Laj Jared ut lix junkab’al

Jun b’eenik b’eresinb’il xb’aan li Qaawa’

yoo chi kab’laak jun najt xteramil kab’l, ut laj Jared ut li ras neke’rileb’ li kristiaan li neke’wech’ok chixk’atq

Laj Jared ut lix junkab’al ke’wan rochoch aran Babel k’iila mil chihab’ chaq ma nayo’la li Jesukristo. Ke’ab’in chiru li Qaawa’. A’b’an lix k’ihaleb’ li kristiaan aran Babel ink’a’ neke’ab’in chiru li Qaawa’. Li kristiaan a’an ke’xtikib’ xkab’lankil jun najt xteramil kab’l re naq te’wulaq sa’ choxa. Li Qaawa’ kixjal li raatinob’aaleb’ li kristiaan re naq ink’a’ chik te’xtaw ru chiribʼilebʼ ribʼ.

Genesis 11:4–9; Eter 1:33

li ras laj Jared natijok, ut laj Jared na’ilok wan wi’ li tenamit

Laj Jared wan jun li ras. Li Qaawa’ kixpaab’ re li ras laj Jared. Laj Jared kixpatz’ re li ras naq taatijoq chiru li Qaawa’ re xpatz’b’al xtenq’. Sa’ lix tij, li ras laj Jared kixpatz’ re li Qaawa’ naq ink’a’ tixjal li raatinob’aaleb’ lix junkab’al ut li ramiiw. Chi jo’kan naq toj te’ruuq chixtawb’al ru chirib’ileb’ rib’.

Eter 1:33–36

laj Jared ut li ras neke’aatinak rik’in lix junkab’aleb’

Li Qaawa’ chaab’il xch’ool ut aj rahonel. Ink’a’ kixjal li raatinob’aaleb’ lix junkab’al ut li ramiiw laj Jared. Moqon, li Qaawa’ kixye re li ras laj Jared naq ak xkawresi jun ch’och’ sik’b’il ru choq’ reheb’. Li Qaawa’ kixye naq tixk’ameb’ xb’e toj aran.

Eter 1:35–42

laj Jared, li ras, ut eb’ li junkab’al neke’el chaq sa’ li tenamit, ut neke’xk’ameb’ naab’aleb’ li xul chirixeb’

Laj Jared ut li ras ke’xch’utub’eb’ lix junkab’aleb’ ut li ramiiweb’. Ke’xch’utub’eb’ ajwi’ lix xuleb’ ut li jar paay chi iyaj. Ke’el chaq sa’ rochocheb’ ut ke’b’eek chiru li yamyookil ch’och’. Li Qaawa’ kixk’ameb’ xb’e chalen chaq sa’ jun choql.

Eter 1:40–43; 2:1–6

eb’ li junkab’al neke’wulak chire li palaw

Chirix jun najtil b’eenik, ke’wulak chire li palaw. Ke’wan chire li palaw chiru kaahib’ chihab’. Ke’nume’ k’iila kutan, ut li ras laj Jared ink’a’ yoo chi tijok chiru li Qaawa’.

Eter 2:13–14

Li Qaawa’ kixye re li ras laj Jared naq taatijoq wi’chik. Li ras laj Jared kixjal xk’a’uxl ut kitijok chiru li Qaawa’. Li Qaawa’ kixkuy xmaak.

Eter 2:14–15

li ras laj Jared naxyiib’ jun ch’ina jukub’

Li Qaawa’ kixk’ut chiru li ras laj Jared chan ru xyiib’ankileb’ li jukubʼ. Eb’ li junkab’al te’ruuq chixq’axb’al ru li palaw sa’eb’ li jukub’ toj sa’ li yeechi’inb’il ch’och’.

Eter 2:15–17

li ras laj Jared narileb’ li jukub’, eb’ li muheb’aal t’ikr, ut li palaw

Li ras laj Jared ut lix junkb’al ke’xyiib’eb’ li jukub’. A’an kixk’e reetal naq maak’a’ li saqen chi sa’. Kixpatz’ re li Qaawa’ ma tento te’xq’ax ru li palaw sa’ q’ojyin. Li Qaawa’ kixye re li ras laj Jared naq tixk’oxla chan raj ru taawanq saqen sa’eb’ li jukub’.

Eter 2:16–19, 22–25

na’ilman li Jesukristo chi b’ayatq, ut li ruq’ ye’b’il chixch’e’b’aleb’ li pek wankeb’ sa’ ruq’ li ras laj Jared

Li ras laj Jared kixyiib’ 16 chi kok’ pek lemeb’ ru. Kixpatz’ re li Qaawa’ naq tixch’e’eb’ re naq te’ok chi lemtz’unk. Li Qaawa’ kixye’ ru’uj li ruq’ ut kixch’e’eb’ li pek chixjunjunqaleb’. Li ras laj Jared kiru chirilb’al ru’uj ruq’ li Qaawa’. A’an kisach xch’ool naq li Qaawa’ wan xxaqalil chanchan li re a’an.

Eter 3:1–8

li Jesukristo na’aatinak rik’in li ras laj Jared

Li Qaawa’ kixye naq nim xpaab’aal li ras laj Jared. Toja’ naq kixk’utb’esi rib’ li Qaawa’ ut kixk’ut lix musiq’ejil xaqalil chiru li ras laj Jared. “Laa’in li Jesukristo,” chan li Qaawa’. Kixye naq sik’b’il chaq ru re wank jo’ li Kolonel. A’an kixk’ut naab’aleb’ chik li na’leb’ chiru li ras laj Jared.

Eter 3:9–20, 25–27

li ras laj Jared natz’iib’ak, ut wankeb’ li pek sa’ jun sek’ chixk’atq

Li ras laj Jared kiq’aj rik’ineb’ lix junkab’al ut li ramiiw. A’an kixtz’iib’a li na’leb’ kixtzol rik’in li Qaawa’. Kixk’eheb’ ajwi’ li pek sa’eb’ li jukub’. Anajwan chik wanqeb’ xsaqen choq’ re xb’eenikeb’.

Eter 4:1; 6:2–3

eb’ li jukub’ neke’xik sa’ xb’een li palaw sa’ li kaq-sut-iq’

Eb’ li junkab’al ke’ok sa’eb’ li jukub’ re xq’axb’al ru li palaw. Ke’xpaab’ naq te’ile’q xb’aan li Qaawa’. Ke’xnumsiheb’ li kaq-sut-iq’ ut eb’ lix b’oolam li palaw. Wan naq, ke’sub’e li jukub’ rub’el li ha’. A’b’an ke’tijok, ut li Qaawa’ kixtaqsiheb’ wi’chik toj sa’ xb’een li ha’. Ke’xb’icha naab’aleb’ li b’ich re b’antioxink chiru li Qaawa’.

Eter 6:4–10

laj Jared, li ras, ut eb’ lix junkab’al neke’wulak sa’ jun ak’ ch’och’

Chirix xnumik tana jun chihab’, ke’wulak sa’ li ch’och’ yeechi’inb’il reheb’ xb’aan li Qaawa’. Ke’yaab’ak xb’aan xsahileb’ xch’ool ut ke’b’antioxin chiru a’an.

Eter 6:11–12