ni Kalou.”

Kalasi ni Matawilivola ni Sigatabu ni iTabagone kei na Uabula

Dua na vuna levu eda soqoni vata kina ena kalasi ni Matawilivola ni Sigatabu oya meda veitokoni ka veivakayaloqaqataki vakai keda ni segata me da muri Jisu Karisito. Dua na sala rawarawa me caka kina oqo oya mo taroga na taro vakaoqo “Na cava esa vakatavulica vei iko na Yalo Tabu ena macawa oqo ni o vulica tu na iVola i Momani ena Lako Mai, Mo Muri Au?” Na isau ni taro oqo e rawa ni vakavurea eso na veivosaki vakaibalebale cake e taracake tu na vakabauti Jisu Karisito kei na Nona kosipeli.

O rawa ni qai sureta na veivosaki e yavutaki mai na vakatutu ni vuli ena Lako Mai, Mo Muri Au. Me vakataka, na kena vakatututaka na vakasama ni vuli na raici ni Alama 36 ka cakava e dua na lisi ni vosa e vakavulica na itavi ni iVakabula ena veivutuni. O rawa ni kerei ira na lewe ni kalasi mera wasea ka veivosakitaka na vosa era sa kunea. Se rawa ni o caka lisi vata vakalasi kei ira ena so na gauna.

Kuoramu ni Matabete i Eroni kei na Kalasi ni Goneyalewa

Ni ra sota na kuoramu ni Matabete i Eroni kei na kalasi ni Goneyalewa ena Sigatabu, sa duidui vakalailai na nodra inaki mai na kalasi ni Matawilivola ni Sigatabu. Me ikuri ni nodra veivukei vakai ira ni vulica na kosipeli i Jisu Karisito, e sota talega na ilawalawa oqo me ra veivakasalataki ena kena rawati na cakacaka ni veivakabulai kei na bula vakacerecerei (raica na iVoladusidusi Raraba: Veiqaravi ena Na Lotu i Jisu Karisito ni Yalododonu Edaidai, 1.2). Era vakayacora oqo ena veidusimaki ni mataveiliutaki ni kalasi kei na kuoramu.

Ena vuku ni ka oqo, sa dodonu me tekivutaka e dua na lewe ni mataveiliutaki ni kuoramu se kalasi ni kuoramu se kalasi yadua na liutaki ni veivosaki ena sasaga eso ni, me ivakaraitaki, bulataka na kosipeli, qaravi ira na vakaleqai, wasea na kosipeli, se vakaitavi ena cakacaka ni valetabu kei na tuva kawa.

Ni oti na gauna ni veivakasalataki vata oqo, na qasenivuli ena liutaka na kalasi se kuoramu ena vulici vata ni kosipeli. Sa rawa ni lesi mera veivakatavulici na iliuliu uabula se lewe ni kalasi se kuoramu. Na mataveiliutaki ni kalasi se kuoramu, ni veivosaki tu kei na iliuliu uabula, na cakava na veilesi oqo.

O ira na lesi me veivakatavulici sa dodonu me vakarau tu ni vakayagataka na vakatutu ni vuli ena ituvatuva vakamacawa ni Lako Mai, Mo Muri Au. Ena ituvatuva yadua, na ivakatakilakila oqo e vakatakila na itaviqaravi e veiganiti tu kei ira na itabagone. Ia, sa rawa ni vakayagataki na vakatutu cava ga ena ituvatuva me itaviqaravi ni vuli vei ira na itabagone.

Me sabolo ni tuvatuva ni soqoni ni kuoramu kei na kalasi, raica na ikuri ni vakamacala D.