1 Nefi 1–2

Laj Lehi ut li xSariah neke’el chaq Jerusalen

Lix tijom li Qaawaʼ choqʼ re jun li junkabʼal

jun kʼutbʼesinbʼil matkʼ wan wiʼ li Qaawaʼ

Laj Lehi ut li xSariah ke’wan rochoch aran Jerusalen rik’ineb’ lix kok’al. Laj Lehi kiril jun k’utb’esinb’il matk’ li kixk’ul rik’in li Qaawa’. Kiril naq jun aj Kolonel taak’ulunq sa’ ruchich’och’ sa’ junaq kutan. Li Qaawa’ kixk’ut ajwi’ chiru naq Jerusalen taasachmanq.

1 Nefi 1:4–18

laj Lehi na’aatinak rik’ineb’ li josq’ aj tenamit

Laj Lehi kixye resil lix matk’ chiruheb’ li tenamit. Kixye reheb’ naq li Jesukristo taak’ulunq sa’ junaq kutan re xkolb’al li ruchich’och’.

1 Nefi 1:18–19

jun k’utb’esinb’il matk’ wankeb’ wi’ li kab’l sachenaqeb’

Laj Lehi kixye ajwi’ re li tenamit naq Jerusalen taasachmanq. Kixb’oqeb’ chixjalb’aleb’ xk’a’uxl.

1 Nefi 1:14, 18–19

li josq’ aj tenamit

Ke’josq’o’ li tenamit. Li Qaawa’ kiraatina wi’chik laj Lehi sa’ matk’. Laj Lehi kixtzol naq a’an ut lix junkab’al moko kolb’ilaqeb’ ta rix aran Jerusalen. Taa’ajmanq naq te’elq.

1 Nefi 1:19–20; 2:1–2

li junkab’al na’el sa’ li tenamit

Laj Lehi ut li xSariah ke’ab’in chiru li Qaawa’. Ke’el sa’ li tenamit rochb’eeneb’ lix junkab’al. Laj Lehi ut li xSariah ke’wan kaahib’eb’ li ralal, laj Laman, laj Lemuel, laj Sam, ut laj Nefi. Ke’xkanab’ li rochocheb’ ut lix chaab’il eechanihomeb’.

1 Nefi 2:3–5

li junkab’al nab’eek

Ke’xk’am xb’e sa’ li yamyookil ch’och’ chire li Kaqi Palaw. Laj Lehi kixb’antioxi re li Qaawa’ li rosob’tesihom choq’ re lix junkab’al. Kixk’ut chiru lix junkab’al naq te’xtaaqe li Qaawa’ ut te’xpaab’eb’ lix taqlahom.

1 Nefi 2:5–10

li junkab’al sa’ li yamyookil ch’och’

Ke’wech’in laj Laman ut laj Lemuel. Yookeb’ chaq chixk’oxlankil li rochocheb’ ut chixjunil li ke’xkanab’ aran. Ink’a’ ke’xtaw ru k’a’ut naq li Qaawa’ kixpatz’ reheb’ naq te’elq. Ink’a’ ke’xpaab’ naq taaruuq taasachmanq jun nimla tenamit jo’ Jerusalen.

1 Nefi 2:11–13

laj Laman ut laj Lemuel

Laj Laman ut laj Lemuel ke’xk’oxla naq laj Lehi narileb’ li matk’ a’ yaal xmajelal xk’oxlahom. K’a’ pe ru taak’ulmanq wi taasachq xb’eheb’ chi junelik sa’ li yamyookil ch’och’?

1 Nefi 2:11

laj Nefi

Laj Nefi kiraj xnawb’al xjunes rib’ naq yaal li kixye laj Lehi. A’an kitijok ut kipatz’ok chiru li Qaawa’.

1 Nefi 2:16

laj Nefi

Li Qaawa’ kixtaqla li Santil Musiq’ej re xtenq’ankil laj Nefi chixpaab’ankil li raatin lix yuwa’. Laj Nefi kixpaab’ li Qaawa’ ut kixwotz li k’a’ru kixtzol rik’ineb’ li ras. Laj Sam kirab’i li raatin laj Nefi ut kixpaab’, a’b’an laj Laman ut laj Lemuel ink’a’ ke’ab’in.

1 Nefi 2:16–18