Li Jesus narula’ani li tenamit

Xtenq’ankil li junjunq chixpaab’ankil a’an

li junkab’al neke’ilok sa’ choxa, ut eb’ li kristiaan sa’ li tenamit neke’wech’ok

Ke’wan naab’al li kristiaan li ink’a’ ke’raj rab’inkileb’ lix profeet li Dios. A’b’an ke’wan chik li ke’paab’ank re li raatineb’ li profeet. Eb’ li ke’paab’an ke’royb’eniheb’ li reetalil lix kamik li Jesukristo.

3 Nefi 7:16–26; 8:1–4

li raq’ kaaq, li kaq-sut-iq’, li b’uutiha’, li hiik, ut li xam neke’xsach jun tenamit

Chirix naq kikam li Jesus aran Jerusalen, ke’tikla chi k’utmank li eetalil. Sa’ li ch’och’ America, ke’wan li kaq-sut-iq’, li hiik, ut li xam chiru xnumik oxib’ hoor. Ke’sachman li tenamit, ut ke’kamsiik naab’al. Toja’ naq kiwan li aak’ab’ chiru xnumik oxib’ kutan.

3 Nefi 8:5–19, 23

wan junli naxyal xlochb’al li xam, a’b’an ink’a’ naloch ut aak’ab’ ru chixjunil

Jwal pim ru li aakʼabʼ jo’kan naq li kristiaan ink’a’ ke’ru chirilb’al li saq’e, li po, chi moko eb’ li chahim. Ink’a’ ke’ru chixlochb’aleb’ li xam malaj li kandeel.

3 Nefi 8:20–23

toj wan li q’ojyin, eb’ li kristiaan neke’xtenq’a rib’ chirib’ileb’ rib’ sa’ xyanqeb’ li polem kab’l, ut jun kristiaan nayaab’ak ut natijok

Naab’aleb’ li toj yo’yookeb’ jwal raheb’ xch’ool ut neke’xuwak. Ke’yaab’ak ut ke’raho’ xch’ool naq ink’a’ ke’xjal xk’a’uxl sa’ junpaat.

3 Nefi 8:24–25

toj wan li q’ojyin, eb’ li kristiaan neke’ilok sa’ choxa, ut li ani natijok ink’a’ chik yoo chi yaab’ak

Ke’rab’i chi xaqaamil jun xyaab’ kuxej. A’an li Jesus li na’aatinak rik’ineb’. Kixyeechi’i naq tixk’irtesi chixjunileb’ li te’xjal xk’a’uxl. Li Jesus kixye reheb’ naq ak xkam ut xwakli chi yo’yo re xtenq’ankil chixjunileb’ li kristiaan. Jwal ke’sach xch’ooleb’ li kristiaan, jo’kan naq ke’xkanab’ yaab’ak. Kikana chi ch’anch’o li ch’och’ chiru k’iila hoor.

3 Nefi 9; 10:1–2

eb’ li junkab’al neke’chunla ut neke’se’ek sa’ sirso, ut maak’a’ chik li q’ojyin

Li Jesus ki’aatinak wi’chik. Kixye reheb’ li kristiaan naq tixtenq’aheb’ wi te’xtaaqe. Kirisi rib’ li q’ojyin, ut ink’a’ chik nachiq’ok li ch’och’. Li kristiaan ke’saho’ xch’ool ut ke’xnima ru li Jesus.

3 Nefi 10:3–10

naab’aleb’ li kristiaan neke’ch’utla sa’ xsutam li santil ochoch, ut neke’ilok sa’ choxa naq neke’ok chi kutano’k li choql

Jun chihab’ tana chirix a’an, naab’aleb’ li kristiaan ke’wulak sa’ xsutam li santil ochoch aran Naab’alil. Yookeb’ chi aatinak chirix li Jesus ut eb’ li reetalil lix kamik. Naq yookeb’ chi aatinak, ke’rab’i jun li ch’ina xyaab’ kuxej nachal chaq sa’ choxa. Xb’een wa, ink’a’ ke’xtaw ru. Ke’rab’i wi’chik.

3 Nefi 8:5; 10:18; 11:1–4

li Jesukristo nakub’e chaq sa’ choxa, ut saheb’ xch’ool li kristiaan naq neke’xk’ul a’an

Naq ke’rab’i rox sut li xyaab’ kuxej, ke’ilok sa’ choxa. A’an li Choxahil Yuwa’b’ej li yoo chi aatinak. Kixye reheb’ li kristiaan naq te’ril ut te’rab’i li Ralal. Toja’ naq ke’ril chi kub’eek chaq sa’ choxa jun winq jutju saʼ jun saqi bʼaatal.

3 Nefi 11:5–8

li Jesukristo naxaqli sa’ xyanqeb’ li kristiaan, ut eb’ a’an neke’chal rik’in re xch’e’b’al li reetalil li klaawx chiru xsa’ li ruq’

Li winq kixaqli sa’ xyanqeb’ li kristiaan ut kixye, “Laa’in li Jesukristo.” Li kristiaan ke’t’ane’ chi ch’och’. Li Jesus kixye reheb’ naq kixk’ul rahilal ut kikam sa’ xk’ab’a’ chixjunileb’. Kixb’oqeb’ li kristiaan chixch’e’b’al xkʼobʼolal li ruqʼ, li roq, ut xkʼatq lix saʼ, re naq te’xnaw naq a’an laj Kolol re li ruchich’och’.

3 Nefi 11:8–14

li Jesukristo nachunla sa’ li taqlebʼaal toj saʼ li santil ochoch, ut li kristiaan neke’chal rik’in re xch’e’b’aleb’ li reetalil li klaawx chiru xsa’ ruq’

Ke’chal li kristiaan chixjunjunqaleb’ rikin li Jesus. Ke’ril rik’in tz’aqal xsa’ ruheb’ ut ke’xch’e’ rik’in tz’aqal ruq’eb’ xk’ob’olal li ruq’, li roq, ut xk’atq lix sa’. Chixjunileb’ ke’xnaw naq a’an li ani taachalq jo’ yeeb’il chaq xb’aaneb’ li profeet. Ke’xnaw naq a’an laj Kolol re li ruchich’och’. Ke’t’ane’ chiroq li Jesus ut ke’xloq’oni a’an.

3 Nefi 11:15–17