Na ikuri ni ivakamacala B

Me Baleti Ira na Lalai—Vakarautaki Ira na Luvemu ki na Bula Taucoko e na Salatu ni Veiyalayalati ni Kalou

Ena veivula ka lima na kena Sigatabu, era sa vakayaloqaqataki na qasenivuli ni Lalai me ra vakaisosomitaka na Lako Mai, Mo Muri Au sa tuvai tu me baleta na ikalima ni Sigatabu kei na dua se sivia ni itaviqaravi ni vuli oqo.

Na iVakavuvuli kei na Cakacakatabu Vakalotu ni Kosipeli i Jisu Karisito

Na ivunau i Karisito e vakavulica vei keda na sala meda lesu tale vua na Kalou.

Ena gauna a rairai kina o Jisu Karisito vei ira na tamata e Amerika, a vakavulica vei ira na Nona ivunau. A kaya ni rawa ni da curuma na matanitu ni Kalou kevaka e tu vei keda na vakabauta, veivutuni, papitaiso, ciqoma na Yalo Tabu, ka vosota me yacova na ivakataotioti (raica na 3 Nifai 11:31–40; Vunau kei na Veiyalayalati 20:29). Na itaviqaravi e ra e rawa ni vukei iko mo vakavulica vei ira na gone ni ivakavuvuli kei na cakacaka vakalotu oqo ena vukei keda meda toro voleka vua na iVakabula ena noda bula taucoko.

Me vulici vakalevu cake na ivunau i Karisito, raica na 2 Nifai 31.

iTaviqaravi e Rawa ni Caka

• Solia vei ira na gone na iyaloyalo e matataka na vakabauti Jisu Karisito, veivutuni, papitaiso, kei na veivakadeitaki (raica na iVola ni iYaloyalo Vakosipeli, naba.1, 111, 103, kei na105). Wilika se cavuqaqataka vata kei ira na gone na ikava ni yavu ni vakabauta, ka kerei ira me ra taura cake nodra iyaloyalo ni tukuni na ivakavuvuli se cakacaka vakalotu oya. Vukei ira na gone me ra kila na sala e vukei keda kina na ivakavuvuli kei na cakacaka vakalotu yadua oqo meda vakataka vakalevu cake na Tamada Vakalomalagi kei Jisu Karisito.

• O na vukei ira vakacava na gone me ra kila ni vakabauta, veivutuni, papitaiso, kei na veivakadeitaki e sega ni dua ga na ka e yaco, ia e vakayarayarataka na noda tubu vakayalo ena noda bula taucoko? Me ivakaraitaki, e rawa ni o vakaraitaka vei ira e dua na iyaloyalo ni dua na sorenikau kei na dua na vunikau levu (se droinitaka na veika oqo ena vava ni volavola). Vukei ira me ra vakasamataka na veika e vukea na sorenikau me tubu me dua na vunikau levu, me vaka na wai, qele, kei na rarama ni matanisiga. Vukei ira me ra raica ni oqo e vaka na veika eda cakava me da toro voleka kina vua na Kalou ena noda bula taucoko—tara cake noda vakabauti Jisu Karisito, veivutuni e veisiga, bulataka noda veiyalayalati ni papitaiso, ka vakarorogo ki na Yalo Tabu.

• Wasea vei ira na gone na italanoa me baleta na rokete mai na itukutuku nei Elder Dale G. Renlund “Ena Rawa Vakacava Meu Vakila na Marau ena Veivutuni?” (iTokani, Tise. 2017, 12–13, se Liaona, Tise. 2017, 70–71; raica talega na vidio “Veivutuni: Na Digidigi Ni Reki” [Valenivola ni Kosipeli]).

  Ena veitikina duidui eso ena italanoa, sureti ira na gone me ra vakasamataka na veika a vakila o Elder Renlund. Na cava na vuna eda reki kina ni da veivutuni? Wasea vei ira na gone na reki kei na loloma o sa vakila ena nomu kerea vua na Tamada Vakalomalagi me vosoti iko.

Papitaiso

E vakarautaka vei keda e dua na ivakaraitaki o Jisu Karisito ena Nona a papitaiso.

E dina ga ni a sega ni ivalavala ca o Jisu, a papitaiso o Koya me ivakaraitaki uasivi sara ni talairawarawa vua na Tamada Vakalomalagi (raica 2 Nifai 31:6–10).

Mo vulica eso tale na ka me baleta na papitaiso, raica Vunau kei na Veiyalayalati 20:37; Ulutaga ni Kosipeli, “Papitaiso,” Valenivola ni Kosipeli.

iTaviqaravi e Rawa ni Caka

• Vakaraitaka e dua na iyaloyalo ni nona papitaiso na iVakabula kei na nona papitaiso e dua tale na tamata (se raica na iVola ni iYaloyalo Vakosipeli, naba. 35 kei na naba. 103 se naba. 104). Kerei ira na gone me ra wasea na cava e duidui kei na cava e tautauvata ena kedrau maliwa na iyaloyalo e rua. Wilika vata na Maciu 3:13–17se “Wase 10: Sa Papitaiso ko Jisu” ena iTalanoa ni Veiyalayalati Vou, 26–29, se sarava na kena vidio ena ChurchofJesusChrist.org

  Me ra dusia na gone na veika eso ena iyaloyalo e tukuni tiko ena wiliwili se na vidio. Tukuna vei ira na gone me baleta na nomu lomana na iVakabula kei na nomu gagadre mo muri Koya.

• Vakarogoca se lagata e dua na sere baleta na papitaiso, me vaka na “When Jesus Christ Was Baptized” (Nodra iVolanisere na Lalai, 102). Na cava eda vulica baleta na papitaiso mai na sere oqo? Wilika na 2 Nifai 31:9–10, ka sureti ira na gone me ra vakarogoca na vuna a papitaisotaki kina o Jisu Karisito. Sureti ira me ra droinitaka na kedra iyaloyalo ni siga era papitaiso kina.

Au rawa ni digitaka meu veiyalayalati kei na Kalou ka papitaiso.

Na vakavakarau ki na papitaiso e kena ibalebale me levu cake mai na vakavakarau ki na dua na soqo. E kena ibalebale na vakavakarau mo cakava e dua na veiyalayalati ka qai maroroya na veiyalayalati oya me baleta e dua na gauna ni bula taucoko. Vakasamataka vakatitobu na sala o rawa ni vukei ira kina na gone me ra kila na veiyalayalati era na cakava vua na Tamada Vakalomalagi ni ra sa papitaiso, ka okati kina na yalayala e vakayacora o Koya vei ira kei na yalayala era cakava Vua.

iTaviqaravi e Rawa ni Caka

• Vakamacalataka ni veiyalayalati e sa dua na yalayala mai vua na tamata kei na Tamada Vakalomalagi. Ni da saga meda maroroya na noda yalayala vua na Kalou, sa yalataka na Kalou ni na vakalougatataki keda. Vola ena vava ni volavola Noqu Yalayala vua na Kalou kei na Nona Yalayala na Kalou vei Au. Wilika vata na Mosaia 18:10, 13 kei na Vunau kei na Veiyalayalati 20:37, ka vukei ira na gone me ra cakava e dua na lisi ni yalayala era raica ena ruku ni ulutaga dodonu (raica talega Dallin H. Oaks, “Nomu Veiyalayalati ni Papitaiso,” Friend, Feb. 2021, 2–3). Wasea na sala sa vakalougatataki iko kina na Tamada Vakalomalagi ena nomu segata mo maroroya na nomu veiyalayalati ni papitaiso.

• Vakaraitaka vei ira na gone na iyaloyalo ni veika a cakava o Jisu Karisito ni a tiko e vuravura (me baleta eso na ivakaraitaki, raica na iVola ni iYaloyalo Vakosipeli, naba 33–49). Kerei ira na gone me ra vakamacalataka na ka e cakava tiko o Jisu ena iyaloyalo yadua. Wilika na Mosaia 18:8–10, 13, ka sureti ira na gone me ra vakarogoca na veika era yalataka me ra cakava ni ra papitaiso (raica talega na “Na Veiyalayalati ni Papitaiso,” FriendFeb. 2019, 7; LiahonaFepe. 2019, F3). Ena vakayarayarataka vakacava na noda ivalavala e veisiga na yalayala eso oqo? Sureti ira na gone me ra droinitaka e dua na kedra iyaloyalo ni vukea tiko e dua ka vakaleqai tu. Se o rawa ni cakava vei ira na gone e dua na beji rawarawa me ra daramaka kina na yaca ni iVakabula.

  papitaisotaki e dua na gonetagane

  Vakamacalataka ni gauna eda sa papitaiso kina, eda sa yalayala vua na Kalou ka yalayala o Koya vei keda.

Vakadeitaki

Ena gauna au sa vakadeitaki kina, Au sa lewena na Lotu i Jisu Karisito ni Yalododonu Edaidai.

Ni yaco mo lewena Na Lotu i Jisu Karisito ni Yalododonu Edaidai ena kauta mai e vuqa na veivakalougatataki, oka kina na madigi eso vei ira na gone me ra vakaitavi vaqaqacotaki ena cakacaka ni Kalou.

Mo vulica eso tale na ka me baleta na veivakadeitaki kei na isolisoli ni Yalo Tabu, raica Gary E. Stevenson, “E Vukei Iko Vakacava na YaloTabu?,” Liaona, Me 2017, 117–20; Ulutaga ni Kosipeli, “Yalo Tabu,” Valenivola ni Kosipeli.

iTaviqaravi e Rawa ni Caka

• Sureta e dua ka se qai papitaiso walega ka vakadeitaki me lako mai ki na kalasi ka wasea se cava a yaco me vakadeitaki. Na cava na kena ibalebale vua na tamata oqo me yaco me lewena Na Lotu i Jisu Karisito ni Yalododonu Edaidai? Vukei ira na gone me ra vakasamataka na sala eso e rawa ni ra maroroya kina na nodra veiyalayalati ni papitaiso vaka lewe ni Lotu (me vaka na qaravi ira na tani, sureti ira eso tale me ra vulica eso tale na ka me baleti Jisu, cavuta na masu ena veisoqoni, kei na so tale). Wasea na sala sa vukei iko kina na nomu cakava na veika oqo mo vakila na reki ni lewena na Lotu i Karisito.

• Vakaraitaka e dua na kedra iyaloyalo na tamata ena Wai o Momani (raica na iVola ni iYaloyalo Vakosipeli, naba76), ka kerei ira na gone me ra vakamacalataka na veika era raica ena iyaloyalo. Wasea na italanoa kei Alama kei ira nona tamata ena nodra papitaiso tiko kina (raica na Mosaia 18:7–16; “Wase 15: Veivakavulici ka Veipapitaisotaki o Alama,” iTalanoa ni iVola i Momani, 43–44, se na kena vidio ena Valenivola ni Kosipeli).

  Railesuva na Mosaia 18:8–9 ka sureti ira na gone me ra matanataka me vukea nodra nanuma na veika era a tuvakarau na tamata me ra cakava vaka lewe ni Lotu i Karisito. Wasea e dua na ka o sa sotava ena nomu sa vakadinadinataka na lewe ni Lotu era veiqaravi tiko ena sala oqo.

iKava ni macawa: Ena gauna au sa vakadeitaki kina au na ciqoma na isolisoli ni Yalo Tabu.

Na veivakalougatataki yalataki ni kena rokovi na veiyalayalati oqo o ya “me tiko ga kei [keda] na nona Yalotabu [Vunau kei na Veiyalayalati 20:77 Na isolisoli totoka oqo mai vua na Kalou e vakatokai me isolisoli ni Yalo Tabu.

iTaviqaravi e Rawa ni Caka

• Wilika na Vunau kei na Veiyalayalati 33:15, ka kerei ira na gone me ra vakarogoca na isolisoli digitaki e solia vei keda na Tamada Vakalomalagi ni da papitaiso ka vakadeitaki. Me vukei ira me ra vulica vakalevu cake na sala ena vukei ira kina na isolisoli ni Yalo Tabu, railesuva vata na Joni 14:26; Kalatia 5:22–23; 2 Nifai 32:5; 3 Nifai 27:20. E rawa talega ni o railesuva na itukutuku “Na Yalo Tabu E ” (iTokani, June 2019, 24–25; Liaona, June 2019, F12–F13).

• Ni se bera na kalasi, kerea na itubutubu ni dua se sivia na gone me ra wasea na sala era sa vakalougatataki kina baleta ni tu vei ira na isolisoli ni Yalo Tabu. E vukei ira vakacava o Koya? Era rogoca vakacava na Domona?

• Lagata vata e dua na sere me baleta na Yalo Tabu, vaka na “Jisu KarisitoNodra iVolanisere na Lalai, 56). Tarogi ira na gone se cava e vakavulica vei ira na sere ena sala e vukei keda kina na Yalo Tabu.

Na Yalo Tabu e rawa ni vosa vei au ena vuqa sara na sala.

O ira na gone era rawa ni kila na domo ni Yalotabu era na vakarau tu me ra ciqoma na ivakatakila yadua me dusimaki ira ena nodra bula taucoko. Vakavulica vei ira ni vuqa tu na sala e rawa ni vosa kina vei keda na Yalo Tabu.

iTaviqaravi e Rawa ni Caka

• Vukei ira na gone me ra vakasamataka na sala duidui eso eda rawa ni vosa kina vua e dua na itokani e tiko vakayawa sara, me vaka na volai ni dua na ivola, vakauta e dua na imeli, se vosa ena talevoni. Sa rawa ni vosa vei keda na Tamada Vakalomalagi mai na Yalo Tabu. Vakayagataka na itukutuku nei Peresitedi Dallin H. Oaks “E Dau Vosa Vakacava vei Keda na Tamada Vakalomalagi?” me vukei ira na gone me ra kila na duidui ni sala e rawa ni vosa kina na Yalo Tabu ki na noda vakasama kei na yaloda (iTokani, Maji 2020, 2–3; Liahona, Mar. 2020, F2–F3).

• Wasea e dua na gauna a veivosaki kina kei iko na Yalo Tabu, ena vakanananu ena nomu vakasama se mai na dua na ka o vakila e lomamu (raica na Vunau kei na Veiyalayalati 6:22–23; 8:2–3; raica talega na Henry B. Eyring, “Dolava na Yalomu ki na Yalo Tabu,” Friend, Liahona, Okosi. 2019, F2–F3). Vakadinadinataka ni rawa ni vukei ira na gone na Yalo Tabu ena sala eso vaka oqori.

• Vukei ira na gone me ra vakasamataka eso na gauna era a vakila beka na Yalo—me ivakaraitaki, ni lagati e dua na sere baleta na iVakabula se ni ra cakava e dua na ka vinaka vei ira na tani. Vukei ira me ra kila na vakila vakayalo e kauta mai na Yalo Tabu. Na cava o nanuma e solia kina vei keda na Yalo Tabu na yalo vakaoqori? Vukei ira na gone me ra vakasamataka na veika e gadrevi me da cakava me da rogoca kina na Yalo Tabu ni vosa vei keda. Veivosakitaka na veika o cakava mo rogoca vakamatata cake kina na Yalo.

Na Sakaramede

Niu taura na sakaramede, au nanuma na solibula ni iVakabula ka vakavouya na noqu veiyalayalati.

Sa solia vei keda na iVakabula na sakaramede me vukea noda nanuma na Nona solibula ena vukuda ka vakavouya na noda veiyalayalati. Ena vuku ni cakacaka vakalotu vakamacawa oqo, sa rawa ni da marautaka tikoga na veivakalougatataki ni noda papitaiso ena noda bula taucoko.

Mo vulica eso tale na ka, raica na Maciu 26:26–30; 3 Nifai 18:1–12; Vunau kei na Veiyalayalati 20:77, 79.

iTaviqaravi e Rawa ni Caka

• Sureti ira na gone me ra rokataka na “A Vakamacalataka o Jisu na Sakaramede vei ira na Nifai” ena iVola ni iTalanoa ni iVolanikalou Rokarokataki: iVolai Momani (2019), 26. Kerei ira me ra dusia na veika era vakasamataka tiko na tamata ena iyaloyalo. Wilika vei ira na gone na tikina eso ena 3 Nifai 18:1–12 se “Wase 45: Sa Veivakavulici o Jisu Karisito me baleta na Sakaramede kei na Masu,” iTalanoa ni iVola i Momani, 126–27 se sarava na kena ChurchofJesusChrist.org. Na cava e rawa ni da cakava me vakasamataki Jisu kina ena gauna ni sakaramede?

• Kerei ira na gone me ra tukuna vei iko eso na ka e dodonu me ra dau nanuma tu ga me ra cakava, me vaka na vesuka na nodra ivava se savata na ligadra ni bera ni ra kana. Na cava na vuna e bibi kina meda nanuma tu na veika oqo? Wilika na Moronai 4:3 vei ira na gone, ka sureti ira me ra vakarogoca na veika eda yalataka me da dau nanuma ena gauna eda vakayagataka kina na sakaramede. Na cava e bibi kina na noda nanumi Jisu Karisito? Vukei ira na gone me ra kila na ivakarau e vukei keda kina na madrai kei na wai ni sakaramede me da nanuma na veika sa cakava vei keda o Jisu (raica na Moronai 4:3; 5:2).

• Vola ena vava ni volavola “Au yalataka vei…” Wilika na masu ni sakaramede vei ira na gone (raica na Vunau kei na Veiyalayalati 20:77, 79). Ni ra rogoca e dua na yalayala eda cakava vua na Kalou, tu vakadua ka vukei ira me ra vakacavara na iyatuvosa ena vava ni volavola vata kei na yalayala era rogoca. Vukei ira me ra kila ni gauna eda taura kina na sakaramede, eda sa cakava tiko na yalayala vata ga eda a vakayacora ena papitaiso.

• Na cava na kena ibalebale mo taura ena nomu bula na yaca i Jisu Karisito? Me vukei ira na gone me ra sauma na taro oqo, wasea e dua na ivakaraitaki ni dua na ka eda biuta kina na yacada. Cava na vuna eda biuta kina na yacada ena ka eso? Na cava na vuna ena vinakata kina o Jisu Karisito me da taura vei keda na Yacana? Sa rawa mo wasea na ivakamacala oqo mai vei Peresitedi Russell M. Nelson: “Taura na yaca ni iVakabula e oka kina na kena cavuti ka vakadinadinataki vei ira na tani—mai na noda ivalavala kei na noda vosa—ni o Jisu na Karisito” (“NaYaca Dodonu ni LotuLiaonaNove. 2018, 88).

Lewa ni Matabete kei na iDola

Na Kalou e vakalougatataki ira na Luvena ena kaukauwa vakamatabete.

O ira kece na luve ni Kalou—yalewa kei na tagane, gone kei na qase—era ciqoma na kaukauwa ni Kalou ni ra rokova na veiyalayalati era sa cakava vata kei Koya. Eda cakava na veiyalayalati oqo ni da ciqoma na cakacaka vakalotu ni matabete me vaka na papitaiso (raica na iVoladusidusi Raraba Veiqaravi Na Lotu i Jisu Karisito ni Yalododonu Edaidai, 3.5, Gospel Library). Mo vulica eso tale na ka, Russell M. Nelson “Na iYau Vakayalo,” Liaona, Nove. 2019, 76–79; “iVakavuvuli ni Matabete,” wase 3 ena iVoladusidusi Raraba.

iTaviqaravi e Rawa ni Caka

• Vukei ira na gone me ra raica na veivakalougatataki era ciqoma ena vuku ni matabete. Me soli vei ira eso na vakasama, sa rawa mo vakaraitaka na vidio “Veivakalougatataki ni Matabete” (Valenivola ni Kosipeli).

• Sa rawa mo vola na veitaro oqo ena vava ni volavola. Na cava e bibi kina vei ira na dina oqo? Vakadinadinataka ni veivakalougatataki oqo e lako mai vei keda ena vukui Jisu Karisito kei na Nona kaukauwa ni matabete.

• Vola na veiulutaga oqo ena vava ni volavola Na kaukauwa va Kalou kaukauwa kei na kaukauwa ni Kalou kei na lewa ni Kalou e soli vei ira na tamata e vuravura. Kerei ira na gone me ra tuva na iyaloyalo ena ruku ni imatai ni ulutaga ka na vukei keda me da kila na ivakarau sa vakayagataka kina na Kalou na Nona kaukauwa me vakalougatataki keda, me vaka na buli ni vuravura, dusimaki keda ka liutaki keda, vakaraitaka vei keda ni lomani keda ka kilai keda, ka rogoca ka sauma na noda masu (raica na iVola ni iYaloyalo Vakosipeli, naba 3, 68, 90, 111). Kerei ira me ra biuta na iyaloyalo ena ruku ni ikarua ni ulutaga ka na vukei keda me da kila na ivakarau era vakayagataka kina na tamata bula kilikili e vuravura na kaukauwa kei na lewa ni Kalou me vakalougatataki keda, me vaka ena nodra vakalougatataki na tauvimate, veipapitaisotaki, veivakadeitaki, qaravi ni sakaramede, kei na vauci ni matavuvale (raica na iVola ni iYaloyalo Vakosipeli, naba 46, 104, 105, 107, 120). Wasea na vuna o vakavinavinakataka kina na matabete kei na veivakalougatataki e kauta mai.

• E dua vei ira na sala bibi eda ciqoma kina na veivakalougatataki ni kaukauwa ni Kalou ena noda bula o ya mai na cakacaka vakalotu ni matabete (raica na Vunau kei na Veiyalayalati 84:20). Me vukei ira na gone me ra vulica na dina oqo, e rawa ni o vola na ivolanikalou eso oqo ena vava ni volavola: 3 Nifai 11:21–26, 33 (papitaiso); Moronai 2 (veivakadeitaki); Moronai 4–5 (sakaramede). Sa rawa vei ira na gone mera digitaka yadua e dua vei ira na malanivosa oqo ka raica na cakacaka vakalotu e vakamacalataka tiko. Sureti ira na gone mera wasea na sala era sa vakalougatataki kina ena nodra mai lotu.

• Vukei ira na gone me ra kila ni ra na ciqoma na kaukauwa mai vua na Kalou ni ra sa papitaiso ka maroroya tiko na nodra veiyalayalati ni papitaiso. Tarogi ira na gone ena rawa ni vukei ira vakacava na kaukauwa oqo.

Na cakacaka ni Kalou e dusimaki mai na idola ni matabete ka vakayacori rawa ena lewa ni matabete.

O ira na tagane lewe ni Lotu bula kilikili e rawa ni ra tabaki ki na dua na itutu ena matabete. Me kena ikuri, ni gauna e vakatikori kina e dua me kacivi se lesi me veivuke ena cakacaka ni Kalou, sa rawa vua me vakayagataka na lewa ni matabete sa lesi kina. Na vakayagataki ni lewa taucoko ni matabete ena Lotu e dusimaki mai vei ira era taura tu na idola ni matabete, me vakataki peresitedi ni iteki, na bisopi, kei ira na peresitedi ni kuoramu. Na idola ni matabete sai koya na lewa me dusimaki kina na vakayagataki ena cakacaka ni Turaga.

iTaviqaravi e Rawa ni Caka

• Wilika vata kei ira na gone na Marika 3:14–15, ka vakaraitaka vei ira e dua na iyaloyalo ni veika a yaco e vakamacalataki e kea (me vaka na iVola ni iYaloyalo Vakosipeli, naba38). Tarogi ira na gone kevaka era sa bau raica e dua me tabaki ki na dua na itutu ni matabete se vakatikori ki na dua na veikacivi (se tukuna vei ira na veika o sa sotava). E tautauvata vakacava kei na veika a cakava na iVakabula vei iratou na Nona iApositolo? Vukei ira na gone me ra tuva ena vava ni volavola na itutu ni matabete se veikacivi e rawa ni soli vei ira na lewe ni Lotu, me vaka e dua na qasenivuli se iliuliu ena dua na isoqosoqo. Tarava ki na valenivolavola se veikacivi yadua, sa rawa mo vola na cava e tiko vua e dua ena itutu se veikacivi oya e tiko vua na dodonu me cakava. Tukuna vei ira na gone na sala sa vukei iko kina na nomu vakatikori mai vua e dua ena ruku ni veidusimaki ni idola ni matabete.

• Sureti ira na gone me ra vakasamataka e dua na ka o gadreva me baleta na, me vaka e dua na motoka se dua na katuba. Na cava ena yaco kevaka e sega vei iko na idola? Wilika vata na Vunau kei na Veiyalayalati 65:2, ka wasea na nomu ivakadinadina me baleta na bibi ni kena tiko vei iko na idola ni matabete e vuravura. E rawa talega ni o sarava na vidio “Sa Evei na Ki?” (Valenivola ni Kosipeli) ka vakaraica na veika e vakavulica o Elder Stevenson me baleta na idola ni matabete.

• Kerea e dua ena tabanalevu e tu vua na idola me lako mai ki na kalasi ka wasea vei ira na gone na ibalebale ni kena tauri na idola ni matabete. Sureti koya me wasea na nona itavi. Na tiki cava ni cakacaka ni Turaga e liutaka tiko o koya? E vukei keda vakacava na iVakabula?

Na Valetabu kei na iTuvatuva ni Bula Marau

Na valetabu e vale ni Turaga

Na valetabu sa tiki tudei tu mai ni ituvatuva nei Tamada Vakalomalagi Vei ira na luvena. Ena veivaletabu, eda cakava na veiyalayalati tabu vata kei Koya, eda sa vakaedaumeni ena kaukauwa ni matabete, ciqoma na ivakatakila, vakayacora na cakacaka vakalotu baleti ira na tubuda era sa takali yani, ka vauci vei ira na noda matavuvale me tawamudu. Na veika kece oqo e rawa ena vuku i Jisu Karisito kei na Nona isoro ni veivakaduavatataki.

O na vukei ira vakacava na gone o vakavulica mera kila ni sa ka tabu na vale ni Turaga ka vakarautaki ira mera bula kilikili mera vakaitavi ena cakacaka vakalotu ni valetabu? Vakasamataka mo railesuva na ivurevure eso oqo: Vunau kei na Veiyalayalati 97:15–17; Russell M. Nelson, “iTinitini ni Vosa,” Liaona, Nove. 2019, 120–22; “Na Cava Na Vuna Era Tara Kina Na Yalododonu Edaidai na Valetabu,” temples.ChurchofJesusChrist.org.

itabagone e tautuba ni valetabu

Na valetabu sa tiki tudei tu mai ni ituvatuva nei Tamada Vakalomalagi Vei ira na luvena.

iTaviqaravi e Rawa ni Caka

• Vakaraitaka e dua se sivia na iyaloyalo ni valetabu. Tarogi ira na gone na cava e cakava na valetabu me dua na vanua talei. Dusimaka ni ena valetabu yadua na ivakamacala oqo: “Tabu me Nona na Turaga: Na Vale ni Turaga.” Tarogi ira na gone na cava era nanuma ni rawa ni kena ibalebale “Tabu me Nona na Turaga.” Au kila ni valetabu e vale ni Turaga. Na cava eda vulica eke baleta na iVakabula? Kevaka e dua vei ira na gone e lako mai ki na dua na valetabu, e rawa talega ni ra wasea na veika era vakila ena gauna era tiko kina e kea. Kevaka o sa lesu mai na valetabu, wasea na veika o a vakila e kea, ka veivosakitaka na vuna e vanua tabu kina vei iko na valetabu.

• Wilika vata naVunau kei na Veiyalayalati 97:15–17. Kerei ira na gone me ra vakaraica na veika e namaka na Turaga vei ira era curuma na Nona vale tabu. Na cava na vuna e gadrevi kina meda kilikili meda curuma na Nona vale? Me tiki ni veivosaki oqo, vosa vei ira na gone me baleta na ivolatara ni valetabu, oka kina na ivakarau ni kena ciqomi e dua. Sa rawa mo sureta e dua na lewe ni matabisopi me wasea vei ira na cava na veivakatarogi ni ivolatara ni valetabu e tautauvata kei na taro e tarogi ena dua.

Ena valetabu eda cakava na veiyalayalati vata kei na Kalou.

E vakatavulica o Peresitedi Russell M. Nelson, “E sureti keda o Jisu Karisito me da taura lesu tale na salatu ni veiyalayalati ki vale vei rau na noda iTubutubu Vakalomalagi ka tiko vata kei ira eda lomana” (“Lako Mai,Mo Muri Au,” Liaona, Me 2019, 91). Vukei ira na gone me ra kila ni salatu ni veiyalayalati e oka kina na papitaiso, veivakadeitaki, kei na edaumeni ni valetabu kei na veivauci.

iTaviqaravi e Rawa ni Caka

• Kerei ira na gone me ra vukei iko mo railesuva na veiyalayalati eda cakava vua na Kalou ena gauna eda papitaiso kina ka da vakavouya ni da vakaivotavota ena sakaramede (raica naMosaia 18:10; Vunau kei na Veiyalayalati 20:77, 79). Vakaraitaka e dua na iyaloyalo ni valetabu ka vakamacalataka ni sa levu cake na veivakalougatataki e vinakata na Tamada Vakalomalagi me solia vei keda ena valetabu.

• Droinitaka e dua na matamata e mua ki na dua na sala. Tarogi ira na gone na cava na vuna era nanuma kina ni veivuke me tiko e dua na salatu me da lakova. Wilika vata na 2 Nifai 31:17–20, ka vakatauvatana kina o Nifai na veiyalayalati ni papitaiso ki na dua na matamata ka sureti keda meda tomana tiko na salatu ni oti na papitaiso. E levu cake na veiyalayalati me caka ni oti na papitaiso, oka kina na veiyalayalati e vakayacori ena valetabu. Vakamacalataka ni sa vakatoka o Peresitedi Nelson na salatu oqo me “salatu ni veiyalayalati.”

Ena valetabu, e sa rawa ni da papitaiso ka vakadeitaki ena vukudra.

Na kosipeli i Jisu Karisito sa rawa kina vei ira kece na luve ni Kalou me ra lesu ka laki bula vata kei Koya, kevaka mada ga era mate ka sega ni kila na kosipeli. Ena valetabu, sa rawa ni da papitaiso ka vakadeitaki na lewe ni Lotu i Jisu Karisito ena vukudra.

iTaviqaravi e Rawa ni Caka

• Veitalanoataka e dua na gauna a cakava kina e dua na tamata e dua na ka vei iko ka sega ni rawa ni o cakava vakataki iko. Sureti ira na gone me ra wasea na mataqali gauna vata vaqori. Vakamacalataka ni gauna eda gole kina ki valetabu, sa rawa ni da ciqoma na cakacaka vakalotu me vaka na papitaiso ena vukudra na tani era sa mate. Eda sa vakataki Jisu vakacava ni da sa cakava tiko na cakacaka baleti ira na mate? Na cava sa cakava ena vukuda na iVakabula ka da sega ni rawa ni cakava vakai keda ga?

• Sureta e dua se sivia na itabagone ka sa papitaiso ena vukudra na tubudra me ra wasea na veika era sotava. Tarogi ira na cava era taleitaka me baleta na valetabu. Vakayaloqaqataki ira me ra wasea na veika era vakila ni ra cakava tiko na cakacaka oqo me baleti ira na nodra qase e liu.

• Droinitaka e dua na vunikau ena vava ni volavola, oka kina na wakana kei na tabana. Kerei ira na gone me ra vakasamataka se tautauvata vakacava kei na dua na vunikau e dua na matavuvale. Vakayacana na wakadra na Qase e Liu, volai ira na kawa ni veitabana , Kawa vakayacana na tolo ni vunikau o Iko. Wilika vata na yatuvosa oqo mai na Vunau kei na Veiyalayalati 128:18: “Ni da na sega ni vakavinakataki sara o ira [na tubuda] io ena sega ni rawa me ra vakavinakataki sara ko ira ke sega koi keda.” Taroga na taro vakaoqo: “Na cava eda gadrevi ira kina na noda qase e liu? Na cava era gadrevi keda kina na noda kawa? Era sa vukei keda vakacava na noda itubutubu, tubuda, kei ira na tubuda tale eso?” Sureti ira na gone me ra vakasaqaqara ena vo ni Vunau kei na Veiyalayalati 128:18 me baleta e dua na malanivosa e vakamacalataka na sala eda rawa ni vukei ira kina na tubuda.

• Sa rawa mo cakacaka vata kei rau na itubutubu ni gone yadua me vaqara na yacana e dua na tubuna me kau ki na valetabu (raica na FamilySearch.org