Li sutq’iik aran Jerusalen

Xsik’b’aleb’ li perel ch’iich’ bronce

li junkab’al naxyiib’ jun muheb’aal t’ikr

Lix junkab’al laj Lehi ut li xSariah ke’b’eek sa’ li yamyookil ch’och’. Sa’ jun li matk’, li Qaawa’ kixye re laj Lehi resileb’ li loq’laj hu tz’iib’anb’ileb’ chiru perel ch’iich’ bronce. Ke’wan rik’in jun winq aj Laban xk’ab’a’ aran Jerusalen. Li Qaawa’ kixye naq lix junkab’al laj Lehi tento te’xk’ameb’ li perel ch’iich’ bronce a’an rik’ineb’ chiru lix b’eenikeb’.

3 Nefi 3:1–3, 19–20

laj Lehi na’aatinak rik’in lix junkab’al

Li Qaawa’ kixye re laj Lehi naq tixtaqlaheb’ li ralal chi sutq’iik aran Jerusalen re naq te’xtaweb’ chaq li perel ch’iich’ bronce. Ke’wech’in li ras laj Nefi. Ke’xye re laj Lehi naq jwal ch’a’aj a’an. Ink’a’ ke’raj sutq’iik.

1 Nefi 3:4–5

li xSariah, laj Lehi, ut laj Nefi neke’aatinak

Jwal ch’a’aj xb’aanunkil a’an, a’b’an laj Nefi kiraj ab’ink. Kixnaw naq li Qaawa’ tixtenq’a a’an ut eb’ li ras. Laj Nefi kixye re laj Lehi naq taasutq’iiq aran Jerusalen ut tixtaweb’ chaq li perel ch’iich’ bronce.

1 Nefi 3:6–8

eb’ li as iitz’inb’ej nach’ rik’in Jerusalen

Laj Laman, laj Lemuel, laj Sam, ut laj Nefi ke’sutq’i aran Jerusalen. Naq ke’wulak, ke’xsik’ ru laj Laman re naq taaxik sa’ rochoch laj Laban ut tixpatz’eb’ chaq li perel ch’iich’ bronce.

1 Nefi 3:9–11

Naq laj Laman kixpatz’eb’ li perel ch’iich’ bronce, laj Laban kixye naq a’an jun aj elq’. Laj Laban kixye naq tixkamsi laj Laman.

1 Nefi 3:11–13

laj Laman na’eelelik chiruheb’ laj k’aak’alenel

Laj Laman ki’eelelik ut koxxye reheb’ li riitz’in k’a’ru kik’ulman.

1 Nefi 3:14

Ke’raho’ xch’ool sa’ kaahib’al. Laj Laman, laj Lemuel, ut laj Samuel ke’raj q’ajk rik’ineb’ xna’ xyuwa’ sa’ li yamyookil ch’och’, a’b’an laj Nefi kichal jun xna’leb’. A’an kixye naq te’xb’aanu jun jalok rik’in laj Laban re naq te’xk’ameb’ li perel ch’iich’ bronce. Ke’sutq’i sa’ li rochocheb’ sa’ li tenamit ut ke’xxok chaq chixjunileb’ lix oor ut lix plaat re te’xjal ru.

1 Nefi 3:14–16, 22–24

neke’eelelik li as iitz’inb’ej chiruheb’ laj k’aak’alenel

Naq ke’xk’ut li oor ut li plaat chiru laj Laban, a’an kiraj chixjunil. A’b’an toj ink’a’ kiraj xk’eeb’aleb’ li perel ch’iich’ bronce reheb’. Kixye b’an reheb’ lix moos naq te’xkamsiheb’ li as iitz’inb’ej re naq taaruuq tixmaq’ chixjunil lix oor ut lix plaat.

1 Nefi 3:16, 23–25

eb’ li as iitz’inb’ej neke’xmuq rib’ chiruheb’ laj k’aak’alenel

Li kaahib’ chi as iitz’inb’ej ke’eelelik chaq ut ke’xkanab’ lix oor ut lix plaat. Eb’ lix moos laj Laban ink’a’ ke’ru chixchapb’aleb’. Eb’ li as iitz’inb’ej ke’xmuq rib’ sa’ jun ochochpek.

1 Nefi 3:26–27

laj Laman ut laj Lemuel neke’josq’o’ rik’in laj Nefi ut laj Sam

Chirix chixjunil li ch’a’ajkilal a’an, ke’josq’o’ laj Laman ut laj Lemuel rik’in laj Nefi. Ke’xsak’ laj Nefi ut laj Sam rik’in jun li che’.

1 Nefi 3:28

li anjel na’aatinak rik’in laj Laman ut laj Lemuel

Kichal chi jun xaqaamil jun li anjel ut kolxpatz’ reheb’ k’a’ut naq neke’xsak’ laj Nefi. Li anjel kixye naq sik’b’il ru laj Nefi re xjolominkileb’. Toja’ naq li anjel kixye reheb’ naq te’sutq’iiq aran Jerusalen. Li Qaawa’ tixkawresi li b’e re naq te’xtaweb’ li perel ch’iich’ bronce.

1 Nefi 3:29