Panangusar iti Umaykayo, Sumurot Kaniak—Para iti Pagtaengan ken Simbaan

Para iti Siasino Daytoy a Resource?

Agpaay daytoy a resource iti asino man nga agtarigagay nga agsursuro manipud iti Libro ni Mormon—kas indibidual wenno sangapamiliaan ken kadagiti klase iti Simbaan. No saan a masansan ti panagadalmo iti nasantuan a kasuratan iti napalabas, makatulong kenka a mangirugi daytoy a resource. No addaankan iti nasayaat a kadawyan ti panagbasa iti ebanghelio, makatulong kenka daytoy a resource a maaddaan iti ad-adu pay a napapateg a padas.

Dagiti Indibidual ken Pamilia iti Pagtaengan

Ti nasayaat a lugar a pakasursuruan iti ebanghelio ket ti pagtaengan. Mabalin a suportarannaka dagiti mannursurom iti simbaan, ken makagun-odka iti pammaregta manipud kadagiti dadduma pay a miembro ti ward. Ngem tapno agbiagkayo iti naespirituan, kasapulanyo ken ti pamiliayo ti inaldaw a taraon manipud “ti nasayaat a balikas ti Dios” (Moroni 6:4; kitaen iti Russell M. Nelson, “Opening Remarks,” Liahona, Nob. 2018, 6–8).

Usarem daytoy a resource iti ania man a wagas a makatulong kenka. Itampok dagiti balabala ti sumagmamano nga agnanayon a kinapudno a masarakan iti Libro ni Mormon ken mangisingasing kadagiti kapanunotan ken aktibidad a tumulong kenka a mangadal kadagiti nasantuan a kasuratan a saggaysa, iti pamiliam, wenno kadagiti gagayyem. Bayat ti panagadalmo, surotem ti panangiwanwan ti Espiritu tapno makasarakka kadagiti agnanayon a kinapudno nga addaan kaipapanan kenka. Sapulenyo dagiti mensahe ti Dios para kadakayo, ken surotenyo dagiti parikna a maawatyo.

Dagiti Mannursuro ken Agsursuro iti Simbaan

No mangisurokayo iti klase ti Primary, klase ti Sunday School dagiti agtutubo wenno nataengan, korum ti Aaronic Priesthood, wenno klase ti Agtutubo a Babai, maparegtaka nga agusar kadagiti balabala iti daytoy a resource bayat ti panagsaganam a mangisuro. Ti Umaykayo, Sumurot Kaniak—Para iti Pagtaengan ken Simbaan ket ti kurikulum para iti klaseyo iti Domingo. Naisangrat dagiti kapanunotan iti panagadal iti daytoy a resource para iti panagsursuro iti pagtaengan ken iti simbaan. Bayat ti panagsaganam a mangisuro, rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo. Sapulem dagiti agnanayon a kinapudno a mangtulong kenka nga agbalin nga ad-adda a kas iti Nailangitan nga Ama ken ni Jesucristo. Ti Umaykayo, Surotennak ti makatulong kadakayo a mangilasin iti sumagmamano kadagitoy a kinapudno ken maawatan ti konteksto dagiti nasantuan a kasuratan.

Laglagipenyo a ti panagsursuro iti ebanghelio, iti kasayaatan a kasasaadna, ket naisentro iti pagtaengan ken suportado ti Simbaan. Iti sabali a pannao, kangrunaan a pagrebbengam ti mangsuporta kadagiti tao a sursuruam iti panangikagumaanda nga agsursuro ken agbiag iti ebanghelio iti pagtaengan. Ikkam ida kadagiti gundaway a mangibinglay kadagiti padas, kapanunotan, ken saludsodda maipapan kadagiti binatog iti nasantuan a kasuratan. Awisem ida a mangibinglay kadagiti nasantuan a kinapudno a nasarakanda. Napatpateg daytoy ngem ti panangsakup iti maysa a kaadu ti material.

Primary

Mangrugi ti panagsaganam a mangisuro iti Primary bayat ti panagadalmo iti Libro ni Mormon a bukod ken kaduam ti pamiliam. No aramidem, silulukatka kadagiti naespirituan nga impresion ken pannakaammo ken pannakaawat manipud iti Espiritu Santo maipapan kadagiti ubbing iti klasem iti Primary. Agbalinka a managkararag, ket maparegtanaka ti Espiritu kadagiti kapanunotan a tumulong kadakuada a mangsursuro iti ebanghelio ni Jesucristo.

Bayat ti panagsaganam a mangisuro, mabalin a magun-odmo ti nayon a pammaregta babaen ti panagsukisok kadagiti balabala iti panangisuro iti daytoy a resource. Tunggal balabala iti Umaykayo, Sumurot Kaniak—Para iti Pagtaengan ken Simbaan addaan iti benneg a napauluan iti “Dagiti Kapanunotan para iti Panangisuro kadagiti Ubbing.” Panunotem dagitoy a kapanunotan a kas singasing tapno mangpataud iti bukodmo nga inspirasion. Am-ammom dagiti ubbing iti klasem iti Primary, ken maam-ammomto ida a nasaysayaat pay bayat ti panakipulapolmo kadakuada iti klase. Am-ammo met ida ti Apo, ken paregtaennakanto kadagiti kasayaatan a wagas a pangisuruam ken pangbendisionam kadakuada.

Posible a naaramiden dagiti ubbing iti klasem ti sumagmamano nga aktibidad iti Umaykayo, Sumurot Kaniak kadua dagiti pamiliada. OK dayta. Nasayaat ti panangulit. Ibilangmo ti panangawis kadagiti ubbing a mangibinglay iti tunggal maysa no ania ti nasursuroda iti pagtaengan—nupay rumbeng met nga iplanoyo dagiti wagas a makipaset dagiti ubbing uray no saanda nga agsursuro iti pagtaenganda. Nasamsamay ti panagsursuro dagiti ubbing iti kinapudno ti ebanghelio no maulit a maisuro dagitoy a kinapudno babaen iti nadumaduma nga aktibidad. No maammuam a nasamay ti maysa nga aktibidad iti panagsursuro para kadagiti ubbing, ibilangmo ti panangulit iti daytoy, nangnangruna no mangisursuroka kadagiti in-inaudi nga ubbing. Mabalin pay nga irebyum ti maysa nga aktibidad manipud iti kallabes nga adalen.

Kadagiti bulan nga addaan iti lima a Domingo, maallukoy dagiti mannursuro iti Primary a mangsukat iti naiskediul nga Umaykayo, Sumurot Kaniak a balabala iti maikalima a Domingo iti maysa wenno ad-adu pay kadagiti aktibidad iti panagsursuro iti “Apendiks B: Panangisagana kadagiti Ubbing para iti Tungpal Biag iti Dana ti Katulagan ti Dios.”

Dagiti Klase dagiti Agtutubo ken Adult Sunday School

Maysa a kangrunaan a rason nga agtitipontayo kadagiti klase ti Sunday School ket mangsuporta ken mangparegta iti tunggal maysa bayat ti panangikagumaantayo a mangsurot ken ni Jesucristo. Ti simple a wagas tapno maaramid daytoy ket ti panagdamag iti saludsod a kas iti “Ania ti insuro kenka ti Espiritu Santo iti daytoy a lawas bayat ti panagadalmo iti Libro ni Mormon nga addaan iti Umaykayo, Sumurot Kaniak?” Dagiti sungbat iti daytoy a saludsod ket mabalin nga agtungpal kadagiti addaan kaipapanan a panaglilinnawag a mangbukel iti pammati ken ni Jesucristo ken iti ebangheliona.

Kalpasanna, mabalinmo ti mangyawis iti panaglilinnawag a naibatay kadagiti singasing iti panagadal iti Umaykayo, Sumurot Kaniak. Kas pagarigan, mabalin nga isingasing ti maysa a kapanunotan iti panagadal ti panagsukisok iti Alma 36 ken panagaramid iti listaan dagiti balikas a mangisuro maipapan iti akem ti Mangisalakan iti panagbabawi. Mabalinmo a kiddawen kadagiti miembro ti klase a mangibinglay ken mangisarita maipapan kadagiti balikas a nasarakanda. Wenno mabalinmo a bubosen ti sumagmamano nga oras a mangilista a sangkamaysa kas maysa a klase.

Dagiti Korum ti Aaronic Priesthood ken Klase ti Young Women

No agmiting dagiti Korum ti Aaronic Priesthood ken klase ti Young Women kadagiti Domingo, medio naiduma ti panggepda iti klase ti Sunday School. Malaksid iti panagtitinnulongda a mangsursuro iti ebanghelio ni Jesucristo, agmimiting pay dagitoy a grupo tapno agtitinnulongda a mangbalakad maipapan iti panangipatungpal iti aramid ti pannakaisalakan ken pannakaitan-ok (kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 1.2). Aramidenda daytoy iti babaen ti panangiturong dagiti panguluen ti klase ken korum.

Gapu iti daytoy a rason, nasken a mangrugi ti tunggal miting ti korum wenno klase iti maysa a miembro ti korum wenno panguluen ti klase a mangidaulo iti panaglilinnawag maipapan kadagiti panagregget nga, kas pagarigan, agbiag iti ebanghelio, agserbi kadagiti tao nga agkasapulan, wenno makiraman iti aramid iti templo ken family history.

Kalpasan daytoy a gundaway para iti panagiinnuman, idauluan ti maysa nga instruktor ti klase wenno korum iti aggigiddan a panagsursuro iti ebanghelio. Mabalin a matudingan a mangisuro dagiti adult leader wenno miembro ti klase wenno korum. Ti panguluen ti klase wenno korum, iti pannakikonsulta kadagiti adult leader, ti mangaramid kadagitoy naituding nga aramiden.

Nasken nga agsagana dagiti tao a nadutokan a mangisuro babaen ti panangusar kadagiti singasing iti panagsursuro iti linawas a balabala ti Umaykayo, Sumurot Kaniak. Iti tunggal balabala, ipakita daytoy nga icon ti maysa nga aktibidad a nangnangruna a mainaig daytoy kadagiti agtutubo. Nupay kasta, ania man kadagiti singasing iti balabala mabalin nga usaren a kas maysa nga aktibidad ti panagsursuro para kadagiti agtutubo.

Para iti pagarigan nga adyenda para kadagiti miting ti korum ken klase, kitaen iti apendiks D.