Laj Lehi kib’eek chixk’atq li Kaqi Palaw, xb’aan laj Gary Smith

8–14 enero: “Tinxik ut tinb’aanu”

1 Nefi 1–5

Lix Hu laj Mormon natikla rik’in li resil jun li junkab’al li yoo chixnumsinkileb’ li ch’a’ajkilal. Kik’ulman a’an sa’ 600 chihab’ ma nayo’la li Kristo, a’b’an wankeb’ na’leb’ sa’ li esil a’in li nak’anjelak rik’in li junkab’al anajwan. Li junkab’al a’in kiwan sa’ jun ruchich’och’ wan wi’ li maa’usilal, a’ut li Qaawa’ kixyeechi’i reheb’ naq wi te’xtaaqe a’an, a’an tixk’ameb’ xb’e re xkolb’aleb’. Sa’ lix b’eenikeb’ ke’wan li chaab’il hoonal jo’eb’ ajwi’ li hoonal moko chaab’ileb’ ta, ninqi osob’tesink ut sachb’a-ch’oolej, a’b’an ke’xnumsi ajwi’ li wech’ok-ib’. Sa’eb’ li loq’laj hu, anchal maajo’q’e natawman jun esil jo’ a’in chirix jun li junkab’al li yoo chixyalb’aleb’ xq’e chixyu’aminkil li evangelio: eb’ li yuwa’b’ej li neke’xyal xq’e chixwaklesinkil xpaab’aaleb’ lix junkab’al ut xk’oxlankil lix kolb’aleb’ rix, eb’ li alalb’ej k’ajolb’ej li neke’xsik’ ru ma te’xpaab’eb’ lix na’ xyuwa’, ut eb’ li asb’ej iitz’inb’ej li neke’xnumsi li sowenak ut li wech’ok-ib’—ut wan naq neke’xkuyeb’ xmaak chirib’ileb’ rib’. Sa’ chixjunil a’in, wan jun li wankilal rik’in lix k’utb’esinkil lix paab’aal li junkab’al a’in.

Li na’leb’ re tzolok sa’ li ochoch ut sa’ li iglees

1 Nefi 1–5

Li raatin li Dios “nim xloq’al” sa’ wilob’aal.

Jun esil aajel ru sa’ lix Hu laj Mormon a’an naq “nim xloq’al” li raatin li Dios (1 Nefi 5:21). Naq yooqat chirilb’al 1 Nefi 1–5, k’e reetal chan ru naq li raatin li Dios kirosob’tesi lix junkab’al laj Lehi (jo’ eetalil, chi’ilmanq 1:11–15; 3:19–20; 5:10–22). K’a’ru neke’xk’ut chawu li ch’ol a’in chirix li raatin li Dios? K’a’ru nakataw li nareek’asi aach’ool chixtz’ilb’aleb’ rix li loq’laj hu?

Chi’ilmanq ajwi’ “Naq nintzol li loq’laj hu,” Eb’ li B’ich, 179; “El legado de las Escrituras” (video), Biblioteca del Evangelio.

1 Nefi 2

Naru nink’ul ut ninkawob’resi lix nawom inch’ool naq nin’ilok wan wi’ li Qaawa’.

Laj Nefi nawb’il ru xb’aan xnimal xpaab’aal chirix li Qaawa’, a’ut ki’ajman ru naq kixyal xq’e re tixk’ul lix nawom xch’ool—jo’ laa’o ajwi’. K’a’ru nakawil sa’ 1 Nefi 2 li naxk’ut k’a’ut naq laj Nefi kiru chixk’ulb’al xnawom naq yaal li raatin lix yuwa’? Kʼaʼut naq laj Laman ut laj Lemuel inkʼaʼ keʼxkʼul li nawom aʼin? (Chi’ilmanq ajwi’ 1 Nefi 15:2–11). Jo’q’e aaweek’ahom naq li Qaawa’ yoo chixq’unob’resinkil laa ch’ool?

Chi’ilmanq ajwi’ “El Señor manda a la familia de Lehi que abandone Jerusalén” (video), Biblioteca del Evangelio.

1 Nefi 3–4

Li Dios tixkawresi jun b’e re taaruuq tinb’aanu li rajom a’an.

Naq li Qaawa’ kixtaqlaheb’ li ralal laj Lehi chixxokb’aleb’ li perel ch’iich’ bronce, ink’a’ kixch’olob’ chi tz’aqal chan raj ru te’xb’aanu. Wan naq nak’ulman a’in rik’in li b’eresink naqak’ul rik’in li Dios, ut rik’in a’an maare taqeek’a naq a’an naxpatz’ li k’a’ru “ch’a’aj” (1 Nefi 3:5). K’a’ru nawulak chawu sa’ lix sumehom laj Nefi chiru lix taqlahom li Qaawa’ sa’ 1 Nefi 3:7, 15–16?

Naq yooqat chirilb’al 1 Nefi 3–4, k’e reetaleb’ li ch’a’ajkilal kixk’ul laj Nefi. Chan ru naq li Qaawa’ “kixk’uub’ jun li b’e” choq’ re laj Nefi re naq “tixbʼaanu li kʼaʼru naxtaqla wiʼ”? K’a’ut naq aajel ru choq’ aawe xnawb’al k’a’ru kixb’aanu li Qaawa’ choq’ re laj Nefi?

Re xkawresinkil jun li b’e choq’ qe re naq tooruuq chixpaab’ankileb’ lix taqlahom, li Dios kixtaqla li Jesukristo re taawanq choq’ aj Kolol qe. Naru nakawil li raatin li Awa’b’ej Dallin H. Oaks, “K’a’ru xb’aanuhom li qaKolonel choq’ qe?” (Jolomil ch’utub’aj-ib’ re abril 2021). K’a’ru xb’aanuhom li Jesukristo re xk’uub’ankil jun li b’e choq’ qe? Rik’in aanawom naq kinumta sa’ xb’een chixjunil choq’ aawe, k’a’ru musiq’anb’ilat wi’ naq “tatxik ut taab’aanu”?

Chi’ilmanq ajwi’ “Nefi es guiado por el Espíritu para obtener las planchas de bronce” (video), Biblioteca del Evangelio; Temas del Evangelio, “Obediencia,” Biblioteca del Evangelio.

Oksiheb’ li seraq’ ut li na’leb’ re xk’utb’aleb’ li jar raqal re li evangelio. Naq nakakawresi aawib’ chi k’utuk, k’oxlaheb’ li numsihom li naru te’wanq choq’ xka’ xyeeb’al xyaalal li k’a’ru wan sa’eb’ li loq’laj hu. Qayehaq, joʼqʼe xkʼuubʼ li Qaawaʼ jun li bʼe choq’ aawe re naq taab’aanu li rajom?

Kinumta xsahileb’ xch’ool, xb’aan laj Walter Rane

1 Nefi 4:1–3; 5:1–8

Naq najultiko’ we lix k’anjel li Dios, naru taawanq tz’aqal inpaab’aal re ab’ink chiruheb’ lix taqlahom.

Naq laj Laman ut laj Lemuel ke’raj wech’ink-ix, chi kok’ aj xsa’ ke’wan laj Nefi ut laj Lehi aran re xmusiq’ankileb’ ut xtenq’ankileb’. Naq nakawaj wech’ink-ix, rilb’al ru li raatin laj Nefi ut laj Lehi naru nakatxtenq’a. K’a’ru ke’xb’aanu laj Nefi ut laj Lehi re xyalb’al xtenq’ankileb’ li ras riitz’in chixnimob’resinkil lix paab’aaleb’ chirix li Dios? (chi’ilmanq 1 Nefi 4:1–3; 5:1–8; chi’ilmanq ajwi’ 1 Nefi 7:6–21). K’a’ru nakatzol li naru nakatxtenq’a naq nakat-aaleek chi wech’ink-ix?

1 Nefi 4:5–18

“Kʼambʼil chaq inbʼe xbʼaan li Musiqʼej.”

Sa’ 1 Nefi 4:5–18, k’a’ru nawulak chawu chirix lix seeb’al laj Nefi chixk’eeb’al reetal ut chixtaaqenkil li Musiq’ej? Naru nakawil li raatin li Awa’b’ej Russell M. Nelson, “Li k’utb’esinb’il na’leb’ choq’ re li Iglees ut choq’ re qayu’am” (Jolomil ch’utub’aj-ib’ re abril 2018) re tzolok chirix xk’ulb’al li k’utb’esinb’il na’leb’ rik’in li Qaawa’.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

1 Nefi 2:16

Naru nawan xnawom inch’ool.

• Chan ru kixnaw laj Nefi naq yaal li kixk’ut lix yuwa’? Tenq’aheb’ laa kok’al chixtawb’aleb’ xsumenkil li patz’om a’in sa’ 1 Nefi 2:16, 19. Maare taawulaq ajwi’ chiruheb’ xtz’iib’ankil li k’a’ru kixb’aanu laj Nefi chiruheb’ kok’ kaaxukuut malaj chiru jalan chik k’a’aq re ru, toja’ naq te’xyiib’ k’a’ruhaq rik’ineb’. A’in naru nekexxtenq’a chixtz’ilb’al rix chan ru naq eb’ li b’aanuhom a’in nokoxhe’xtenq’a chixkab’lankil jun xnawom ch’oolej.

• Naru nakak’ut chiruheb’ laa kok’al jalam-uuch malaj k’a’aq re ru li neke’reetali li k’a’aq re ru naru neke’xsik’ wi’ xnawom xch’ooleb’, jo’ lix Hu laj Mormon, jun xjalam-uuch li Jesukristo, li santil ochoch, malaj li yo’yookil profeet. Patz’ reheb’ naq te’xsik’ ru jun reheb’ ut te’xwotz xnawom xch’ooleb’ chirix a’an. Naru ajwi’ nakaye reheb’ laa kok’al chan ru naq xak’ul lix nawom aach’ool. Kʼaʼut naq naqaj ru jun xnawom qach’ool qajunes qib’?

1 Nefi 3–4

Li Dios tinixtenq’a chixpaab’ankileb’ lix taqlahom.

• Naru nakawoksi jun reheb’ li k’anjeleb’aal a’in re xtenq’ankileb’ laa kok’al chi aatinak chirix li kixb’aanu li Dios re xtenq’ankil laj Nefi chixk’ulb’aleb’ li perel ch’iich’ bronce: 1 Nefi 3–4; li perel re kok’ k’anjel re li xaaman a’in; “Kaw lix ch’ool laj Nefi” (B’ichleb’aal choq’ reheb’ li Kok’al, 64–65); ut “Ch’ol 4: Eb’ li perel ch’iich’ bronce” (sa’ Eb’ li Esilal sa’ lix Hu laj Mormon, 8–12).

• Maare taawulaq cheru xk’utb’esinkil li nak’ulman sa’ 1 Nefi 3:2–7. Naru nakaye naq laa’at laj Lehi ut taapatz’ reheb’ laa kok’al naq te’q’ajq aran Jerusalen re xxokb’aleb’ chaq li perel ch’iich’ bronce. Patz’ reheb’ naq tate’xsume rik’in tz’aqal raatineb’ jo’ chanru naq a’aneb’ laj Laman, laj Lemuel, malaj laj Nefi. K’a’ru xtaqlahom li Dios naq taqab’aanu? (che’ilmanq li jalam-uuch 103–115 sa’ li Hu reheb’ li Jalam-uuch re li Evangelio malaj Mosiah 18:8–10 re xtawb’al xkomon chik laa na’leb’). Chan ru naru nokowan jo’ laj Nefi?

1 Nefi 3:19–21; 5:19–22

Eb’ li loq’laj hu a’aneb’ xnimal b’ihomal.

• Q’axal aajeleb’ ru li loq’laj hu choq’ re lix junkab’al laj Lehi. Re xk’utb’al xyaalal a’in, naru nakapatz’ reheb’ laa kok’al naq tate’xtenq’a chixseraq’inkil malaj chixk’utb’esinkil li k’a’ru ke’xb’aanu laj Nefi ut eb’ li ras re xxokb’aleb’ chaq li perel ch’iich’ bronce: jwal najt ke’b’eek, ke’xkanab’ chaq lix oor ut lix plaateb’, ut ke’xmuq rib’ sa’ jun li ochoch pek re xkolb’al rix lix yu’ameb’. Chirix a’an naru nekeril 1 Nefi 5:21 ut neketz’il rix k’a’ut naq q’axal ninqeb’ xloq’al li loq’laj hu choq’ re lix junkab’al laj Lehi. K’a’ut naq ninqeb’ xloq’al choq’ qe? Chan ru naru naqileb’ li loq’laj hu jo’ jun li b’ihomal?

Laj Nefi ut lix junkab’al ke’xk’e xloq’aleb’ li loq’laj hu.

1 Nefi 4:6

Li Santil Musiq’ej tinixb’eresi naq tinyal inq’e chixb’aanunkil li rajom li Qaawa’.

• Chirix rilb’al sa’ 1 Nefi 3 chan ru naq laj Nefi ut eb’ li ras ke’xyal xxokb’aleb’ chaq li perel ch’iich’ bronce, il rik’ineb’ laa kok’al 1 Nefi 4:6 re xnawb’al k’a’ru kixb’aanu laj Nefi re xxokb’aleb’ chaq sa’ roso’jik. Chirix a’an laa kok’al naru neke’xtz’iib’a k’a’aq re ru naraj li Dios naq te’xb’aanu. Chan ru naq li Santil Musiq’ej naru nokoxtenq’a sa’eb’ li hoonal a’an?

Re xtawb’al xkomon chik li na’leb’, chi’ilmanq li hu Amigos re li po a’in.

Kin’ab’in chiru lix yaab’ xkux li Musiq’ej, xb’aan laj Walter Rane