“Li eetalil re ach’ab’aak,” Eb’ li Seraq’ sa’ lix Hu laj Mormon (2023)
Li eetalil re ach’ab’aak
Xkolb’al rix li wankilal re xpaab’ankil li Dios
Laj Amalikiah a’an jun aj Nefita jwal nim roq ut kaw xmetz’ew. A’an kiraj wank choq’ rey. A’an kixyeechi’i naq tixk’e wankilal reheb’ li te’tenq’anq re. A’an kiwulak chiru naab’aleb’ ut eb’ a’an ke’xsik’ xq’unb’esinkileb’ xch’ool xkomoneb’ chik li tenamit chixtaaqenkil. Laj Amalikiah kixk’eheb’ lix tenamit chixb’aanunkil li k’a’ru ink’a’ us. A’an ut eb’ li ke’taaqenk re ke’raj xkamsinkileb’ li tenamit li ke’k’utuk chirix li Jesukristo.
Laj Moroni, laj taqlanel sa’ xb’eeneb’ li teep aj pleet reheb’ laj Nefita, kixpaab’ li Jesus. Kixnaw naq osob’esinb’ileb’ laj Nefita xb’aan naq neke’xpaab’eb’ lix taqlahom li Dios. Jwal kijosq’o’ xb’aan naq laj Amalikiah yoo chixnajtob’resinkileb’ li tenamit rik’in li Dios, chixyalb’al ok choq’ rey, ut chixyalb’al xrahob’tesinkileb’ li tenamit.
Laj Moroni kixpej lix b’aatal. Kixtz’iib’a chiru naq eb’ li tenamit tento te’xjultika lix Dioseb’, li achʼabʼaak wankeb’ wi’, ut lix junkab’aleb’. Toja’ naq kixb’ak’ sa’ ru’uj jun li b’arb’ookil che’ ut kixk’ab’a’i li eetalil re ach’ab’aak. Laj Moroni kixtz’aama naq taa’osob’tesiiq xb’aan li Dios. A’an kixk’ut li eetalil re ach’ab’aak chiruheb’ laj Nefita ut kixpatz’ reheb’ naq te’xjunaji rib’ rik’in a’an sa’ xpleetinkil laj Amalikiah.
Eb’ li tenamit ke’xtiqib’ rib’ sa’ kolb’a-ib’ aq’ej ut ke’alinak rik’in laj Moroni. Yo’oon wankeb’ re pleetik choq’ re li Dios ut li rochocheb’, lix junkab’aleb’, ut li ach’ab’aak wankeb’ wi’. Ke’ok sa’ sumwank, malaj ke’xyeechi’i, rik’in li Dios naq junelik te’xtaaqe a’an. Toja’ naq ke’xkawresi rib’ re xpleetinkil laj Amalikiah.
Jwal nim lix teep aj pleet aj Moroni. Kixuwak laj Amalikiah. A’an kixyal eelelik rochb’eeneb’ laj taaqenel re. A’b’an ke’wan naab’al li ke’ok chixk’oxlankil naq maare moko tiik ta li pleetik naxb’aanu laj Amalikiah. Ke’wan naab’al li ink’a’ chik ke’xtaaqe. Lix teep aj pleet aj Moroni kixrameb’ li toj ke’taaqenk re laj Amalikiah, a’b’an laj Amalikiah kiru chi eelelik rochb’een junjunqeb’ chik.
Laj Amalikiah xko’o sa’ xch’ocheb’ laj Lamanita. Kiraj naq eb’ laj Lamanita te’xtenq’a chixpleetinkileb’ laj Nefita. Chi jo’kan taanimanq lix teep aj pleet. Kixq’unb’esiheb’ xch’ool naab’aleb’ laj Lamanita chi josq’o’k rik’ineb’ laj Nefita. Li rey sa’ xb’eeneb’ laj Lamanita kixye re chixjunileb’ laj Lamanita naq te’xkawresi rib’ re pleetik rik’ineb’ laj Nefita.
Li rey kixk’oxla naq chaab’il laj Amalikiah. Kixk’e laj Amalikiah choq’ jun aj taqlanel sa’ xb’eeneb’ li teep aj pleet reheb’ laj Lamanita. A’b’an laj Amalikiah toj kiraj xkomon chik li wankilal.
Laj Amalikiah kixk’uub’ chan ru taajolominq sa’ xb’eeneb’ laj Lamanita. A’an ki’ok choq’ aj jolominel sa’ xb’een chixjunil li teep aj pleet aj Lamanita. Chirix a’an kixk’eheb’ lix moos chixkamsinkil li rey ut chi tik’ti’ik chirix ani kikamsink re.
Laj Amalikiah kixpak’ xjosq’il xb’aan xkamik li rey. Eb’ laj Lamanita ke’xk’oxla naq chaab’il laj Amalikiah. A’an kisumla rik’in li rixaqil li rey ut ki’ok choq’ li ak’ rey. Kiraj ajwi’ awa’b’ejink sa’ xb’eeneb’ laj Nefita. A’an kixhob’eb’ laj Nefita re naq eb’ laj Lamanita te’josq’o’q rik’ineb’. Naab’aleb’ laj Lamanita ke’raj chik xpleetinkileb’.
Naq laj Amalikiah yoo chixtawb’al xwankilal rik’in tik’ti’ik, laj Moroni yoo chixkawresinkileb’ laj Nefita re naq te’xpaab’ li Dios. A’an kixk’e li eetalil re ach’ab’aak sa’ xb’een li junjunq chi najt xteramil kab’l sa’ li ch’och’ re xjultikankileb’ re lix yeechi’ihomeb’. Eb’ lix teep aj pleet aj Moroni ke’xkawresiheb’ ajwi’ laj Nefita choq’ re li pleet. Ke’xyiib’eb’ li xaqxookil tz’ak ut ke’xb’ekeb’ li jul re xkolb’aleb’ rix ut xkawob’resinkileb’ li tenamit.
Naq ke’chal laj Lamanita re pleetik, ink’a’ ke’ru chi ok sa’eb’ li tenamit aj Nefita. Ke’rame’ xb’aaneb’ li xaqxookil tz’ak ut jul li ke’kawresiik xb’aaneb’ lix teep aj pleet aj Moroni. Ke’kam naab’aleb’ laj Lamanita naq ke’xpleetiheb’ laj Nefita. Kijosq’o’ chi us laj Amalikiah. Kixyeechi’i naq tixkamsi laj Moroni.
Eb’ laj Nefita ke’xb’antioxi re li Dios naq xtenq’aheb’ ut xkoleb’ rix. Ke’xkawob’resiheb’ wi’chik li tenamit ut ke’xyiib’ xkomoneb’ chik li tenamit. Toj yooq li pleet rik’ineb’ laj Lamanita, a’b’an li Dios kixtenq’a laj Moroni ut eb’ lix teep aj pleet chixkolb’aleb’ rix laj Nefita. Ke’saho’ xch’ool laj Nefita. Ke’ab’in chiru li Dios ut ke’kana chi tiik chixpaab’ankil.