Li profeet aj Samuel

Xk’utb’al lix yo’lajik ut lix kamik li Jesus

eb’ laj Nefita neke’risi chaq laj Samuel sa’ xtenamiteb’

Jun profeet aj Lamanita aj Samuel xk’ab’a’ kiwulak chi k’utuk chiruheb’ laj Nefita aran Tzarahemla. A’an kik’utuk chirix li jalb’a-k’a’uxlej. Eb’ laj Nefita ink’a’ ke’raj ab’ink ut ke’risi chaq sa’ xtenamiteb’.

Helaman 13:1–2

Laj Samuel sutq’iik raj chaq re rik’in lix tenamit. A’b’an li Qaawa’ kiraj naq taasutq’iiq re xtzolb’aleb’ laj Nefita.

Helaman 13:2–3

laj Samuel naxaqli chirix li tenamit ut na’ilok taqe’q

Li Qaawa’ kixye naq tixye re laj Samuel k’a’ru tixye a’an. Laj Samuel ki’ab’in chiru li Qaawa’. Kisutq’i Tzarahemla. A’b’an eb’ laj Nefita ink’a’ ke’xkanab’ chi ok sa’ li tenamit.

Helaman 13:3–4

laj Samuel naxaqli sa’ xb’een li xaqxookil tz’ak ut na’aatinak rik’ineb’ li kristiaan

Laj Samuel kitaqe’ sa’ xb’een lix xaqxookil tz’ak li tenamit. A’an kixye li na’leb’ naxk’e li Qaawa’ sa’ xch’ool. A’an kixye reheb’ li kristiaan naq te’sachmanq xb’aan naq neke’xb’aanu k’iila maa’usilal. Kixye naq ka’ajwi’ li jalb’a-k’a’uxlej ut li paab’aal chirix li Jesukristo taaruuq chi kolok reheb’. Kixye naq li Jesus, li Ralal li Dios, taayo’laaq sa’ oob’ chihab’.

Helaman 13:4–11; 14:2, 8, 12–18

laj Samuel naxaqli sa’ xb’een lix xaqxookil tz’ak li tenamit ut na’aatinak, ut wan chixk’atq xjalam-uuch li Jesus jo’ k’uula’al, rik’in xMaria ut laj Jose

Laj Samuel kixye naq te’k’utmanq reetalil lix yo’lajik li Jesus. Kixye reheb’ li kristiaan naq te’yo’lenq re rilb’aleb’ li eetalil. Jun reheb’ a’an naq taawanq jun q’ojyin chi maakʼaʼ li qʼojyin. Jo’kan ajwi’, taak’utunq jun ak’ chahim ut teʼwanq chik kʼiila sachbʼa-chʼoolej saʼ choxa.

Helaman 14:3–7

na’aatinak laj Samuel, ut wan chixk’atq jun xjalam-uuch li Kolonel waklijenaq chi yo’yo chirix lix muqleb’aal naq yoo chi aatinak rik’in li xMaria aj Magdala

Laj Samuel kiraj naq li kristiaan te’wanq xpaab’aaleb’ chirix li Jesus. Kixye naq li Jesus taakamq ut taawakliiq chi yo’yo re naq chixjunileb’ te’ruuq chi kole’k wi te’xjal xk’a’uxleb’.

Helaman 14:8, 12–18

na’aatinak laj Samuel, ut wan chirix a’an xjalam-uuch jun tenamit q’ojyin ru

Laj Samuel kixye naq te’k’utmanq reetalil lix kamik li Jesus. Li kristiaan ink’a’ te’ruuq chirilb’al li saq’e, li po, chi moko eb’ li chahim. Maak’a’aq li saqen chiru oxib’ kutan.

Helaman 14:20, 27

na’aatinak laj Samuel, ut wan chixk’atq jun xjalam-uuch jun tenamit yoo chi k’atk xb’aan li raqʼ kaaq

Taawanq li kaaq ut raqʼ kaaq. Te’wanq li hiik, ut te’sachmanq naab’al li tenamit.

Helaman 14:21–27

laj Samuel naxaqli sa’ xb’een lix xaqxookil tz’ak li tenamit, ut eb’ li josq’il kristiaan neke’xyal xkutinkil rik’in tzimaj ut pek, a’b’an maajun naketok re laj Samuel

Ke’wan li kristiaan li ke’xpaab’ laj Samuel, a’b’an naab’aleb’ chik aj Nefita ke’josq’o’ rik’in. Ke’xkuti rik’in pek ut rik’in tzimaj. Li Qaawa’ kixkol rix laj Samuel naq xaqxo sa’ xb’een li tz’ak. Maajun reheb’ li pek ut li tzimaj kiru chixketb’al.

Helaman 16:1–2

wankeb’ li kristiaan li neke’tijok ut yookeb’ xk’a’uxl, ut wankeb’ chik li josq’eb’, ut laj Samuel na’eelelik

Naq maajun reheb’ kiru chixketb’al laj Samuel, ke’ok chi paab’ank naab’aleb’ chik li kristiaan. A’b’an lix k’ihaleb’ toj yookeb’ xjosq’il. Ke’xyal xchapb’al laj Samuel ut xb’ak’b’al. Laj Samuel ki’eelelik toj sa’ rochoch. Toj kik’utuk chiru lix tenamit a’an.

Helaman 16:3, 6–8

jun profeet aj Nefi xk’ab’a’ na’aatinak rik’ineb’ li kristiaan chire li nima’

Eb’ laj Nefita li ke’xpaab’ li raatin laj Samuel ke’xjal xk’a’uxleb’ ut ke’kub’siik xha’ xb’aan li profeet aj Nefi. Ke’xpaab’ li Jesus ut ke’yo’len re rilb’aleb’ li reetalil lix yo’lajik li Jesus ki’aatinak wi’ laj Samuel.

Helaman 16:1, 3–5; 3 Nephi 1:8