“Laj Korianton,” Eb’ li Seraq’ sa’ lix Hu laj Mormon (2023)
Laj Korianton
Li sutq’iik rik’in li Qaawa’
Laj Korianton a’an jun reheb’ li ralal laj Alma. A’an xko’o rochb’een lix yuwa’, laj Shiblon li ras, ut xkomoneb’ chik re xtzolb’aleb’ laj Tzoramita chirix lix evangelio li Jesukristo.
Naq laj Korianton kiwan sa’ xyanqeb’ li tenamit, ki’aaleek chi maakob’k. Ink’a’ ki’ab’in chiru li Qaawa’, kixsik’ b’an ru xb’aanunkil li k’a’ru naq’etok reheb’ lix taqlahom li Dios. Xmaak lix b’aanuhom, ke’wan laj Tzoramita li ink’a’ ke’xpaab’ lix k’utum laj Alma ut eb’ li ralal.
Laj Alma kixb’oq laj Korianton chixjalb’al xk’a’uxl ut chi sutq’iik rik’in li Qaawa’ re te’kuye’q lix maak. Laj Korianton kiwan xk’a’uxl chirix junjunq xcha’al lix k’uub’anb’il na’leb’ li Qaawa’. Laj Alma kixtenq’a li ralal chixtawb’al ru lix k’uub’anb’il na’leb’ li Qaawa’ re sahil ch’oolejil, lix tojb’al rix li maak xb’aan li Kristo, li wakliik chi yo’yo, ut li yu’amej chirix li kamk. Laj Alma kixjultika re naq wan jun k’anjel naraj li Qaawa’ naq tixb’aanu.
Laj Korianton ki’ab’in chiru lix yuwa’. Kixpaab’ li Jesus ut kixjal xk’a’uxl. Kixtzol naq li Qaawa’ tiik ru xna’leb’ ut a’an ajwi’ aj rahonel. Laj Korianton kik’utuk wi’chik rochb’een lix yuwa’ ut li ras. Ke’xtzoleb’ naab’aleb’ chirix li sahil ch’oolejil ut li tuqtuukilal re li jalb’a-k’a’uxlej ut xyu’aminkil lix evangelio li Jesukristo.