Li profeet aj Nefi

Xk’ulb’al nimla wankilal rik’in li Qaawa’

eb’ laj Nefita chaab’il xt’ikreb’ neke’elq’ak ut neke’reetz’uheb’ li kristiaan

Li chʼuut rehebʼ laj elqʼ re laj Gadianton ke’xjolomi li tenamit Tzarahemla. Ke’ok sa’ aatin naq te’xtenq’a rib’ chirib’ileb’ rib’ chixb’aanunkil li k’a’ru ink’a’ us. Ke’maq’ok ut ke’xrahob’tesiheb’ li kristiaan re xtawb’al tumin ut wankilal. Lix k’ihaleb’ li kristiaan ke’xjunaji rib’ rik’ineb’ laj elq’. Ke’raj b’ihomo’k.

Helaman 6:15–24, 38–39; 7:4–5

laj Nefi nawiq’la sa’ lix najt xteramil kab’l ut natijok, ut jun aj Nefita naxka’ya rik’in josq’il

Li profeet aj Nefi kiwan rochoch aran Tzarahemla. Laj Nefi kitijok chiru li Dios xb’aan naq ra xch’ool naq li kristiaan ink’a’ neke’xtaaqe lix taqlahom li Dios. Laj Nefi kixtz’aama chiruheb’ li kristiaan naq taajultiko’q reheb’ chixjunil li xb’aanuhom li Dios choq’ reheb’. A’b’an moko ke’ab’in ta li kristiaan. Jwal ke’xk’oxla li tumin ut li wankilal chiru li ab’ink chiru li Dios.

Helaman 7:1–22

laj Nefi na’aatinak rik’ineb’ laj Nefita sa’ chaq li najt xteramil kab’l, ut li kristiaan neke’xjap re chiru a’an.

Laj Nefi kixtijeb’ li kristiaan chirixeb’ laj elq’. Kixye naq tento te’xjal xk’a’uxl. Wankeb’ aj raqol aatin aj Nefita li ak neke’xjunaji rib’ rik’ineb’ laj elq’. Ke’josq’o’ rik’in laj Nefi ut ke’xye naq tik’ti’ li naxye. Ke’raj naq te’josq’o’q ajwi’ li kristiaan rik’in laj Nefi.

Helaman 7:22–29; 8:1–7

laj Nefi na’aatinak ut nareek’asi li ruq’

Laj Nefi kixye naq li Dios naab’al naxye reheb’ lix profeet. Laj Nefi kixye reheb’ naq chixjunileb’ li profeet ke’k’utuk chirix lix chalik li Jesukristo. Kixye naq eb’ li profeet ke’xtijeb’ li kristiaan naq Jerusalen taasachmanq wi ink’a’ te’xjal xk’a’uxl. Kixk’eheb’ chixjultikankil naq sachenaq chik Jerusalen.

Helaman 8:11–25

laj Nefi na’aatinak rik’ineb’ laj Nefita, ut li kristiaan neke’rab’i

Wulajaq chik, eb’ laj raqol aatin ke’xyal xb’alaq’inkil laj Nefi rik’in k’iila patz’om. Laj Nefi kixye resil li maa’usilal wankeb’ wi’. Ke’wan li kristiaan li ke’xpaab’ laj Nefi ut ke’xnaw naq a’an jun profeet.

Helaman 9:19–41

Ke’wan chik li ink’a’ ke’paab’an. Li kristiaan ke’xwech’ rib’ chirib’ileb’ rib’, toja’ naq ke’xchap xb’e. Laj Nefi kik’oxlak chirix li na’leb’ kixk’ut li Qaawa’ chiru. Ra xch’ool xb’aan naq maa’useb’ lix b’aanuhomeb’ li kristiaan.

Helaman 10:1–3

laj Nefi nawiq’la ut natijok, ut li saqen nalemtz’un sa’ xb’een

Li Qaawa’ kiraatina laj Nefi. Sa xch’ool xb’aan naq laj Nefi xk’e xch’ool chi k’utuk chiru li tenamit. Sa’ xk’ab’a’ xtiikilal laj Nefi chi paab’ank, li Qaawa’ kixk’e nimla wankilal re sa’ xb’een li k’a’ru wan sa’ ch’och’ ut sa’ choxa. Li Qaawa’ naxnaw naq laj Nefi ka’ajwi’ taaroksi li wankilal a’an re xtenq’ankileb’ li kristiaan chixjalb’aleb’ xk’a’uxl.

Helaman 10:3–12

laj Nefi na’aatinak rik’ineb’ laj Nefita, ut li kristiaan neke’xtz’eqtaana malaj neke’xka’ya rik’in josq’il

Li Qaawa’ kixye re laj Nefi naq taaq’ajq rik’ineb’ li tenamit ut naq tixye reheb’ naq te’xjal xk’a’uxleb’. Laj Nefi kiq’aj sa’ aanil. A’b’an ke’josq’o’ li kristiaan rik’in, ut ink’a’ ke’ab’in.

Helaman 10:11–15

eb’ laj k’aak’alenel tenamit neke’xsik’ laj Nefi, ut laj Nefi na’el chiruheb’

Ke’xyal xtz’apb’al laj Nefi sa’ tz’alam. A’b’an lix Musiq’ li Dios kixtenq’a laj Nefi chi eelelik.

Helaman 10:15–17

laj Nefi na’ilok wan wi’ jun tenamit yoo chi k’atk

Laj Nefi toj kixk’ut li raatin li Dios. Ink’a’ ke’ab’in li kristiaan. Ke’ok chixwech’b’al rib’ chirib’ileb’ rib’. Kiniman li wech’ok-ib’ xmaakeb’ laj elq’. Ink’a’ k’iila hoonal kiraj naq ak neke’laje’pleetik sa’ li junjunq chi tenamit. Ke’wan naab’al li ke’rahob’tesiik malaj li ke’kamsiik. Ra xch’ool laj Nefi. Ink’a’ kiraj naq taa’oso’q li tenamit xmaak li pleetik.

Helaman 10:17–18; 11:1–4

li ch’och’ chaqi, maak’a’ nak’i, ut maak’a’ ajwi’ li ha’, ut eb’ laj Nefita raheb’ xch’ool ut neke’xtenq’a rib’ chirib’ileb’ rib’

Laj Nefi kixpatz’ re li Dios naq taawanq jun nimla we’ej re naq taajultiko’q li Qaawa’ reheb’ li kristiaan, ut te’xjal xk’a’uxl. Maak’a’ li hab’ chiru k’iila chihab’. Li ch’och’ kichaqi, ut ink’a’ ke’k’i li awimq. Ke’tz’okaak li kristiaan. Ke’xkanab’ li pleetik ut kijultiko’ wi’chik reheb’ li Qaawa’. Ke’xjal xk’a’uxleb’ ut ke’risiheb’ chaq laj elq’ sa’ xyanqeb’.

Helaman 11:3–7, 9–10

natijok laj Nefi, yoo li hab’, ut eb’ laj Nefita neke’se’ek ut neke’b’antioxin chiru li Dios

Li kristiaan ke’xpatz’ re laj Nefi naq taatijoq chiru li Qaawa’. Laj Nefi kixk’e reetal naq ke’xjal xk’a’uxl ut eb’ laj elq’ ke’el aran. A’an kixpatz’ re li Qaawa’ naq tixtaqla li hab’. Li Qaawa’ kixsume lix tij laj Nefi. Kichal li hab’, ke’ok chi k’iik li awimq. Li kristiaan ke’b’antioxin chiru li Dios. Ke’xnaw naq laj Nefi a’an jun profeet ut naq k’eeb’il nimla wankilal re xb’aan li Dios.

Helaman 11:8–18