“Laj Alma, laj Amulek, ut laj Tzeesrom,” Eb’ li Seraq’ sa’ lix Hu laj Mormon (2023)
Laj Alma, laj Amulek, ut laj Tzeesrom
Xsik’b’al ru xpaab’ankil ut ab’ink chiru li Dios
Laj Alma kixk’e reetal naq wankeb’ li komon re li Iglees li ink’a’ yookeb’ chixpaab’ankileb’ lix taqlahom li Dios. Jo’kan naq laj Alma kixchap xb’e re xjultikankil li raatin li Dios sa’ li junjunq chi tenamit. Ke’wan naab’al li ke’xjal xk’a’uxl. Laj Alma kiwulak sa’ li tenamit Ammonihah. Li tenamit aran ink’a’ ke’ab’in chiru. Ke’xchuub’a ut ke’ralinasi sa’ li tenamit.
Laj Alma kiraho’ xch’ool naq ki’el sa’ li tenamit. Ki’ok xk’a’uxl chirixeb’ li tenamit. Toja’ naq kixk’ut rib’ jun anjel chiru. Li anjel kixye naq naru taasaho’q laj Alma xb’aan naq kixpaab’ li Dios. Li anjel kixye re laj Alma naq taaq’ajq sa’ li tenamit ut tixk’e xtijomeb’. Wi ink’a’ te’xjal xk’a’uxl, te’sache’q. Laj Alma kiq’aj sa’ aanil.
Naq kiwulak laj Alma sa’ li tenamit, q’axal natz’okaak. Ak kixkuy xsa’ chiru naab’al kutan. Laj Alma kixpatz’ xtzakemq rik’in jun winq aj Amulek xk’ab’a’.
Laj Amulek kixye re laj Alma resil jun xk’utb’esinb’il matk’. Sa’ li matk’, jun anjel kixye re laj Amulek naq laj Alma a’an xprofeet li Dios. Laj Amulek kiraj xtenq’ankil laj Alma.
Laj Amulek kixk’am xb’e laj Alma sa’ rochoch ut kixk’e chi wa’ak. Laj Alma kikana sa’ rochoch laj Amulek chiru k’iila kutan. Li Dios kirosob’tesi laj Amulek ut lix junkab’al. Moqon, li Dios kixye re laj Alma ut laj Amulek naq te’xye reheb’ li wankeb’ sa’ li tenamit naq te’xjal xk’a’uxl. Laj Alma ut laj Amulek ke’ab’in chiru. Li Dios kixk’e lix wankil reheb’ re xtenq’ankileb’ chi k’utuk.
Jun reheb’ li ke’ab’in reheb’ chi k’utuk a’an laj Tzeesrom xk’ab’a’. Q’axal seeb’ xna’leb’ ut kiraj xb’alaq’inkil laj Alma ut laj Amulek. Laj Tzeesrom kixye re laj Amulek naq tixk’e re naab’al li tumin wi tixye naq moko yaal ta li Dios. Kiraj naq taatik’ti’iq laj Amulek re naq li tenamit ink’a’ te’xpaab’ lix k’utum laj Amulek ut laj Alma.
Alma 10:29–32; 11:21–25; 12:4–6
A’b’an laj Amulek ink’a’ kiraj tik’ti’ik chirix li Dios. Kixye b’an naq yaal li Dios. Laj Amulek ut laj Alma ke’xnaw k’a’ru xk’oxlahom laj Tzeesrom. Kisach xch’ool laj Tzeesrom ut ki’ok chi patz’ink reheb’. Ke’xk’ut chiru laj Tzeesrom naq wan jun xk’uub’anb’il na’leb’ li Dios choq’ re chixjunileb’. Laj Tzeesrom kixpaab’ li ke’xk’ut laj Alma ut laj Amulek chirix li Dios ut li Jesukristo.
Alma 11:23–46; 12:1–18, 24–34; 14:6–7; 15:6–7
Kiraho’ xch’ool laj Tzeesrom xb’aan li maa’usilal kixb’aanu. Kiyajer. Laj Alma ut laj Amulek ke’rula’ani. Laj Alma kixye naq laj Tzeesrom taaruuq chi k’iraak xb’aan lix paab’aal laj Tzeesrom chirix li Jesus. Laj Alma kixpatz’ re li Dios naq tixk’irtesi. Laj Tzeesrom kixaqli sa’ junpaat. Ak xk’ira chik! Kikub’e xha’ ut kixtzoleb’ li tenamit chiru xnajtil lix yu’am.