“Laj Enos,” Eb’ li Seraq’ sa’ lix Hu laj Mormon (2023)
“Laj Enos,” Eb’ li Seraq’ sa’ lix Hu laj Mormon
Laj Enos
Li tijok rik’in nimla metz’ew chiru li Qaawa’
Laj Jakob kixk’eheb’ li perel ch’iich’ re laj Enos, li ralal. Laj Enos kitz’iib’ak chiruheb’ jo’ kixb’aanu laj Jakob. Sa’ jun li kutan, laj Enos xko’o chi yohok sa’ li k’iche’. Kinaq sa’ xch’ool lix k’utum lix yuwa’ chirix li Qaawa’. Laj Jakob ak kixk’ut chiru laj Enos naq xtaaqenkil li Qaawa’ tixk’e xsahil xch’ool.
Laj Enos kiraj reek’ankil li sahil ch’oolej ki’aatinak wi’ lix yuwa’. Kixsik’ ru tijok chiru li Qaawa’. Kitijok chiru chixjunil li kutan toj sa’ li q’ojyin.
Li Qaawa’ kixye re laj Enos naq kuyb’ileb’ lix maak. Kinumta xsahil xch’ool laj Enos. Ki’osob’tesiik laj Enos xb’aan lix paab’aal chirix li Jesukristo.
Laj Enos kiraj naq eb’ laj Nefita te’reek’a ajwi’ li sahil ch’oolejil a’in. Ink’a’ kixkanab’ tijok. Kixpatz’ re li Qaawa’ naq eb’ laj Nefita te’reek’a ajwi’ li sahil ch’oolejil a’an.
Li Qaawa’ kixye re laj Enos naq taawanq rik’ineb’ laj Nefita wi te’xpaab’eb’ lix taqlahom. Naq kirab’i a’in laj Enos, kikawob’resiik wi’chik lix paab’aal chirix li Qaawa’.
Laj Enos kitijok wi’chik. Kixpatz’ re li Qaawa’ naq taarosob’tesiheb’ laj Lamanita ut naq tixkol rix li k’a’ru tz’iib’anb’il chiruheb’ li perel ch’iich’. A’an kiraj naq eb’ laj Lamanita te’rileb’ li perel ch’iich’ ut te’xpaab’ li Qaawa’. Li Qaawa’ kixyeechi’i re laj Enos naq eb’ laj Lamanita te’rileb’ li tz’iib’ahom a’an sa’ junaq kutan.